Mah cu khuacaan thlennak kong he aa tlaiin vawleicung ram komh i hlathlaitu phu hna nih an chimmi bia a si. Minung a kan zohkhenhtu Sertu a um tiah na zumh ahcun hlathlaitu phu nih an chimmi mah bia na theih tikah Pathian nih vawlei kha amah tein aa remh khomi phun in a ser ti kha na hngalh ṭhan men lai.

Asinain mi nih vawlei kha an hrawh tuk caah amah tein aa remh kho ti lo. Mah kong he aa tlaiin Pathian nih thil cheukhat a tuah lai tiah zeicah kan zumh khawh?

Vawlei cu hrawh a si lai lo i a hmun zungzal lai timi kong he aa tlaiin rinli kulh ah langhtermi Baibal caang hna kha i cinken.

• Kan vawlei cu Pathian nih a sermi a si. “Pathian nih van le vawlei ser hram aa thawk tikah.”—Genesis 1:1

• Vawlei cu Pathian ta a si. “Vawlei le a chung i a ummi thil vialte hi BAWIPA ta an si, vawlei le a cung i a ummi minung vialte zong hi amah ta kan si dih.”—Salm 24:1

• Pathian nih vawlei cu zungzal hmun ding in a ser. “Vawlei cu a umnak hmun ah khan fek tein na bunh i ahohmanh nih an ṭhial kho lo.”—Salm 104:5

• Pathian nih vawleicung ah a ummi thilnung pawl cu zungzal in an nung lai tiah bia aa kam. “Pathian [nih] . . . vawlei kha a ser i a siam, fekte le saupi nguh in a ser, vawlei cu thetse ram, ram pakpalawng ah a ser lo.”—Isaiah 45:18

• Pathian nih minung cu vawlei ah zungzal in an nung lai tiah bia aa kam. “A dingmi cu ram chungah him tein an um lai i ram cu zungzal in anmah ta a si lai.”—Salm 37:29

Pathian nih vawlei kha minung nih harnak ton loin zungzal in an i nuamh khawh nakhnga phun in a ser. Baibal ah vawlei a hrawktu mahzawn lawng aa ruatmi hna kha Jehovah nih ri a khiahmi caan ah a hrawh hna lai tiah a chimchung.—Biathlam 11:18

Cun Pathian nih vawlei kha aa dawh tukmi paradis ah a canter lai i sermi thil vialte nih “an herhmi kha tling tein an hmuh” lai.—Salm 145:16