JERUSALEM i Baibal Hmun Thil Hlun Chiahnak Inn ah BC 700-600 kar ah ṭialmi lungtlap pakhat a um. Mah lung cu Israel Hebron in a hlat tuk lonak mithi vuinak lungkua chungah an lakmi a si. Mah lung ah hitin aa ṭial: “Hagav fapa Hagaf cungah Yahweh Sabaot i chiatserhnak tlung ko seh.” Mah lungca nih Baibal chimmi kha zeitindah a cohlan? Mah nih Hebru ca in aa ṭialmi YHWH cu Pathian min a si i Baibal chan lioah mah cu mi nih an hngalh tukmi le an rak hman tukmi a si ti kha a langhter. Mithi vuinak lungkua ah an hmuhmi a dang lungca hna zong a um. I ton awk le i thuh awkah thlan a sertu hna nih Pathian min, Pathian min aa telmi minung min hna kha thlan vanpang ah an ṭial tawn ti kha mah lungca nih a langhter.

Mah lungca kong he aa tlaiin Georgia Sianghleiruun i Dr. Rachel Nabulsi nih hitin a ti: “YHWH timi min atu le atu an hmanmi cu a biapimi a si. . . . Lungca le lungtlap ah aa telmi ca hna nih Israel le Judah mi hna caah YHWH timi cu zeitlukin dah a biapimi a si ti kha a langhter.” Mah nih Hebru holh in YHWH tiah aa ṭialmi Pathian min thong tampi aa telmi Baibal a cohlan kha a langhter. Minung min zong ah Pathian min aa telmi a um.

Lungca ah aa ṭialmi “Yahweh Sabaot” timi a sullam cu “Jehovah cu ralkapbu Bawipa” tinak a si. Mah nih Baibal chan ah Pathian min lawng si loin “Jehovah cu ralkapbu Bawipa” a si timi bia zong mi nih an rak hngalh ti kha a langhter. Hebru Baibal chungah 283 aa telmi “Jehovah cu ralkapbu Bawipa” a si timi bia a cohlan zong kha a langhter. Mah cu Isaiah, Jeremiah le Zekhariah chungah tam bik hmuh khawh a si.