VAWLEI CU A HMUN LAI MAW?
Thli
THLI cu kan herh tukmi a si. Thli kha minung nih kan dawp. Mah leng ah thli nih ni i ṭih a nungmi ceunak hna zong in vawlei kha a huhphenh. Thli a um lo ahcun vawlei a kihlum cu ti khal level tang ah a tla colh lai.
Thli Caah Ṭih A Nungmi Hmailei
Thli a thurmi nih minung nunnak caah harnak a chuahter. Vawleicung Ngandamnak Phu nih an chimmi ning in vawlei milu zatuak ah pakhat lawng nih thli thiang an dawp.
Thli a thur hnawmhmi nih thawchuahnak he aa pehtlaimi zawtnak, cuap cancer le lung thahri lei zawtnak a chuahter khawh. Thli a thur hnawmh ruang ah kum fatin mi 7,000,000 hrawng an thi.
Vawlei Cu Zungzal Hmun Ding In Ser A Si
Vawlei cu thilnung vialte caah thli thiang chuah khawhnak le a mah tein aa thianh peng khomi phun in ser a si. Thli cu minung ruang ah a thurmi a si. Tahchunhnak cheukhat in zohhmanh hna u sih.
-
Tupi nih carbon dioxide dawp khawhnak kong cu mi tampi nih an hngalh. Asinain a daamnak hmun ah a khomi bungkung kong a hngalmi cu mi tlawm te lawng an si. Bungkung nih a linhnak ah a khomi thingkung nakin carbon dioxide kha let nga in a hloh khawh deuh.
-
Rili belh zong nih thli tuamtu lak ah a ummi carbon dioxide kha an dawp. A hnah ah aa telmi thli in a khatmi a bo te ruang ah rili belh cu ti nih a fenh i rilikam in a hlatnak hmun a phanh hnu ah mah a bomi te cu a kek. Cuticun carbon dioxide a dawpmi rili belh cu rili chung ah a pil i rili taw ne ah kumzabu tampi chung a um.
-
Thli cu amah tein i kilven khawhnak ṭhawnnak a ngei ti kha COVID-19 pul rai chung ah hmuh khawh a si. 2020 ah vawleicung pumpi ah sehzung ah rianṭuan a ngah lo ca le mawṭaw hna hman a ngah lo caah thli a hung thiang colh. Lockdown an tuah hnu tlawmpal ah thli cu a thiang deuh tiah “2020 Vawleicung Thli Sining Kong Report” ah aa telmi ram zatuak ah 80 leng nih thawng an thanh.
Minung I Zuamnak
Sehbing hmannak nih thli thurnak a tlawmter
Thli thurhnawmhnak zorter awkah nawlngeitu pawl nih chawlettu pawl kha lamhruainak an pek hna bantuk in scientist pawl zong nih thli thurnak ruang ah a chuakmi thil ṭhalo hna a tlawm deuh nakhnga lamthar hna an kawl peng. Tahchunhnak ah, pawngkam a thurtermi thil hna kha siivai a ngei lomi ah aa thlen nakhnga mit in hmuh khawh lomi rungrul hna kha an hman. Mawṭaw i cit can ah sehbing i cit awk asiloah ke in kal awk le inn ah mei tha semrel tein hman awk zong ah ruahnak an kan cheuh.
Cozah cheukhat nih an rammi pawl kha thli thurnak a tlawmter deuhmi meipung thar hna kha an pek ko hna nain tamdeuh nih cun tu tiang an hmang kho rih lo
Asinain Ngandamnak Phu le Vawleicung Bank hna i tel in ramkomh phu hna i 2022 report ning in thli a thian deuh nakhnga mah nakin i zuam deuh a hau rih.
2020 report ning in vawleicung pumpi i milu zatuak cheuthum ah cheukhat nih thli a thurtermi lam le thil hna kha hmang in rawl an chuan peng rih. Hmun tampi ah mi tlawm te lawng nih thli thurnak a tlawmtermi rawl chuannak hna kha an i cawk khawh i thing le meihol a airolhmi thil hna kha an hman khawh.
Vawlei Caah Ruahchannak—Baibal Chimhmi
“Pathian nih van khi a ser hna i a samh hna; vawlei le a cung i a ummi thilnung vialte kha amah nih a ser hna; vawlei cung i a ummi vialte kha nunnak le thaw a pek hna.”—Isaiah 42:5.
Pathian nih dawp awk thli a kan pek leng ah thli a thianter tu kokek thil zong kha a kan serpiak. Minung cung ah dawtnak a ngei tukmi Lianngan Bik Pathian nih thli thurnak he aa tlai in zeihmanh tuah loin a um lai maw? “Pathian Nih Vawlei A Hmun Peng Lai Tiah Bia Aa Kam” timi capar kha zoh.
