1-2. Kan caah Jesuh keneh zulh cu zeitindah a si khawh? Tahchunhnak pe.

HAWRHA nih a khuh dih i ṭih a nung tukmi thetse ram ah a kalmi phu pakhat ah kaa tel ve tiah na mitthlam ah cuanter hmanh. Hmuhtonnak a ngeimi mi pakhat nih lam aan hruai hna. Lam a kal tikah a keneh kha hawrha cungah a tang. Lamhruaitu kha na hmu kho lo nain na thin a phang lo. Mah canah na phu chung i mi pawl he a si khawh chungin a keneh kha nan zulh.

² Kannih zong a hmaanmi Khrihfa in ṭih a nungmi thetse ram bantuk a simi hi vawlei ah kan nung ve. Cucaah Jehovah nih a keneh kan zulh khawhmi Hruaitu ṭha bik a Fapa, Jesuh Khrih kha a kan pek. (1 Pet. 2:21) Baibal cherhchanmi cauk pakhat ah Peter nih Jesuh kha lamhruaitu he a tahchunh. Lamhruaitu nih a keneh a chiah tak bantukin Jesuh zong nih a kehneh a chiah ta i mah kha kan zulh khawh. A keneh kong he aa tlaiin mah biahalnak pathum hi i ruah hna u sih: Jesuh keneh zulh timi cu zei sullam dah a si? Zeicah cutin kan tuah awk a si? Zeitindah cutin kan tuah khawh?

3. Mi pakhat keneh zulh timi cu zei sullam dah a si?

³ Mi pakhat keneh zulh timi sullam cu zeidah a si? A caan ah Baibal ah “kal” le “ke” timi biafang nih mi pakhat i a nunning kha a chim duhmi a si. (Gen. 6:9; Ptb. 4:26) Cucaah mi pakhat keneh zulh timi sullam cu a nunning zulh le amah i zohchunh kha a si.

4. Jesuh keneh zulh timi cu zei sullam dah a si?

 ⁴ Jesuh keneh zulh timi cu zei sullam dah a si? A sawhsawh tein chim ahcun a nunning i zohchunh kha a si. Cherhchanmi Baibal caang ningin Jesuh nih sifah harnak a inkhawh caah zohchunhawk ṭha a chiahmi kong kha lamkaltu Peter nih a chim. Asinain kan i zohchunh khawhmi Jesuh tuahmi a dang thil tampi zong a um. (1 Pet. 2:18-25) Jesuh vawleicung a nun lio i a tuahmi le a chimmi thil dihlak cu kan i zohchunh awk caah a si.

5. Mitling lo a simi hna nih Jesuh nunning kha zulh khawh a si taktak maw? Fianter.

⁵ Mitling lo a simi kannih nih Jesuh nunning kha kan zul kho taktak maw? Kan zulh khawh. Peter nih “[Jesuh] keneh” kha tling tein kan zulh awk a si tiah a ti lo. Mitling lo kan si nain kan si khawh chungin a keneh kan zulh ahcun lamkaltu Johan chimmi bia hi kan ngaih khawh lai: “Jesuh nunning kha kan zulh awk a si.”—1 Johan 2:6, NW.

6-7. Jesuh keneh zulhnak nih Jehovah he a kan naihter lai tiah zeicah kan chim khawh?

⁶ Jesuh keneh zulhnak nih Jehovah he a kan naihter lai. Zeicah cutin kan chim khawh? Pakhatnak, Jesuh nih Pathian lung a lawmhtermi nunning he aa tlaiin zohchunhawk ṭha a chiah. (Johan 8:29) Cucaah Jesuh keneh kan zulhnak thawngin Jehovah lung kan lawmhter lai. Cun a hawikom si awkah aa zuammi hna cu vancung kan Pa nih a naih hna lai tiah kan zumh khawh.—Jeim 4:8.

⁷ Pahnihnak, Jesuh nih a Pa kha tling tein aa zochunh. Cucaah Jesuh nih hitin a chim khawh: “Keimah a ka hmutu paoh nih cun ka Pa kha an hmuh ve ko.” (Johan 14:9) Cucaah Jesuh sining le midang a pehtlaih hna ning kha kan i zohchunh khawh. Tahchunhnak ah, thinghmui zawtnak a ngeimi pa cungah zaangfahnak a langhter, cun a zawtnak a  zual tukmi nu cung zongah zawnruahnak a langhter i an dawtmi hna nih an thihtakmi hna cungah zaangfahnak a rak langhter. (Mar. 1:40, 41; 5:25-34; Johan 11:33-35) Jehovah sining kha kan i zohchunh deuh tikah amah he kan i naih deuh.

8. Jesuh keneh zulhnak nih hi vawlei “tei” awkah zeicah a kan bawmh lai ti kha fianter.

⁸ Jesuh keneh zulhnak nih hi vawlei ṭha lo ah lungvaivuan in um lo awkah a kan bawmh. Jesuh nih vawlei a nunnak a dongh lai zan ah hitin a rak ti khawh: “Vawlei cu ka tei cang.” (Johan 16:33) A chim duhmi cu a ruahnak, a hmuitinh le a tuahsernak ah hi vawlei huham aa iapter lomi kha a si. Jehovah nih a min thangṭhatter awkah hi vawlei ah a thlahhnawh channak a ruang kha Jesuh nih a philh bal lo. Kannih tah zeitin? Hi vawlei ah kan lung a vaivuanhter khotu thil tampi a um. Asinain Jesuh bantukin Jehovah duhnak kha biapi ah kan chiah peng ahcun hi vawlei hi kan “tei” khawh ve lai.—1 Johan 5:5.

9. Zungzal nunnak lam cungah kan kal peng khawh nakhnga zeidah kan tuah a hau?

⁹ Jesuh keneh zulhnak nih zungzal nunnak ah lam a kan hruai. Mirum mino pa pakhat nih zungzal nunnak hmuh awkah zeidah tuah a hau tiah a hal tikah Jesuh nih hitin a leh: “Ra law ra ka zul.” (Matt. 19:16-21) Judah mi cheukhat nih Khrih kha an rak zum lo. Cucaah Jesuh nih hitin a ti hna: “Ka tuu nih . . . an ka zulh. Annih cu zungzal nunnak kha ka pek hna.” (Johan 10:24-29) A cawnpiaknak tam deuh in hngalh a duhmi, Sanhedrin chungtel pakhat a simi Nikodemu kha Jesuh nih “amah a zummi poah” cu “zungzal nunnak” an ngei lai tiah a ti. (Johan 3:16) Cucaah Jesuh kan zumh kha kan biachim le kan tuahserhnak in kan langhter khawh. Cutin kan tuah ahcun zungzal nunnak lam cungah kan kal peng kho lai.—Matt. 7:14.

10. Jesuh kong ṭha deuh in “hngalh” awkah zeidah kan tuah a hau? (Johan 17:3)

¹⁰ Jesuh keneh kan zulh hlanah a kong kha kan hngalh a hau. (Johan 17:3 rel.) Jesuh “hngalh” timi cu thil cheukhat kan tuah peng a hau tinak a si. A kong kha tam deuh in kan cawn a hau, cun a sining, a ruahnak le a phunglam hna kha tam deuh in kan cawn zong a hau. Biatak chungah kan umnak cu zei can a si cang hmanhah Jehovah le a Fapa kong kan “hngalh” nakhnga kan cawn peng a hau.

11. Thawngṭha cauk pali ah zei kong dah aa tel?

¹¹ Jehovah nih a Fapa kong tam deuh in kan hngalh khawh nakhnga a Bia a simi Thawngṭha cauk pali in a kan bawmh. Mah Thawngṭha cauk ah Jesuh nunning le phungchim rianṭuannak kong tuanbia hna aa tel. Mah kong nih Jesuh chimmi, tuahmi le a intuarmi kong kha a kan chimh. Mah cauk pali nih Jesuh  kong kha ‘ruah’ awkah a kan bawmh. (Heb. 12:3) Mah ah Jesuh chiahtakmi keneh kong hna aa tel. Cucaah Thawngṭha cauk kan hlathlainak thawngin Jesuh kong kha tam deuh in kan hngalh khawh. Mah tikah Jesuh keneh kha kan zulh khawh.

12. Thawngṭha cauk in zeitindah tling tein ṭhathnemhnak kan hmuh khawh?

¹² Thawngṭha cauk in tling tein ṭhathnemhnak kan hmuh khawh nakhnga rel lawngin a za lo. Mah cauk kha ṭha tein hlathlai awk le thukpi in ruah awkah a caan kan pek a hau. (Joshua 1:8 he tahchunh.) Thawngṭha cauk ṭha tein ruah khawh awk le kan relmi ningin zulh khawh awkah a kan bawm khomi ruahnak cheuhnak pahnih in i ruah hna u sih.

13. Thawngṭha cauk kha zeitindah a cang taktakmi na siter khawh?

¹³ Pakhatnak, Thawngṭha cauk ah aa telmi kong kha a cang taktakmi siter. A cangmi kong hngalh awk, theih awk le intuar awkah na mitthlam ah cuanter. Cutin tuah awkah bawmtu a simi Jehovah bupi nih a kan chuahpiakmi cauk hna in hlathlainak tuah. Hlathlainak na tuahmi kong i a hlan le a hnuah a cangmi kong dihlak kha ruat. Mah ah langhtermi minung le an umnak hmun kong kha tam deuh in ruat. Cun na hlathlaimi kong le a dang Thawngṭha cauk ah a ummi mah kong kha tahchunh. A caan ah Thawngṭha cauk ṭialtu pakhat nih a dang Thawngṭha cauk ah langhter a si lomi a kong a dikthliar kha a langhter tawn.

14-15. Thawngṭha cauk kha kan nunnak ah zeitindah kan hman khawh?

¹⁴ Pahnihnak, na nunnak ah Thawngṭha cauk kha hmang. (Johan 13:17) Thawngṭha cauk kha ṭha tein na hlathlai hnuah hitin i hal: ‘Mah kong in ka nunnak ah ka zulh khawhmi kong a um maw? Mi pakhat bawmh awkah mah kong hi zeitindah ka hman khawh rih?’ Pakhat cio i an kong kha ṭha tein ruat law aa tlak ahcun na cawnmi kong kha dawtnak le hmualngei tein chim khawh awkah i zuam.

¹⁵ Mah ruahnak cheuhnak pahnih zulh  khawh ning kha i ruah hna u sih. Cun Jesuh nih biakinn ah a hmuhmi a si a fak ngaingaimi nuhmeinu kong zong kha kan i ruah hna lai.

16. Marka 12:41 ah langhtermi kong kha fianter.

¹⁶ A kong kha a cang taktakmi siter. (Marka 12:41 rel.) A cangmi kha na mitthlam ah cuanter. Mah hi AD 33, Nisan 11, Jesuh a thih lai zarh ah a cangmi a si. Jesuh nih biakinn i cawnpiaknak caah a caan tam deuh kha a rak hman. Asinain biaknak lei hruaitu hna nih an rak ralchanh. A hmasa ah an lak i cheukhat nih a nawlngeihnak he aa tlaiin biahalnak an rak tuah. A kan let kho lai lo tiah an ruahmi biahalnak hna kha an rak hal. (Mar. 11:27-33; 12:13-34) Mah tikah Jesuh cu biakinn i a dang hmun ah a rak i ṭhial. Mah cu Nu Pawl An I Tonnak Tual tiah auhmi Biakinn tangka chiahnak pawngah si dawh a si. A ṭhu i mi pawl nih thawhlawm an pekmi kha a zoh hna. Mirum pawl nih tangka tampi an sanhmi kha a hmuh. Tangka chiahnak pawng i a um caah tangka an sanhmi thawng kha a theihmi a si men lai.

17. Marka 12:42 ah langhtermi, a si a fak ngaingaimi nuhmeinu nih zeidah a tuah?

¹⁷ Marka 12:42 rel. Tlawmpal hnuah Jesuh nih thawhlawm a pemi nu pakhat kha a hmuh. Anih cu “a si a fak ngaingaimi nuhmeinu” a si. (Luka 21:2) A nunning cu a har tuk i a nunnak caah a herhmi thil cawknak tangka hmanh ngeih dawh a si lo. Asinain thawhlawm pek awkah a kal i a ngeihmi tangka piahnih kha a pek. Mah tangka a sanh tikah a thawng a thang men lai lo. Jesuh nih nuhmeinu nih a pekmi phaisa sen piahnih kha a hngalh. Mah cu mah caan lioah an rak hmanmi man a ngei lo bikmi phaisa a si. Mah tangka nih rawl caah an zuarmi a man a tlawm bikmi pithlung pakhat hmanh kha a caw kho lo.

18. Marka 12:43, 44 ningin nuhmeinu pekmi thawhlawm kong he aa tlaiin Jesuh nih zeidah a chim?

¹⁸ Marka 12:43, 44 rel. Jesuh cu mah nuhmeinu nih a lung a suk tuk. Cucaah a zultu pawl kha a auh hna i nuhmeinu kong he aa tlaiin hitin a ti: “Hi a si a fakmi nuhmeinu nih hin tangka kuang ah midang vialte nakin tam bik a sanh.” Cun hitin a ti: “A dang [a hleiin mirum pawl] nih cun an ngeih hlei kha an sanh, sihmanhsehlaw hi nu hi cu sifak ngai a si ko nain a ngeihmi vialte kha a sanh dih, a nunnak ca i a hman dingmi kha a thawh dih.” Jehovah nih a ka zohkhenh lai ti a zumh caah zumhfekmi mah nuhmeinu nih mah ni ah a ngeihmi tangka dihlak kha a rak pek.—Salm 26:3.

19. Nuhmeinu kong he aa tlaiin Jesuh chimmi in zei a biapimi kong dah kan cawn khawh?

¹⁹ Na nunnak ah mah ningin zul. Nangmah le nangmah kha ‘nuhmeinu kong he aa tlaiin Jesuh chimmi in zeidah ka cawn khawh?’ tiah i hal. Cun mah nuhmeinu kong kha ruat. Jehovah sinah tampi pek a duh ti cu lunghrin awk a um lo. Asinain a tuah khawhmi kha a rak tuah i Jehovah kha a ṭha bikin a rak pek. Jesuh nih nuhmeinu nih a pekmi thawhlawm cu a Pa nih a sunsak tuk ti kha a hngalh. Mah hi kan caah a biapi tukmi cawn dingmi a si: A rian kha kan si khawh chungin, kan lungthin dihlak in le kan nunnak dihlak in kan ṭuan tikah Jehovah cu aa lawm. (Matt. 22:37; Kol. 3:23) Jehovah nih kan tuah khawhmi paoh kan tuahmi kha a hmuh tikah aa lawm. Mah ah phungchim rianṭuannak le pumhnak ti bantuk amah biaknak ah kan caan le kan thazaang kan hmanmi zong aa tel.

20. Nuhmeinu kong in na cawnmi kha zeitindah na hman khawh? Tahchunhnak pe.

²⁰ Nuhmeinu kong in na cawnmi kha zeitindah na hman khawh? An i zuamnak nih Jehovah  lung a lawmhter tiah zumh awkah aa harhmi hna pakhat cio i an kong kha ruah awkah i zuam. Tahchunhnak ah, a dam lo ca asiloah phungchim rianṭuannak ah a duh tlukin aa tel khawh lo caah man ka ngei lo asiloah sualnak ka ngei tiah aa ruatmi na hngalhmi kum upa unaunu an um maw? Asiloah caan saupi a zaw i a zawtnak a zual tuk ca le zarh fatin Biakinn i aa pumh khawh lo caah a lung a dongmi unaupa pakhat kong tah na ruat kho lai maw? “Ṭhatnak a chuahpitu” bia kan chimnak thawngin cu bantuk mi hna kha kan bawmh khawh hna. (Efe. 4:29) A si a fak ngaingaimi nuhmeinu kong in kan cawn khawhmi kong kha midang sinah chim hna. An si khawh chungin an i zuammi nih Jehovah lung a lawmhter ti kha thazaang peknak bia na chimmi nih a zumhter khawh hna. (Ptb. 15:23; 1 Thes. 5:11) Thil hmete a lawh hmanhah Jehovah kha an si khawh chungin an pek caah na thangṭhatmi hna cu Jesuh keneh na zulhmi a si.

21. Zei tuah awkah dah bia na khiah?

²¹ Thawngṭha cauk ah Jesuh nunning, amah kan i zohchunh khawh ning le a keneh kan zulh khawh ning kong hna aa tel caah kan i lawm tuk. Cucaah pumpak hlathlainak le Chungkhar pumhnak ah Thawngṭha cauk kha a bik in na hlathlai awk a si ko lo maw? Cu bantuk hlathlainak in tling tein ṭhathnemhnak hmuh awkah a kong kha a cang taktakmi siter le mah kha kan nunnak ah zulh a hau ti kha i cinken hna u sih. Jesuh tuahmi kha kan i zohchunh lengah a chimmi zong kha kan ngaih a hau. A hnu capar ah Jesuh nih a thih hlanah hmanung bik a chimmi bia in kan cawn khawhmi kong kha kan i ruah hna lai.