1. Kum fatin tuahmi Jesuh A Thih Philhlonak ah i pumhnak in zeitindah ṭhatnak kan hmuh?

 TLANHNAK man cu a sunglawi tukmi laksawng a si ti kha na hna a tla ko lai. (2 Kor. 9:15) Jesuh nih a nunnak kha raithawinak in a pek caah Jehovah he a ṭhami pehtlaihnak kan ngei kho. Zungzal nunnak ruahchannak zong kan ngei kho. Cucaah tlanhnak man cung le dawtnak in a khatmi Jehovah cung ah kan i lawmh tuk awk a si, a si ko lo maw? (Rom 5:8) Jehovah le Jesuh nih an kan tuahpiakmi cung ah kan i lawmh peng khawh nakhnga Jesuh nih A Thih Philhlonak kha kum fatin tuah ding in a kan fial.—Luka 22:19, 20.

2. Hi capar ah zei kong dah kan i ruah hna lai?

² Tukum Jesuh A Thih Philhlonak cu 2025, April 12 ah tuah a si lai. Kan dihlak in i pumh awkah kan i tim lai ti cu a fiang ko. Mah Philhlonak caan chung ah Jehovah le a fapa nih a kan tuahpiakmi kong kha a caan pe in ṭha tein kan ruah a ahcun ṭhathnemhnak tampi kan hmu lai. Hi capar ah tlanhnak man nih Jehovah le a fapa kong zeidah a kan cawnpiak timi kong kan i ruah hna lai. A hnu capar ah tlanhnak man in zeitindah ṭhatnak kan hmuh khawh ti le zeitindah lawmhnak kan langhter khawh timi kong kan i ruah hna lai.

 Tlanhnak Man In Jehovah Kong Kan Cawnmi

3. Mi pakhat thihnak nih mi nuai tampi kha zeitindah a luatter khawh hna? (Hmanthlak zong zoh.)

³ Tlanhnak man nih Jehovah dinnak kong a kan cawnpiak. (Deut. 32:4) Zeiti lam in dah? Mah hi ruat hmanh: Adam nih nawl a buar caah thihnak a chuahtertu sualnak ro kha kan co. (Rom 5:12) Sualnak le thihnak in kan luat nakhnga Jehovah nih Jesuh kha tlanhnak man pek awkah a rak thlah. Asinain a tlingmi mi pakhat raithawinak nih mi nuai tampi kha zeitindah a luatter khawh hna lai? Lamkaltu Paul nih hitin a ti: “Mipa pakhat [Adam] nawlngaih lonak nih mi tampi kha misual ah a canter hna. Cu bantuk in mipa pakhat [Jesuh] nawlngaihnak nih mi tampi kha miding ah a canter hna lai.” (Rom 5:19; 1 Tim. 2:6) Phundang in cun a tlingmi pa pakhat nawlngaih lonak nih sualnak le thihnak sal ah a kan phakter. Cu bantuk in a tlingmi pa pakhat nawlngaihnak nih sualnak le thihnak in a kan luatter ve.

4. Tlanhnak man pek hau loin Adam tefa lakin nawlngaimi hna kha Jehovah nih zeicah zungzal in a nunter hna lo?

⁴ Kanmah khamh awkah Jesuh cu thih a herh taktak maw? Tlanhnak man pek hau loin Adam tefa lakin nawlngaimi hna kha zeicah Jehovah nih zungzal in a nunter ko hna lo? Mah cu mitlinglo a simi hna caah a dingmi le aa tlakmi thil a lo men lai. Asinain Jehovah dinnak he cun aa tlakmi a si lo. Jehovah cu a dingmi a si caah Adam nih hramhram in nawl a buarmi kha zei rel loin a um lo.

5. Jehovah nih a dingmi thil a tuah zungzal lai ti kha zeicah kan zumh khawh?

⁵ Asinain Jehovah nih a dinnak kha ruat loin mitlinglo a simi Adam tefa kha zungzal in a nunter hna ah tah zeitin? Pathian cu dinnak zei ah a rel lomi a si i hmailei zong ah cutin a si peng lai tiah mi nih an ruah khawh. Cun a biakam ning in a tuah lomi a si ti zong in an ruah khawh. Mah cu a hmaan lo ti kha kan hngalh. Jehovah nih mahca ṭhatnak hlaw in a Fapa ngeihchunhte kha raithawinak caah a kan peknak thawng in a dingmi thil kha a rak tuah cang. Cucaah hmailei zong ah a dingmi thil a tuah zungzal lai ti kha kan zumh khawh.

6. Tlanhnak man nih Jehovah dawtnak a langhter ning lamkhat cu zeidah a si? (1 Johan 4:9, 10)

⁶ Tlanhnak man nih Jehovah dinnak lawng si loin zeitluk in dah a kan dawt ti zong hngalhthiam awkah a kan bawmh khawh. (Joh. 3:16; 1 Johan 4:9, 10 rel.) Tlanhnak man kong in Jehovah nih zungzal in nunter a kan duh i a chungkhar ah telter a kan duh ti kha kan hngalh khawh. Mah hi ruat hmanh:  Adam nih sualnak a tuah tikah Jehovah nih a chungkhar in a ṭhawl. Cucaah kan chuahka in Pathian chungkhar ah kan i tel colh lo. Asinain tlanhnak man thawng in Jehovah nih kan sualnak kha a kan ngaihthiam. Hmailei ah zumhnak a langhtermi mi vialte kha a chungkhar in a kan cohlan ṭhan lai. Atu hmanh ah Jehovah le unau pawl he pehtlaihnak ṭha kan ngei kho. Jehovah nih a kan dawt tuk, a si ko lo maw?—Rom 5:10, 11.

7. Jehovah nih a kan dawt tuk ti kha Jesuh inmi sifah harnak nih zeitindah a kan hngalhter?

⁷ Tlanhnak man cu a sunlawi tukmi a si ti kha kan hngalh ahcun Jehovah dawtnak zong kan hngalhthiam deuh lai. Harnak caan ah Pathian salle cu zumhfek tein an um kho lai lo tiah Satan nih sual a puh. Satan a palh ti langhter awkah Jehovah nih Jesuh kha a thih hlanah sifah harnak in ding in nawl a awnh. (Job 2:1-5; 1 Pet. 2:21) Ral pawl nih an nihsawhmi, ralkap pawl nih hrihrual in an tukmi, tung cung ah thir in an khenhmi le an thahmi vialte kha a hmuh dih. (Matt. 27:28-31, 39) Jehovah nih mah thil vialte kha a kham khawh ko. Tahchunhnak ah, “Pathian nih a duh ahcun khamh ko seh” tiah an serhsat lioah a khamh khawh ko. (Matt. 27:42, 43) Cutin a tuah ahcun Jesuh nih tlanhnak man a pe kho ti lai lo i ruahchannak zong kan ngei kho lai lo. Cucaah Jehovah nih a Fapa kha a thih tiang sifah harnak innak nawl a awnh.

8. A Fapa nih fahnak a inmi a hmuh tikah Jehovah cu a lung a fak maw? Fianter. (Hmanthlak zong zoh.)

⁸ Jehovah cu lianngan bik a si caah intuarnak a ngei lai lo tiah kan ruah awk a si lo. Jehovah nih amah he aa lo in a kan ser. Cucaah intuarnak kan ngei i amah zong a ngei ve lai ti cu a fiang ko. Baibal nih Jehovah cu ‘a ngaih a chia’ i ‘a thin a hung’ kho tiah a langhter. (Salm 78:40, 41) Abraham le Isak kong kha ruat hmanh. Pathian nih Abraham kha a fapa ngeihchunhte pek awkah a rak hal. (Gen. 22:9-12; Heb. 11:17-19) A fapa thah a timh lioah Abraham cu zeitindah a um lai ti kha kan mitthlam ah kan cuanter khawh. Cu bantuk in mi nih a Fapa kha an hrem i an thahmi a hmuh tikah Jehovah cu zeitluk in dah a ngaih a chiat lai?—An Zumhnak I Zohchunh Hna—Abraham, Ṭhen 2 timi video kha jw.org ah zoh.

9. Amah a biami pawl Jehovah nih zeitluk in dah a kan dawt ti hngalhthiam awkah Rom 8:32, 38, 39 nih zeitindah aan bawmh?

⁹ Chungkhar le rualchan asiloah hawikom ṭha pawl i telin ahohmanh Jehovah tluk in a kan daw khotu an um lo ti kha tlanhnak man in kan hngalh khawh. (Rom 8:32, 38, 39 rel.) Kanmahle kanmah kan i dawtmi nakhmanh in Jehovah nih a kan dawt  deuh. Zungzal in nun na duh maw? Jehovah nih aan duhpiak chinchin. Na sualnak ngaihthiam na duh maw? Jehovah nih aan duhpiak chinchin. Jehovah nih tlanhnak man cung ah an i lawm lai, zumhnak an langhter lai i a nawl an ngaih lai tiah aa ruahchan. Tlanhnak man cu Jehovah nih a kan dawt taktak ti a langhtertu laksawng a si. Vawlei thar ah Jehovah dawtnak kong tam deuh in cawnnak caanṭha kan ngei lai.—Pct. 3:11

Tlanhnak Man In Jesuh Kong Kan Cawnmi

10. (a) Jesuh cu thah a si lainak kong he aa tlaiin zeicah a lungre a theih tuk? (b) Jesuh nih zeiti lam in dah Jehovah min kha a thianter? (“ Jesuh Zumhfehnak Nih Jehovah Min A Thianter” timi rinli kulh zong zoh.)

¹⁰ Jesuh nih a Pa min ṭhatnak kha biapi ah a chiah. (Joh. 14:31) Jesuh cu Pathian serhsattu in sualphawtnak he thah a simi nih a Pa min a chiatter lai kha a lungre a thei tuk. Cucaah “Ka Pa, a si khawh ahcun hi hrai hi ka ṭhialpiak ko” tiah thla a cam. (Matt. 26:39) A thih tiang zumhfek tein a umnak thawng in Jesuh nih a Pa min kha a thianter.

11. Jesuh nih mi cung ah zeitindah dawtnak a langhter? (Johan 13:1)

¹¹ Jesuh nih mi kha a dawt hna, a hleiin a zultu pawl a dawt tuk hna ti kha tlanhnak man nih a kan cawnpiak. (Ptb. 8:31; Johan 13:1 rel.) Tahchunhnak ah, Jesuh nih vawleicung a rat tikah a tuah dingmi rian cu a har tuk ti kha a hngalh. Fahnak in buin ka thi lai ti zong a hngalh. Asinain Jesuh nih mah rian kha rian sawhsawh in a hmu lo. Lungthin dihlak in phungchimnak le cawnpiaknak rian kha a ṭuan i midang a bawmh hna. A thih lai hmanh ah lamkaltu pawl kha an ke a ṭawlpiak hna, a hnemh hna i a cawnpiak rih hna. (Joh. 13:12-15) Tung cung an thlai lioah Jesuh nih a pawng ah an thlai vemi misual pa kha ruahchannak  a pek i a nu zong kha Johan sinah a ap. (Luka 23:42, 43; Joh. 19:26, 27) Jesuh nih a nunnak a kan pek lawng si loin vawleicung a nunnak kip ah minung a kan dawt tuk ti kha a langhter.

12. Jesuh nih zeitindah kan caah mahca ṭhatnak a hlawt peng?

¹² Khrih cu “voikhat ah zungzal ca in” a thi ko nain atu tiang kan caah mahca ṭhatnak a hlawt peng rih. (Rom 6:10) Zeiti lam in dah? Tlanhnak man in ṭhatnak tampi kan hmuh khawh nakhnga fakpi in aa zuam. Zeidah a tuah ti kha ruat hmanh. Siangpahrang, Tlangbawi Ngan le Khrihfabu lu in kan caah rian a ṭuan. (1 Kor. 15:25; Efe. 5:23; Heb. 2:17) Chiti thuhmi le mibu nganpi pumhnak rian zong kha a tlangtlak, mah rian cu harnak nganpi a dongh hlanah liim a si lai. b (Matt. 25:32; Mar. 13:27) Ni hmanung bik ni ah zumhawktlak sal thawng in thlarau rawl hmaan tein kan hmuh khawh nakhnga zong a timhtuah. (Matt. 24:45) Kum Thongkhat Uknak chung zong ah Jesuh nih kan caah ṭhatnak tampi a tuah rih lai. Jehovah nih Jesuh kha kan caah thih ding lawng si loin thilṭha tampi tuahpiak ding zong in a kan pek ti cu a fiang ko!

Cawng Zungzal

13. Ṭha tein ruahnak nih Pathian le Khrih dawtnak kong cawn peng awkah zeitindah a kan bawmh khawh?

¹³ Jehovah Pathian le Jesuh Khrih nih an kan tuahpiakmi kong ṭha tein na ruah ahcun zeitluk in dah an kan dawt ti kha na hngalh lai. Tukum Jesuh A Thih Philhlonak caan chung ah Matthai, Marka, Luka le Johan Baibal cauk pawl kha na rel khawh. Voikhat ah tam tuk rel ding in i zuam hlah. Mah canah duhsah tein rel law Jehovah le Jesuh kan dawt hna awk a sinak a ruang kha hlathlai. Cun na hngalhmi kha midang sinah chim.

14. Salm 119:97 ning in hlathlainak nih tlanhnak man le a dang thil thar kong cawn peng awkah zeitindah a kan bawmh lai? (Hmanthlak zong zoh.)

¹⁴ Biatak chung na umnak a sau cang ahcun Pathian dinnak, dawtnak le tlanhnak man ti bantuk kan theih lengmangmi a konglam hna in thil thar cawn ding a um ti hnga maw tiah na ruah men lai. A tak ti ahcun thil thar cawn ding a um zungzal lai. A si ahcun zeidah na tuah khawh? Kan cauk hna kha ṭha tein rel law na hngalhthiam lomi a um tikah hlathlainak tuah. Na hlathlaimi kong le mah in Jehovah,  a fapa le an dawtnak kong zeidah ka cawn khawh ti kha ṭha tein ruat.—Salm 119:97 rel.

15. Zeicah Baibal ah thuhmi ro hna kha kan kawl peng awk a si?

¹⁵ Baibal na rel tik asiloah hlathlainak na tuah tik paoh ah lungthawh awk ngai a simi a konglam thar pakhatkhat na hmuh lo ahcun na lung dong hlah. Tahchunhnak ah, sui kawltu hna nih sui tlang hme tete an hmuh khawh nakhnga lungsau tein suimilam tampi chung asiloah ni tampi chung an kawl. An hmuhmi sui tlang cu zeitluk a hmet hmanh ah a man a sungmi a si caah kawl an i zuam peng. Baibal ah thuhmi ro hna cu sui nakin a let tampi in a man a sung deuh! (Salm 119:127; Ptb. 8:10) Cucaah Baibal kha rel peng law thil thar cawn awkah lungsau tein kawl.—Salm 1:2.

16. Zeitindah Jehovah le Jesuh kha kan i zohchunh khawh hna?

¹⁶ Hlathlainak na tuah tikah na nunnak ah hman khawh ning lam kha kawl. Tahchunhnak ah, midang kha duhdanhnak ngei loin na pehtlaih hnanak thawng in Jehovah dinnak kha i zohchunh. A har hmanh ah mahca ṭhatnak kha hlaw. Lungtho tein Jehovah duhnak tuah law midang kha bawm hna. Cuticun a Pa cung le midang cung ah Jesuh ngeihmi dawtnak kha i zohchunh. Mah leng ah midang nih Jehovah pekmi laksawng cohlannak caanṭha an hmuh ve nakhnga Jesuh bantuk in thawngṭha chim hna.

17. A hnu capar ah zei kong dah kan i ruah hna lai?

¹⁷ Tlanhnak man kong kha ṭha tein kan hngalhthiam i kan sunsak ahcun Jehovah le a Fapa kan dawt hnanak cu a fek deuh lai. Anmah zong nih an kan dawt chinchin lai. (Joh. 14:21; Jeim 4:8) Cucaah Jehovah timhpiakmi hlathlainak hriamnam hna kha hmang in tlanhnak man kong kha cawng peng hna u sih. A hnu capar ah tlanhnak man in ṭhatnak kan hmuh khawh ning le Jehovah dawtnak cung ah lawmhnak kan langhter khawh ning lam cheukhat kong kan i ruah hna lai.