1-2. Lamkaltu 8:27-31, 35-38 ningin Ethiopia bawipa cu tipil in awkah zeinihdah a forh?

KHRIH zultu pakhat in tipil in na duh maw? Dawtnak le sunsaknak nih mi tampi kha tipil in awkah a forh hna. Siangpahrangnu sinah rian a ṭuanmi Ethiopia bawipa kong hi ruathmanh.

² Ethiopia bawipa nih Baibal in a cawnmi kong kha a tuahsernak in a langhter colh. (Lamkaltu 8:27-31, 35-38 rel.) Zeinihdah a forh? Rangleng cung a ṭhut lioah Isaiah Baibal caang cheukhat kha a rel caah Baibal a sunsak tukmi a si ti cu a fiang ko. Cun Filip nih bia a ruah tikah Jesuh nih a caah a tuahpiakmi cungah aa lawm tuk. Asinain mah bawipa cu zeicah Jerusalem ah a kal? Anih cu Jehovah a daw cangmi a si. Zeitindah kan hngalh khawh? Anih cu Jerusalem ah Jehovah a bia cangmi a si. A nu le a pa biaknak kha a chuah tak i a hmaanmi Pathian sinah aa pum pemi miphun hna sin lawngah aa kom. Jehovah a dawt caah a dang a biapimi thil kha tuah awkah bia a khiah. Cucaah tipil a ing i Khrih zultu pakhat a hung si.—Matt. 28:19.

3. Mi pakhat kha tipil in awkah zeinihdah a donh khawh? (“ Na Lungthin Cu Zei Bantuk Vawlei He Dah Aa Lawh?” timi rinli kulh ah zoh)

³ Jehovah dawtnak nih tipil in awkah aan forh khawh. Asinain cheukhat dawtnak nih cun tipil in awkah aan donh khawh. Zeitindah? Tahchunhnak cheukhat kong hi ruathmanh. Zumlotu na innchunghawi le na hawile kha na dawt tuk men hna lai i tipil ka in ahcun an ka huat lai ti kha na phang men lai. (Matt. 10:37) Asiloah Pathian nih a huat ti na  hngalhmi ziaza hna kha na duh men lai i mah ziaza hna kha ngol awkah naa harh men lai. (Salm 97:10) Asiloah a hmaan lomi biaknak puai a tuahmi phungphai in a ṭhangmi na si men lai. Mah puai hna he aa tlaiin philh khawh lomi hna na ngei men lai. Cucaah Jehovah lung a lawmhter lomi mah phungphai hna kha hlawt awkah naa harh men lai. (1 Kor. 10:20, 21) Cucaah “zeidah asiloah ahodah ka dawt bik?” timi kong he aa tlaiin biakhiahnak na tuah a hau.

4. A bikin tipil na innak a ruang cu zeidah a si?

⁴ Na duhmi le na sunsakmi thil ṭha tampi a um ko lai. Tahchunhnak ah, Jehovah Tehte Hna he Baibal na hlathlai hlan hmanh in Baibal a sunsak tukmi na si men lai. Cun Jesuh zong kha na dawt tuk men lai. Atu cu Jehovah Tehte Hna he nan i hngal cang, cucaah anmah he caan hmanṭi kha na hun duh men lai. Asinain mah bantuk thil ṭha duh lawngin cun Jehovah sinah i pum pek in tipil in kha na duh men lai lo. A bik in tipil na innak a ruang cu Jehovah Pathian na dawt caah a si. Zei dang vialte nakin Jehovah kha na dawt deuh ahcun amah biak lo awkah zei thil asiloah ahohmanh nih an in don kho lai lo. Jehovah na dawtnak nih tipil in dingin aan forh lengah tipil na in hnu zongah a cungah zumhfek tein um dingin aan bawmh lai.

5. Zei biahalnak dah kan i ruah hna lai?

⁵ Jesuh nih Jehovah kha kan lungthin dihlak, kan nunnak dihlak, kan ruahnak dihlak le kan thazaang dihlak in kan dawt awk a si tiah a ti. (Mar. 12:30) Jehovah kha lungthin dihlak in zeitindah na dawt khawh i na upat khawh? Jehovah nih zeitlukin dah a kan dawt ti kha kan ruah ahcun mah nih amah kha dawt ṭhan awkah a kan bawmh lai. (1 Johan 4:19) Mah a biapi bikmi dawtnak kha kan ngeih ahcun a dang zei ruahnak le tuahsernak dah kan hun ngeih lai? *

6. Rom 1:20 ningin Jehovah kong na cawn khawhnak lamkhat cu zeidah a si?

⁶ A thil sermi in Jehovah kong kha cawng. (Rom 1:20, rel; Biat. 4:11) Thingkung le saram pawl a ser hnanak ah a langmi Pathian a fimnak kong kha ruat. Khuaruahhar lam in na pum ser a si ning kong zong kha ruat. (Salm 139:14) Jehovah nih nika a sernak ah a langmi a ṭhawnnak kong kha ruat. Nika cu arfi nuai tampi lakah pakhat lawng a si rih. * (Isa. 40:26) Mah kong kha na ruah ahcun Jehovah kha na upat chinchin lai. Asinain Jehovah cu a fimmi le a ṭhawngmi a si ti hngalh cu amah he nan i pehtlaihnak ah a hram lawng a si rih. Jehovah na dawtnak a feh chin nakhnga a kong kha tam deuh in na hngalh a hau.

7. Jehovah kha lungtak tein dawt khawh awkah zeidah na zumh a hau?

⁷ Jehovah nih aan dawt taktak ti kha na zumh a hau. Van le vawlei Sertu nih aan hngalh i aan zohkhenh ti kha zumh awkah naa harh maw? Naa harh ahcun Jehovah cu “aho kan sin hmanh hin aa hlat lo” ti kha philhhlah. (Lamkaltu 17:26-28) David nih Solomon sinah a chim bantukin na “lung vialte cu a purh dih” i “amah cu na kawl ahcun na hmuh lai” tiah bia aan kamh. (1 Chan. 28:9) Atu ah Baibal na hlathlainak a ruang cu Jehovah nih a sinah “aan hnuh” caah a si. (Jer. 31:3, NW) Jehovah nih na caah a tuahmi  thil kha na sunsak deuh tikah amah na dawt cu a fek deuh ve lai.

8. Jehovah dawtnak kha zeitindah na lehrulh khawh?

⁸ Jehovah dawtnak kan lehrulh khawh ning lamkhat cu a sinah thlacamnak thawngin a si. Na lungretheihnak kong le aan tuahpiakmi thil vialte caah na lawmhnak kong kha a sinah na chim ahcun Pathian na dawtnak cu a fek chin lai. Na thlacamnak aan lehmi na hmuh tikah Jehovah he nan i pehtlaihnak cu a fek chin lai. (Salm 116:1) Pathian nih aan hngalhthiam ti zong kha na hun zumh lai. Asinain Jehovah he nan i naih chin nakhnga a ruahnak kha na hngalhthiam a hau. Cun na sinin aan halmi kong zong kha na hngalh a hau. Cutin hngalh khawhnak lamkhat cu a Bia, Baibal hlathlainak thawngin a si.

9. Baibal na sunsak kha zeitindah na langhter khawh?

⁹ Pathian Bia, Baibal kha sunsak awkah cawng. Jehovah kong biatak le na caah aa timhmi kong kha Baibal lawngah hmuh khawh a si. Baibal na sunsaknak kha nifatin Baibal na relnak thawngin, Baibal cawnpiaknak caah naa timhtuahnak thawngin le na cawnmi ningin na zulhnak thawngin langhter. (Salm 119:97, 99; Johan 17:17) Pumpak Baibal relnak caah cazin na ngei maw? Mah cazin ningin Baibal kha nifatin na rel maw?

10. Baibal aa thleidannak pakhat cu zeidah a si?

¹⁰ Baibal aa thleidannak pakhat cu mit in Jesuh a rak hmutu hna kong aa telmi hi a si. Cucaah Jesuh nih na caah a tuahmi kong kha Baibal nih fiang tein a langhter. Jesuh nih a chimmi le a tuahmi kong kha na hlathlai ahcun amah he hawikom si na duh lai.

11. Jehovah dawt awkah zeinihdah aan bawmh lai?

¹¹ Jesuh dawt awkah cawng law Jehovah na dawtnak cu a ṭhang chin lai. Zeicah? Zeicahtiah Jesuh nih a Pa sining kha tling tein a langhter caah a si. (Johan 14:9) Cucaah Jesuh kong tam deuh na cawn ahcun Jehovah kong kha na hngalhthiam deuh lai i na sunsak deuh lai. Mi nih an nautatmi hna, a si a fakmi, a zawmi le a tha a dermi hna cungah Jesuh nih a langhtermi zaangfahnak kong kha ruat. Cun Jesuh nih ruahnak an cheuhmi kha  na ngaih tikah na nunnak zeitindah a ṭhat deuh timi kong zong kha ruat.—Matt. 5:1-11; 7:24-27.

12. Jesuh kong na cawn tikah zei tuah awkah dah aan forh lai?

¹² Kan sualnak ngaihthiamnak caah Jesuh nih a pekmi tlanhnak man kong kha ṭha tein na ruah ahcun Jesuh na dawtnak cu a fek chin lai. (Matt. 20:28) Jesuh nih na caah lungtho tein a nunnak a pek ti kha na hngalh tikah i ngaihchih awk le Jehovah ngaihthiamnak kawl awkah aan forh lai. (Lam. 3:19, 20; 1 Johan 1:9) Jesuh le Jehovah na dawt deuh hna tikah anmah a dawmi midang zong kha na hun dawt deuh ve hna lai.

13. Nangmah bawmh awkah Jehovah nih zeidah aan pek?

¹³ Jehovah chungkhar pawl dawt awkah cawng. Zumlotu na innchungkhar le na hawile nih Jehovah sinah zeicah i pumpek na duh ti kha an hngalthiam lai lo. Cucaah a ral hmanh an in ralchanh men lai. Asinain Jehovah nih thlaraulei innchungkhar aan peknak thawngin aan bawmh lai. Anmah he naih tein na um ahcun na herhmi bawmhnak le dawtnak kha na hmuh lai. (Mar. 10:29, 30; Heb. 10:24, 25) A caan a zat tikah na chungkhar pawl cu Jehovah a biami le a phunglam a zulmi hmanh an hung si kho.—1 Pet. 2:12.

14. Jehovah phunglam kong he aa tlaiin 1 Johan 5:3 ningin zeidah na hngalh?

¹⁴ Jehovah phunglam kha zul law sunsak awkah cawng. Jehovah na hngalh hlanah cun nangmah tein phunglam naa ser men lai. Asinain atu ahcun Jehovah phunglam cu a ṭha bikmi a si ti kha na hngalh. (Salm 1:1-3; 1 Johan 5:3 rel.) Nupi, va, nulepa le fale kong he aa tlaiin Baibal ruahnak cheuhnak kong kha ruat. (Efe. 5:22–6:4) Mah ruahnak cheuhnak na zulh caah nan innchungkhar cu a nuam deuh maw? Hawikom fimhring tein i thimnak kong he aa tlaiin Jehovah lamhruainak na zulh caah a ziaza a ṭha deuhmi na si maw? Aa nuammi deuhmi tah na si maw? (Ptb. 13:20; 1 Kor. 15:33) Mah biahalnak hna hi a si tiah leh na duh ko lai.

15. Baibal phunglam ningin nun awkah bawmhnak na herh ahcun zeidah na tuah khawh?

¹⁵ A caan ah, na cawnmi Baibal phunglam zeitindah zulh ding a si ti kha hngalh awkah naa harh men lai. Cucaah Jehovah nih a hmaan le hmaan lo kong hngalhthiam awkah aan bawm khomi Baibal hrambunh in chuahmi cauk hna kha a bupi hmangin aan pek. (Heb. 5:13, 14) Mah cauk hna kha na rel i na hlathlai tikah zeitlukin dah zulh awk a tlakmi a si ti le a hmaanmi a si ti kha na hngalh lai i Jehovah bupi ah i tel na duh lai.

16. Jehovah nih a miphun pawl kha zeitindah a dirh hna?

¹⁶ Jehovah bupi dawt awk le bawmh awkah cawng. Jehovah nih a miphun pawl caah Khrihfabu kha a dirh i a Fapa Jesuh kha Khrihfabu lu ah a ser. (Efe. 1:22; 5:23) Liim a duhmi rian kha tlangtlak in lamhruai awkah Jesuh nih chiti thuhmi phu hmete kha rian a pek hna. Jesuh nih mah phu kha “zumhawk a tlakmi le a fimmi sal” tiah a auh hna. An rian cu Jehovah he a ṭhami pehtlaihnak kan ngeih nakhnga bawmh le amah he kan i pehtlaihnak kilven kha a si. Mah rian kha an sunsak tuk. (Matt. 24:45-47) Zumhawk a tlakmi le a fimmi sal nih an in bawmh khawhnak lamkhat cu sining a tlinhmi Khrihfa upa pawl kha rian an pek hnanak thawngin a si. (Isa. 32:1, 2; Heb. 13:17; 1 Pet. 5:2, 3) Khrihfa upa pawl nih an si khawh chungin an in hnemh i Jehovah he nan i naih chin nakhnga lungtho tein bawmh an in duh. Asinain na caah an tuah khawhmi lakah a biapi bikmi pakhat cu midang sinah Jehovah kong na chim khawh  nakhnga an in bawmhmi kha a si.—Efe. 4:11-13.

17. Rom 10:10, 13, 14 ningin midang sinah Jehovah kong kha zeicah kan chim awk a si?

¹⁷ Midang kha Jehovah dawt awkah bawm hna. Jesuh nih a zultu pawl kha midang sinah Jehovah kong cawnpiak dingin a fial hna. (Matt. 28:19, 20) Mah nawlpeknak kha a phung men in zulh khawh a si. Asinain Jehovah na dawtnak a hun ṭhan tikah lamkaltu Peter le Johan bantukin hitin na chim khawh ve lai: “Kan hmuh komi le kan theih komi cu chim lo cun kan um kho bal lai lo.” (Lam. 4:20) Mi pakhat nih Jehovah a dawt nakhnga kan bawmh khawh ahcun mah nih nuamhnak a kan hmuhter lai. Ethiopia mipa kha Baibal ah aa telmi biatak kong a hngalh nakhnga le tipil a in nakhnga a bawmh tikah thawngṭha chimtu Filip cu zeitlukin dah aa nuamh lai ti kha na mitthlam ah cuanter hmanh. Filip kha naa zohchunh i Jesuh nawlpek ningin phung na chim tikah Jehovah Tehte pakhat si na duh na langhtermi a si. (Rom 10:10, 13, 14 rel.) Mah tikah Ethiopia mipa bantukin “zei nih dah tipil in a ka donh lai?” tiah naa hal ve men lai.—Lam. 8:36.

18. A hnu capar ah zei kong dah kan i ruah hna lai?

¹⁸ Tipil in dingin biakhiahnak na tuahmi cu na nunnak ah a biapi bikmi biakhiahnak na tuahmi a si. Mah cu a biapi tukmi biakhiahnak a si caah tipil innak a sullam kha ṭha tein na ruah a hau. Tipil innak kong he aa tlaiin zeidah na hngalh awk a si? Tipil na in hlan le na in hnuah zeidah na tuah awk a si? A hnu capar ah mah biahalnak a phi kha kan i ruah hna lai.