1. Kan dihlak in kan chungkhar mi pawl he aa tlaiin zei bantuk duhnak dah kan ngeih?

“BIATAK ka cawnle cangka in ka chungkhar mi dihlak kha keimah he Paradis ah um ve hna seh ti ka duh. A hleiin ka vapa, Wayne le kan fapa nih keimah he Jehovah bia ve hna seh ti kha ka duh” tiah Pauline  * timi unaunu nih a ti. Jehovah a hngal rih lomi le a daw rih lomi chungkhar na ngei maw? Pauline bantukin na chungkhar pawl nih Jehovah bia ve hna seh ti kha na duh ve ko lai.

2. Hi capar ah zei kong dah kan i ruah hna lai?

² Kan chungkhar mi pawl kha thawngṭha cohlan awkah kan hnek kho hna lo, asinain Baibal biatak kong kha ruat in cohlan awkah tha kan pek khawh hna. (2 Tim. 3:14, 15) Kan chungkhar mi pawl kha zeicah phung kan chimh hna awk a si? An cungah zeicah zawnruahnak kan langhter awk a si? Kan chungkhar mi pawl nih kanmah bantukin Jehovah an dawt nakhnga zeitindah kan bawmh khawh hna? Kan Khrihfabu i unau pawl nih zeitindah an kan bawmh khawh?

3. Kan chungkhar mi pawl kha 2 Peter 3:9 ningin zeicah phung kan chimh hna awk a si?

³ A rauhhlan ah Jehovah nih hi chan ṭhalo hi a donghter cang lai. “Zungzal nunnak hmu dingah thim a simi hna” lawng an luat lai. (Lam. 13:48) Mising pawl sinah kan caan le kan thazaang tampi hmangin phung kan chim. Cucaah kan chungkhar mi pawl nih kanmah he Jehovah an biak khawh nakhnga phungchimh  kan duhmi hna cu a phung a si kho. Dawtnak a ngeimi kan Pa, Jehovah nih “pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.”—2 Peter 3:9 rel.

4. Kan chungkhar mi pawl sin phung kan chim tikah zei palhnak dah kan tuah khawh men?

⁴ Khamhnak kong biatak kan chim tikah a hmaanmi lam le a palhmi lam a um ti kha kan i cinken a hau. Tahchunhnak ah, kan hngalh lomi sin phung kan chim tikah nem tein kan chim men lai, asinain kan chungkhar mi pawl sin phung kan chim tikah cun hlangfang ngaiin kan chim men lai.

5. Kan chungkhar mi sin phung kan chim hlanah zeidah kan i cinken awk a si?

⁵ Kan chungkhar mi pawl sin a hmasa bik phung kan chim lio kong kan ruah tikah kan lak i tam deuh cu kan tuahsernak ruangah kan i ngaichih men lai i lam dang in rak chim ning law a ṭha deuh lai tiah kan ruah men lai. Lamkaltu Paul nih Khrihfa hna kha hitin ruahnak a cheuh hna: “Nan biachim nan holhrel cu a zungzal in ngaih a nuammi le a ṭhami a si awk a si i ahopaoh kha zeitindah ka chonh ah a ṭhat bik lai ti hngalh kha nan i zuam lai.” (Kol. 4:5, 6) Kan chungkhar mi sin phung kan chim tikah mah ruahnak cheuhnak kha kan i cinken awk a si. Cutin kan tuah lo ahcun kan bia ngaih dingin bawmh canah anmah he bia i alnak tu a chuak kho.

6-7. Zumlotu innchunghawi cungah zawnruahnak langhter a herh ti a langhtermi tahchunhnak pakhat in chim.

⁶ Zawnruahnak Langhter. A hmasa ah langhtermi Pauline nih hitin a ti: “A hmasa ah ka vapa kha Baibal le Pathian kong lawngte chimh ka duh. ‘Nifatin a cangmi thil’ kong kha kan i ruah bal lo.” Pauline a vapa, Wayne cu Baibal kong a hngalh lo caah Pauline nih a chimmi kong kha  a hngalthiam lo. A nupi nih a biaknak kong lawngte ruat sehlaw a lo. Ṭih a nungmi bu he aa kom i hlen a si cang ti a phang.

⁷ Pauline nih zanlei le zarhte zarhpi ah unau pawl he pumhnak, phungchimnak le i hawikomhnak ah caan tampi ka hmang ti kha a hun hngalh. Pauline nih “Wayne inn a ṭin tikah a caan ah inn ah ahohmanh kan um lo caah a li a leng” tiah a ti. Wayne nih a nupi le a fa cu amah he caan hmangṭi hna seh ti a duh ti cu a fiang ko. Wayne nih a nupi cu ahote he dah an i komh ti kha a hngal lo i a nupi caah a hawile cu amah nakin a biapi deuhmi an lo. Pauline kha kaan mak lai tiah Wayne nih a tlerhkhonh. Pauline nih zawnruahnak tam deuh a langhter khawhnak lam cheukhat a um ti kha na hngal maw?

8. Kan Chungkhar mi pawl kha 1 Peter 3:1, 2 ningin zeinihdah an lung a suk bik hna?

⁸ Zohchunh awk ṭha chia. Kan chimmi nakin kan tuahmi nih kan chungkhar mi pawl kha an lung a suk deuh tawn hna. (1 Peter 3:1, 2 rel.) A donghnak ah Pauline nih mah kha a hngalhthiam. Hitin a ti: “Wayne nih a kan dawt tuk i mak a ka duh taktak lo ti kha ka hngalh. Asinain a ka tlerhkhonhmi nih Jehovah duhmi lam in ka nun a hau ti kha a ka hngalhter. Bia tampi chim canah ka tuahsernak in zohchunh awk ṭha ka chiah a hau.” Pauline nih Baibal kong kha hramhram in a chim ti lo i nifatin a cangmi thil kong tu kha a chimh. Wayne nih a nupi a nun a nem deuhmi le a fapa a ziaza a ṭhat deuhmi kha a hmuh. (Ptb. 31:18, 27, 28) Baibal biatak nih an chungkhar cungah ṭhatnak a chuahtermi kha Wayne nih a hmuh tikah Baibal baitak kong kha a hun ruah i a cohlan.—1 Kor. 7:12-14, 16.

9. Kan chungkhar mi pawl kha zeicah kan bawmh zungzal hna awk a si?

⁹ Na Chungkhar mi pawl kha bawm zungzal  hna. Jehovah nih kan caah zohchunh awk ṭha a chiah. Mi pawl kha thawngṭha cohlan awk le nunnak hmuh awkah caanṭha a pek “lengmang hna.” (Jer. 44:4) Lamkaltu Pual nih Timote kha midang kha bawm zungzal hna tiah a ti. Zeicah? Cutin a tuahnak thawngin amahle amah aa khamh hlei ah a bia a ngaimi hna zong a khamh khawh hna lai. (1 Tim. 4:16) Kan chungkhar mi pawl kha kan dawt hna caah Baibal biatak kha hngal ve hna seh ti kan duh. Caan tlawmpal hnuah Pauline a biachim le a tuahsernak nih a chungkhar cungah ṭhatnak a chuahter. Atu ah a vapa cu amah he Jehovah a biak cang caah aa nuam tuk. An pahnih ningin hmaikal an ṭuan i Wayne cu Khrihfa upa pakhat in rian a ṭuan.

10. Zeicah kan lung a sau a herh?

¹⁰ Na lungsau. Pathian nawl ngaih dingin bia kan khiah tikah kan nunnak le kan zumhnak ah thlennak kan tuah. Mah thlennak kan tuahmi kha kan chungkhar mi nih cohlan awkah an i harh men lai. Anmah he biaknaklei puai le ramkhellei cawlcanghnak hna ah kan i tel ti lomi kha an hun hngalh. A hramthawk ahcun kan chungkhar mi cheukhat cu kan cungah an thin a hung tuk men lai. (Matt. 10:35, 36) Asinain annih cu zeitikhmanh ah an i thleng kho lai lo tiah kan ruah awk a si lo. Kan zumhnak kong hngalhthiam awkah bawmh kha kan ngol ahcun zungzal nunnak hmu dingah an i tlak lo tiah bia kan ceihmi hna a si. Jehovah nih biaceihnak rian a pekmi cu kanmah kan si lo, Jesuh a si. (Johan 5:22) Kan lung a sau ahcun a donghnak ah kan chungkhar mi pawl nih kan chimmi thawngṭha kha ngaih an duh khawh men.—“ Cawnpiaknak Ah Kan Website Kha Hmang” timi rinli kulh ah zoh.

11-13. Alice nih a nu le a pa a pehtlaih hna ningin zeidah na cawn khawh?

¹¹ Fek tein le fimkhur tein um. (Ptb. 15:2) Alice kong hi ruathmanh. Anih cu a nu le a pa he aa hlatnak hmun a um lioah Jehovah kong kha a cawng. A nu le a pa cu Pathian a zum lomi le ramkhellei ah aa telmi an si. A cawnmi thil ṭha kong kha ka chimh colh hna a hau ti kha a hngalh. Hitin a ti: “Na chungkhar sinah na zumhnak le na tuahsernak naa thlenmi kong na chimh colh hna lo ahcun a hnu i na chimh hna tikah an lau chinchin lai.” Alice nih dawtnak ti bantuk a nu le a pa nih hngalh an duh hngami kong he aa tlaiin an sinah cakuat a ṭial. Cun mah he aa tlaiin Baibal chimmi zong a langhter i an ruahnak kha a hal hna. (1 Kor. 13:1-13) Ṭha tein an rak zohkhenh caah a nu le a pa cungah aa lawmhnak kong kha a ṭial i laksawng zong a kuat hna. A tlawn hna tikah a si khawh chungin a nu kha inn rian a bawmh. A hmasa ahcun Alice nih a zumhnak thar kong a chimh hna tikah a nu le a pa cu an hna a tla lo.

¹² A nu le a pa sin a um chungah nifatin Baibal a rel peng. “Mah nih ka caah Baibal cu zeitluk in dah a biapit ti kha hngalhthiam awkah ka nu kha a bawmh” tiah Alice nih a ti. A pa zong nih a fanu aa thlennak a ruang kha hngalhthiam awkah Baibal cawn dingin bia a khiah, cun Baibal a palhnak zong kha kawl a duh. Alice nih hitin a ti: “Baibal ukkhat ka pek, a chungah chingchiahnak ca tete zong ka ṭialpiak chih.” A phichuak cu zeidah a si? Alice a pa nih Baibal a palhnak kha pakhat hmanh a hmu lo, mah canah a relmi kong nih a lung a suk tuk.

¹³ Harnak kan ton tik hmanhah fek tein le fimkhur tein kan um a hau. (1 Kor. 4:12b) Tahchunhnak ah, Alice cu a nu nih a ralchanh. “Tipil ka in tikah ka Nu nih ‘fanu ṭhalo’ na si tiah a ka ti.” Alice nih zeitindah a lehrulh? “Ka biaknak thar kong chimh kha hrial loin Jehovah Tehte pakhat si awkah bia ka khiah cang i ka biakhiahnak kha ka thleng ti lai lo tiah upatnak he ka chimh. Ka dawt taktak ti kha ka nu nih a zumh khawh nakhnga kaa zuam. Kan pahnih in kan ṭap, cun rawl zong thaw tein ka chuanpiak. Mah caan thawkin Baibal nih miṭha pakhat a ka siter ti kha ka nu nih a hun hngalh.”

14. Zeicah kan chungkhar pawl kha kan biakhiahnak thlen awkah nawl kan awnh hna awk a si lo?

 ¹⁴ Kan chungkhar mi hna nih kan caah Jehovah biak cu zeitluk in a biapit ti kha an hngalhthiam khawh nakhnga a caan pek an hau men lai. Tahchunhnak ah, Alice nih a nu le a pa nih an duhpiakmi a sangmi fimcawnnak kha i thim loin hmaikal rian tu aa thim caah a nu cu a ṭap. Asinain Alice cu fek tein a um peng. Alice nih hitin a ti: “Na chungkhar kha thil pakhat kong he aa tlaiin na biakhiahnak thlen dingin nawl na awnh hna ahcun a dang kongkau zongah na biakhiahnak kha thlen awkah an i zuam men lai. Na chungkhar cungah nemnak na langhter i fek tein na um ahcun cheukhat nih a hnuah na chimmi kha an hun ngaih khawh men.” Mah thil sining kha Alice nih a rak ton. Atu cu a nu le a pa an pahnih ningin hmaikal an ṭuan i a pa cu Khrihfa upa pakhat a si cang.

15. Matthai 5:14-16 le 1 Peter 2:12 ningin kan chungkhar mi hna kha midang nih ‘thil ṭha an tuahmi’ nih zeitindah a bawmh khawh hna?

¹⁵ Khrihfabu i unau pawl nih ‘thil ṭha an tuahmi’ in Jehovah nih mi kha a sinah a hnuh hna. (Matthai 5:14-16; 1 Peter 2:12 rel.) Jehovah Tehte a si lomi innchunghawi a ngeimi na si ahcun na innchunghawi cu Khrihfabu i unau pakhatkhat he an i tong bal maw? A hmasa ah langhtermi Pauline nih a inn ah unau cheukhat kha a sawm hna, zeicahtiah a vapa Wayne cu unau pawl he an i theihhngalh khawh nakhnga caah a si. Unaupa pakhat nih Jehovah Tehte Hna cu zeibantuk dah an si taktak ti kha a hngalhthiam nakhnga a bawmhmi kha Wayne nih aa cinken rih, hitin a ti: “A rian in khunh a la i bawlung chuih zoh awkah ka sinah a ra. Mah  tikah ‘anih cu a tlarimi a si’ ti kha ka hun hngalh.”

16. Kan chungkhar pawl kha zeicah i pumh dingin kan sawm hna awk a si?

¹⁶ Kan chungkhar pawl bawmhnak ah a ṭha tukmi lam pakhat cu Khrihfabu pumhnak ah i pumh ve dingin sawm kha a si. (1 Kor. 14:24, 25) Ruahnolhnak cu rianṭuan dinh hnuah caan tawite lawng tuah a si caah Wayne cu Ruahnolhnak ah a voikhatnak a hun i pum. Hitin a ti: “Phungchimnak cu ka hngalthiam lo nain ka hmuhmi, mi pawl tu cu kaa cinken hna. Ka sinah an ra i an ka don i ka kut kha fek tein an ka tlaih. Mi ṭha an si tiah ka chim khawh.” A hleiin nuva tuahkhat nih Pauline le a fapa kha i pumh awk le phungchimnak ah i tel khawh awkah an bawmh hnanak thawngin Pauline cungah zaangfahnak an langhter. Cucaah Wayne nih Pauline zumhnak thar kong kha hngalhthiam deuh awkah i zuam dingin bia a khiah i Wayne nih mah unaupa kha Baibal ka cawnpiak tiah a ti.

17. Kanmah le kanmah zei caah dah sual kan i phawt awk a si lo, asinain kan chungkhar mi hna cu an i thleng kho lai lo tiah zeicah kan ruah awk a si lo?

¹⁷ Kan chungkhar mi dihlak nih kanmah he Jehovah an biak lai kha kan i ruahchan. Cucaah Pathian salle an hung si nakhnga kan chungkhar mi pawl kha bawmh awkah thazaang chuah in kan i zuam. Asinain biatak cu an cohlang men lai lo. Cubantuk thil sining kan ton ahcun an biakhiahnak ruangah kanmah le kanmah sual kan i phawt awk a si lo. Kan zumhnak cohlan awkah ahohmanh kan hnek kho hna lo. Asinain na chungkhar mi hna nih Jehovah na biak caah zeitluk in dah naa nuamh ti kha an hmuh tikah mah cu an cungah tampi huham a ngei kho. An caah thla campiak hna. Fimkhur tein an sinah bia chim. Anmah bawmh kha ngol hlah. (Lam. 20:20) Jehovah nih naa zuamnak cungah thluachuah aan pek lai ti kha zum. Cun na chungkhar mi hna nih na chimmi kha an ngaih ahcun khamhnak an hmuh lai.