Ngaihchiat awk ngai a simi cu kum 13 hrawng ka si ah Jehovah he kan i pehtlaihnak cu a hung der. Ka sianginn kaiṭi hawi pawl cu a za a long tukmi an lo i kei zong anmah bantukin zanlonnak ngeih ka hun duh ve. Ka nu le ka pa nih an sermi dingrep zulh le Khrihfabu phunglam hna zulh cu a har tuk tiah ka ruah i Jehovah biak cu a har tukmi rian in ka hun hmuh. Jehovah cu a um taktak ti kha ka zumh ko nain amah cu ka naih kho lai lo tiah ka ruah.

Phungchim rianṭuannak ah hmaan tein cun kaa tel lo nain tlawmpal cu kaa tel. Phungchim ka kal tikah kaa timtuah bal lo, cucaah biahram thawk asiloah bia peh kha kaa harh. A phi chuak cu lennolh asiloah Baibal cawnpiaknak pakhat hmanh ka ngeih lo caah lohmun ah kaa nuam ti lo, mah ruangah phungchim rianṭuan kha hlan bantukin ka duh ti lo. Keimah le keimah hitin kaa hal: ‘Ahodah zarhkhat hnu zarhkhat, thlakhat hnu thlakhat in phungchim rian cu a ṭuan peng kho lai?’

Kum 17 ka si tikah zalong tein um ka duh. Cucaah ka thil kaa serh, inn in ka chuak i Australia  ah kaa ṭhial. Ka nule ka pa cu anmah he aa hlatnak hmun i kaa ṭhial caah an ngaih a chia tuk. An lungre cu a thei ko nain thlaraulei ah ka tuahtawnmi thil kha a tuah peng ko lai tiah an ka ruah.

Australia ahcun thlaraulei ah ka der chinchin. Pumhnak hna ah ka hun bau. Zankhat aa pum i zan dang ah nightclub ah a kalmi keimah bantuk mino pawl he kaa kawm. Hlanlio kong ka ruah ṭhan tikah biatak ah ka um buin vawlei he zong kaa pehtlai, asinain khoika hmanhah lungsi hnangamnak ka hmu lo ti kha ka hun hngalh.

Kum hnih hrawng a rauh hnuah ṭha tein ka hngalh lomi, chikkhatte kan i tonmi unaunu nih ka nunning kong kha a ka ruahter ṭhan. Nungak a simi unaunu panga he innkhat ah kan umṭi i peng zohkhenhtu le a nupi Tamara kha kan inn ah zarhkhat chung tlun dingin kan sawm hna. Khrihfabu caah a vapa a rian a tam tuk lioah Tamara cu kanmah he caan tampi a hmangṭi i aa nuam tuk. Mah kha ka duh tuk. Anih cu a fim tuk i chawnhbiak zong a fawi. Thlaraulei ah an rian a tammi hna cu a nuamh zong an i nuam tuk ti ka hun hngalh.

Tamara cu lungthawhnak a ngei tukmi a si. Biatak kha a sunsak i phungchim rian ṭuan kha a duh tuk. A ṭha bik in ka ṭuan lo caah kaa nuamh lo lioah anih cu Jehovah kha a ṭha bikin a pek caah aa nuam tuk. A ṭhami a lungput le aa nuamhnak cu ka nunnak ah tampi huham a ngei. A kong nih mah a biapimi biatak hi a ka ruahter: Jehovah nih kan dihlak in “lunglawm tein” le “lunglawmhnak hla he” ka bia hna seh ti a kan duh.—Salm 100:2.

Tamara nih a ngeihmi nuamhnak phun kha ngeih ka duh ve, asinain cutin i nuamh khawh awkah thlennak nganpi ka tuah a hau. Kum thum hrawng a caan ka lak ko nain kaa thleng kho colh lo. Asinain thlennak fate ka tuah hmasa. Phungchim rianṭuannak caah ka hun i timtuah i a caan ah manhcaan hmaikal ka ṭuan. Mah nih ṭihnak ngeih lo awk le mahle mah zumhnak ngeih deuh awkah a ka bawmh. Phungchimnak ah Baibal tam deuh ka hman caah nuamhnak ka hmu deuh ve. A rauhhlan ah thla fatin manhcaan hmaikal ka hun ṭuan.

Jehovah sinah an si khawh chungin aa pemi le lunglawm tein a rian a ṭuanmi ahopoah he i hawikomh dingin kaa thim. A ṭhami an tuahsernak nih ka nunnak ah zeidah a biapi bik timi ruah awk le nifatin Baibal rel awkah a ka bawmh. Phungchim rian ah ka hun i nuam deuh i a hnuah hmaanhmaan hmaikal ka hun ṭuan. Kum tampi chungah Khrihfabu ah lawmhnak le lungsinak ka hmuh hmasa bik a si.

Kum khat a rauh hnuah Jehovah a daw i phungchim rianṭuan a duhmi, dawtnak le zaangfahnak a ngeimi Alex kha ka hmuh. Anih cu bu rianṭuantu a si i pioneer zong kum ruk chung a ṭuan cangmi a si. Alex cu a herh deuhnak hmun a simi Malawi zongah a caan ah phungchim rian a ṭuan. A caah zohchunh awk ṭha a chiami missionary pawl he aa kom i mah nih a nunnak ah Jehovah rian kha pakhatnak ah chiah dingin a bawmh.

2003 ah Alex he kan i um i mah caan thawkin caantling rian kan ṭuanṭi. A ṭha tukmi kong hna kha kan cawng i Jehovah nih lam tampi in thluachuah a kan pek.

2009 ah Indonesia tikulh pakhat a simi,Timor-Leste timi ram fate pakhat ah missionary ṭuan dingin sawm kan si. Kan lung a cawlcang tuk nain a ṭih zong kan ṭih. Thlanga hnuah khuapi a simi Dili ah kan phan.

Kan inn thar cu a hmasa kan umnak he aa dang tuk. Nunphung, holh, rawl le nunning thar he aa tlakin thlennak kan tuah. Phungchim rian  kan ṭuannak ah a si a fak tukmi, sianginn a kai lomi le ralchanhtu hna he zong kan i tong. Raldohnak le zaangennak ruangah mi tampi cu lungthinlei le pumsalei ah harnak an tong. *

Phungchim rianṭuannak cu khuaruahhar awk ngai a si. Tahchunhnak ah, voikhat cu a ngaih a chia ngaimi kum 13 a simi Maria * he kan i tong. A luancia kum tlawmpal lioah a nu nih a thihtak i a pa he zong an i tong bal tuk lo. A ṭhirual pawl bantukin Maria nih a nunnak ah zeidah liim a duh ti kha a hngal lo. Voikhat cu a ṭah buin a intuarnak kong a ka chimhmi kha kaa cinken rih. Asinain an holh ṭha tein ka thiam rih lo caah a chimmi kha ka theithiam lo. Mah tikah Jehovah sinah thazaang ka pek khawh nakhnga ka bawm tiah thla ka cam. Cun a caah thazaang petu a si dingmi Baibal caang hna kha ka relpiak. Kum tlawmpal a rauh hnuah biatak nih Maria a lungput, a ziaza le a nunnak a thlenmi kha ka hmuh. Tipil a ing i atu cu amah tein Baibal cawnpiaknak zong a ngei cang. Atu ah Maria cu thlaraulei chungkhar nganpi a ngei cang i dawtmi ka si timi ruahnak zong a ngei cang.

Jehovah nih Timor-Leste i phungchim rianṭuannak kha thluachuah a pek. Thawngthanhtu tam deuh cu a luancia kum hra lioin tipil a ing cangmi an rak si ko nain hmaikal, bu rianṭuantu le Khrihfa upa in rian an ṭuan. A dang RTO rian le mahle holh in Baibal kong hrambunhmi cauk hna chuah khawh awkah an bawmh hna. Pumhnak ah hla an sakmi ka theih tik, an mithmai a panhmi ka hmuh hna tik le thlaraulei an ṭhanchomi ka hmuh hna tikah kaa lawm tuk.

Timor-Leste i ka nunnak cu Australia i kan nunning he aa dang tuk. Asinain a nuam tukmi nunnak kong kha ka mitthlam ah ka cuanter kho lo. A caan ah market ah ngacar le tisik anhnah a zuarmi, mi tampi he mawṭaw pakhat in khual kan tlawngṭi hna. Cun ni cheukhat ahcun a lin tukmi inn, a thur tukmi zel le ar an vahnak pawng hna ah Baibal cawnpiaknak kan tuah. Zuamcawhnak kan tong ko nain ‘mah cu khuaruahhar awk ngai a si’ tiah ka ruah tawn.

Hnulei sining kong ka ruah ṭhan tikah kumhra fai ka si lioin ka nu le ka pa nih Jehovah kong kha an ka cawnpiak i an ka bawmh caah kaa lawm tuk. Phungthlukbia 22:6 ah a chimmi bia kha keimah cung zongah a hmaan. Ka Nu le ka Pa cu Alex he Jehovah rian kan ṭuanmi an hmuh tikah an i uangthlar tuk. 2016 thawkin Australasia zung ṭengnge nih an tlangtlakmi hmun ah peng zohkhenhtu in rian kan ṭuan.

Caan cheukhat chung phungchim rian ah ka rak i nuamh lomi cu zumh awkah a har ngaimi a lo. Atu cu phungchim rianṭuan kha ka duh tuk. Kan nunnak ah zei bantuk thil sining a can hmanhah lungthin dihlak in Pathian rian ṭuannak lawngin lawmhnak taktak hmuh khawh a si ti kha ka hun hngalh. A luancia kum 18 chung Alex he Jehovah rian kan ṭuanṭimi cu ka nunnak ah kaa nuam bikmi a si. Salm caṭialtu David nih Jehovah sinah a chimmi bia a hmaan ning kha ka hun hngalhthiam: “Nangmah ah himnak a hmumi cu an i lawm lai i lawmhnak in hla an sa zungzal lai. . . . Nangmah thawngin lawmhnak taktak an hmu.”—Salm 5:11.