1. Kumzabu pakhatnak ah Jehovah miphun pawl cu zeitindah ningcang tein dirh a si?

 JEHOVAH nih a miphun pawl kha rian a pek hna tikah ningcang tein an tuah lai tiah aa ruahchan. (1 Kor. 14:33) Tahchunhnak ah, Pathian nih vawleicung pumpi ah thawngṭha chim hna seh ti a duh. (Matt. 24:14) Cucaah Jesuh kha mah rian ṭuan ding in rian a pek. Jesuh nih ningcang tein ṭuan a si nakhnga a tlangtlak. Kumzabu pakhatnak lio ah Khrihfabu cu hmun kip ah dirh a si caah khrihfa upa pawl kha lamhruainak pek awk le hruaitu si awkah rian pek an si. (Lam. 14:23) Jerusalem khua i Khrihfa upa pawl, lamkaltu pawl le kum upa pawl nih Khrihfabu dihlak nih an zulh lai tiah an ruahmi biakhiahnak kha an tuahpiak hna. (Lam. 15:2; 16:4) Unau pawl nih an hmuhmi lamhruainak kha an zulh caah “khrihfabu cu zumhnak ah an ṭhawng chinchin i nifate in an karh chin lengmang.”—Lam. 16:5.

2. 1919 thawk in Jehovah nih a miphun pawl kha zeitindah lam a hruai hna i thlarau rawl a pek hna?

² Jehovah nih tuchan zong ah a miphun kha ningcang tein a dirh peng rih hna. 1919 thawk in Jesuh nih phungchim rianṭuannak dirh awk le a zultu pawl thlarau rawl pek awkah phu hmete a simi chiti thuhmi pa pawl kha a hman hna. a (Luka 12:42) Jehovah nih mah phu hna i an rianṭuannak cung ah thluachuah a pek hna ti cu a fiang ko.—Isa. 60:22; 65:13, 14.

3-4. (a) Ningcang tein dirhnak in zeitindah ṭhathnemhnak kan hmuh ti kha tahchunhnak pe. (b) Hi capar ah zei kong dah kan i ruah hna lai?

 ³ Ningcang tein kan ṭuan lo ahcun Jesuh nih a kan pekmi rian kha kan liim kho lai lo. (Matt. 28:19, 20) Tahchunhnak ah, unaupa pawl nih lohmun rianṭuannak kha an tlangtla lo i mi kip nih an duhnak hmun paoh ah phung an chim khawh hei ti u sih. Cheukhat lohmun cu atu le atu chim a si kho i cheukhat lohmun tu cu chim bal lo zong a si kho. Ningcang tein dirh a si caah a dang zei lam hna in dah ṭhathnemhnak kan hmuh rih?

⁴ Jesuh nih vawleicung a um lioah a zultu pawl kha ningcang tein a dirh hna bantuk in tuchan zong ah ningcang tein a dirh peng rih hna. Hi capar ah Jesuh nunning kong le mah a nunning kha kan bupi nih zeitindah an zulh timi kong kan i ruah hna lai. Cun Jehovah bupi cung ah kan i lawmhnak zeitindah kan langhter khawh timi kong zong kan i ruah hna lai.

Kan Bupi Nih Jesuh Nunning Kha An Zulh

5. Jesuh nunning kan zulh khawhnak lamkhat cu zeidah a si? (Johan 8:28)

⁵ Jesuh nih vancung a Pa sin in zeidah tuah awk a si i zeidah chim awk a si ti kha a cawn. Jehovah bupi nih zeidah a hmaan i zeidah a hmaan lo ti kan hngalh nakhnga Baibal an hmannak thawng in Jesuh nunning kha an i zohchunh. (Johan 8:28 rel; 2 Tim. 3:16, 17) Baibal rel awk le zulh awkah ralrin peknak kan hmuh peng. Mah ruahnak cheuhnak zulhnak in zeitindah ṭhathnemhnak kan hmuh?

6. Baibal hlathlainak in ṭhathnemhnak kan hmuh khawh ning a biapimi lamkhat cu zeidah a si?

⁶ Bupi chuahpiakmi cauk hmang in Baibal kan hlathlai tikah ṭhathnemhnak tampi kan hmu. Tahchunhnak ah, bupi sin in kan hmuhmi lamhruainak hna kha Baibal cawnpiaknak he kan tahchunh khawh. Kan hmuhmi lamhruainak cu Baibal cung ah hram aa bunhmi an si ti kha kan hmuh tikah Jehovah bupi cung ah kan zumhnak cu a fek chinchin.—Rom 12:2.

7. Jesuh nih zei kong dah a chim, Jehovah bupi nih a nunning kha zeitindah an zulh?

⁷ Jesuh nih “Pathian Pennak kong thawngṭha” kha a chim. (Luka 4:43, 44) Jesuh nih a zultu pawl zong kha Pennak kong chim awkah a fial hna. (Luka 9:1, 2; 10:8, 9) Cucaah tuchan i Jehovah bupi chung ah a ummi poah nih khoika hmun an um asiloah zei rian an ngeih hmanh ah Pennak kong kha an chim peng.

8. Zei tinvo sung dah pek kan si?

⁸ Midang sinah Pathian Pennak kong biatak chim ding in tinvo sung kan ngei. Mah tinvo sung cu mi kip nih an ngeihmi a si lo. Tahchunhnak ah, Jesuh nih vawleicung a um lioah khuachia pawl kha a kong a chimter hna lo. (Luka 4:41) Tuchan zong ah mi pakhat nih Jehovah miphun he phungchim rianṭuannak i aa tel hlan ah mah tinvo sung caah sining a tlinh hmasa a hau. Zeitik caan le khoika hmun kan um hmanh ah Pathian Pennak kong kan chimnak thawng in phungchimnak tinvo sung zeitluk in dah kan sunsak ti kha kan langhter. Jesuh bantuk in kan hmuitinh cu mi pawl i an lungthin cung ah biatak thlaici tuh le ti toih kha a si.—Matt. 13:3, 23; 1 Kor. 3:6.

9. Bupi nih Pathian min kha zeitindah an hngalhter hna?

⁹ Jesuh nih Pathian min kha a hngalhter hna. Vancung a Pa sin thla a cam lio ah Jesuh nih hitin a ti: “Nangmah kong cu annih kha ka hngalhter hna.” (Johan 17:26) Midang nih Pathian min an hngalh nakhnga Jehovah bupi nih an tuah khawhmi vialte an tuahnak thawng in Jesuh kha an i zohchunh. Lamkhat cu Vawlei Thar Lehnak Baibal thawng in a si. Mah  Baibal ah Pathian min kha a hrampi aa telnak zawn ah an telh dih ṭhan. Mah holhlehnak Baibal cu atu ah a uk ning in siseh a cheuchum in siseh holhphun 270 leng in hmuh khawh a si cang. Mah Baibal i Thlaihhlei A4 le A5 ah Pathian min an telh ṭhannak he aa tlaiin a dikthliar kong kha hmuh khawh a si. Study Baibal ah aa telmi Thlaihhlei C zong ah hmuh khawh a si. Mah ah Khrihfa Greek Baibal ah Pathian min voi 237 telh ṭhan a sinak kong kha a langhter.

10. Myanmar ah a ummi nu pakhat hmuhtonnak in zeidah kan hngalh khawh?

¹⁰ Jesuh bantuk in mi tampi nih Pathian min an hngalh nakhnga kan si khawh chung in bawmh kan duh hna. Myanmar ah a ummi, kum 67 a simi nu pakhat nih Pathian cu min a ngei timi kong a theih tikah a mitthli he hitin a ti: “Pathian min cu Jehovah a si ti kha ka nunnak ah a voikhatnak ka theihmi a si. . . . Ka cawn khawhmi lak ah a biapi bikmi thil kha na ka cawnpiak.” Mah hmuhtonnak in mi nih Pathian min an hngalh tikah an nunnak aa theng kho ti kha kan hngalh.

Bupi Cung Ah Naa Lawmhnak Langhter Peng

11. Khrihfa upa pawl nih Jehovah bupi cung ah an i lawmhnak zeitindah an langhter khawh? (Hmanthlak zong zoh.)

¹¹ Khrihfa upa pawl nih bupi cung ah an i lawmhnak an langhter khawh ning lamkhat cu zeidah a si? Lamhruainak an hmuh tikah Khrihfa upa pawl nih ṭha tein rel le a si khawh chung in mah ning in zulh a hau. Tahchunhnak ah, pumhnak ṭhen zeitindah tlaih ding a si i zeitindah Khrihfabu caah thlacam ding a si ti lawng si loin Khrih tuu pawl zeitindah zohkhenh ding a si timi kong he aa tlai zong in lamhruainak an hmuh. Khrihfa upa pawl nih bupi lamhruainak an zulh tikah unau pawl cu Jehovah nih a kan dawt i a kan zohkhenh timi ruahnak an ngei.

12. (a) Hruaitu pawl he zeicah rian kan ṭuanṭi awk a si? (Hebru 13:7, 17) (b) Hruaitu pawl i a ṭhami an ziaza cung ah zeicah lungthin kan pek awk a si?

¹² Khrihfa upa pawl sin in lamhruainak kan hmuh tikah lungtho tein kan zulh a hau. Cutin kan tuah ahcun a kan hruaitu pawl kha an rian ṭuan awkah kan fawiter deuh hna lai. Baibal nih hruaitu bia ngaih awk le nawl zulh awkah tha a kan pek. (Hebru 13:7, 17 rel.) A caan ah mah cu zuamcawhnak a si kho men. Zeicah? Mah unaupa pawl cu mitling lo an si caah a si. Asinain a ṭhami an ziaza cung ah si loin a ṭha lomi an ziaza cung ah lungthin kan pek ahcun kan ral pawl kha kan bawmhmi hna a si lai. Zeiti lam in dah? Kan ral pawl nih Pathian nih bupi hmang in lam a kan hruai timi kong ah lunghrinnak ngei hna seh ti a kan duh. Cucaah Khrihfa upa pawl kong he aa tlaiin a ṭha lomi ruahnak kan ngeih ahcun bupi kong ah a ṭha lomi ruahnak kan hun ngei kho ve i kan zumhnak zong a hun tlau kho. Kan ral pawl hlennak hngalh awk le al awkah zeidah kan tuah khawh?

Aho Ruang Hmanh Ah Naa Lawmhnak Tlauter Hlah

13. Pathian ral pawl nih bupi kha zeitindah an thangchiat?

¹³ Pathian ral pawl nih bupi kong ah a ṭhatnak he a chiatnak he hmu hna seh ti a kan duh. Tahchunhnak ah, Jehovah nih amah a biami hna cu pumsalei, ziazalei le thlaraulei ah thiang tein um hna seh ti a duh kha Baibal in kan hngalh. Cun ṭhatlonak a tuah pengmi hna le an ziaza thlen a duh lomi hna kha Khrihfabu in chuah awkah a fial hna. (1 Kor. 5:11-13; 6:9, 10) Baibal nawlpekmi kha kan ngaih. Asinain mah nawlpekmi kan zulh caah kan ral pawl nih mi cung ah dawtnak a ngei  lomi, mi bia a ceihmi le a hmuhnak a bimi in sual an kan puh.

14. Bupi kong he aa tlaiin a hmaan lomi thawngpang a karhtertu cu ahodah a si?

¹⁴ Bupi a ralchanhtu taktak kha hngal. Satan Khuachia nih bupi kong he aa tlaiin lihbia kha a karhter. Satan cu “lih vialte pa a si.” (Johan 8:44; Gen. 3:1-5) Cucaah Satan nih Jehovah bupi kong he aa tlaiin a hmaan lomi thawngpang karhter awkah kan ral pawl a hman hna lai ti kha kan i ruahchan awk a si. Kumzabu pakhatnak ah cutin a rak si.

15. Biaknaklei hruaitu pawl nih Jesuh le a zultu pawl cung ah zeidah an tuah?

¹⁵ Pathian Fapa Jesuh cu mitling a si i khuaruahhar thil zong a tuah ko nain Satan nih Jesuh kong he aa tlaiin lihbia karhter awkah mi cheukhat kha a hman hna. Tahchunhnak ah, biaknaklei hruaitu pawl nih mi pawl kha Jesuh khuachia ṭhawl khawhnak a petu hi “khuachia bawi a si” tiah an ti hna. (Mar. 3:22) Jesuh bia an ceih lio ah biaknaklei hruaitu pawl nih Pathian a thangchiattu in sual an puh i mi bupi kha thah awkah hal u tiah an ti hna. (Matt. 27:20) A hnu ah ralchanhtu pawl nih thawngṭha a chimmi Khrih zultu pawl hrem awkah “mi kha an forh hna i unau pawl kha an huatter hna.” (Lam. 14:2, 19) Lamkaltu 14:2 he aa tlaiin 1998, December 1, Vennak Innsang [Myanmar] ah hitin a fianter: “Judah ralchanhtu pawl nih thawngṭha kha anmah theng nih an cohlan lo lawng si loin Khrihfa pawl kha Jentail mi hna nih an huat hna nakhnga an i zuam.”

16. A hmaan lomi thawngpang kan theih tikah zeidah kan i cinken awk a si?

¹⁶ Tuchan tiang Satan cu lih a chim peng rih. Anih cu “vawleicung mi vialte a hleng dihtu hna” a si peng rih. (Biat. 12:9) Cucaah bupi  le hruaitu unaupa pawl kong he aa tlaiin a hmaan lomi thawngpang na theih tikah Jesuh le kumzabu pakhatnak i zultu pawl nih an ral pawl an pehtlaih hna ning kha i cinken. Tuchan Jehovah miphun pawl cu Baibal nih a chimhchung bantuk in hremnak le thangchiatnak an tong. (Matt. 5:11, 12) A hmaan lomi kong a karhtertu cu ahodah a si ti kha kan hngalh i kan al colh ahcun a hmaan lomi thawngpang kha kan zum lai lo. Zeidah kan tuah awk a si?

17. A hmaan lomi thawngpang kha zeitindah kan hrial khawh? (2 Timote 1:13) (“ A Hmaan Lomi Thawngpang Lehrulh Ning” timi rinli kulh zong zoh.)

¹⁷ A hmaan lomi thawngpang kha zum hlah. A hmaan lomi thawngpang kan theih tikah zeidah kan tuah awk a si ti kha Paul nih fiang tein a chim. Timote sinah “cawnpiaknak hmaan lo . . . tuanbia menmen hna” le “Pathian kong a si lomi tuanbia menmen kha cu hrial hna” tiah a ti. (1 Tim. 1:3, 4; 4:7) Mah hi ruathmanh: Ngakchia pakhat nih zelṭuang ah a tlami a thurmi thil kha a kaa ah aa tuh men ko lai nain upa nih cun mah nih zawtnak a chuahter khawh ti kha a hngalh caah cutin a tuah bal lai lo. Kannih zong lihbia a karhtertu kha kan hngalh caah a hmaan lomi thawngpang kha kan zum lo. Mah can ah biatak tu kha “fekte in” kan i tlaih.—2 Timote 1:13 rel.

18. Jehovah bupi cung ah kan i lawmhnak kha zeitindah kan langhter khawh?

¹⁸ Pathian bupi nih Jesuh kan i zohchunh ning lam tampi lak ah lam thum kong lawng kan i ruah hna. Baibal na hlathlai tikah bupi nih Jesuh nunning an zulh ning lam hna kha tam deuh in hngalh awkah i zuam. Khrihfabu i unau pawl nih bupi cung ah an zumhnak an fehter chin nakhnga bawm hna. Zumhfek tein Jehovah rian na ṭuannak thawng in le a duhnak liim awkah a hmanmi a bupi he naih tein na um pengnak thawng in naa lawmhnak kha langhter peng. (Salm 37:28) Jehovah a daw i zumhfek tein a ummi hna he hawikom sinak tinvo sung cung ah naa lawmhnak kha langhter peng.