“Nannih cu saya hmanh si awk nan si cang.” (Heb. 5:12) Van le vawlei ah a thiam bik Saya a simi Jehovah nih amah kong midang cawnpiak dingin a kan sawm. Chungkhar, Khrihfabu le lohmun ah Jehovah kong cawnpiak ding timi rian cu a sunglawi tukmi tinvo a si bantukin a biapimi rian zong a si. Mah rian kha zeitindah ṭha tein ṭuan khawh a si?

Lamkaltu Paul nih Timote sin a ṭialmi cakuat ah a phi hmuh khawh a si, hitin a ti: “Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. . . . Nangmah naa khamh hlei ah na bia a theimi kha na khamh khawh hna nakhnga hi thil hi ngol loin tuah lengmang hna.” (1 Tim. 4:13, 16) Khamhnak thawngṭha chim awkah rian nan ngei. Cucaah relnak le cawnpiaknak ah ṭhancho dingin i zuam cu a biapi tuk. Cutin ṭhancho khawh awkah mah brochure nih aan bawmh hna lai. A tanglei ah langhtermi hi zoh hna u sih.

Jehovah cu ‘A Liannganmi Cawnpiaktu’ a si. (Isa. 30:20, NW) Mah brochure nih relnak le cawnpiaknak ah ṭhancho dingin aan bawmh lai nain Jehovah lawnglawng hi biatak hrampi le midang a hnuk khotu a si ti kha philh hlah. (Joh. 6:44) Cucaah thiang thlarau hmuh awkah thlacam zungzal. Baibal kha atu le atu hmang. Nangmah kha si loin Jehovah kha lungthin pekter hna. Pathian kha lungtak tein an dawt nakhnga a ngaitu kha bawm hna.

Minung sinah pekmi a biapi bikmi thawngṭha kong chim awkah sawm nan si. “Pathian pekmi thazaang” kha nan i bochan ahcun hlawhtlinnak nan hmu lai ti kha kan zumh.—1 Pet. 4:11.

Nan rian ṭuanṭi hawi,

Jehovah Tehte Hna i Uktu Bu