Na Hngal Maw?
Ramdang mi nih zeicah Siangpahrang David ralkap an ṭuan?
DAVID ralkap hna lak ah Israel mi a si lomi pa hna zong an i tel. Tahchunnak ah, Ammon mi Zelek, Hit mi Uriah le Moab mi Ithmah an si. a (1 Chan. 11:39, 41, 46) “Chereth mi vialte le Peleth mi vialte le Gath khua in amah a zulmi Git mi” zong an i tel. (2 Sam. 15:18) Chereth mi le Peleth mi pawl cu Filistin miphun he aa naih niammi si dawh an lo. (Ezek. 25:16) Git mi hna cu Gath khua i Filistin miphun pawl si dawh an si.—Josh. 13:2,3; 1 Sam. 6:17, 18.
David nih ramdang mi hna kha zeicah a ralkap a ṭuanter hna? David nih a cung le a bik in Jehovah cung ah zumhawktlak tein an um lai ti kha a zumh caah a si. Tahchunnak ah, Chereth mi le Peleth mi hna kong he aa tlaiin The New Interpreter’s Dictionary of the Bible timi cauk ah hitin a ti: “David uknak i a har bikmi caan lio ah a cung ah zumhawktlak tein an rak um peng.” Zumhawktlak tein an um kha zeitindah an langhter? “Israel mi” mi nih David hnu zulh ti loin Sheba timi “mizei ruaram lo pa” hnu an zulh lio ah Chereth mi le Peleth mi hna cu David cung ah zumhawktlak tein an um peng. (2 Sam. 20:1, 2,7) Caan dang zong ah David fapa Adonijah cu siangpahrang si awkah aa zuam. Asinain Chereth mi le Peleth mi hna cu David cung ah zumhawktlak tein an um peng i Jehovah nih a changtu siangpahrang ṭuan ding in a thimmi Solomon zong kha an rak bawmh.—1 Si. 1:24-27, 38, 39.
David cung ah zumhawktlak tein a ummi a dang ramdang mi pakhat cu Git khuami Ittai a si. Ralchanhtu Absalom nih Israel mi phun pawl amahlei ah ṭan ding in a lem hna lioah Ittai le a ralkap 600 nih Siangpahrang David kha an rak bawmh. Cun David nih Ittai cu ramdang mi a si caah a caah raldoh lo ding zong in a chimh. Asinain Ittai nih hitin a ti: “Siangpahrang ka bawipa a umnak hmun paoh ah thih siseh nun siseh, khika ah na salpa cu ka um ve lai.”—2 Sam. 15:6, 18-21.
Ittai cu Jehovah chiti thuhmi David cung ah zumhawktlak tein a um
Chereth mi hna, Peleth mi hna le Git mi hna cu ramdang mi an si ko nain Jehovah cu a hmaanmi Pathian le David chiti a thuhtu in an hngalh i an upat. Cu bantuk zumhawk a tlakmi pa pawl a lei ah an ṭan caah David cu zeitluk in dah aa lawmh lai.
a Deuteronomi 23:3-6 ah ṭialmi Pathian nawlbia ah Ammon mi le Moab mi hna cu Israel miphun pawl pumhnak ah an i tel lai lo tiah aa ṭial. Asinain mah nawlbia nih miphun taktak sinak kha a chim duhmi a si kho men. Pathian miphun pawl sin ah ramdang mi pawl an i fonhmi le an i hawikomhmi kha thlauh dawh a rak si lo. Insight on the Scriptures, Volume 1, c. 95 ah zoh.
