CAWN AWK CAPAR 34
Jehovah Khrihfabu Ah Na Dirhmun
“Khrih hi nge tampi a ngeimi pum bantuk a si; nge cu tampi an si ko nain pum cu pakhat a si ko.”—1 KOR. 12:12.
HLA 101 Lungrual Tein Ṭuanṭinak
LANGHTERNAK *
1. Zei tinvo sung dah kan i nuamhpi khawh?
JEHOVAH Khrihfabu chungah kan i tel khawhmi cu zeitlukin dah tinvo sung a si. Khrihfabu chung i unau pawl he Jehovah kan biakṭi caah nuamhnak le daihnak taktak kan hmu. Khrihfabu chung i na dirhmun cu zeidah a si?
2. Lamkaltu Paul nih a cakuat ah atu le atu zei tahchunhnak dah a hman?
2 Lamkaltu Paul nih a cakuat ah atu le atu a hmanmi tahchunhnak in a kong tampi kan cawn khawh. Mah a cakuat ah Paul nih Khrihfabu kha minung pum he a tahchunh. Cun Khrihfabu kha minung pakhat i a pum cheubang he zong a tahchunh.—Rom 12:4-8; 1 Kor. 12:12-27; Efe. 4:16.
3. Hi capar ah zei a kong pathum dah kan i ruah hna lai?
3 Hi capar ah Paul hmanmi tahchunhnak in kan cawn khawhmi a biapimi a kong pathum kha kan i ruah hna lai. Pakhatnak, Jehovah Khrihfabu chungah pakhat cio i kan dirhmun * kong kha kan i ruah hna lai. Pahnihnak, Khrihfabu chung i kan dirhmun kha hngalhthiam awkah kan i harh ahcun zeidah kan tuah khawh timi kong kan i ruah hna lai. Pathumnak, Pathian nih Khrihfabu chungah a kan pekmi rian kha pakhat cio nih i manh lo ngaiin zeicah kan ṭuan a herh timi kong kha kan i ruah hna lai.
Jehovah Khrihfabu Chungah Pakhat Cio Nih Kan Ṭuan Dingmi Rian
4. Rom 12:4, 5 nih zeidah a kan cawnpiak?
4 Paul tahchunhnak in kan cawn khawhmi a pakhatnak a kong cu kan dihlak in Jehovah chungkhar ah a biapimi dirhmun kan ngei timi kha a si. Paul nih a chimmi tahchunhnak kha hitin a thawk: “Kan pum cungah hin nge tampi kan ngei i hi nge vialte hi rian dangdang an ngei cio. Cu bantuk cun, kannih zong hi mi tampi kan si nain Khrih he kan i pehtlaihnak thawngin pumkhat kan si i pum nge dangdang cu pakhat le pakhat an i pehtlaih dih bantukin kannih zong pakhat le pakhat kan i pehtlai dih ve.” (Rom 12:4, 5) Paul nih zeidah a chim duhmi a si? A chim duhmi cu kan dihlak in Khrihfabu ah rian dangdang kan ngei cio, asinain kan dihlak in a sunglawimi kan si ti kha a si.
Khrihfabu ah rian dangdang kan ngei cio, asinain kan dihlak in a sunglawimi kan si (Catlangbu 5-12 zoh) *
5. Jehovah nih Khrihfabu kha zei “laksawng” dah a pek hna?
5 Khrihfabu chung i dirhmun a ngeimi kong kha na ruah tikah hruaitu a simi hna kong kha na lung ah a chuak colh men lai. (1 Thes. 5:12; Heb. 13:17) Jehovah nih Khrih thawngin a Khihfabu kha “minung laksawng” a pek hna. (Efe. 4:8, NW) Mah “minung laksawng” ah Uktu Bu chungtel, Uktu Bu bawmtu, Zung Ṭengnge Kawmiṭi chungtel, peng zohkhenhtu, tinṭan cawnpiaktu, Khrihfa upa le bu rianṭuantu an i tel. Jehovah i a sunglawmi a tuu pawl zohkhenh awk le Khrihfabu thazaang pek awkah mah unaupa dihlak cu thiang thlarau in rian pek an si.—1 Pet. 5:2, 3.
6. Thiang thlarau in rian pek a simi unaupa hna nih 1 Thesalon 2:6-8 ningin zei tuah awkah dah an i zuam awk a si?
6 Unaupa hna cu rian a phunphun ṭuan khawh awkah thiang thlarau in rian pek an si. Annih cu pum chung dihlak nih ṭhathnemhnak a hmuh nakhnga kut le ke ti bantuk minung pum cheubang in langhter an si. Cun Khrihfa dihlak nih ṭhathnemhnak an hmuh nakhnga mah rian pekmi unaupa hna nih thiang thlarau bawmhnak thawngin fakpi in rian an ṭuan. Midang sinin thangṭhatnak hmuh awkah an i zuam lo. Mah canah unau pawl thazaang pek awk tu ah fakpi in an i zuam. (1 Thesalon 2:6-8 rel.) Mah zawn lawng aa ruat lomi thlarau lei ah sining a tlinhmi, cu bantuk unaupa hna ruangah Jehovah cungah kan i lawm tuk.
7. Caantling rian a ṭuanmi mi tampi cu zei thluachuah dah an hmuh?
7 Khrihfabu ah mi cheukhat cu missionary, special hmaikal asiloah hmaanhmaan hmaikal in rian an ṭuan men lai. Vawleicung pumpi ah a ummi unau pawl nih phungchim rian le zultu siternak rian kha ṭuan dingin bia an khiah. Cutin bia an khiah caah mi tampi kha Khrih zultu si dingin an bawmh khawh hna. Caantling in Jehovah rian a ṭuanmi lakah mi tam deuh cu tangka asiloah thilri chawva tampi an ngei lo nain Jehovah nih thilṭha tampi a pek hna. (Mar. 10:29, 30) Cu bantuk unau pawl kha kan dawt tuk hna, cun Khrihfabu chung i an um ca zongah kan i lawm tuk.
8. Thawngthanhtu dihlak cu Jehovah caah zeicah a sunglawimi an si?
8 Khrihfabu ah dirhmun a ngeimi hna cu rian pekmi unaupa hna le caantling rian a ṭuanmi hna lawng an si maw? An si lo. Thawngṭha a chimtu thawngthanhtu dihlak cu Pathian ca le Khrihfabu caah a biapimi an si. (Rom 10:15; 1 Kor. 3:6-9) Khrihfabu ah a biapi bikmi kan hmuitinh pakhat cu kan Bawipa, Jesuh Khrih zultu siter kha a si. (Matt. 28:19, 20; 1 Tim. 2:4) Thawngṭha a chimmi ah tipil a ingmi le a ing rih lomi dihlak an i tel, cun annih nih mah rian kha an nunnak ah a biapi bikmi siter awkah an i zuam.—Matt. 24:14.
9. Khrihfa unaunu hna kha zeicah kan sunsak hna awk a si?
9 Jehovah nih Khrihfa unaunu pawl zong Luka 8:2, 3; Lam. 16:14, 15; Rom 16:3, 6; Fil. 4:3; Heb. 11:11, 31, 35) Jehovah nih cu bantuk sining ṭha a ngeimi Khrihfa unaunu hna kha kan Khrihfabu ah a umter hna.
Khrihfabu ah a biapimi rian a pek hna. Zumhfek tein a rian a ṭuanmi nupi le, nu le, nuhmei pawl le nungak pawl kha a sunsak hna. Baibal ah Pathian lung a lawmhtermi, zohchunhawk a ṭhami nu tampi kong kha a chim. Annih cu fimnak, zumhnak, lungthawhnak, ralṭhatnak, siannak le rianṭha ṭuannak ah zohchunhawk a ṭhami in thangṭhat an si. (10. Kum upa hna kha zeicah kan sunsak hna awk a si?
10 Kan Khrihfabu i kum upa unau tampi cung zongah kan i lawm. Cheukhat Khrihfabu ah an nun chung dihlak Jehovah rian zumhfek tein a ṭuanmi kum upa unau tampi an um. Kum upa cheukhat cu nai ah biatak a cawngmi an si men lai. Kum upa tampi cu an kum a hun upat deuh caah ngandamnak he aa tlaiin buaibainak an tong men lai. Mah buaibainak nih Khrihfabu rian le phungchim rian an ṭuannak ah ri a ngeihter men hna lai. Asinain mah kum upa hna nih lohmun rianṭuannak ah an si khawh chungin an i tel i midang cawnpiaknak le thapeknak ah an thazaang dihlak kha an hman. Cucaah an hmuhtonnak in ṭhathnemhnak kan hmu. Annih cu Jehovah ca le kan caah duh a nung tukmi an si.—Ptb. 16:31.
11-12. Nan Khrihfabu i mino pawl kha zeitindah thazaang na pek khawh hna?
11 Mino pawl kong zongah cutin a si ve. Annih cu Satan Khuachia nih a ukmi vawlei le a ṭhalomi ruahnak nih a iapmi vawlei ah an ṭhan caah zuamcawhnak tampi an tong. (1 Johan 5:19) Asinain mino pawl nih pumhnak ah a phi an pekmi, phungchim rianṭuannak ah an i telmi le an zumhnak ralṭha tein an runvenmi kan hmuh tikah kan dihlak in thazaang kan hmu. Mino pawl cu Jehovah Khrihfabu ah a biapimi dirhmun an ngei.—Salm 8:2.
12 Asinain unau cheukhat nih Khrihfabu ah a a sunglawimi kan si ti kha zumh awkah an i harh. Cu bantuk ruahnak a ngeimi hna kha Khrihfabu ah kan dihlak in dirhmun kan ngei ti an zumh nakhnga zeitindah kan bawmh khawh hna? Zohhmanh hna u sih.
Khrihfabu Chung I Na Dirhmun Kha Hngal
13-14. Mi cheukhat nih Khrihfabu ah man ka ngei lo tiah zeicah an ruah?
13 Paul tahchunhnak in kan cawn khawhmi a pahnihnak a kong kha ruathmanh. Paul chimmi a pahnihnak tahchunhnak nih tuchan mi tampi nih an tonmi buaibainak kong ah lungthin a kan pekter. Mah ruangah mi tampi nih Khrihfabu ah a sunglawimi ka si ti kha zumh awkah an i harh. Paul nih hitin a ti: “Ke nih hin i thawh sehlaw, ‘Kei cu kut ka si lo caah pum chungah kaa tel lo,’ ti sehlaw, cu nih cun pum nge a si cu a ngolter hnga maw? Ngolter hlah. Hna nih hin, ‘Kei cu mit ka si lo caah pum chungah kaa tel lo,’ ti sehlaw, cu nih cun pum nge a si cu a ngolter hnga maw? Ngolter hlah.” (1 Kor. 12:15, 16) Paul nih zeidah a chim duhmi a si?
14 Nangmah le nangmah kha unau dang he naa tahchunh ahcun Khrihfabu ah man ka ngei lo timi ruahnak na hun ngei kho. Khrihfabu chung i mi cheuhkhat cu cawnpiak a thiammi, tlangtlak a thiammi, midang thazaang pek le hnemh a thiammi an si. Cucaah anmah bantukin midang kha ṭha tein ka bawm kho hna lo tiah na ruah men lai. Mah nih aa toidormi na si kha a langhter. (Fil. 2:3) Asinain naa ralrin a hau. Thiamnak a ngeimi hna he naa tahchunh lengmang ahcun na lung a dong lai. Paul nih a chim bantukin Khrihfabu chungah dirhmun a ngei lomi hmanh in naa hun i ruat men lai. Cu bantuk ruahnak hloh awkah zeinihdah aan bawmh khawh?
15. Kan hmuhmi laksawng kong he aa tlaiin 1 Korin 12:4-11 ningin zeidah kan hngalh a herh?
15 Mah kong hi ruathmanh: Jehovah nih kumzabu pakhatnak i Khrihfa hna kha thiang thlarau hmangin khuaruahhar thil tuah khawhnak ṭhawnnak a pek hna, asinain an dihlak in cun mah laksawng kha an hmu dih lo. (1 Korin 12:4-11 rel.) Jehovah nih sining a phunphun a pek hna, asinain an dihlak in a sunglawimi an si. Tuchan ahcun thiang thlarau hmangin khuahruahhar laksawng pek kan si ti lo. Asinain mah phunglam hi kan zulh rih. Kan ngeihmi sining cu aa khat cio lo nain kan dihlak in Jehovah caah a sunglawimi kan si.
16. Lamkaltu Paul i zei ruahnak cheuhnak dah kan zulh awk a si?
16 Kanmah le kanmah Khrihfa unau dang he i tahchunh canah, lamkaltu Paul i mah ruahnak cheuhnak hi kan zulh awk a si: “Kan rian ṭuanmi cu kanmah cio nih a ṭhat a chiat a cuaithlai ning kan thiam awk a si; cucaah tuah awk aa tlakmi thil kan tuah tikah, midang nih a ṭha, a ṭhalo ti hau loin, kan lung aa lawm kho lai.”—Gal. 6:4.
17. Paul ruahnak cheuhnak kan zulh ahcun zei ṭhathnemhnak dah kan hmuh lai?
17 Paul ruahnak cheuhnak kha kan zulh i kan tuahsernak kha kan i dothlat ahcun midang nih an ngeih lomi sining kan ngeih kha kan hun hngalh lai. Tahchunhnak ah, Khrihfa upa pakhat cu pulpit cungah phungchim a thiammi a si men lai lo asinain zultu siternak rian ah a thiam tukmi a si men lai. Asiloah a dang Khrihfa upa hna bantukin midang tlangtlak a thiam lomi a si men lai, asinain zaangfahnak le dawtnak a ngeimi le unau pawl nih Baibal ruahnak cheuhnak an hal ngammi a si men lai. Asiloah anih cu khual dawtnak langhternak ah minṭhatnak a hmumi a si men lai. (Heb. 13:2, 16) Kan thazaang le kan laksawng kha fiang tein kan hmuh ahcun Khrihfabu caah kan tuah khawhmi a ṭhami thil kong kha kan hun ruah lai. Cun kanmah he aa lo lomi laksawng pek a simi unau pawl kha kan nahchuah hna lai lo.
18. Kan sining kha zeitindah kan ṭhanchoter khawh?
18 Khrihfabu chung i kan dirhmun cu zei bantuk a si hmanahah kan dihlak in kan rian le kan sining kha ṭhanchoter kan duh. Cutin kan ṭhanchoter khawh nakhnga Jehovah nih a bupi hmangin a kan cawnpiak. Tahchunhnak ah, zarh lai pumhnak ah hmualngei tein phungchim rianṭuan khawh ning kong he aa tlaiin lamhruainak hna kan hmu. Mah lamhruainak kha zulh awkah naa zuam maw?
19. Pennak Kong Chimtu hna caah Tinṭan kai ding timi na hmuitinh kha zeitindah na phanh khawh?
19 A dang a ṭha tukmi cawnpiaknak pakhat cu Pennak Kong Chimtu hna caah Tinṭan kha a si. Mah tinṭan ah kum 23 in 65 kar a simi caantling rian a ṭuanmi unau pawl kai khawh a si. Mah hmuitinh cu ka phan kho bal lai lo tiah na ruah men lai. Cutin na ruah ahcun na kai khawh lonak a ruang kha cazin tuah canah kai na duhnak a ruang tu kha cazin tuah. Mah nih tuah a herhmi thil kha tuah dingin aan bawmh lai. Jehovah bawmhnak thawngin le naa zuamnak thawngin a si kho lo dingmi a lomi thil kha na hun tuah khawh lai.
Khrihfabu Thazaang Pek Awkah Na Laksawng Kha Hmang
20. Rom 12:6-8 in zeidah kan cawn khawh?
20 Paul tahchunhnak in kan cawn khawhmi a pathumnak a kong kha Rom 12:6-8 ah kan hmuh khawh. (Rel.) Hika zongah Paul nih Khrihfabu chungmi hna nih an hmuhmi laksawng phun dangdang kong kha a langhter ṭhan. Asinain atu ahcun zei laksawng kan hmuh hmanhah Khrihfabu thazaang peknak caah kan hman awk a si timi kong kha a hleiin a chim.
21-22. Robert le Felice sinin zeidah kan cawn khawh?
21 Robert timi unaupa cungah a cangmi kong hi ruathmanh. Ramdang i phungchim rian a ṭuan hnuah an khua i Bethel ah rianṭuan dingin rian pek a rak si. Unaupa nih palhnak ka tuah ruangah a si lo ti kha a hngalh ko nain hitin a ti: “Ka rian ka sung tiah ka ruah caah thla tampi chung kaa nuam lo. A caan ah Bethel rian ka ṭuanmi hmanh kha ngol ka rak duh.” Zeitindah nuamhnak a hmuh ṭhan? Khrihfa upa pakhat nih Jehovah nih a hmasa i kan ṭuanmi rian in a kan cawnpiak caah atu i kan
ṭuanmi rian kha hmualngei deuh in kan ṭuan khawh timi kong kha a hngalhter ṭhan. Robert nih hlanlio kong kha ruat ti loin atu i a ṭuanmi rian ah lungthin pek a hau ti kha a hun hngalh.22 Unaupa Felice Episcopo zong cu bantuk thil sining a tong ve. Unaupa le a nupi cu 1956 ah Gilead tinṭan a dihmi an si. Bolivia ah peng zohkhenhtu in rian an ṭuan i 1964 ah fa an hun ngei. Felice nih hitin a ti: “Kan duh tukmi rian kaltak cu kan caah a har tuk. Mah ruangah kumkhat chung ka lungre a rak thei. Asinain Jehovah bawmhnak thawngin ka ruahnak kha ka thlen khawh i nulepa pakhat in ka rian thar ah lungthin ka hun pek.” Robert asiloah Felice bantukin na ruat ve maw? Atu ah a hmasa i na rak ṭuanmi tinvo sung bantuk na ngeih ti lo caah lungrethei in na um maw? Cutin na si ahcun na ruahnak kha na thlen i atu ah Jehovah le unau pawl caah na tuah khawhmi kong kha biapi ah na chiah ahcun na hun i nuam deuh lai. Na laksawng le na ngeihmi sining kha midang bawmhnak ah na hman ahcun Khrihfabu thazaang peknak ah nuamhnak na hmu lai.
23. Zei tuah awkah dah a caan kan lak awk a si, a hnu capar ah zei kong dah kan i ruah hna lai?
23 Kan dihlak in Jehovah caah a sunglawimi kan si. Jehovah nih a chungkharmi si hna seh ti a kan duh. Unau pawl thazaang pek awkah kan tuah khawhmi kong kha kan ruah i fakpi in kan i zuam ahcun Khrihfabu chungah dirhmun ka ngei lo timi ruahnak kan ngei lai lo. Asinain Khrihfabu chung i midang kan hmuh hna ning kong ah tah zeitin? Kan sunsak hna kha zeitindah kan langhter khawh? A hnu capar ah mah a biapimi kong kha kan i ruah hna lai.
HLA 24 Jehovah Tlang ah Ra U
^ cat. 5 Kan dihlak in Jehovah dawtmi si kan duh. Asinain a caan ah Jehovah caah zeitindah hman awk a tlakmi kan si khawh timi kong kha kan ruat men lai. Hi capar nih kan dihlak in Khrihfabu chungah a sunglawimi kan si ti kha hngalh awkah a kan bawmh lai.
^ cat. 3 BIAFANG FIANTERNAK: Jehovah Khrihfabu chung i kan dirhmun nih Khrihfabu thazaang pek awkah kan ṭuanmi rian kha a chim duhmi a si. Mah cu kan miphun, kan ngeihmi tangka, kan chungkhar, kan nunphung asiloah kan cawnmi fimnak cungah aa hngatmi a si lo.
^ cat. 62 HMANTHLAK FIANTERNAK: Khrihfabu pumh hlan, pumh lio le pumh dih hnuah a cangmi thil a langhtermi hmanthlak pathum. Hmanthlak 1: Khrihfa upa pakhat nih a rak i pummi a conglawmh lio, mino unaupa nih sehlei thilri a timhtuah lio le unaunu pakhat le kum upa unaunu pakhat bia an i ruah lio. Hmanthlak 2: Mino he upa he Vennak Innsang Cawnnak ah a phi pek dingin an kut an thlir lio. Hmanthlak 3: Nuva tuahkhat Biakinn thianhnak ah an i tel lio. A nu nih a fanu thawhlawm kuang ah thawhlawm a thlakter lio. Mino unaupa nih cauk ṭha tein a zohkhenh lio, a dang unaupa nih kum upa unaunu thazaang a pek lio.