1-3. Caantling in rian a ṭuanmi hna nih an rian in i dinh a hauhnak a ruang cu zei hna dah an si?

ROBERT le Mary Jo nih hitin an ti: “Kum 21 chung missionary rian kan ṭuan hnuah, kan nu le kan pa an pali ningin an ngan a dam lo. Anmah kha zohkhenh kan duh hna. Asinain kan sunsak tukmi hmun kha kan kaltak lai caah kan ngaih a chia tuk.”

² William le Terrie nih hitin an ti: “Ngandam lonak ruangah kan rian kan ṭuan kho ti lai lo ti kha kan hun hngalh. Cucaah kan ngaih a chia tuk i kan ṭap. Mah lengah ramdang ah Jehovah rian ṭuan ding timi kan saduhthah zong a rawk dih.”

³ Aleksey nih hitin a ti: “Cozah nih rian ka ṭuannak zung ṭengnge khar an duh ti kha kan hngalh. Cucaah Bethel an khar i kan chuahtak tikah kan ngaih a chia tuk.”

4. Hi capar ah zei kong dah kan i ruah hna lai?

⁴ Bethel ah rian a ṭuanmi hna i telin a dang caantling rianṭuantu tampi zong an rian in dinh an si. * Mah zumhfekmi unau hna caah an sunsak tukmi an rian chuahtak cu a har tuk ko lai. Thlennak he aa tlak in um khawh awkah zeinihdah a bawmh khawh hna? Anmah kha zeitindah na bawmh khawh hna? Mah biahalnak hna i a phi nih kan nunnak ah thlennak a um tikah tawnghtham khawh awkah a kan bawmh lai.

5. Caantling rian in i dinhnak nih zeiti lam in dah a kan hnorsuan khawh?

⁵ Lohmun ah a ṭuanmi kan si ah, Bethel ah a ṭuanmi kan si ah  kan ṭuannak hmun le mah ah a ummi mi pawl kha kan sunsak tuk hna. Cucaah kan rian kan kaltak tikah kan ngaih a chia tuk. Kan kaltakmi unau pawl kha kan ngai tuk hna, a hleiin hremnak ruangah kan kaltak hna tikah kan lungre a thei khun. (Matt. 10:23; 2 Kor. 11:28, 29) Nunphung thar he kan i ziak cang caah i ṭhial ṭhan cu kan caah a har tuk men lai. Robert le Mary Jo nih hitin an ti: “Kanmah kan nunphung kha kan i ziak ti lo i kanmah holh tein phungchim hmanh kha kan hun i harh. Kan i ziak ti lo tiah kan ruah.” Caantling rian in aa dinmi cheukhat cu ruahlopi in tangka lei chambaunak hna an tong kho. Zei tuah awk hngal loin le lungdong in an um kho. Cun kan him lo timi ruahnak hna zong an ngei kho. Zeinihdah a bawmh khawh hna?

6. Jehovah kha zeitindah kan naih khawh?

⁶ Jehovah kha naih zungzal. (Jeim 4:8) Zeitindah cutin kan tuah khawh? “Thlacamnak a kan lettu” in Pathian kha kan i bochannak thawngin a si. (Salm 65:1) “Nan harnak vialte kha chim dih u” tiah Salm 62:8 ah a ti. Jehovah nih “kan hal khawh leng le kan ruah khawh lengin thil” a tuah khawh. (Efe. 3:20) Thlacamnak in kan halmi lawng kha si loin kan tonmi buaibainak hna kha kan ruah khawh lengin le kan i ruahchan lomi lam in a kan tawnghthampiak lai.

7. (a) Jehovah he naih tein um khawh zungzal awkah zeinihdah a kan bawmh lai? (b) Hebru 6:10-12 ningin zumhawktlak tein Jehovah rian ṭuan zungzalnak nih zei ṭhatnak dah a chuahter lai?

⁷ Jehovah he naih tein um khawh zungzal awkah Baibal kha nifatin rel law thukpi in ruat. Hlanah missionary a rak ṭuanmi pakhat nih hitin a ti: “Hlanah na rak tuah bantukin chungkhar pumhnak kha hmaan tein tuah law pumhnak caah i timtuah peng.” Khrihfabu thar i thawngṭha chimnak ah na si khawh chungin i tel peng. Jehovah nih hlan bantukin an ṭuan khawh ti lo hmanhah zumhawktlak tein a rian a ṭuan zungzalmi kha a philh hna lo.—Hebru 6:10-12 rel.

8. Nunning sawhsawh tein nun peng awkah 1 Johan 2:15-17 nih zeitindah a kan bawmh khawh?

⁸ Nunning sawhsawh tein nung peng. Satan vawlei i lungretheihnak nih a ‘thahmi’ si hlah. Mah ruangah Jehovah rianṭuan zong kha ngol hlah. (Matt. 13:22) Vawlei mi, hawikom asiloah chungkhat nih Satan vawlei ah tangka kawl  dingin an in hnek tikah mah kha al. (1 Johan 2:15-17 rel.) Thlaraulei, lungthinlei le pumsalei in kan herhmi vialte kha “kan herh lio caante ah” kaan pek hna lai tiah bia aa kammi Jehovah kha i bochan.—Heb. 4:16; 13:5, 6.

9. Phungthlukbia 22:3, 7 ningin a herh loin leiba ngeih kha hrial cu zeicah a biapit, a ṭhami biakhiahnak tuah khawh awkah zeinihdah a kan bawmh lai?

⁹ A herh loin leiba ngeih kha hrial. (Phungthlukbia 22:3, 7 rel.) I ṭhialnak nih tangka tampi a dihter khawh i fawi tein leiba zong a ngeihter khawh. Leiba ngeih lo awkah tangka cawi in a herh tuk lomi thil cawk kha hrial. Tahchunhnak ah, a dam lomi kan chungkhar kan zohkhenh hna tik ti bantuk kan lungre a theih lio caan ah tangka zeizat dah ka cawi lai timi kong he aa tlaiin biakhiahnak tuah cu a har kho. Cu bantuk thil sining na ton ahcun ‘thlacamnak’ nih a ṭhami biakhiahnak tuah awkah aan bawmh khawh ti kha i cinken. Jehovah nih a ṭhami biakhiahnak na tuah khawh nakhnga lungdaihnak an peknak thawngin na thlacamnak kha aan leh lai.—Fil. 4:6, 7; 1 Pet. 5:7.

10. Zeitindah hawikom thar ngeih khawh a si?

¹⁰ Hawikom le chungkhar he pehtlaihnak ṭha ngei peng. Na intuarnak le na tonmi kong kha na hawikom ṭha pawl kha chim hna, a hleiin cu bantuk thil sining a tong balmi hna kha chim hna. Cutin tuahnak nih na intuarnak kha a ṭhat deuh nakhnga aan bawmh khawh. (Pct. 4:9, 10) Hlanah rianpek na sinak hmun i na hawile cu na hawikom an si peng rih. Asinain atu na umnak hmun zongah hawikom thar ngeih khawh i zuam. Hawikom ngeih khawh awkah nangmah theng hawikom ṭha na si hmasa a hau ti kha i cinken. Zeitindah hawikom thar na ngeih khawh? Midang kha Jehovah nih aan pekmi thluachuah kong kha chim hna law Jehovah rianṭuannak ah naa nuamh kha hngalhter hna. Caantling rian na sunsak kha Khrihfabu i mi cheukhat nih an hngalhthiam lo hmanhah cheukhat nih cun an hngalhthiam khawh i annih cu na hawikom ṭha an hung si kho. Asinain nangmah kong asiloah na thil tikhawhnak kong kha tamtuk in chim hlah, cun a ṭhalomi intuarnak na ngeihmi kong zong kha chim hlah.

11. Na chungkhar kha zeitindah na nuamhter zungzal khawh?

¹¹ Na innchunghawi damlonak ruangah na rian in naa dinh a herh ahcun na innchunghawi kha sual phaw hlah. Cun nangmah theng na ngan a dam lo tikah na innchunghawi a ngaih ka chiatter ti zongin sual i phaw hlah. Nannih cu “pum khat” nan si i zei bantuk thil sining nan ton hmanhah pakhat le pakhat i zohkhenh dingin Jehovah hmaiah bia nan i kam ti kha philh hlah. (Matt. 19:5, 6) Fa na ngeih ruangah na rian in naa dinh a hauh ahcun na fa kha na rian nakin amah cu na caah a biapi deuh ti kha  hngalhter. Na fa kha Pathian “thluachuah” in na hmuh kha zumhter. (Salm 127:3-5) Cun na rian in na rak hmuhmi thluachuah kong zong kha chim. Cutin na tuahmi nih na fa kha nangmah bantukin Jehovah rian kha caantling in ṭuan ve awkah a forh lai.

12. (a) Caantling rian a ṭuanmi hna kha an rian an ṭuan khawh zungzal nakhnga zeitindah kan bawmh khawh hna? (b) An tonmi thlennak he aa tlak in an um khawh nakhnga zeitindah kan bawmh khawh hna?

¹² Thangṭhat awk ngai a simi cu Khrihfabu tampi le unau pakhat cio nih caantling rian a ṭuanmi hna kha an rian ṭuan peng khawh dingin an bawmh hna. An rian ṭuan peng awkah tha an pek hnanak thawngin, tangka le a dang an herhmi thilri an pek hnanak thawngin asiloah lamhlat ah a ummi an chungkhar zohkhenhnak ah an bawmh hnanak thawngin cutin an tuah. (Gal. 6:2) Nan Khrihfabu ah caantling rian in aa dinmi an um ahcun a ṭhalomi thil asiloah palhnak an tuah caah an i dinhmi a si tiah ruat hlah. * Mah canah thil sining thlennak he aa tlak in an um khawh nakhnga bawm hna. Lungtho tein conglawmh hna law atu ah an ngan a dam lo buin an si khawh chungin rian an ṭuanmi kha thangṭhat hna. Anmah he i theihhngalh awkah i zuam. An hngalhnak, an in cawnpiaknak le an hmuhtonnak in cawng.

13. Caantling rian in aa dinmi hna kha zeitindah kan bawmh khawh hna?

¹³ Hmasa bik ah caantling rian in aa dinmi hna nih umnak inn, tlunkalnak, rian ti bantuk an herhmi hna kha na bawmh hna a hau men lai. Ngunkhuai pek le aamahkhaan hmuhnak ti bantuk nifate an herhmi thil hna zongah bawmh an hau men lai. A bikin an herhmi  cu an sining hngalhthiampiak kha a si. An chungkharmi asiloah anmah theng ngandam lonak an tong men lai. Dawtmi nih thihtak ruang zongah ngaihchia in an um men lai. * An ka in cun an chim lai lo nain rian an rak ṭuannak i an hawile kha an ngaih hna ca zongah an ngaih a chia men lai. Lung a buaiter khomi mah bantuk intuarnak hna kha tei khawh awkah a caan an pek a hau.

14. Khrihfabu thar i unau pawl nih caantling rian in aa dinmi unaunu pakhat kha zeitindah an bawmh?

¹⁴ Anmah he phungchim na kal i a ṭhami tuahsernak in tha na pek hna ahcun i nuamh awkah na bawmh khawh hna lai. Ramdang ah kum tampi Pathian rian a ṭuanmi unaunu pakhat nih hitin a ti: “A hmasa rian ka rak ṭuannak ah nifatin Baibal cawnpiaknak tampi ka tuah. Asinain atu cu phungchimnak ah Baibal relpiak asiloah video pakhat piahpiak hmanh a har. Asinain Khrihfabu thar i unau pawl nih anmah he lennolh le Baibal cawnpiaknak kalṭi awkah an ka sawm. Zumhfekmi le rian aa zuammi unau pawl nih Baibal cawnpiaknak an tuahmi kha ka hmuh tikah mah nih lohmun cungah a ṭhami hmuhnak a ka ngeihter deuh. Lohmun thar ah biaruahnak thawk khawh ning kha ka cawn. Mah vialte nih nuamhnak a ka hmuhter ṭhan.”

15. Thil sining thar ah zeitindah hlawhtlinnak na hmuh khawh?

¹⁵ Thil sining thar ah hlawhtlinnak na hmu kho. Ka rian in dinh ka simi cu palhnak ka tuah caah asiloah san ka tlaih ti lo caah a si tiah ruat hlah. Atu ah Jehovah nih aan bawmh khawhnak lam kong kha ruat law phungchimnak ah i tel zungzal. Kumzabu pakhatnak i zumhfekmi Khrihfa hna kha i zohchunh hna. Annih cu khoika i an um hmanhah “zumtu aa ṭhekmi kha a kenkip lo ah an kal i an kalnak paohah thawngṭha kha an chim.” (Lam. 8:1, 4) Phung kan chim peng ahcun ṭhatnak kan hmu lai. Tahchunhnak ah, ram pakhat in ṭhawl a simi hmaikal pawl cu an pawngkam ram pakhat ah  an i ṭhial, mah ram cu an rak hmanmi holh in thawngṭha chim a herh deuhnak ram a si. Thla tlawmpal chungah khulrang in a ṭhangcho thluahmahmi phu thar hna kha an dirh khawh.

16. Thil sining thar ah zeitindah nuamhnak kan hmuh khawh?

¹⁶ “BAWIPA ah nan i lawmhnak cu nan thazaang a si.” (Neh. 8:10) Kan i lawmh biknak cu zeitluk in kan sunsakmi a si hmanhah kan rian kha si loin Jehovah he a ṭhami pehtlaihnak kan ngeihmi kha a si awk a si. Cucaah Jehovah he kalṭi zungzal law fimnak, lamhruainak le bawmhnak caah Jehovah kha i bochan. Hlanlio i na rak ṭuannak hmun ah a ummi, mi pawl kha na si khawh chungin na rak bawmh hna caah a hmasa na rian kha na sunsak tuk. Cu bantukin atu i na ṭuanmi rian zong kha lungthin dihlak in ṭuan law mah kha sunsak awkah Jehovah nih zeitindah aan bawmh ti kha hngalh awkah i zuam.—Pct. 7:10.

17. Atu ah kan ṭuanmi rian he aa tlaiin zeidah kan i cinken awk a si?

¹⁷ Jehovah rian kan ṭuanmi cu zungzal ca a si i atu ah kan ṭuanmi rian tu cu chikkhat ca lawng a si ti kha kan i cinken a hau. Vawlei thar ah kan dihlak in kan rian aa thleng men lai. A hmasa ah langhtermi Aleksey nih atu i ka tonmi thlennak nih hmailei thlennak caah timhcia a ka siter tiah a zumh. Hitin a ti: “Jehovah le vawlei thar cu a um taktakmi a si ti kha ka hngalh, asinain mah cu keimah he aa hlat tiah ka rak ruah. Atu cu Jehovah he kaa naih tuk cang i vawlei thar zong a nai tuk cang tiah ka ruah.” (Lam. 2:25) Cucaah zeibantuk rian pek kan si hmanhah Jehovah he kalṭi peng hna u sih. Zeitikhmanh ah a kan hlaw lai lo i khoika hmun i kan um hmanhah a rian kan ṭuannak ah i nuamh awkah a kan bawmh lai.—Isa. 41:13.