1. Pathian dawtnak nih zeitindah a kan umter?

LAMKALTU Johan nih “Pathian cu dawtnak a si” tiah a ti. (1 Johan 4:8) Mah bia nih mah biatak hrampi hi a kan hngalhter ṭhan: Nunnak Hrampi Pathian cu dawtnak Hrampi zong a si. Jehovah nih a kan dawt. A kan dawtnak nih a himmi, aa nuammi le lungsi hnangamnak a ngeimi a kan siter.

2. Matthai 22:37-40 ningin nawlbia pahnih cu zeidah an si, kan caah a pahnihnak nawlbia zulh cu zeicah a har?

² Khrihfa pawl nih dawtnak kan langhter lai maw, langhter lai lo timi kong he aa tlaiin kan i thim kho lo. Zeicahtiah mah cu nawlbia a si caah a si. (Matthai 22:37-40 rel.) Jehovah kha ṭha deuh in kan hun hngalh tikah a pakhatnak nawlbia zulh kha kan caah a fawi deuh men lai. Mah lengah Jehovah cu a tlingmi a si. Cucaah kan zawn a kan ruah i zaangfahnak he a kan pehtlaih. Asinain a pahnihnak nawlbia zulh cu kan caah a har men lai. Zeicah? Kan innpa a simi kan unau pawl cu mitlinglo an si caah a si. A caan ah an chimmi le an tuahsernak ruangah kan zawn an kan ruat lo i kan cungah zaangfahnak an ngei lo tiah kan ruah men lai. Jehovah nih mah zuamcawhnak kan tonmi kha a hngalh. Cucaah Baibal ṭialtu cheukhat kha pakhat le pakhat cungah zeitindah le zeicah dawtnak kan langhter awk a si timi kong he aa tlaiin cuset khaset timi ruahnak cheuhnak kha a ṭialter hna. Mah a ṭialtu hna lakah pakhat cu Johan a si.—1 Johan 3:11, 12.

3. Johan nih atu le atu zei kong dah a chim?

³ Johan nih a cakuat ah Khrihfa hna nih dawtnak kan langhter awk a sinak kong kha a hleiin a ṭial. Johan ṭialmi Baibal  nih Jesuh nunning kong kha a langhter, Johan nih a dang Thawngṭha cauk a ṭialtu pathum nakin “dawtnak” le “dawt” timi biafang kha tam deuh a hman. Johan Thawngṭha cauk le a cakuat pathum a ṭial lioah Johan cu kum zakhat hrawng a rak si. Mah thawchuah hnawhmi a cakuat ah Khrihfa hna nih an tuahmi thil kip ah dawtnak cu huham a ngeih awk a si tiah a ti. (1 Johan 4:10, 11) Asinain mah in cawn awkah Johan nih a caan a rak lak.

4. Johan nih midang cungah dawtnak a langhter zungzal maw?

⁴ Johan nih a no lioah dawtnak a langhter zungzal lo. Tahchunhnak ah, voikhat cu Jesuh le a zultu pawl Jerusalem lei khual an tlawn lioah Samaria khua kha an tan pah. Samaria khua pakhat i mi hna nih Jesuh le a zultu pawl cungah khual dawtnak an rak langhter lo. Mah tikah Johan nih zeitindah a rak lehrulh? Hi khuami hna hrawhnak ding caah hin vancung in mei au u tiah na kan duh maw tiah Jesuh kha a rak hal. (Luka 9:52-56) Caan dang zongah Johan nih a dang zultu pawl cungah dawtnak a rak langhter lo. Amah le a nau Jeim nih Pathian Pennak ah Jesuh pawngah ṭhut dingin an nu kha Jesuh sinah rak halter dawh a si. Jeim le Johan nih an tuahmi thil an hmuh tikah a dang zultu pawl cu an thin a rak hung. (Matt. 20:20, 21, 24) Cu bantuk palhnak a tuah ko nain Jesuh nih Johan kha a rak dawt ṭhiamṭhiam.—Johan 21:7.

5. Hi capar ah zei kong dah kan i ruah hna lai?

⁵ Hi capar ah Johan le a ṭialmi dawtnak kong he aa tlaiin thil cheukhat kong kha kan i ruah hna lai. Kan i ruah pah in unau cungah zeitindah dawtnak kan langhter khawh timi kong zong kan theih hna lai. Cun chungkhar lu nih a chungkhar cungah dawtnak langhter cu zeicah a biapit tuk timi kong zong kan theih hna lai.

6. Jehovah nih a kan dawt kha zeitindah a langhter?

⁶ Zaangfahnak he chimmi bia cu dawtnak langhter a si tiah kan ruah tawn. Asinain dawtnak taktak timi cu tuahsernak zongah a langh awk a si. (Jeim 2:17, 26 he tahchunh.) Tahchunhnak ah, Jehovah nih a kan dawt. (1 Johan 4:19) A kan dawtnak kong kha Baibal ah aa dawh tukmi bia in a langhter. (Salm 25:10; Rom 8:38, 39) Asinain Pathian nih a kan dawtnak kha a bia lawng si loin a tuahsernak zongin a langhter ti kha kan hngalh. Johan nih hitin a ti: “Pathian nih a kan dawtnak a langhter ning cu hitihin a si: a Fapa ngeihchun kha vawlei ah hin a run thlah i amah  thawngin nunnak kan ngei lai.” (1 Johan 4:9) Jehovah nih a dawt tukmi a Fapa kha kan caah fahnak le thihnak in dingin nawl a awnh. (Johan 3:16) Jehovah nih a kan dawt taktak timi kong he aa tlaiin lunghrinnak kan ngeih awk a si maw?

7. Jesuh nih a kan dawt ti kha zeinihdah a langhter?

⁷ Jesuh nih a zultu pawl a dawt hna kha a hngalhter hna. (Johan 13:1; 15:15) A dawt hna kha a biachim lawng si loin a tuahsernak zongin a langhter. Jesuh nih “mi nih a hawile caah dawtnak ngan bik a ngeih khawhmi cu an ca i a nunnak pek hi a si” tiah a ti. (Johan 15:13) Jehovah le Jesuh nih a kan dawtnak kong kha kan ruah ahcun zei tuah dah kan duh lai?

8. Kuatkhat Johan 3:18 ah a chim bantukin zeidah kan tuah awk a si?

⁸ Jehovah le Jesuh kan dawt hna kha an nawl kan ngaih hnanak thawngin kan langhter khawh. (Johan 14:15; 1 Johan 5:3) Jesuh nih a hleiin pakhat le pakhat i daw u tiah nawl a kan pek. (Johan 13:34, 35) Cucaah unau pawl kan dawt hna kha kan kaa lawng si loin kan tuahsernak zongin kan langhter awk a si. (1 Johan 3:18 rel.) Pakhat le pakhat kan i dawt kha a hleiin zei kan tuahnak thawngin dah kan langhter khawh?

9. Johan kha dawtnak langhter awkah zeinihdah a forh?

⁹ Johan cu a pa he an chungkhar pawcawmnak caah ngatlaihnak rian an ṭuan. Asinain aa dinh caan kha Jehovah le Jesuh kong midang cawnpiaknak caah a rak hman. Johan nih aa thimmi nunning cu a fawimi a si lo. Johan cu hremnak a rak tong i kumzabu pakhatnak a dongh lei, a kum a upat hnuah ram in ṭhawl a rak si. (Lam. 3:1; 4:1-3; 5:18; Biat. 1:9) Thongthlak a si lio hmanhah Jesuh kong kha a rak chim i midang a dawt hna kha a rak langhter. Tahchunhnak ah, Patmos tikulh a um lioah Biathlam cauk kha a ṭial i Khrihfabu nih “a um zau dingmi thil” kha an hngalh nakhnga a kuat hna. (Biat. 1:1) Cun Patmos tikulh in a luat hnuah Johan nih Jesuh nunning le phungchim rianṭuannak kong a langhtermi Thawngṭha cauk kha ṭial dawh a rak si. Cun a cakuat pathum zongin unau pawl kha a hnemh hna i thazaang a rak pek hna. Johan nih mahca ṭhatnak a hlawtmi kha zeitindah kan i zohchunh khawh?

10. Mi pawl na dawt hna kha zeitindah na langhter khawh?

¹⁰ Mi pawl na dawt hna kha naa thimmi thil thawngin na langhter khawh. Satan vawlei nih na caan le na thazaang kha nangmah caah hmang dih sehlaw tangka hmuhnak asiloah na min ṭhatnak caah i zuam seh ti aan duh. Mah canah vawleicung pumpi ah a ummi Pennak kong thawngṭha a chimtu hna nih an caan kha thawngṭha chimnak le Jehovah he an i naih nakhnga midang bawmhnak caah an si khawh chungin an hman. Mi cheukhat cu phungchimnak le cawnpiaknak ah caantling hmanhin an i tel.

11. Zumhfekmi thawngthanhtu tampi nih Jehovah le unau pawl an dawt hna kha zeitindah an langhter?

¹¹ Zumhfekmi Khrihfa tampi cu anmah le an chungkhar pawl zohkhenh khawh awkah vawlei lei rian kha caantling in an ṭuan. Asinain mah zumhfekmi thawngthanhtu hna nih Pathian bupi kha an si khawh chungin an bawmh. Tahchunhnak ah, cheukhat nih harnak a tongmi hna kha an bawmh hna, cheukhat cu biakinn saknak ah an ṭuan kho i kan dihlak in vawleicung pumpi rianṭuannak caah thawhlawm peknak caan ṭha kan hmu. Cutin an tuahmi cu Pathian le an minung hawi an dawt hna caah a si. Unau pawl kan dawt hna  kha zarh fatin kan i pumhnak thawngin le anmah he caan kan hmanṭinak thawngin kan langhter khawh. Kan tha a ba men ko lai nain mah pumhnak ah kan i pum. Kan thin a phang ko nain a phi kha kan pek. Pumpak buaibainak kan ngei ko nain unau pawl kha pumh hlan le pumh dih hnuah tha kan pek hna. (Heb. 10:24, 25) Cutin kan tuah caah zumtu khat unau pawl cu an i lawm tuk ko lai.

12. Johan nih unau pawl a dawt hna kha zeiti lam in dah a langhter rih?

¹² Johan nih unau pawl a dawt hna kha a thangṭhat hnanak lawngin si loin ruahnak a cheuh hnanak thawng zongin a rak langhter. Tahchunhnak ah, Johan nih a cakuat ah unau pawl an zumhnak le rianṭha an ṭuannak caah a thangṭhat hna lawng si loin sualnak kong he aa tlaiin hlangfang tein ruahnak zong a cheuh hna. (1 Johan 1:8–2:1, 13, 14) Cu bantukin kannih zong unau pawl i an tuahmi thilṭha caah kan thangṭhat ve hna a hau. Asinain mi pakhat nih a ṭha lomi lungput asiloah ziaza a ngei ti kha kan hngalh ahcun a herhmi kha fimhring tein kan chimhnak thawngin kan dawtnak kha kan langhter khawh. Kan hawikom pakhat ruahnak kan cheuh tikah ralṭhatnak ngeih a herh ko nain Baibal nih hawikom ṭha cu pakhat le pakhat an i haarter asiloah an i remh tiah a ti.—Ptb. 27:17.

13. Zeidah kan hrial awk a si?

¹³ A caan ah unau pawl kan dawt hna kha thil cheukhat kan tuah lonak thawng zongin kan langhter khawh. Tahchunhnak ah, an chimmi bia ruangah kan thin a hun colh ding a si lo. Jesuh vawleicung a nunnak a dih lai i a cangmi kong kha ruathmanh. A zultu pawl kha nunnak hmuh awkah ka sa kha nan ei i ka thi kha nan din a hau tiah a ti hna. (Johan 6:53-57) Mah tikah a zultu tampi cu an khuaruah a har tuk i an rak kaltak. Asinain Johan i telin a hawikom taktak nih cun an kaltak lo. Annih cu zumhfek tein a sinah an rak um. Jesuh nih a chimmi kha an theihthiam lo caah an khuaruah cu a har ko lai. Asinain zumhfekmi Jesuh hawile nih cun Jesuh chimmi cu a palh i thinhun awk a si tiah an ruat lo. Mah canah biatak a chimmi a si ti kha an hngalh caah an rak zumh. (Johan 6:60, 66-69) Kan hawile chimmi bia ruangah thinhun colh lo cu a biapi tukmi a si. Cucaah an chim duhnak kha fianter awkah caanṭha kan pek hna awk a si.—Ptb. 18:13; Pct. 7:9.

14. Unau pawl kha zeicah kan huat hna awk a si lo?

¹⁴ Johan nih unau pawl kha huat lo ding  zongin tha a kan pek. Mah ruahnak cheuhnak kha kan zulh lo ahcun Satan cu kan cungah huham a ngei kho. (1 Johan 2:11; 3:15) Kumzabu pakhatnak a dongh lai ah mah bantuk thil cu a rak cang. Mah lio caan ah Pathian salle hna nih pakhat le pakhat an i huat nakhnga le an i ṭhencheu nakhnga Satan cu fakpi in a rak i zuam. Johan nih mah cakuat a ṭial lioah Khrihfabu chungah Satan bantukin lam a pial tertu pa pawl an rak um. Tahchunhnak ah, Diotrefes cu Khrihfabu ṭhencheu awkah fakpi in aa zuam. (3 Johan 9, 10) Uktu bu aiawh in khual a tlawngmi pawl kha a rak upat hna lo. Anmah cungah khual dawtnak a langhtermi hna kha Khrihfabu chung hmanhin chuah awkah a rak i zuam. Mah cu a ṭha lo taktakmi a si. Tuchan zongah Satan nih Pathian miphun pawl kha ṭhencheuter awkah fakpi in aa zuam rih. Kan lakah huatnak kha zeitik hmanhah kan umter ding a si lo.

15. Chungkhar lu nih zeidah aa cinken awk a si?

¹⁵ Chungkhar lu nih a chungkhar a dawt hnanak a langhter khawh ning a biapimi lamkhat cu an herhmi thilri a pek hnanak thawngin a si. (1 Tim. 5:8) Asinain mah thilri nih thlaraulei ah an herhmi lungsinak a pe kho hna lo ti kha aa cinken awk a si. (Matt. 5:3) Chungkhar lu caah Jesuh nih a chiahmi zohchunhawk ṭha kha i cinken. Johan Thawngṭha cauk ningin tung cung i an thlai lio hmanhah Jesuh nih a chungkhar kong kha a ruah rih. Jesuh an thahnak hmun ah Johan cu Jesuh a nu Mary he an dirṭi. Nganfahnak a tuar lio hmanhah Jesuh nih Mary zohkhenh awkah Johan kha a fial. (Johan 19:26, 27) Jesuh unau pawl nih Mary kha pumsalei in an zohkhenh lai ti cu a fiang ko, asinain annih cu Jesuh zultu an rak si rih lo. Cucaah Jesuh nih Mary kha pumsalei le thlaraulei ah zohkhenh siseh ti a rak duh.

16. Johan cu zei rian nganpi dah a ngeih?

¹⁶ Johan cu rian nganpi a ngei. Lamkaltu pakhat in phungchim rian kha lungtho tein a rak ṭuan. Cun anih cu innchungkhar zong a rak ngei cang men lai. Cucaah a chungkhar kha pumsalei he thlaraulei he an herhmi zohkhenh awkah a tlarimi a si a hau. (1 Kor. 9:5) Tuchan chungkhar lu hna nih zeidah an cawn khawh?

17. Chungkhar lu nih a chungkhar thlaraulei ah an herhmi bawmh cu zeicah a biapit tuk?

¹⁷ Chungkhar lu a simi unaupa pakhat cu a  biapimi rian tampi a ngei. Tahchunhnak ah, rian fakpi in aa zuammi nih Jehovah thang a ṭhatter. (Efe. 6:5, 6; Titas 2:9, 10) Cun tuukhal lennak le phungchim rianṭuannak ti bantuk Khrihfabu rian zong a ngei men lai. Mah lengah a nupi le a fale he hmaan tein Baibal hlathlai zong a biapimi a si. Annih nih pumsalei, lungthinlei le thlaraulei ah an dam khawh nakhnga unaupa i aa zuamnak kha an sunsak tuk.—Efe. 5:28, 29; 6:4.

18. Johan nih zeidah a hngalh?

¹⁸ Johan cu kum saupi a nung i a ṭha tukmi hmuhtonnak zong a ngei. A zumhnak a derter khomi zuamcawhnak tampi zong a rak tong. Asinain unau pawl dawt ding timi nawlbia i telin Jesuh nawlbia vialte kha a si khawh chungin a zulh dih. Johan nih Jehovah le Jesuh nih an ka dawt i zei bantuk hneksaknak poah inkhawh awkah thazaang an ka pek lai ti kha a hngalh. (Johan 14:15-17; 15:10; 1 Johan 4:16) Satan le a vawlei nih Johan kha unau pawl cungah dawtnak langhter lo awkah an kham kho lo.

19. Kuatkhat Johan 4:7 nih zei tuah awkah dah a kan forh, zeicah?

¹⁹ Johan bantukin kannih zong mi cungah huatnak lungput a ngeimi Satan ukmi vawlei ah kan nung. (1 Johan 3:1, 10) Satan nih kan unau pawl kha hua hna seh ti a kan duh ko nain nawl kan awnh lo ahcun cutin a tuah kho lai lo. Cucaah unau pawl kan dawt hnanak kha kan kaa lawng si loin kan tuahsernak in langhter awkah bia khiak hna u sih. Cutin dawtnak kan langhter tikah Jehovah chungkhar pawl cu an i nuam lai i kanmah zong kan i nuam tuk ve lai.—1 Johan 4:7 rel.