1. Tuchan ah mi tampi nih zei cung ah dah lungthin an pek?

 TUCHAN ah mi tampi cu anmah zawn lawng aa ruatmi an si. Tahchunhnak ah, mi cheukhat cu social media ah anmah le an tuahmi cung ah mi nih lungthin an pek nakhnga fakpi in an i zuam. Asinain tuchan ah mi tlawmte lawng nih Jehovah Pathian kha sunparnak an pek. Hi capar ah Jehovah sunparnak pek timi cu zei sullam dah a si i cutin tuah awkah zeinihdah a kan forh timi kong kan i ruah lai. Cun Pathian kha hmuh awkah aa tlakmi sunparnak zeitindah kan pek khawh timi kong le a rauhhlan ah zeitindah a min a sunparter lai timi kong zong kan i ruah hna lai.

Jehovah Sunparnak Pek Timi Cu Zei Sullam Dah A Si?

2. Jehovah nih Sinai Tlang ah a sunparnak kha zeitindah a langhter? (Hmanthlak zong zoh.)

² Sunparnak timi cu zeidah a si? Baibal ah a hmanmi “sunparnak” timi biafang nih mi lungthin a la khomi thil paohpaoh kha a chim duhmi a si. Jehovah nih Izipt ram i sal taannak in Israel mi pawl a luatter hna hnuah a sunparnak khuaruahhar lam in a langhter. A cangmi kong hi na mitthlam ah cuanter hmanh: Israel mi nuai tampi cu Pathian bia ngaih ding in Sinai Tlang hram ah an i pum. Khuadawm chahpi nih tlang kha a khuh dih. Ruahlopi in li fakpi in aa hnin, nimtlau a lek, khua a ri i muko tum thawng bantuk thangpi in an theih. (Ex. 19:16-18; 24:17; Salm 68:8) Jehovah nih cutin a sunparnak a langhter tikah Israel mi cu zeitluk in dah an khuaruah a har lai ti kha na mitthlam ah cuanter hmanh.

3. Jehovah sunparnak pek ti tikah zeidah a chim duhmi a si?

 ³ Cu a si ah minung nih tah Jehovah kha sunparnak kan pe kho maw? Kan pek khawh. Lamkhat cu a ṭhawnnak kong le duh a nung tukmi a sining kong midang kan chimh hnanak thawng in a si. Cun a bawmhnak thawng in kan tuah khawhmi thil caah Jehovah kha thangṭhatnak kan peknak thawng zong in a si. (Isa. 26:12) Siangpahrang David nih Jehovah sunparnak peknak ah zohchunh awk ṭha a kan chiahpiak. Israel mibu hmaiah Pathian sinah hitin thla a cam: “Maw BAWIPA, lianngannak le ṭhawnnak le sunparnak le teinak le upatnak cu nangmah ta an si ko. Zeitintiah vancung le vawleicung i a ummi thil vialte cu nangmah ta an si dih.” Cun David nih a thlacamnak kha “BAWIPA nan Pathian cu thangṭhat ko u” tiin a donghter.—1 Chan. 29:11, 20.

4. Jesuh nih zeitindah Jehovah kha sunparnak a pek?

⁴ Jesuh nih vawleicung a um lioah khuaruahhar thil tuah khawhnak ṭhawnnak a Petu cu Jehovah a si tiah mi sinah a chimnak thawng in a Pa kha sunparnak a pek. (Mar. 5:18-20) Jesuh nih a Pa kong a chimh hna ning le midang a pehtlaih hna ning zong in Jehovah kha sunparnak a pek. Voikhat cu Jesuh nih pumhnak inn ah a cawnpiak hna. Cuka ah kum 18 chung khuachia nih a tuahmi nu pakhat a um. Khuachia nih a zawtter caah a keng a kul i ding tein a dir kho lo. A caah zeitluk in dah a har lai! Jesuh nih a zaangfah caah nem tein hitin a ti: “Minu, na zawtnak in na luat cang.” Jesuh nih mah minu cung ah a kut a chuan tikah ding tein a dir kho colh. A dam ṭhan caah aa lawm tuk i Pathian kha a thangṭhat! (Luka 13:10-13) Mah nu nih Jehovah kha sunparnak pek awkah a ruang ṭha a ngeih bantuk in kannih zong kan ngei ve.

Jehovah Kha Sunparnak Pek Awkah Zeinihdah A Kan Forh?

5. Jehovah upat awkah zei a ruang hna dah kan ngeih?

⁵ Jehovah kha kan upat tuk caah sunparnak kan pek. Kan upat awk a sinak a ruang tampi a um. Jehovah cu a lianngan bikmi a si i a ṭhawnnak cu ri a ngei lo. (Salm 96:4-7) A sang tukmi a fimnak cu sermi thil ah fiang tein a lang. Anih cu kan nunnak Hrampi a si i nunnak caah a herhmi thil vialte a kan Petu zong a si. (Biat. 4:11) Jehovah cu zumhawk tlakmi a si. (Biat. 15:4) A tuahmi thil vialte cu a hlawh a tling dih, a biakam zong a tlinter zungzal. (Josh. 23:14) Cucaah Jehovah kong he aa tlaiin profet Jeremiah nih “Miphun a fim bikbik hna lak le an bawi bikbik hna lakah, khuazei tal ah nangmah bantuk hi hmuh khawh an si hnga maw?” tiah a ti. (Jer. 10:6, 7) Vancung kan Pa kha upat awkah a ruang ṭha kan ngei taktak ko. Asinain upat lawng in a za lo, kan dawt a hau.

6. Zeicah Jehovah kha kan dawt?

⁶ Jehovah kha kan dawt tuk caah sunparnak kan pek. Duh a nung tukmi a sining hna kha i ruah hna u sih. Jehovah cu zaangfahnak le siaherhnak taktak a ngei. (Salm 103:13; Isa. 49:15) Zawnruahnak a ngei i kan lung a fah tikah a lung a fak ve. (Zek. 2:8) Amah he kan i naih khawh nakhnga lam a kan sialpiak. (Salm 25:14; Lam. 17:27) Cun aa toidormi a si i “Van le vawlei run zoh awkah hin a rung kuun. Sifakmi kha leidip lak i an umnak khan a cawi hna.” (Salm 113:6, 7) Cucaah a liannganmi kan Pathian kha sunparnak pek kan duh, a si ko lo maw?—Salm 86:12.

7. Zei bantuk caanṭha dah kan ngeih?

 ⁷ Midang kha Jehovah kong hngalhter kan duh hna caah sunparnak kan pek. Mi tampi nih Jehovah kong biatak kha an hngal lo. Zeicah? Satan nih Jehovah kong lihbia a karhternak thawng in an lungthin mit a cawtter caah a si. (2 Kor. 4:4) Satan nih Jehovah cu teirul cham a hmangmi, dawtnak a ngei lomi le sifah harnak a chuahtertu a si tiah mi tampi kha a hlen hna. Asinain kannih cu Pathian kong biatak kha kan hngalh i a kong tehte khaan awk le sunparnak pek awkah caanṭha kan ngei. (Isa. 43:10) Salm 96 nih Jehovah kha sunparnak pek awkah a hleiin a kan forh. Mah salm hla kong kan i ruah tikah Jehovah kha hmuh awkah aa tlakmi sunparnak zeitindah kan pek khawh ti kha ruat.

Jehovah Kha Zeitindah Sunparnak Kan Pek Khawh?

8. Jehovah sunparnak kan pek khawh ning lamkhat cu zeidah a si? (Salm 96:1-3)

⁸ Salm 96:1-3 rel. A kong kan chimnak thawng in Jehovah kha sunparnak kan pek khawh. Mah Baibal caang ah “BAWIPA cu hla in thangṭhat u,” ‘a kan khamhnak thawngṭha kha chim u,’ “miphun hna sinah a sunparnak kha thanh u” tiah a ti. Cutin kan tuahnak thawng in vancung kan Pa kha sunparnak kan pek khawh. Zumhfekmi Judah mi hna le kumzabu pakhatnak Khrihfa hna cu Jehovah nih a tuahpiakmi hna thilṭha kong kha midang sinah lungtho tein an chim i Pathian min ṭha kha an kilven. (Dan. 3:16-18; Lam. 4:29) Kannih tah zeitindah cutin kan tuah khawh?

9-10. Angelena hmuhtonnak in zeidah na cawn khawh? (Hmanthlak zong zoh.)

⁹ United States ah a ummi unaunu Angelena a kong hi ruat hmanh. Rian a ṭuannak company ah Jehovah min ṭhatnak kha ralṭha tein a rak kilven. Mithar a si caah Angelena cu meeting ah sawm a si i company ah a lutkami hna cu an hnulei sining kong chimnak caanṭha pek an si. Jehovah Tehte a si ruang ah aa nuamhnak kong kha hmanthlak in langhter awkah Angelena cu aa tim. Asinain amah chim caan a phanh hlante ah mi pakhat nih Jehovah Tehte pakhat in a ṭhangmi ka rak si tiah a ti i kan zumhnak kha a thangchiat. Angelena nih hitin a ti: “Ka thin  a phang tuk. Asinain ‘Jehovah kong cutin a chimmi kha ka zoh sawhsawh lai maw asiloah ka dirkamh lai dah?’ tiah ka ruat.”

¹⁰ Mah pa nih a chim dih tikah Angelena cu a lung chung in tawi tein thla a cam. Mah hnuah hitin a ti: “Kei zong nangmah bantuk in Jehovah Tehte pakhat in a ṭhangmi ka si ve. Atu tiang ka si rih.” Thil sining cu a ṭha tuk lo nain Angelena cu lungdai tein a um. Unau pawl he Jehovah nuam tein an biakṭi lio hmanthlak kha a hmuhsak hna i a zumhnak kong kha upatnak tein a chimh hna. (1 Pet. 3:15) Mah hnuah zeidah a cang? Angelena nih a chim dih tikah mah pa cu a lungput aa thleng. Cun Jehovah Tehte a rak si lio i aa nuamhnak kong kha a hun chim. Angelena nih hitin a ti: “Jehovah cu thangṭhat awk a tlak. A min kilvennak rian a kan pekmi cu tinvo sung taktak a si.” Kannih zong midang nih Jehovah min an thangchiat tikah sunparnak pek awk le thangṭhat awkah rian kan ngei ve.

11. Salm 96:8 i phunglam kha Jehovah a biami hna nih zeitindah an zulh?

¹¹ Salm 96:8 rel. Kan ngeihmi a sunglawimi thil in Jehovah kha sunparnak kan pek khawh. Jehovah a bia taktakmi hna nih cutin an tuah zungzal. (Ptb. 3:9) Tahchunhnak ah, Israel mi nih biakinn saknak le remhnak caah thawhlawm an pek. (2 Si. 12:4, 5; 1 Chan. 29:3-9) Zultu cheukhat nih “an ngeihchiah kha hmang in” Jesuh le lamkaltu pawl kha an bawmh hna. (Luka 8:1-3) Kumzabu pakhatnak Khrihfa hna zong nih harnak a tongmi unau pawl kha bawmhnak an kuat hna. (Lam. 11:27-29) Tuchan zong ah lungtho tein thawhlawm peknak thawng in Jehovah kha sunparnak kan pek khawh.

12. Thawhlawm kan pekmi nih Jehovah kha zeitindah sunparnak a hmuhter? (Hmanthlak zong zoh.)

¹² Thawhlawm kan pekmi nih Jehovah kha sunparnak a hmuhter. Hmuhtonnak pakhat hi zoh hmanh. Zimbabwe ram ah caan saupi khua a khen caah harnak tampi an tonnak kong kha 2020 report ah a langhter. Unaunu Prisca i telin mi nuai tampi cu ei awk an ngei lo. Asinain Prisca cu a hlan bantuk in Nithum Ni le Ninga Ni fatin phungchim a vak. Leithuan caan hmanh ah cutin a tuah. Lo rian ṭuan loin phungchim a vah caah a innpa pawl nih an nihsawh i “Ei awk ngei loin na thi te lai” tiah an ti. “Jehovah nih a salle kha ei  awk ngei loin a chia bal hna lo” tiah Prisca nih a leh hna. Cu hnu tlawmpal ah bupi sinin tirawl bawmhnak a hmuh. Mah bawmhnak cu thawhlawm hmang in an pekmi a si. Prisca a innpa pawl cu an lung a suk tuk hna i “Pathian nih aan zohkhenh taktak ko. Cucaah a kong kha tam deuh in cawn kan duh ve” tiah an ti. A innpa pasarih cu Khrihfabu pumhnak ah an hun i pum.

13. Kan nuncan ziaza in Jehovah kha zeitindah sunparnak kan pek khawh? (Salm 96:9)

¹³ Salm 96:9 rel. Kan nuncan ziaza in Jehovah kha sunparnak kan pek khawh. Jehovah biakinn ah rian a ṭuanmi tlangbawi hna cu pumsalei in an thian a hau. (Ex. 40:30-32) Asinain pumsalei thiannak nakin ziazalei thiannak cu a biapi deuh. (Salm 24:3, 4; 1 Pet. 1:15, 16) Baibal nih “Kan mihlun kha i phoih in mithar kan i hruk a hau” tiah a ti. Mah cu a thurhnawmmi ruahnak le tuahsernak vialte kha hrial in kan ruahnak le kan tuahsernak ah Jehovah sining hna kan langhter a hau tinak a si. (Kol. 3:9, 10) Jehovah bawmhnak thawng in a ṭhalo tukmi nuncan ziaza a ngeimi hna hmanh an i thleng kho i mithar an i hruk kho.

14. Jack hmuhtonnak in zeidah na cawn khawh? (Hmanthlak zong zoh.)

¹⁴ A puarhrang i ṭih a nun tuk caah Khuachia Pa ti hmanh in an auhmi Jack hmuhtonnak kong hi ruat hmanh. A sualnak ruang ah Jack cu thih dan pek a si. Asinain thah a si hlanah a umnak thonginn ah a ra tawnmi unaupa pakhat he Baibal an cawng. Jack cu a nuncan ziaza a rak ṭhalo tuk nain a mihlun kha aa phoih i caan tlawmpal a rauh ah tipil a ing. Thah a si ni ah Jack cu aa thleng tuk cang, cucaah thonginn cawngtu cheukhat cu mangṭha an cah pah in an mitthli a ha dih. Thongbawi pakhat nih hitin a ti: “Jack cu hika hmun ah ṭih a nung bikmi thongtla a rak si. Atu cu a zia a ṭha bikmi a si cang.” Jack thah a si hnu a hmai zarh ah zarh fatin a ra tawnmi unaupa hna cu pumhnak tuahpi awkah an ra ṭhan. Mah ah a voikhatnak aa pummi thongtla pakhat a um. Mah thongtla pa cu zeinihdah i pumh awkah a forh? Jack a nuncan ziaza aa thlenmi nih a forh i Jehovah biak awkah zeidah tuah a herh ti kha hngalh a duh. Kan nuncan ziaza nih vancung kan Pa kha sunparnak a hmuhter khawh ti cu a fiang ko!—1 Pet. 2:12.

 A Rauhhlan Ah Jehovah Nih Zeitindah A Min A Sunparter Lai?

15. A rauhhlan ah Jehovah nih zeitindah a min a sunparter lai? (Salm 96:10-13)

¹⁵ Salm 96:10-13 rel. Salm 96 i a donghnak cacaang hna nih Jehovah cu a dingmi Biaceihtu le Siangpahrang a si ti kha a langhter. Jehovah nih a rauhhlan ah zeitindah a min a sunparter lai? A biaceihnak thawng in a si. A min thang a chiattertu a Liannganmi Babilon kha a hrawh cang lai. (Biat. 17:5, 16; 19:1, 2) A Liannganmi Babilon hrawh a simi kha an hmuh tikah mi cheukhat cu kanmah he Jehovah biaknak ah an hun i fonh kho. Armageddon ah Jehovah nih Satan vawlei ṭhalo kha a hrawh dih lai, amah a ralchanhmi le a min thang a chiattermi vialte zong a hloh dih hna lai. Asinain amah a dawmi, a nawl a ngaimi le sunparnak a petu vialte kha a khamh hna lai. (Mar. 8:38; 2 Thes. 1:6-10) Khrih Kum Thongkhat Uknak i a hmanung bik hneksaknak a dih hnuah Jehovah nih a min kha tling tein a thianter lai. (Biat. 20:7-10) Mah tikah “ti nih rili kha a khuh bantuk in vawlei cu BAWIPA sunparnak hngalhnak in a khat ve lai.”—Hab. 2:14.

16. Zei tuah awkah dah bia na khiah? (Hmanthlak zong zoh.)

¹⁶ Mi vialte nih Jehovah kha a min he aa tlakmi sunparnak an pek tikah zeitluk in dah a nuamh lai! Mah caan a phanh hlanah caanṭha kan hmuh fatin Pathian kha sunparnak pek awkah kan si khawh chung in i zuam hna u sih. Mah cu a biapi tukmi a si caah Uktu Bu nih Salm 96:8 kha 2025 kumcaang Baibal in an thim. Hitin a ti: “A min he aa tlakmi sunparnak kha BAWIPA cu pe u.”