1, 2. (a) Kan chan he aa tlaiin Jehovah nih zeidah a rak chimchung? (b) Hi capar ah zei kong dah kan i ruah hna lai? (A hramthawknak hmanthlak zoh.)

JEHOVAH nih kan chan he aa tlaiin hitin a chim: “Khi caan ah cun holh phun kip a hmangmi miphun kip chungin mi pahra nih Judah mi pakhat kha a puan in an i tlaih lai i, ‘Pathian cu na sinah a um ti kha kan theih caah na sinah kan kal ko lai,’ tiah an ti lai.” (Zekh. 8:23) “Judah mi” nih thiang thlarau in chiti thuh a simi hna kha a aiawh hna. Annih cu “Pathian Israel miphun” ti zongin auh an si. (Gal. 6:16, NW) “Mi pahra” timi nih vawleicung ah zungzal nun ding ruahchannak a ngeimi hna kha a aiawh hna. Annih nih chiti thuhmi cu Jehovah nih thluachuah a pek hna ti kha an hngalh caah anmah he Jehovah biakṭi kha an sunsak.

² Profet Zekhariah bantukin Jesuh nih Pathian miphun i an lung aa rualnak kong kha a chim. Vancung ruahchannak a ngeimi kha “tuurun hmete” in le vawlei ruahchannak a ngeimi kha “tuu dang” in a langhter hna. Asinain an phuhnih in “tuurun runkhat” an si lai i “tuukhal pakhat” hnu kha an zul lai tiah Jesuh nih a chim. (Luka 12:32; Johan 10:16) Phu pahnih an um caah mi cheukhat nih hitin an ruah  men lai: (1) Tuchan chiti thuhmi dihlak i an min kha tuu dang nih hngalh a hau maw? (2) Chiti thuhmi hna nih anmahle anmah kha zeitindah an i hmuh awk a si? (3) Khrihfabu chung i pakhatkhat nih Ruahnolhnak ah mitsurhang le changreu a hun hman tikah zeitindah ka pehtlaih awk a si? (4) Ruahnolhnak ah mitsurhang le changreu a hmangmi milu an karh ahcun lungretheih awk a si maw? Mah kong hna kha hi capar ah kan i ruah hna lai.

3. 144,000 ah ahote dah aa tel lai ti kha zeicah fiang tein hngalh khawh a si lo?

³ Tuchan chiti thuhmi dihlak i an min kha tuu dang nih hngalh a hau maw? A hau lo. Zeicah? Annih nih vancung an laksawng an hmu lai maw, hmu lai lo ti kha fiang tein hngalh khawh a si lo caah a si. ^[1] Vancung kai awkah Pathain nih a sawm ko hna nain zumhfek tein an um lawngah an laksawng cu an hmuh lai. Mah kha Satan nih a hngalh i anmah “hlen” awkah “nal profet” a hman hna. (Matt. 24:24) Jehovah nih zumhfekmi in bia a ceih hna hlan tiang an laksawng an hmu lai maw, hmu lai lo ti kha chiti thuhmi hna nih fiang tein an hngal kho lo. An thih hlan asiloah harnak nganpi aa thawk hlanah Jehovah nih hmanung bik hnatlaknak asiloah hmanung bik hmelchunhnak a pek hna lai. (Biat. 2:10; 7:3, 14) Cucaah 144,000 ah ahote dah aa tel ti hngalh awkah i zuam cu man a ngei lo.

4. Tuchan chiti thuhmi dihlak i an min hngalh khawh a si lo ahcun zeitindah tuu dang cu ‘an sinah an kal’ khawh lai?

⁴ Tuchan chiti thuhmi dihlak i an min hngalh khawh a si lo ahcun zeitindah tuu dang cu ‘an sinah an kal’ khawh lai? “Mi pahra nih Judah mi pakhat kha a puan in an i tlaih lai i, ‘Pathian cu na sinah a um ti kha kan theih caah na sinah kan kal ko lai,’ tiah an ti lai” tiah Baibal nih a ti. Mah Baibal caang ah Judah mi pakhat tiah a ti ko nain mi pakhat nak tam kha a chimduhmi a si. Cucaah Judah mi timi nih mi pakhat lawng si loin chiti thuhmi phu dihlak kha a aiawh. Mah kha tuu dang nih an hngalh caah mah phu he Jehovah an biaṭi i an bawmh hna. Cucaah mah phu ah aa telmi kip i an min hngalh le pakhat cio i an hnu zulh kha a hau lo. Jesuh cu kan Hruaitu a si i amah hnu lawng zulh awkah Baibal nih a kan fial.—Matt. 23:10.

5. Chiti thuhmi hna nih zei ralrin peknak dah thukpi in an ruah awk a si, zeicah?

⁵ Chiti thuhmi hna nih 1 Korin 11:27-29 i ralrin peknak bia kha thukpi in an ruah awk a si. (Rel.) Chiti thuhmi pakhat nih Jehovah he a ṭhami pehtlaihnak a ngeih lo buin le a cungah zumhawktlak lo a si buin mitsurhang le changreu a hman ahcun ‘aa tlak lo buin’ a hmanmi le Pathian a upat lomi a si lai. (Heb. 6:4-6; 10:26-29) Mah a biapimi ralrin peknak nih chiti thuhmi hna kha an laksawng hmuh an duh ahcun a dongh tiang  zumhfek tein an um a hau ti a hngalhter hna. Mah an laksawng cu ‘Pathian nih Khrih Jesuh thawngin cunglei nunnak i a kawhmi hna hi a si.’—Fil. 3:13-16.

6. Chiti thuhmi hna nih anmahle anmah kha zeitindah an i hmuh awk a si?

⁶ Paul nih chiti thuhmi hna kha hitin a ti hna: “Bawipa rian ṭuan ruang i thong i a tlami keimah nih, Pathian nih aan auhnak hna he aa tlakmi nunning khan nung u tiah kaan forh hna.” Cutin zeitindah an tuah khawh lai? Paul nih hitin a fianter: “Toidornak lungthin ngei u, lungnem le lungsau in um zungzal u. Pakhat le pakhat i bawm u law cuticun nan i dawtnak kha langhter u. Pumkhat sinak, thlarau nih aan pekmi hna kha ngeih peng awkah aan funtu hna daihnak hri khan fek tein i ṭem u.” (Efe. 4:1-3) Jehovah thiang thlarau nih a salle kha i porhlawt loin toidor tein um awkah a bawmh hna. (Kol. 3:12) Cucaah chiti thuhmi hna nih midang nakin kan ṭha deuh tiah an i ruat lo. Jehovah nih midang nakin thiang thlarau tam deuh in a kan pe lo ti kha an hngalh. Midang nakin Baibal biatak kha thuk deuh in kan hngalhthiam ti zongin an i ruat lo. Annih nih anmah ruahnak in mi pakhatkhat kha chiti thuh na si ve i Ruahnolhnak ah mitsurhang le changreu na hman awk a si tiah zeitikhmanh ah an ti lai lo. Mah canah vancung kai dingin mi a sawmtu cu Jehovah lawng a si ti kha toidor tein an cohlan.

7, 8. Chiti thuhmi hna nih zeidah an i ruahchan lo, zeicah?

⁷ Chiti thuhmi hna nih vancung kai ding sawm an simi kha an sunsak tuk ko nain midang nih a hleikhun in pehtlaih lai kha an i ruahchan lo. (Efe. 1:18, 19; Filipi 2:2, 3 rel.) Jehovah nih chiti a thuh hna tikah mikip theih dingin a thanh lo i anmah pakhat cio tu kha thiang thlarau in a hngalhter hna. Cucaah chiti thuh an simi kha mi cheukhat nih an zumh colh lo tikah an khuaruah a har lo. Pathian nih a hleikhunmi rian a kan pek tiah a timi paoh zumh colh lo awkah Baibal nih ralrin a kan pekmi kha an hngalh. (Biat. 2:2) Midang nih lungthin pek lai kha an i ruahchan lo caah chiti thuhmi kan si tiah anmah tein an chim lai lo. A tak ti ahcun mah kong kha mikip sinah an chim lo. Vancung an laksawng kong he aa tlaiin i uangthlar ngai zongin an chim lo.—1 Kor. 1:28, 29; 1 Korin 4:6-8 rel.

⁸ Chiti thuhmi hna nih a hleiin dirhmi phu chungah aa telmi in anmahle anmah an i ruat lo. Chiti thuh a simi hna he lawng i komh, anmah tein phu dirh in Baibal hlathlaiṭi ti bantuk zong an tuah lo. (Gal. 1:15-17) Chiti thuhmi hna nih cutin an tuah ahcun Khrihfabu ah lung i khahlonak hna a chuak lai. Pathian miphun lakah daihnak le lungrualnak a chuahtertu thiang thlarau an ralchanh zong a si lai.—Rom 16:17, 18 rel.

9. Ruahnolhnak i mitsurhang le changreu a hmangmi kan pehtlaih hnaning kha zeicah kan i ralrin awk a si? (“ Dawtnak cu Tla Bulbal in Khua a Sa Lo” timi rinli kulh zoh.)

⁹ Chiti thuhmi unau hna kha zeitindah pehtlaih awk an si? Jesuh nih a zultu hna kha “nan dihlak in u le nau nan si” tiah a ti hna. Hitin a ti chap: “Mahle mah aa ngantermi cu ṭhumh an si lai i mi toi ah aa dormi cu mingan ah ser an si lai.” (Matt. 23:8- 12) Cucaah mi pakhatkhat kha a hleihluat tukin pehtlaih awk a si lo. Chiti thuhmi a si hmanhah cutin pehtlaih awk a si lo. Baibal nih Khrihfa upa pawl i an zumhnak i zohchunh awkah a kan forh ko nain zei bantuk minung hmanh hruaitu in ser awkah a kan fial lo. (Heb. 13:7) Mi cheukhat nih upatnak “a lethnih” in an hmuh awk a si tiah Baibal nih a timi cu a hmaan ko. Asinain mah cu chiti thuh an si ruangah si loin “ṭha tein a hruaitu” an si ruang le “phungchim le cawnpiak i a ṭangmi” an si ruangah a si. (1 Tim. 5:17) Chiti thuhmi hna kha a hleihluat tuk in kan thangṭhat hna i lungthin kan pek hna ahcun siarem loin kan umter hna lai. Mah nakin a ṭhalo deuhmi cu aa porhlawmi kan hun siter khawh hna. (Rom 12:3) Chiti thuhmi Khrihfa hna kha cu bantuk palhnak a tuahter khomi zeithil hmanh tuah kan duh lo.

10. Chiti thuh a simi hna cungah zeitindah upatnak na langhter khawh?

¹⁰ Jehovah nih chiti a thuhmi hna cungah zeitindah upatnak kan langhter khawh? Chiti thuh an sining he aa tlaimi pumpak kong hna kha kan hal hna awk a si lo. Cuticun midang kongkau ah kan i thlak lo. (1 Thes. 4:11; 2 Thes. 3:11) Chiti thuh a simi hna i an nu le an pa, an innchunghawi asiloah an innchungkhar mi hna zong chiti thuh an si ve ko lai tiah kan ruah awk a si lo. Mah thluachuah cu chungkhar he aa pehtlai lo. (1 Thes. 2:12) Chiti thuhmi i a innchunghawi kha a lung a fahter khomi bia kan hal awk a si lo. Tahchunhnak ah, na innchunghawi tel loin vawleicung ah zungzal nun ding kha zeitindah na ruah tiah kan hal hna awk a si lo. Jehovah nih vawlei thar ah “an dihlak in an herhmi kha tling tein” a pek hna lai ti kha kan zumh khawh.—Salm 145:16.

11. Midang faak lonak thawngin zeitindah kanmahle kanmah kan i kilven?

¹¹ Chiti thuhmi hna kha midang nakin a biapi deuhmi bantukin kan pehtlaih hna lo tikah kanmahle kanmah kan i kilvenmi zong a si. Zeitin in dah? Khrihfabu ah “unau aa titermi” an um lai tiah Baibal nih a chim. Annih nih chiti thuh kan si ti hmanhin an chim khawh men. (Gal. 2:4, 5; 1 Johan 2:19) Mah lengah chiti thuh a simi cheukhat zong zumhawktlak loin an hung um kho. (Matt. 25:10-12; 2 Pit. 2:20, 21) Midang faak a hmangmi kan si lo ahcun zeitikhmanh ah minung hnu a zulmi kan si lai lo. Chiti thuhmi an si ah, a min a thangmi an si ah, Jehovah a biaknak a saupi cangmi an si ah, zumhfek tein an um lo tik asiloah Khrihfabu in an chuah tikah anmah ruangah kan zumhnak a tlau lai lo i Jehovah biak ti lo zongin kan um lai lo.—Judah 16.

12, 13. Ruahnolhnak ah mitsurhang le changreu a hmangmi milu he aa tlaiin zeicah lungretheih awk a si lo?

¹² Ruahnolhnak ah mitsurhang le changreu a hmangmi milu an zorchuknak hi kum tampi a si cang. Asinain nai kum hrawngah mitsurhang le changreu a hmangmi cu kumkhat hnu kumkhat an tam chin. Mah he aa tlaiin lungretheih a hau maw? A hau lo. A ruang cheukhat kha atu i ruah hna u sih.

¹³ “Bawipa nih amah ta a simi cu a hngalh ko hna.” (2 Tim. 2:19) Ruahnolhnak  ah mitsurhang le changreu a hmangmi milu a relmi unau hna nih ahote dah chiti thuhmi taktak an si ti kha an hngal kho lo. Cucaah anmahle anmah chiti thuh kan si tiah aa ruat ko nain chiti thuh a si lomi zong mah relmi milu ah an i tel. Tahchunhnak ah, mitsurhang le changreu a hmangmi cheukhat cu a hnuah an hmang ṭhan ti lo. Cheukhat tu cu an lung a hmaan lo caah chiti thuhmi kan si tiah anmahle anmah an i ruahmi a si kho men. Cucaah vawleicung ah chiti thuhmi pa zeizat dah an tang ti kha fiang tein kan hngal kho lo.

14. Harnak nganpi aa thawk tikah vawleicung ah chiti thuhmi pa zeizat dah an taang lai timi he aa tlaiin Baibal nih zeidah a chim?

¹⁴ Chiti thuhmi pawl vancung i lak awk Jesuh a rat tikah annih cu vawleicung hmunkip ah an um lai. Baibal nih hitin a ti: “Muko nganpi cu an tum lai i [Jesuh nih] a vancungmi kha vawlei killi ah a thlah hna lai i vanrang toi khuazakip in a mithim hna kha a pumh hna lai.” (Matt. 24:31) Baibal nih donghnak caan chungah vawleicung ah chiti thuhmi tlawmte lawng an tang cang lai ti zongin a ti. (Biat. 12:17) Asinain harnak nganpi aa thawk tikah an lakin pa zeizat dah an tang lai ti kha cu a chim lo.

15. Jehovah thimmi 144,000 he aa tlaiin zeidah hngalhthiam a herh?

¹⁵ Chiti thuhmi hna kha zeitik ah dah thim ding timi biakhiahnak a tuahtu cu Jehovah a si. (Rom 8:28-30) Jehovah nih Jesuh a thawhṭhan hnuah chiti thuhmi hna kha a thim hna. Kumzabu pakhatnak i Khrihfa hna cu an dihlak  in chiti thuhmi si dawh an si. Mah hnu kumzabu pakhatnak in donghnak caan aa thawk tiang, kum tampi chungah Khrihfa kan si tiah aa timi tam deuh cu Khrihfa deu an si. Jesuh nih annih kha “belh” he a tahchunh hna. Asinain mah caan chungah zumhfekmi cheukhat kha Jehovah nih chiti a thuh rih hna. Annih cu Jesuh nih a chimmi “rawl kung” kha an si. (Matt. 13:24-30) Donghnak caan chung zongah Jehovah nih 144,000 i aa telmi hna kha a thim thluahmah rih hna. ^[2] Donghnak a phanh hlante ah Jehovah nih mi cheukhat kha thim awkah bia a khiah ahcun zeicah kan phunzai awk a si lo? (Isa. 45:9; Dan. 4:35; Rom 9:11, 16 rel.) ^[3] Zanlei sang in rian a hung ṭuanmi hna kha dum ngeitu nih midang bantukin a pehtlaih hna ruangah a phunzaimi rianṭuantu pawl bantukin lehrulh lo awkah kan i ralrin a hau.—Matt. 20:8-15 rel.

16. Jehovah nih a miphun pawl rawl a dangh hnaning in zeidah kan hngalh?

¹⁶ Vancung ruahchannak a ngeimi vialte cu “zumhawk a tlakmi le a fimmi sal” ah an i tel lo. (Matt. 24:45-47) Kumzabu pakhatnak lio bantukin tuchan zongah Jehovah le Jesuh nih mi tampi rawl pek awk asiloah cawnpiak awkah mi tlawmte kha an hman hna. Kumzabu pakhatnak ah Khrihfa Greek Baibal ṭial awkah chiti thuhmi tlawmte lawng hman an rak si. Tuchan zongah Pathian miphun ‘a caan hmaan tein rawl petu dingah’ chiti thuhmi Khrihfa tlawmte lawng rian pek an si.

17. Hi capar in zeidah na hngalh?

¹⁷ Hi capar in zeidah kan hngalh? Jehovah nih langhternak “Judah mi” kha vancung nunnak pek awk le langhternak “mi pahra” kha vawleicung nunnak pek awkah bia a khiah. Asinain an phuhnih in a halmi hna cu aa khat. An phuhnih in zumhawktlak tein an um lai i an i toidor lai. Khrihfabu ah daihnak le lungrualnak a um nakhnga hmunkhat te ah rian an ṭuanṭi lai. Donghnak caan kan naih thluahmah bantukin Khrih lamhruainak tangah tuu run runkhat in Jehovah biak zungzal awkah bia khiak hna u sih.