Jesuh nih a thih hlanah Salm 22:1 i David bia kha zeicah a cherhchanh?

Jesuh nih a thih hlan i hmanung bik a chimmi bia kha Matthai 27:46 ah hitin langhter a si: “Ka Pathian, ka Pathian zeicahdah na ka kaltak?” Cutin a chimnak thawngin Jesuh nih Salm 22:1 ah langhtermi salm caṭialtu David bia kha a tlinter. (Mar. 15:34) Jesuh nih a lung a dongh caah asiloah chikkhat a zumhnak a tlau caah cutin a chimmi a si tiah ruah cu a hmaan lomi a si. Jesuh nih amah thih a herhnak a ruang kha ṭha tein a hngalh i lungtho tein cutin tuah a rak a duh. (Matt. 16:21; 20:28) Cun a thih lai zongah Jehovah nih a pawngin “a kilveng” zungzal lai lo ti kha a hngalh. (Job 1:10, NW) Jehovah nih a kilven zungzal lo caah Jesuh nih a thih tiang zumhfek tein a um kho.—Mar. 14:35, 36.

Cu a si ah Jesuh nih zeicah salm chung bia kha a rak chim? Fiang tein cun kan hngal lo nain a si khomi a kong cheukhat kha kan i ruah hna lai. *

Mah bia a chimnak thawngin Jesuh nih a hleiin a thihnak kong ah Jehovah cu aa tel lo tiah a ti duhnak a si maw? Jehovah bawmhnak um loin Jesuh nih tlanhnak man kha a pek a hau. Anih cu minung a si i “mi vialte” caah a thih a hau.—Heb. 2:9.

Salm chung bia tlawmpal a cherchanhnak thawngin Jesuh nih salm Baibal cauk dihlak kha lungthin pe hna seh ti a duhnak a si maw? Mah caan lio i Judah mi hna nih salm  chung bia tampi kha an i baihat. Salm chung Baibal caangkhat an theih tikah a uk ningin an ruah khawh colh. Mah cu Jesuh duhnak a si ahcun mah nih Judah mi a zultu hna kha a thihnak kong he aa tlaimi salm chung i Baibal chimchungbia kong kha i cinken dingin a bawmh hna lai. (Salm 22:7, 8, 15, 16, 18, 24) Cun salm Baibal caang a donghnak nih Jehovah thang a ṭhatter i Jesuh kha vawleicung pumpi Siangpahrang in a langhter—Salm 22:27-31.

David chimmi bia a cherhchannak thawngin Jesuh nih sualnak ka ngei lo tiah a hleiin a chim duhmi a si maw? Jesuh cu thah a si hlanah Sanhedrin biaceihnak zung nih Pathian thang a chiat tiah phung ning loin bia an ceih. (Matt. 26:65, 66) Sanhedrin biaceihnak zung nih upadi ningin si loin zan tlai hnuah an i tong hna i khulrang in bia an ceih. (Matt. 26:59; Mar. 14:56-59) Jesuh nih “ka Pathian, ka Pathian zeicahdah na ka kaltak?” tiah a ti tikah mah dantatnak phun, in awkah zei palhnak hmanh a tuah lo ti kha lungthin a pekter duhmi hna a si men lai.

Jesuh nih salm caṭialtu David cu harnak a tong tiah midang a hngalhter ṭhanmi hna nih David cu Jehovah mithmai ṭha a sung a ti duhnak a si maw? Cutin biahalnak a tuah caah David cu Pathian cungah zumhnak a ngei lo tinak a si lo. Mah biahalnak a tuah hnuah Jehovah nih a mi pawl kha a khamh hna lai i thluachuah a pek peng hna lai ti a zumh kha a rak langhter. (Salm 22:23, 24, 27) “David Fapa” Jesuh hmanh thingtung cungah thlai in harnak a rak tong, mah nih Jesuh cu Jehovah mithmai ṭha a hmu ti lo tinak a si lo.—Matt. 21:9.

Jesuh nih a zumhfehnak tling tein a langhter khawh nakhnga Jehovah nih a kilven lo caah Jesuh cu a ngaih a chiat tukmi a si maw? A Fapa nih harnak tong in thih ding timi cu Jehovah i a hmasa aa tinhnak a si lo. Asinain a hmasa bik ralchanhnak a um caah cutin tuah a herhnak a si. Jesuh cu palhnak a tuah bal lo nain Satan chuahtermi biahalnak a phi pek awk le pa pakhat nih a sunghmi thil cawk ṭhan khawh awkah a herhmi tlanhnak man pek dingin Jesuh cu harnak ton in a thih a hau. (Mar. 8:31; 1 Pet. 2:21-24) Jehovah nih Jesuh kha a nunnak ah hmasa bik chikkhat chung a kilven lo lawng ah mah cu a tling kho lai.

Tungcung ah thih dingin Jehovah nih nawl a awnhnak a ruang kha a zultu pawl nih lungthin pek dingin bawmh awkah Jesuh nih aa zuammi a si maw? * Misual pakhat in tungcung ah thah a simi nih mi tampi a tlukrilhter hna lai ti kha Jesuh nih a hngalh. (1 Kor. 1:23) A zultu pawl nih a thihnak a kong taktak cungah lungthin an pek ahcun mah a sullam kha an hngalh lai. (Gal. 3:13, 14) Mah tikah Jesuh kha misual pakhat in si loin Khamhtu pakhat in an hmuh lai.

Jesuh nih mah bia a cherhchanmi cu zei ruang a si hmanhah cutin a tonmi cu Jehovah duhnak a si ti kha a hngalh. Mah salm bia a cherhchan hnu tlawmpal ah Jesuh nih “aa liim cang” tiah a ti. (Johan 19:30; Luka 22:37) Jehovah nih chikkhat a kilven lomi nih Jesuh kha vawlei ah a tuah dingmi thil kha a liimter khawh. Cun “Moses Phungbia chung le profet hna nih an ṭialmi chung le Salm chungah” a kong an ṭialmi zong kha a rak tlinter.—Luka 24:44.