CAWN AWK CAPAR 3
HLA 35 A Biapi Deuhmi Thil Kha Hngal
Jehovah Lung A Lawmhtermi Biakhiahnak Tuah
“BAWIPA ṭih cu fimnak hramthawknak a si, a Thiang Mi [Pathian] hngalh cu a thukmi thil hmuh khawhnak a si.”—PTB. 9:10.
A BIK IN LANGHTERMI
A ṭhami biakhiahnak tuah awkah fimnak, hngalhthiamnak le thleidan khawhnak zeitindah kan hman awk a si timi kong kan hngalh lai.
1. Kan dihlak in zei tuah awkah dah kan i harh?
NIFATIN biakhiahnak kan tuah a hau. Thaithawh zeidah ka ei lai asiloah zeitik ah dah ka ih lai ti bantuk biakhiahnak cu a fawimi an si. Asinain kan ngandamnak, kan i nuamhnak, kan dawtmi hna le kan biaknak cung ah huham an ngei khomi biakhiahnak tu cu tuah awkah kan i harh. Kanmah le kan chungkhar caah ṭhatnak a chuahtermi biakhiahnak tuah kan duh. Mah leng ah Jehovah lung a lawmhtermi biakhiahnak zong tuah kan duh.—Rom 12:1, 2.
2. A ṭhami biakhiahnak tuah khawh awkah zeinihdah aan bawmh lai?
2 A ṭhami biakhiahnak tuah khawh awkah (1) a konglam hngalh i zuam, (2) Jehovah hmuh ning kha ruat, (3) naa thim khawhmi kha ṭha tein tuaktan. Hi capar ah mah thil pathum kong kha kan i ruah lai. Mah nih thleidan khawhnak kan ngeihmi kha a ṭhanchoter lai.—Ptb. 2:11.
A Konglam Hngalh I Zuam
3. Biakhiahnak tuah hlanah a konglam hngalh awkah zeicah i zuam hmasa a herh? Tahchunhnak pe.
3 A ṭhami biakhiahnak tuah khawh awkah a konglam hngalh kan i zuam hmasa a hau. Zeicah a biapit? Tahchunhnak ah, a zual tukmi zawtnak a ngeimi pakhat nih a zawtnak kong kha siibawi sinah a hal hei ti u sih. Mizaw kha zoh hmasa loin le biahalnak zeihmanh tuah hmasa loin siibawi nih thlop awkah bia a khiak colh lai maw? A khiak lai lo. Nang zong a biapimi a konglam hngalh awkah naa zuam hmasa ahcun a ṭhami biakhiahnak na tuah khawh lai. Zeitindah cutin na tuah khawh?
4. Phungthlukbia 18:13 ning in a konglam hngalh awkah zeidah na tuah khawh? (Hmanthlak zong zoh.)
4 A konglam hngalh awkah biahalnak na tuah khawh. Tahchunhnak ah, hnianghrawmnak ah sawm na si hei ti u sih. Naa tel lai maw? Hnianghrawmnak a tuahtu asiloah a timhtuah ning kha ṭha tein na hngalh lo ahcun hi bantuk biahalnak hi na tuah a hau lai: “Khoika ah le zeitik ah dah a si lai? Mi pa zeizat dah an i tel lai? Aho nih dah a tlangtlak lai? Zei bantuk mi dah an i tel lai? Zeidah tuah a si lai? Zu tah aa tel lai maw?” Mah bantuk biahalnak nih a ṭhami biakhiahnak tuah khawh awkah aan bawmh lai.—Phungthlukbia 18:13 rel.
Biahalnak tuah law a konglam hngalh i zuam (Catlangbu 4 zoh) a
5. A konglam na hngalh hnuah zeidah na tuah awk a si?
5 A konglam na hngalh hnuah thil sining dihlak kha ṭha tein dothlat. Tahchunhnak ah, Baibal phunglam zei ah a rel lomi an i tel asiloah tlangtlatu um loin zu danghnak a um lai ti na hngalh ah tah zeitin? Mah hnianghrawmnak cu aukhuang cercur in tuahmi puai ah a cang kho ti kha na hngal maw? (1 Pet. 4:3) Mah hnianghrawmnak cu phungchim vah caan asiloah pumh caan he aa ton ah tah zeitin? Thil sining dihlak kha na hngalh ahcun a ṭhami biakhiahnak tuah awkah naa fawih deuh lai. Asinain a dang na tuah dingmi pakhat a um rih. Thil sining kong he aa tlaiin na hmuh ning kha ṭha tein na hngalh cang. Asinain hitin i hal: ‘Jehovah nih tah zeitindah a hmuh?’—Ptb. 2:6.
Jehovah Hmuh Ning Kha Ruat
6. Jeim 1:5 ning in zeicah Jehovah sinah bawmhnak kan hal awk a si?
6 Jehovah hmuh ning hngalhthiam awkah a sinah bawmhnak hal. Kan biakhiahnak nih a lung a lawmhter lai maw, lawmhter lai lo ti thleidan khawh awkah a bawmmi fimnak kaan pek hna lai tiah Jehovah nih bia a kan kamh. “Mawhchiatnak um loin mi vialte siang ngai in a petu Pathian nih” cu bantuk fimnak kha a kan pek.—Jeim 1:5 rel.
7. Jehovah hmuh ning hngalh awkah zeidah na tuah khawh? Tahchunhnak pe.
7 Jehovah sinah lamhruainak na hal hnuah na thlacamnak aan leh ning kha hngalh i zuam. Tahchunhnak ah, khual na tlawn lioah lam na tlau ahcun cuka hmun i a ummi pakhatkhat kha bawmhnak na hal ko lai. Asinain aan leh manh hlanah na kaltak lai maw? Na kaltak lai lo ti cu a fiang ko. Mah canah lamhruainak aan pekmi kha ṭha tein na ngaih ko lai. Cu bantuk in Jehovah sinah fimnak na hal hnuah na thlacamnak aan leh ning hngalh khawh awkah mah thil sining he aa tlakmi Baibal phunglam le nawlbia kha na hlathlai khawh. A hmasa ah langhtermi hnianghrawmnak ah kaa tel lai maw, tel lai lo timi biakhiahnak na tuah tikah aukhuang cercur in puai tuahnak kong le a ṭha lomi hawikomhnak kong Baibal chimmi kha na tuaktan khawh. Cun nangmah duhnak si loin Pathian Pennak hmasa bik ah chiah a herhnak kong zong na ruah khawh.—Matt. 6:33; Rom 13:13; 1 Kor. 15:33.
8. Lamhruainak na kawl tikah bawmhnak na herh ahcun zeidah na tuah khawh? (Hmanthlak zong zoh.)
8 A caan ah lamhruainak na kawl tikah bawmhnak na herh men lai. Hmuhtonnak tampi a ngeimi unau pakhat kha ruahnak cheuhnak na hal khawh. Asinain nangmah tein hlathlainak na tuah ahcun ṭhatnak tampi na hmuh lai. Jehovah Tehte Hna i Baibal Hlathlainak Ca Lamhruainak le Khrihfa Nunning Caah Baibal Caang Hna ti bantuk hlathlainak hriamnam ah a konglam tampi a um. Na hmuitinh cu Jehovah lung a lawmhtermi biakhiahnak tuah a si ti kha i cinken.
Jehovah hmuh ning kha ruat (Catlangbu 8 zoh) b
9. Kan biakhiahnak nih Jehovah lung a lawmhter lai maw, lawmhter lai lo ti kha zeitindah kan hngalh khawh? (Efesa 5:17)
9 Kan biakhiahnak nih Jehovah lung a lawmhter lai maw, lawmhter lai lo ti kha zeitindah kan hngalh khawh? Pakhatnak, Jehovah kong kha ṭha tein hngalh hmasa a hau. Baibal nih “A Thiang Mi [Pathian] hngalh cu a thukmi thil hmuh khawhnak a si” tiah a ti. (Ptb. 9:10) Hngalhthiamnak taktak cu Jehovah sining, aa tinhmi, a duhmi le a duh lomi thil hngalhnak in a rami a si. Hitin i hal: ‘Jehovah kong ka hngalhmi cung ah hrambunh in a lung a lawmhter hngami zei biakhiahnak dah ka tuah khawh?’—Efesa 5:17 rel.
10. Baibal phunglam cu zeicah chungkhar phunglam le nunphung nakin a biapit deuh?
10 Jehovah lung lawmhter awkah kan dawtmi hna an ngaih a chiattermi thil kha a caan ah tuah a hau men lai. Tahchunhnak ah, chungkhar cheukhat ah nulepa nih a cuza cangmi an fanu kha mirum pa asiloah man tampi a pe khomi pa vatter an duh men lai. Asinain mah pa cu thlaraulei in a ṭhawngmi a si men lai lo. An fanu kha thilri chawvalei in zaangdam tein nung seh ti an duh caah a si ti cu a hmaan ko. Asinain an fanu nih hitin aa hal awk a si: ‘Mah pa nih Jehovah he a ṭhami pehtlaihnak ngeih peng awkah a ka bawm kho lai maw? Jehovah nih tah mah thil sining kha zeitindah a hmuh?’ A phi kha Matthai 6:33 ah kan hmuh. Mah ah Khrihfa cu “Pennak kha biapi bik ah chiah zungzal” ding in forh kan si. Nulepa le hawikom kha kan upat ko hna nain biapi bik ah kan chiah dingmi cu Jehovah lung lawmhter kha a si.
Naa Thim Khawhmi Kha Tuaktan
11. Naa thim khawhmi tuaktan awkah Filipi 1:9, 10 i zei sining nih dah aan bawmh lai?
11 Na biakhiahnak cung ah huham a ngeimi Baibal phunglam kong na ruah hnuah naa thim khawhmi kha ṭha tein tuaktan. (Filipi 1:9, 10 rel.) Thleidan khawhnak na ngeih ahcun naa thim khawhmi pakhat cio i a phichuak kha na hmuh chung khawh lai. A caan ah cun biakhiahnak kha fawi tein na tuah khawh men lai. Asinain biakhiahnak dihlak in cun a si lo. A harmi thil sining hmanh ah thleidan khawhnak na ngeih ahcun a ṭhami biakhiahnak na tuah khawh lai.
12-13. Rian i thim tikah thleidan khawhnak nih a ṭhami biakhiahnak tuah awkah zeitindah aan bawmh lai?
12 Tahchunhnak ah, na chungkhar zohkhenh khawh awkah rian na kawl hei ti u sih. Rian pahnih na hmuh. Zei bantuk rian dah an si, zeitik ah dah na ṭuan lai, tlun kalnak tah aa hlat maw ti bantuk a konglam dihlak kha na tuaktan cang. A pahnih in Baibal nih a cohlanmi rian an si ko lai. Na huam deuhmi phun asiloah tangka tam deuh aan hmuhter hngami rian kha i thim na duh deuh ko lai. Asinain biakhiahnak na tuah hlanah na ruah dingmi a um rih.
13 Hitin i hal: ‘Mah rian hi ka ṭuan ahcun kaa pumh caan he aa tong lai maw? Asiloah lungthinlei in siseh, thlaraulei in siseh ka chungkhar zohkhenh awkah a caan a za in ka ngei lai maw?’ Cutin naa hal ahcun thilri chawva si loin na biaknak le na chungkhar ti bantuk “a biapi deuhmi thil” kha a hmasa ah na chiah khawh lai. Cun Jehovah lung a lawmhter dingmi biakhiahnak zong na tuah khawh lai.
14. Thleidan khawhnak le dawtnak nih midang tlukrilhter lo awkah zeitindah a kan bawmh lai?
14 Thleidan khawhnak nih ‘midang a tlukrilhter’ khomi biakhiahnak tuah lo awkah a kan bawmh lai. (Fil. 1:10) Hrukaih ning le i ṭamh ning he aa tlaiin biakhiahnak kan tuah tikah mah cu a biapi tukmi a si. Tahchunhnak ah, kan duhmi hrukaih ning le i ṭam ning nih unau pawl le midang kha a tlukrilhter khawh hna ah tah zeitin? Thleidan khawhnak nih midang hmuh ning kha upat awkah a kan bawmh lai. Mah leng ah dawtnak nih “midang ca ṭhatnak” kha ruat in a zatawk in i hrukaih awkah a kan forh lai. (1 Kor. 10:23, 24, 32; 1 Tim. 2:9, 10) Cun midang cung ah dawtnak le upatnak a langhtermi biakhiahnak kan tuah khawh lai.
15. A biapimi biakhiahnak tuah hlanah zeidah a herh?
15 A biapimi biakhiahnak na tuah tikah na hlawh a tlin nakhnga zeidah tuah a hau ti kha ruat. Jesuh nih “tuak” hmasa ding in a kan cawnpiak. (Luka 14:28) Na biakhiahnak a hlawh a tlin nakhnga a caan, tangka le thazaang zeitluk tam dah a dih lai ti kha ruat. Thil sining cheukhat ah cun na chungkhar pawl nih zeitindah an in bawmh khawh timi kong kha nan i ruahṭi a hau men lai. Cutin tuah cu zeicah a ṭhat? Mah nih na biakhiahnak thlen a hau maw asiloah a ṭha deuhmi thim khawhmi a um maw ti aan hngalhter lai. Na chungkharmi kha na theihter hna i ruahnak na hal hna ahcun na biakhiahnak a hlawh a tlin nakhnga bawmh an in duh lai.—Ptb. 15:22.
A Hlawh A Tling Hngami Biakhiahnak Tuah
16. A hlawh a tling hngami biakhiahnak tuah awkah zeinihdah aan bawmh lai? (“ A Ṭhami Biakhiahnak Tuah Khawh Ning” timi rinli kulh zong zoh.)
16 Hi capar i ruahnak cheuhnak na zulh ahcun a ṭhami biakhiahnak na tuah khawh lai. A konglam kha ṭha tein na hngalh cang, Jehovah lung a lawmhtermi biakhiahnak tuah awkah aan bawm khomi phunglam zong na hlathlai cang. Atu cu na biakhiahnak a hlawh a tlin nakhnga Jehovah sinah bawmhnak hal.
17. A ṭhami biakhiahnak tuah khawh awkah zeidah a biapi bik?
17 Hlanah a hlawh a tlingmi biakhiahnak tampi na tuah cang hmanh ah a ṭhami biakhiahnak tuah peng awkah na fimnak le na hmuhtonnak si loin Jehovah fimnak i bochan a hau ti kha i cinken. Amah lawnglawng nih fimnak, hngalhthiamnak le thleidan khawhnak taktak aan pek khawh. (Ptb. 2:1-5) Jehovah nih a lung a lawmhtermi biakhiahnak tuah khawh awkah aan bawmh lai.—Salm 23:2, 3.
HLA 28 Jehovah Hawi Sinak
