1. Jehovah nih a mi hna kong he aa tlaiin zeidah a hngalh?

JEHOVAH PATHIAN nih “a mi cu a zaangfah hna.” (Salm 149:4) Mah nih a kan nuamhter tuk. Jehovah nih kan ngeihmi sining ṭha kha a hngalh, cun miṭha a si kho dingmi in a kan hmuh i a hawile si awk zongah a kan bawmh. A cungah zumhfek tein kan um ahcun kanmah he naih tein a um zungzal lai.—Johan 6:44.

2. Jehovah nih a kan dawt ti kha mi cheukhat nih zeicah zumh awkah an i harh?

² Mi cheukhat nih hitin an ti men lai: ‘Jehovah nih a miphun kha a phu ningin a dawt hna ti cu ka hngalh ko, asinain Jehovah nih pumpak in a ka dawt ti kha zeitindah ka zumh khawh lai?’ Mi cheukhat nih zeicah mah biahalnak cu an tuah? A ngakchiat lioah harnak tampi a rak tongmi Oksana * nih hitin a ti: “Tipil ka in lio le hmaikal rian ṭuan hram ka thawk lioah ka rak i nuam tuk. Asinain kum 15 a rauh hnuah ka ngakchiat lio i ka rak tonmi harnak kong kha ka hun hngalh ṭhan. Jehovah mithmai ṭha ka sung i a dawtnak hmuh awkah kaa tlak ti lo tiah ka hun ruah.” A ngakchiat lioah buaibainak tampi a rak tongmi hmaikal unaunu Yua nih hitin a ti: “Jehovah lunglawmhter ka duh caah a sinah ka pum kaa pe. Asinain a ka daw bal lo tiah ka rak ruah.”

3. Hi capar ah zei kong dah kan i ruah hna lai?

³ A cungah langhtermi unaunu pahnih bantukin Jehovah cu na dawt tuk ko nain a ka dawt timi kong he aa tlaiin lunghrinnak na ngei men lai. Pathian nih aan zohkhenh taktak ko ti kha zeicah na zumh a herh? Jehovah nih a ka daw lo tiah na ruah tikah zeinihdah aan bawmh khawh? Mah biahalnak a phi kha i ruah hna u sih.

4. Jehovah dawtnak cungah lunghrinnak ngeih cu zeicah ṭih a nun?

⁴ Dawtnak cu a ṭhawng tukmi a si. Jehovah nih a kan dawt ti kha kan zumh ahcun kan nunnak ah harnak a um hmanhah kan si khawh chungin a rian ṭuan kha kan duh lai. Asinain Pathian nih a kan zohkhenhnak cungah lunghrinnak kan ngeih ahcun ‘kan der taktak a si lai.’ (Ptb. 24:10) Cun kan lung a dongh i Pathian nih a kan daw lo tiah kan hun ruah ahcun Satan dohnak kha kan tei kho lai lo.—Efe. 6:16.

5. Pathian dawtnak cungah lunghrinnak a ngeimi unau cheukhat cungah zeidah a cang?

⁵ Tuchan ah zumhfekmi Khrihfa cheukhat cu lunghrinnak an ngeih caah thlaraulei ah an tha a der. Khrihfa upa James nih hitin a ti: “Bethel ah rian ka ṭuan i ramdang holh a hmangmi Khrihfabu lohmun ah kaa tel ko nain Jehovah nih a caah ka tuahmi kha a cohlang taktak maw tiah ka ruah. Jehovah nih ka thlacamnak a ngai hnga maw ti tiang hmanhin ka hun ruah.” Caantling rian a ṭuanmi Eva nih hitin a ti: “Jehovah dawtnak cungah lunghrinnak ngeih cu ṭih a nung tuk, zeicahtiah a caah kan tuahmi thil vialte cungah huham a ngei kho ti kha ka hngalh caah a si. Mah nih Jehovah rian na ṭuanmi kha aan ngolter khawh i a rian na ṭuannak ah naa nuamhnak zong a tlauter khawh.” Hmaikal le Khrihfa upa a simi Michael nih hitin a ti: “Pathian nih a kan zohkhenh ti kha na zumh lo ahcun duhsah in Pathian he nan i hlat lai.”

6. Pathian dawtnak cungah lunghrinnak kan ngeih tikah zeidah kan tuah awk a si?

⁶ Jehovah nih a kan daw lo timi ruahnak nih kan zumhnak a hrawh khawh ti kha mah hmuhtonnak hna nih an langhter. Asinain Pathian dawtnak cungah lunghrinnak kan hun ngeih tikah zeidah kan tuah awk a si? Mah ruahnak kha kan hloh colh awk a si. Cucaah Jehovah sinah mah “ruahnak” kha ‘Pathian daihnak nih na lungthin le na ruahnak him tein a chiah’ nakhnga thlenpiak dingin bawmhnak hal. (Salm 139:23; Fil. 4:6, 7) Cun mah ruahnak a ngeimi cu nangmah lawng na si lo ti kha philhhlah. A dang zumhfekmi unau pawl nih mah a ṭha lomi ruahnak kha an doh. Cun hlanlio Jehovah salle zong nih mah ruahnak kha an rak doh ve. Lamkaltu Paul sinin kan cawn khawhmi kong kha ruathmanh.

7. Paul nih zei bantuk buaibainak dah a rak ngeih?

⁷ Ṭuan awk rian cu a tam tuk caah ka ṭuan kho dih lai lo tiah a caan ah na ruat maw? Cutin na ruah ahcun Paul sining kha na hngalhthiam lai. Paul cu Khrihfabu pakhat ca lawngah si loin “Khrihfabu” dihlak caah a lungre a rak thei. (2 Kor. 11:23-28) Ngandam lonak nih naa lawmhnak kha a tlauter maw? Paul cu ‘a pum ah fahnak pakhat’ a ngeih caah harnak a tong. Mah cu ngandam lonak a si kho men, cucaah mah kha dam seh ti a duh. (2 Kor. 12:7-10) Nangmah pumpak tlinlonak ruangah a caan ah na lung a dong maw? A caan ah Paul zong cutin a rak si ve. Paul nih a hmaanmi thil tuah awkah a rak i zuam chih caah amahle amah kha “mi lungrethei ka va si dah” tiah aa rak i ti.—Rom 7:21-24.

8. A tonmi buaibainak inkhawh awkah Paul kha zeinihdah a rak bawmh?

⁸ Paul cu hneksaknak le lungdongh awk a simi thil sining tampi a tong ko nain Jehovah rian kha a rak ṭuan peng. Cutin tuah khawh awkah zeinihdah thazaang a ngeihter? A tlinlonak kha a hngalh ko nain tlanhnak man cungah a fekmi zumhnak a ngei. “Amah [Jesuh] a zummi paoh cu . . . zungzal nunnak an ngei lai” timi Jesuh biakam zong kha a hngalh. (Johan 3:16; Rom 6:23) Paul nih tlanhnak man cungah zumhnak a ngei ti cu a fiang ko. Sualnak ngan an tuah hmanhah an i ngaihchih ahcun Jehovah nih ngaihthiam a duh hna ti kha a zumh.—Salm 86:5.

9. Galati 2:20 ah langhtermi Paul bia in zeidah kan cawn khawh?

⁹ Khrih thawngin langhtermi Pathian dawtnak ṭhawnnak cung zongah zumhnak a rak ngei. (Galati 2:20 rel.) Mah Baibal caang a donghnak bia hna kha i cinken. Paul nih “a ka daw i ka ca i a nunnak a pe mi Pathian Fapa” tiah a rak ti. Paul nih ka ṭhat lo tuk caah Pathian nih a ka daw kho lai lo tiah a rak ruat lo. Cun ‘Jehovah nih unau pawl a dawtmi hna cu ka hngalh ko nain kei tu cu a ka daw kho lai lo’ ti zongin a rak ruat lo. Paul nih Rom mi hna kha “kannih cu misual kan si ko rih lioah hin Khrih cu kan caah a thi” tiah a rak ti hna. (Rom 5:8) Pathian dawtnak cu ri a ngei lo.

10. Rom 8:38, 39 in zeidah kan cawn khawh?

¹⁰ Rom 8:38, 39 rel. Paul nih Pathian dawtnak cu a ṭhawng tuk ti kha a hngalh. Cucaah “Pathian dawtnak he a kan ṭhen khotu ding cu sermi thil dihlak ah hin zeihmanh a um lo” tiah a ti. Cun Jehovah nih Israel mi kha lungsaunak he a pehtlaih hna ti zong kha a hngalh.  Mah lengah Jehovah nih a cungah zaangfahnak a langhter ning zong kha a hngalh. Paul nih hitin a ti: ‘Jehovah nih ka caah thih dingin a Fapa a thlah ahcun a ka dawtnak cungah lunghrinnak ka ngeih awk a si maw?’—Rom 8:32.

11. Paul nih 1 Timote 1:12-15 ah a langhter bantukin sualnak a rak tuah ko nain Pathian nih a ka dawt tiah zeicah a rak zumh khawh?

¹¹ Kuatkhat Timote 1:12-15 rel. A hlan i a rak tuahmi thil ruangah Paul nih ka sual tuk tiah a ruah men lai. Cucaah amahle amah kha a sual “bik ka si” tiah aa timi cu khuaruahhar awk a si lo. Paul nih biatak a hngalh hlanah khuakhat hnu khuakhat Khrihfa pawl kha a rak hrem hna i cheukhat kha thong ah a rak thlak hna. Biaceihnak zung nih Khrihfa cheukhat thah dingin biakhiahnak an tuahmi kha a rak bawmh hna. (Lam. 26:10, 11) An nu le an pa amah ruangah thah a rak simi fale pawl he an i ton tikah Paul cu zeitlukin dah a intuar lai ti kha ruathmanh. Paul nih a palhnak ruangah aa ngaihchih ko nain hlanlio thil sining hna kha ka thleng kho lo ti kha a hngalh. Jesuh cu ka caah a thi ti kha a zumh i “Pathian vel thawngin a tu i ka sining hi ka si” tiah a rak ti. (1 Kor. 15:3, 10) Mah in zeidah kan cawn khawh? Na caah Jesuh a thi ti kha na zumh a hau i mah nih Jehovah he a ṭhami hawikom aan siter khawh. (Lam. 3:19) Jehovah Tehte pakhat kan rak si zong, si lo zongah Pathian caah a biapimi cu a hlanah kan rak tuahmi palhnak kha si loin atu ah kan tuahmi le hmailei ah kan tuah dingmi tu kha a si.—Isa. 1:18.

12. Man ka ngei lo asiloah dawtmi ka si lo tiah kan ruah ahcun 1 Johan 3:19, 20 nih zeitindah a kan bawmh khawh?

¹² Na sualnak caah Jesuh a thihmi kong na ruah tikah hitin na ruah men lai: ‘Mah a sunglawimi laksawng hmuh awkah kaa tlak lo.’ Zeicah cutin na ruah? A tling lomi kan lungthin  nih a kan hlen khawh i man kan ngei lo asiloah dawtmi kan si lo tiah a kan ruahter khawh. (1 Johan 3:19, 20 rel.) Mah bantuk ruahnak kan hun ngeih tikah “Pathian cu kan lung nakin a ngan deuh” ti kha kan i cinken a hau. Jehovah nih a kan daw lo asiloah a kan ngaithiam lai lo tiah kan ruah hmanhah vancung kan Pa nih a kan dawt i a kan ngaihthiam zungzal lai. Jehovah nih a kan dawt ti kan zumh nakhnga kan cawn a hau. Cutin tuah khawh awkah Baibal kha atu le atu hlathlai, a zungzal in thlacam le zumhfekmi a salle pawl he hmaan tein i komh a hau. Cutin tuah cu zeicah a biapit tuk?

13. Baibal hlathlainak nih zeitindah a kan bawmh khawh? (“ Baibal Nih A Bawmh Hna Ning” timi rinli kulh ah zoh.)

¹³ Nifatin Baibal hlathlai law Jehovah sining ṭha pawl kha tam deuh in na hngalh lai. Zeitlukin dah aan dawt ti zong kha na hngalh lai. Baibal kong kha nifatin thukpi in na ruah ahcun na ruahnak le na lungthin “ding tein nunnak ding cawnpiaknak caah” aan bawmh khawh. (2 Tim. 3:16) Man ka ngei lo timi ruahnak hloh awkah aa zuammi Khrihfa upa Kevin nih hitin a ti: “Salm 103 relnak le ṭha tein ruahnak nih ka ruahnak remh awk le Jehovah nih a ka hmuh ning hngalhthiam awkah a ka bawmh.” A hmasa ah langhter a simi Eva nih hitin a ti: “Zanlei ah Jehovah intuar ning kong kha ruah awkah a caan ka pek. Mah nih lungdaihnak a ka hmuhter i ka zumhnak zong a fehter chin.”

14. Thlacamnak nih zeitindah a kan bawmh khawh?

¹⁴ Zungzal in thlacam. (1 Thes. 5:17) Mi pakhat he hawikom si na duh ahcun atu le atu bia nan i ruah a hau i na intuarnak kong zong kha na chimh a hau. Jehovah he kan i hawikomhnak zongah cutin a si ve. Thlacamnak in kan intuarnak, kan ruahnak le kan lungretheihnak kong kan chimh tikah amah kan zumh le a kan dawt ti kan hngalh kan langhtermi a si. (Salm 94:17-19; 1 Johan 5:14, 15) A hmasa ah langhtermi Yua nih hitin a ti: “Thla ka cam tikah nikhat chung ah a cangmi kong lawng ka cam lo. Ka ruahmi le kan intuarmi kong taktak kha ka chimh. Duhsah in Jehovah kha company i hruaitu manager pakhat in si loin fale a daw taktakmi Pa pakhat in ka hun hmuh.”—“ Na Rel Bal Maw?” timi rinli kulh ah zoh.

15. Jehovah nih kan cungah pumpak siaherhnak a ngeih kha zeitindah a langhter?

¹⁵ Zumhfekmi hna he i kom; annih cu Jehovah sinin hmuhmi laksawng an si. (Jeim 1:​17) Vancung kan Pa nih ‘zeitik paohah a kan daw zungzalmi’ unau pawl a kan peknak thawngin kan cungah pumpak siaherhnak a ngeih kha a langhter. (Ptb. 17:17) Paul nih Kolose Khrihfa hna sin a cakuat ah amah a rak bawmtu Khrih fa hna kha “bawmtu ṭhahnem ngaingai” nan si tiah a ti hna. (Kol. 4:​10, 11) Jesuh Khrih hmanh nih a hawile, vancungmi le minung hna sinin bawmhnak kha a herh i a rak sunsak.​​—⁠Luka 22:​28, 43.

16. Jehovah he hawikom ṭha si awkah zumhfekmi hawikom pawl nih zeitindah an kan bawmh khawh?

¹⁶ Jehovah laksawng a simi zumhfekmi hawilei sinin ṭhathnemhnak tling na hmu maw? Nutling, patling a simi kan hawikom sinah kan lungretheihnak kong kan chimmi cu derthawm a si lo, mah nih himnak tu a kan pek. A hmasa ah langhtermi James nih hitin a ti: “Nutling, patling a simi hna he i hawikomhnak nih tampi a ka bawmh. A ṭhalomi ruahnak ka ngeih tikah ka hawile nih lungsau tein an ka ngaihpiak i an ka dawtnak kong kha an ka chimh. Cucaah Jehovah nih a ka dawt i a ka zohkhenh ti kha ka hun hngalh.” Unau pawl he hawikom ṭha si cu a biapi tukmi a si.

17-18. Aho bia dah kan ngaih awk a si, zeicah?

¹⁷ Satan nih a hmaanmi thil tuahnak ah kan lungdong seh ti a duh. Cun Jehovah nih a kan dawt lo caah khamhnak hmuh awkah kan i tlak lo timi zumhnak ngei hna seh ti zong a kan duh. Asinain kan hngalh bantukin mah cu a hmaan lomi a si.

¹⁸ Jehovah nih aan dawt. Pathian mithmuh ah a sunglawi tukmi na si. Pathian bia na ngaih ahcun Jesuh bantukin “a dawtnak chungah” na um ve lai. (Johan 15:10) Cucaah Satan kha zum hlah asiloah Jehovah nih a ka daw lo timi ruahnak zong ngei hlah. Mah canah pakhat cio kan ṭhatnak a kan hmuhpiaktu Jehovah nawl tu kha ngai. Pathian nih nangmah i telin “a mi cu a zaangfah hna” ti kha zum.