Tlangbawi a si lomi Levi miphun hna i an rian lakah biakinn cawnghnak rian zong aa tel. Annih cu biakinn hotu i lamhruainak tangah rian a ṭuanmi an si. Biakinn cawngtu palik pawl i an rian he aa tlaiin Judah caṭialtu Philo nih hitin a ti: “Mi cheukhat nih biakinn luhnak kutka hmai in an cawngh i mi cheukhat nih cun biakinn hmun thiang hmai in an cawngh. Mah cu biakinn hmun thiang ah luhnak nawl a ngei lomi pawl nih timhciammam tein asiloah ruahlopi in an luh sual nakhnga lo caah a si. Cheukhat nih biakinn kha chun he zan he aa changchang tein an cawngh.”

Sanhedrin nih palik pawl kha a herh ning paoh in a hman hna. Annih cu Rom cozah nih hriamnam tlaihnak nawl a pekmi Judah mi phu pakhat an si.

Baibal lei mifim a simi Joachim Jeremias nih hitin a ti: “Palik pawl nih Jesuh an tlaih lioah Jesuh nih nifate in pei Biakinn ah ka ṭhu i kaan cawnpiak lengmang ko hna cu, nan ka tlaih ṭung lo tiah a ti hna, (Matt. 26.55) cucaah Jesuh a tlaitu pawl cu mah palik pawl an si lai ti cu a fiang ko.” Cun mah caṭialtupa nih mah hlan deuh i Jesuh a rak tlaitu pawl zong biakinn cawngtu palik pawl an si lai tiah a zumh. (Johan 7:32, 45, 46) A hnuah lamkaltu pawl tlaih awkah Sanhedrin nih biakinn hotu le palik cheukhat pawl kha a thlah hna. Cucaah biakinn ah lamkaltu Paul a tlaitu hna zong biakinn cawngtu palik pawl an si kho men.—Lam. 4:1-3; 5:17-27; 21:27-30.