ZUMHNAK cu a ṭhawng tukmi a si. Tahchunhnak ah, Satan nih Jehovah he kan i pehtlaihnak kha hrawh a duh. Asinain ‘Khuachia nih mei bantuk a simi thal in a kan kah tikah hmih khawh’ awkah zumhnak nih a kan bawmh. (Efe. 6:16) Zumhnak thawngin tlang bantuk a simi buaibainak hna kha kan inkhawh. Jesuh nih a zultu pawl kha hitin a ti hna: “Anṭam ci tlukin a nganmi zumhnak nan ngeih ahcun, hi tlang hi, ‘I thawn,’ ti u law aa thawn ko lai.” (Matt. 17:20) Zumhnak nih Jehovah he kan i pehtlaihnak a fehter khawh ti kha kan hngalh caah mah biahalnak hna hi ṭha tein kan ruah awk a si: “Zumhnak timi cu zeidah a si? Kan lungput cu kan zumhnak cungah zeitindah huham a ngeih? Kan zumhnak kha zeitindah kan fehter khawh? Cun ahodah kan zumh awk a si?—Rom 4:3.

“Khuachia zong nih [Pathian a um] ti kha an zumh ve” caah zumhnak timi cu biatak kong hngalh asiloah zumh sawhsawh lawng kha a si lo.” (Jeim 2:19) Cu a si ah zumhnak timi cu zeidah a si?

Baibal nih zumhnak kha a kong pahnih in a fianter. Pakhatnak, “zumhnak ngeih kan ti hi, kan i ruahchanmi kan hmuh ṭheu lai ti kan zumh” kha a si. (Heb. 11:1a) Zumhnak na ngeih ahcun Jehovah nih a chimmi vialte cu a hmaan i a tling hrimhrim lai ti kha na zumh lai. Tahchunhnak ah, Jehovah nih Israel mi kha hitin a ti hna: “Chun ca le zan ca i phung ka sermi hi hrawh khawh a si i annih nih ningcang loin an um khawh a si ahcun, David ka sal he ka biakamnak zong kha a rawk kho ve lai.” (Jer. 33:20, 21) Nika a chuak sual lai lo i chun le zan a um sual lai lo tiah na phang bal maw? Vawlei cu amahle lam te ah aa hel i nika a vel timi kokek phunglam cungah lunghrinnak na ngeih lo ahcun mah phunglam hna a Sertu nih a biakam a tlinter khawh timi cungah tah lunghrinnak na ngeih awk a si maw? A si lo.—Isa. 55:10, 11; Matt. 5:18.

Pahnihnak, zumhnak timi cu “kan mit in kan hmuh khawh lomi hi an um ko ti kan zumh hi a si.” Zumhnak timi cu mit in hmuh khawh lomi, a taktak a simi thil ‘a um ko ti zumh’ kha a si. (Heb. 11:1b) Zeiti lam in dah? Ngakchia pakhat nih ‘thli a um ti kha zeitindah na hngalh?’ tiah aan hal hei ti u sih. Thli cu na hmu bal lo, asinain thli a um ti a langhtermi thaw le thli a hranmi tibantuk kong kha na chimh khawh. Mah nih ngakchia kha thli cu hmuh khawh a si lo nain a um taktakmi a si ti kha zumh awkah a bawmh lai. Cu bantukin zumhnak timi cu a fiangmi langhtertu thil cungah hram aa bunhmi a si.—Rom 1:20.

Zumhnak cu langhtertu thil cungah hram aa bunhmi a si caah mi pakhat nih zumhnak a ngeih nakhnga ‘biatak kha a hngalh’ hmasa a hau. (1 Tim. 2:4) Asinain mah lawngin a za lo. Lamkaltu Paul nih hitin a ti: “kan lung in kan zumh.” (Rom 10:10) Mi pakhat nih biatak kha zumh lawng si loin a sunsak zong a hau. Mah lawngah a zumhnak kha a langhter khawh lai i Pathian lung a lawmhtermi lam in a nung kho lai. (Jeim 2:20) Biatak kha lungtak tein a sunsak lomi pakhat nih cun a zumhnak thlen a duh lo ca asiloah aa thimmi thil kha tuah a duh caah langhtertu thil hna kha zumh a duh men  lai lo. (2 Pet. 3:3, 4; Judas 18) Mah ruangah Baibal chan i khuaruahhar thil tuahmi a hmumi dihlak nih zumhnak an rak ngeih lomi a si. (Nam. 14:11; Johan 12:37) Pathian thiang thlarau nih biatak a sunsak taktakmi hna lawng kha zumhnak ngeih awkah a bawmh hna.—Gal. 5:22; 2 Thes. 2:10, 11.

A fekmi zumhnak a ngeimi hna lakah Siangpahrang David zong aa tel ve. (Heb. 11:32, 33) Asinain David a chungkharmi dihlak nih cu bantuk zumhnak an ngei lo. Tahchunhnak ah, David nih Goliath a zuamcawh tikah a upa Eliab nih sual a phawt, mah cu zumhnak a ngeih lo a langhtermi a si. (1 Sam. 17:26-28) Ahohmanh zumhnak ngeicia in hrin kan si lo i nulepa sinin zumhnak ro zong kan co lo. Cucaah David zumhnak cu Pathian he aa ṭhami pehtlaihnak a ngeihnak thawngin a rami a si.

Salm 27 ah David nih zeitindah a fekmi zumhnak a hun ngeih ti kha a langhter. (Caang 1) David nih hlanlio i a hmuhtonnak kong le Jehovah nih zeitindah a ral pawl a dohpiak hna timi kong kha a ruah. (Caang 2, 3) Biaknak ca i Jehovah timhtuahnak kha a sunsak tuk. (Caang 4) David nih puan biakinn ah zumtu khat pawl he Pathian kha a biak. (Caang 6) Jehovah sinah lungtak tein thla a cam. (Caang 7, 8) David nih Pathian lamhruainak zong kha hmuh a duh. (Caang 11) David caah zumhnak cu a biapi tukmi a si, cucaah David nih hitin a ti: “Zumhnak hei ngei hlah ning law zeidah ka lawh hnga?”—Caang 13, NW.

Salm 27 ah a langhtermi ziaza le lungput kha na ngeih ahcun David bantuk zumhnak na ngei kho ve lai. Zumhnak cu a hmaanmi hngalhnak cungah hram aa bunh caah Baibal le Baibal hrambunhmi cauk hna kha tam deuh na hlathlai ahcun Pathian thlarau nih a chuahtermi mah ziaza kha na ngei kho lai. (Salm 1:2, 3) Hlathlainak na tuah tikah a caan pe in ruat. Cutin ruahnak nih Jehovah cung i naa lawmhnak kha a karhter chin lai. Jehovah cungah naa lawmh tuk caah, Khrihfabu pumhnak ah amah na biaknak thawngin le midang sinah naa ruahchannak kong na chimnak thawngin na zumhnak kha langhter na duh ko lai. (Heb. 10:23-25) Kan zumhnak kha ‘lung dong lo tein thla kan cam’ zungzalnak thawng zongin kan langhter khawh. (Luka 18:1-8) Cucaah Jehovah sinah “a zungzal in thla cam” law “amah nih aan zohkhenh” ti kha zum. (1 Thes. 5:17; 1 Pet. 5:7) Zumhnak nih a hmaanmi thil tuah awkah a kan forh i a hmaanmi thil kan tuah tikah kan zumhnak cu a fek chin.—Jeim 2:22

Jesuh nih a thih lai zan ah a zultu pawl kha hitin a ti hna: “Pathian kha zum u law keimah zong kha ka zum ve u.” (Johan 14:1) Cucaah Jehovah cung lawngah si loin Jesuh cung zongah zumhnak kan langhter a hau. Jesuh na zumh kha zeitindah na langhter khawh? A kong pathum in i ruah hna hmanh u sih.

 Pakhatnak, tlanhnak man kha Pathian nih aan pekmi pumpak laksawng in hmu. Lamkaltu Paul nih hitin a ti: “A ka daw i ka ca i a nunnak a pemi Pathian Fapa zumhnak thawngin ka nung.” (Gal. 2:20) Jesuh kha na zumh ahcun tlanhnak man cu nangmah he aa pehtlaimi a si i na sualnak ngaihthiamnak hrampi a si ti kha fek tein na zumh lai. Cun tlanhnak man cu zungzal nunnak ruahchannak aan ngeihtertu a si i Pathian nih aan dawt ti a langhtertu hmelchunhnak ngan bik a si ti zong kha na zumh lai. (Rom 8:32, 38, 39; Efe. 1:7) Tlanhnak man nih a ka bawmh khawh ti kha na zumh taktak ahcun ka sual timi ruahnak le nangmah le nangmah cungah a chiatnaklei in hmuhnak na ngei ti lai lo.—2 Thes. 2:16, 17.

Pahnihnak, Jesuh tlanhnak man cungah hrambunh in Jehovah kha thlacamnak in naih. Tlanhnak man thawngin ‘ralṭhatnak’ he Jehovah sinah thla kan cam kho. Cutin kan tuah ahcun “kan herh lio caante ah Pathian zaangfahnak le vel cu kan hmuh lai.” (Heb. 4:15, 16; 10:19-22) Thlacamnak nih sualnak tuah awkah leem kan si tikah al ding timi kan biakhiahnak kha a fehter chin.—Luka 22:40.

Pathumnak, Jesuh nawl kha ngai. Lamkaltu Johan nih hitin a ti: “Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.” (Johan 3:36) Johan nih zumhnak langhternak le nawlngaih lonak aa dannak kong a chimmi kha i cinken. Cucaah Jesuh nawl na ngaih tikah amah na zumh na langhtermi a si. Jesuh cawnpiakmi le nawlpekmi dihlak a simi “Khrih nawlbia” na zulhnak thawngin Jesuh nawl na ngaih kha langhter. (Gal. 6:2) Cun “zumh awk a tlakmi le a fimmi sal” hmangin a kan pekmi lamhruainak na zulhnak thawng zongin Jesuh nawl na ngaih kha langhter. (Matt. 24:45) Jesuh nawl na ngaih ahcun thlichia bantukin ṭih a nungmi buaibainak hna kha inkhawh awkah thazaang na ngei lai.—Luka 6:47, 48.

Voikhat cu mipa pakhat nih a au buin Jesuh kha hitin a ti: “Zumhnak cu ka ngei, sihmanhsehlaw a za lo, ka bawm tuah!” (Mar. 9:24) Mah pa nih zumhnak tlawmpal cu a ngei, asinain zumhnak tam deuh ngeih a herh kha toidor tein a cohlan. Mah pa bantukin kannih zong kan nunnak ah zumhnak tam deuh ngeih a herhmi thil sining hna kan tong ve lai. Cucaah atu in kan zumhnak kha kan fehter a hau. Kan theih cang bantukin Baibal kan hlathlai i kan ruah tikah kan zumhnak cu a fek chin. Mah nih Jehovah cungah kan i lawmhnak kha a karhter chin lai. Zumtu khat pawl he Jehovah kan biakṭi, mi sinah kan i ruahchannak kong kha kan chim i thla kan cam zungzal ahcun kan zumhnak cu a fek chin lai. Mah lengah kan zumhnak kan fehter tikah a ngan bikmi laksawng kan hmu. Baibal nih hitin a kan forh: “Ka hawile hna, nannih cu a thiang bikmi nan zumhnak cungah khan fek chin lengmang in i sa chin lengmang ko u. . . . Pathian dawtnak chungah khan um ko u.”—Judas 20, 21.