1, 2. (a) Pathian i “a sung tukmi a laksawng” ah zeidah aa tel? (b) Hi capar ah zei kong dah kan i ruah hna lai?

JEHOVAH nih a fapa ngeihchunh Jesuh kha vawleicung ah a rak thlahnak thawngin a ngan bikmi dawtnak a langhter. (Johan 3:16; 1 Johan 4:9, 10) Lamkaltu Paul nih mah dawtnak kha ‘a sung tukmi laksawng’ tiah a ti. (2 Kor. 9:15) Paul nih zeicah cutin a ti?

² Jesuh tlanhnak man cu Pathian biakam vialte a tling dih lai tinak ca i aamahkhaan a si kha Paul nih a hngalh. (2 Korin 1:20 rel.) Cucaah Pathian i “a sung tukmi a laksawng” ah Jesuh tlanhnak man lawng si loin Jehovah nih a langhtermi thilṭha vialte le a hmunmi a dawtnak zong aa tel tinak a si. Mah a sunglawi tukmi laksawng kong kha minung thluak in cun tling tein hngalhthiam khawh a si lo. Mah a sunglawi tukmi laksawng nih zeitindah a kan ṭhathnemh awk a si? 2016, March 23, Nithum Ni ah tuah hngami Khrih a thih Philhlonak ca timhtuahnak ah  mah laksawng nih zeitindah a kan forh awk a si?

3, 4. (a) Mi pakhatkhat nih laksawng aan pek tikah zeitindah na um? (b) A sunglawi tukmi laksawng nih na nunnak kha zeitindah a thlen khawh?

³ Mi pakhatkhat nih laksawng a kan pek tikah kan i nuam tuk. Laksawng cheukhat cu man an ngei tuk i kan nunnak hmanh a thlen khawh. Tahchunhnak ah, thilṭhalo tuahnak ah kaa tel ve tiah na mitthlam ah cuanter hmanh. Mah ruangah thih dantatnak naa huah. Asinain nangmah zaka in thih dantatnak a ing hngami pakhat ruahlopi in a rak chuak. Mah pa cu na hngalhmi a si lo, asinain anih cu nangmah ca thih awkah timhcia a si. A sunglawi tukmi mah laksawng nih zeitindah aan umter lai?

⁴ Mah bantuk dawtnak le a sunglawi tukmi laksawng nih na nunnak ah thlennak a umter ko lai. Siannak le dawtnak langhter awk, na lung aan fahtertu hna ngaihthiam awkah mah nih aan forh ko lai. Nangmah caah a nunnak a pemi cungah na nun chung vialte naa lawm ko lai.

5. Pathian pekmi tlanhnak man laksawng cu a dang laksawng hna nakin zeicah a sunlawi deuh?

⁵ Pathian pekmi tlanhnak man laksawng cu tahchunhnak i laksawng nakin a let tampi in a sunglawi deuh. (1 Pit. 3:18) Mah hi ruathmanh: Adam sinin sualnak ro kan co ruangah kan dihlak in thih dantatnak kan i huah. (Rom 5:12) Jehovah nih minung a kan dawt caah Jesuh kha vawlei ah a rak thlah i ‘mi vialte kan caah thihnak’ a inter. (Heb. 2:9) Jesuh tlanhnak man nih thihnak kha zungzal ca in a hrawh lai. (Isa. 25:7, 8; 1 Kor. 15:22, 26) Jesuh a zummi paoh cu vancung ah Khrih he siangpahrang in siseh, vawleicung ah Pathian Pennak uknak tangah a ummi in siseh, dai tein le nuam tein zungzal an nung lai. (Rom 6:23; Biat. 5:9, 10) Jehovah pekmi laksawng ah zei thluachuah hna dah aa tel?

6. (a) Jehovah pekmi laksawng thawngin hmuh laimi zei thluachuah hna dah naa ngaih? (b) Pathian pekmi laksawng nih zei thil pathum tuah awkah dah a kan forh lai?

⁶ Pathian pekmi laksawng ah zawtnak vialte damter, vawlei paradis ah canter le mithi thawhter hna aa tel. (Isa. 33:24; 35:5, 6; Johan 5:28, 29) ‘A sung tukmi laksawng’ an kan pek caah Jehovah le Jesuh kha kan dawt tuk hna. Mah laksawng nih zei tuah awkah dah a kan forh? (1) Jesuh Khrih kha naih tein i zohchunh awk, (2) unau pawl dawt awk le (3) midang kha lungtak tein ngaihthiam awkah a kan forh lai.

7, 8. Khrih dawtnak nih zei tuah awkah dah a kan forh awk a si?

⁷ Pakhatnak ah, Jesuh a thangṭhatmi lam in nun awkah a kan forh awk a si. Lamkaltu Paul nih “Khrih nih kan ca i a ngeihmi dawtnak nih cun a kan uk” tiah a ti. (2 Korin 5:14, 15 rel.) Jesuh dawtnak kha ṭha tein kan hngalhthiam ahcun Jesuh dawt awk le thangṭhat awkah a kan forh lai ti kha Paul nih a hngalh. Jehovah nih kan ca i a tuahmi thil hna le a dawtnak kha ṭha tein kan hngalhthiam ahcun Jesuh a thangṭhatmi lam in nun awkah a kan forh lai. Cutin nun kan duh kha zeitindah kan langhter khawh?

⁸ Jehovah dawtnak nih Jesuh kha naih tein i zohchunh awkah a kan forh lai. (1 Pit. 2:21; 1 Johan 2:6) Pathian le Khrih kha  an nawl kan ngaih hnanak thawngin kan dawtnak kan langhter khawh. Jesuh nih hitin a ti: “Ka nawlbia kha a cohlang i a zulmi paoh cu keimah a ka dawmi kha an si. A ka dawmi cu ka Pa nih a dawt ve hna lai; kei zong nih ka dawt ve hna lai i an sinah kaa phuang lai.”—Johan 14:21; 1 Johan 5:3.

9. Zei bantuk hneknak hna dah kan ton?

⁹ Ruahnolhnak caan chungah kan nunning kha ṭha tein kan i dothlat awk a si. Cucaah hitin i hal: ‘Zei kong hna ah dah Jesuh kha kaa zohchunh? Zei zawn ah dah ṭhancho ka herh rih?’ Vawlei mi hna nunning in nun ve awkah hneknak kan ton lengmang caah cutin i hal cu a biapi tuk. (Rom 12:2) Kan i ralrin lo ahcun vawlei lei mifim mi hna, minthangmi hna le zaang lentecelhnak ah a min a thangmi hna kha kan hun i zohchunh khawh hna. (Kol. 2:8; 1 Johan 2:15-17) Mah hneknak hna kha zeitindah kan doh khawh?

10. Ruahnolhnak caan chungah zei bia dah kan i hal awk a si, zei tuah awkah dah a kan forh awk a si? (A hramthawknak hmanthlak zoh.)

¹⁰ Kan thilhrukning, kan zohmi video, kan ngaihmi hla hna lengah computer, cell phone le tablet ah kan rawnmi hna kha Ruahnolhnak caan chungah a caan pe in ṭha tein kan check awk a si. Hitin i hal: ‘Jesuh hi ka pawngah um sehlaw ka thilhrukning he aa tlaiin ka ning a zak hnga maw?’ (1 Timote 2:9, 10 rel.) ‘Ka thilhrukning nih Khrih zultu ka si kha a langhter maw? Ka zohmi video hi Jesuh nih zoh a duh lai maw? Ka ngaihmi hla hi tah ngaih a duh lai maw? Jesuh nih ka phone asiloah tablet hi i hlan sehlaw pakhatkhat a hmuh sual lai tiah ka thin a phang lai maw? Kaa celhmi game hi zei ruangah dah ka duh ti kha Jesuh sin chim awkah kaa harh lai maw?’ Zeitluk a man a fakmi a si hmanhah Khrihfa pakhat ca i aa tlak lomi zei thil paoh hlonh awkah Jehovah kan dawtnak nih a kan forh awk a si. (Lam. 19:19, 20) Jehovah sin kan i pumpek lioah Khrih a thangṭhatmi lam in nun awkah bia kan i kam. Cucaah Jesuh i zohchunh awkah a harter khomi zei thil hmanh kan tlaihchan awk a si lo.—Matt. 5:29, 30; Fil. 4:8.

11. (a) Jehovah le Jesuh kan dawt hnanak nih phungchim rian ah zeitindah a kan forh? (b) Dawtnak nih Khrihfabu i midang bawmh awkah zeitindah a kan forh khawh?

¹¹ Jesuh kan dawtnak nih lungtho tein phungchim awk le cawnpiak awkah a kan forh. (Matt. 28:19, 20; Luka 4:43) Ruahnolhnak caan chungah suimilam 30 asiloah 50 in manhcaan hmaikal ṭuan awkah na caan na suai kho lai maw? Kum 84 a si cangmi pahmei pakhat nih a kumkhua le a ngandamnak ruangah manhcaan hmaikal ka ṭuan kho lai lo tiah a ruah. Asinain an Khrihfabu i hmaikal pawl nih an bawmh. Umkalnak le aa tlakmi lohmun kha an timhtuahpiak. Mah ruangah suimilam 30 in manhcaan hmaikal a ṭuan kho. Nangtah nan Khrihfabu i unau pakhatkhat kha March asiloah April thla i manhcaan hmaikal ṭuan awkah na bawm kho lai maw? Mikip nih hmaikal ṭuan khawh a si lo ti cu a hmaan ko, asinain kan caan le kan thazaang kha Jehovah rianṭuannak ah tam deuh in kan hman khawh ko. Cutin kan tuah ahcun Jesuh dawtnak nih a kan forh kha Paul bantukin kan langhter khawh lai. Pathian dawtnak nih zei tuah awkah dah a kan forh rih lai?

12. Pathian dawtnak nih zei tuah awkah dah a kan forh?

¹² Pahnihnak ah, Pathian dawtnak nih kan unau pawl dawt awkah a kan forh awk a  si. Lamkaltu Johan nih hitin a ṭial: “Ka fale hna, hihi Pathian nih a kan dawtning a si ahcun kannih zong pakhat le pakhat kan i dawt ve awk a si.” (1 Johan 4:7-11) Cucaah Pathian dawtnak ṭha tein kan hngalhthiam ahcun unau pawl kan dawt hna a hau. (1 Johan 3:16) Kan dawtnak kha zeitindah kan langhter khawh?

13. Midang cung dawtnak langhternak he aa tlaiin Jesuh nih zei zohchunh awk dah a chiah?

¹³ Zeitindah midang kan dawt khawh hna ti kha Jesuh nih zohchunh awk ṭha a chiah. Vawleicung a um lioah mi kha a bawmh hna, a hleiin aa toidormi kha a bawmh hna. A zawmi, a ke a beimi, a mit a cawmi, a hna a chetmi le a holh kho lomi kha a damter hna. (Matt. 11:4, 5) Biaknaklei hruaitu hna he i lo loin Jesuh nih mi pawl kha biatak cawnpiak a duh hna. (Johan 7:49) Aa toidormi kha a dawt hna i anmah bawmh awkah fakpi in rian a ṭuan.—Matt. 20:28.

14. Unau dawtnak langhter awkah zeidah na tuah khawh?

¹⁴ Nan Khrihfabu chung i unau pawl, a hleiin kum upa pawl kha zeitindah ka bawmh khawh hna tiah Ruahnolhnak caan chungah a caan pe in na ruah awk a si. An sinah na leng kho hna lai maw? Ei awk na put kho hna lai maw? Inn rian na bawm kho hna lai maw? An i pumh khawh nakhnga umkalnak ah na bawm kho hna lai maw? Phungchim kalṭi awkah na sawm kho hna lai maw? (Luka 14:12-14 rel.) Pathian dawtnak nih unau pawl dawt awkah in forh seh.

15. Zeidah hngalhthiam a herh?

¹⁵ Pathumnak ah, Jehovah dawtnak nih unau pawl ngaihthiam awkah a kan forh. Kan dihlak in Adam sinin sualnak le thihnak ro kan co caah “Kei cu tlanhnak man ka herh lo” tiah a ti khomi ahohmanh kan um lo. Zumhfekmi Pathian salle hmanh nih tlanhnak man an herh. Kan dihlak in kan ngeihmi leiba nganpi ngaihthiam kan si ti kha hngalhthiam a hau. Mah cu zeicah a biapit? Jesuh chimmi bianabia pakhat ah a phi hmuh khawh a si.

16, 17. Jesuh chimmi bianabia in zeidah kan i cawn khawh?

¹⁶ Tangka talent thonghra [denarii 60,000,000] leiba a ngeimi a salpa a ngaithiammi siangpahrang pa kong Jesuh nih a chim. Asinain mah sal nih tangka talent 100 a bami a salhawi kha a ngaithiam lo. Siangpahrang pa ngeihmi zaangfahnak nih a salhawi ngaihthiam awkah a forh awk a si. A salpa nih a salhawi leiba tlawmte a ngaithiam lo ti kha siangpahrang pa nih a hngalh tikah a thin a hung tuk. Cucaah hitin a ti: “Sal ṭhalo, na ka nawl caah na ka batmi vialte kaan ngaihthiam dih. Na cung i zaangfahnak ka ngeih bantukin pei na salhawi cungah na ngeih ve  awk a si cu.” (Matt. 18:23-35) Mah siangpahrang bantukin Jehovah nih kan leiba nganpi kha a kan ngaihthiam. Jehovah dawtnak le zaangfahnak nih zei tuah awkah dah a kan forh awk a si?

¹⁷ Ruahnolhnak ca kan i timhtuah tikah hitin kan i hal awk a si: ‘Unau pakhatkhat ruangah ka thin a hung maw? Ngaihthiam awkah kaa harh maw?’ Cutin a si ahcun ‘ngaihthiam awkah timhcia’ a simi Jehovah i zohchunh khawhnak caanṭha a si. (Neh. 9:17; Salm 86:5, NW) Jehovah langhtermi zaangfahnak kha kan sunsak ahcun midang cungah zaangfahnak kan langhter ve lai i lungtak in kan ngaihthiam hna lai. Unau kan dawt hna lo i kan ngaihthiam hna lo ahcun Jehovah dawtnak le ngaihthiamnak kha kan i ruahchan kho lai lo. (Matt. 6:14, 15) Midang kan ngaihthiam hna ti tikah a hlan i thil sining cu aa thleng hlei lai lo nain hmailei ca tu ah cun ṭhatnak a chuak ko lai.

18. Pathian dawtnak nih midang tlinlonak ngaihthiam awkah unaunu pakhat kha zeitindah a bawmh?

¹⁸ Unau an tlinlonak ngaihthiam peng cu a fawi lai lo. (Efesa 4:32; Kolose 3:13, 14 rel.) Tahchunhnak ah, unaunu Lily ^[1] nih nuhmei a simi unaunu Carol kha a bawmh. Carol nih kal a duhnak hmun paohah a thlah, a herhmi thil a cawkpiak i a dang lam tampi zongin a bawmh. Lily nih cutin a bawmh ko nain Carol cu a phunzai peng i zeitikhmanh ah a lung a tling bal lo. Pehtlaih a har tuk. Asinain Lily nih Carol i a ṭhatnak kha a hmuhpiak. Carol a zawt a zual i a thih hlan tiang kum tampi chung a rak bawmh. Lily nih hitin a chim: “Carol a thawhṭhan lai kha kaa ngaih tuk. Mitling a hung si tik i a kong kha hngalh ka duh rih.” Pathian dawtnak nih unau pawl cung dawtnak langhter awk le minung kan tlinlonak zungzal in hrawh a si lai caan hngah awkah a kan forh lai.

19. Pathian i “a sung tukmi a laksawng” nih zei tuah awk dah aan forh?

¹⁹ Jehovah nih “a sung tukmi a laksawng” a kan pek ti cu a fiang ko. Mah laksawng kha sunsak zungzal hna u sih. Ruahnolhnak caan cu Jehovah le Jesuh nih an kan tuahpiakmi vialte ṭha tein ruah awkah aa tlak bikmi caan a si. Jehovah le Jesuh an dawtnak nih Jesuh Khrih kha naih tein i zohchunh awk, unau pawl dawt awk le lungtak in midang ngaihthiam awkah kan forh ko seh.