1. David nih Jehovah toidornak kong he aa tlaiin zeidah a chim?

JEHOVAH cu aa toidormi a si tiah kan chim kho taktak maw? Kan chim khawh. David nih hitin a ti: “Nangmah nih na ka huhphenh i na ka khamh; na [toidornnak, NW] nih mi ngan ah a ka ser.” (2 Sam. 22:36; Salm 18:35) David nih hmailei Israel siangpahrang a si dingmi chiti thuh dingin a pa inn ah Profet Samuel a rat ni kha a ruah men ko lai. David cu fapa pariat lakah a hniang bik a si; asinain Jehovah nih Siangpahrang Saul airolhtu dingin a rak thim.—1 Sam. 16:1, 10-13.

2. Hi capar ah zei kong dah kan i ruah hna lai?

² Salm caṭialtu pa nih Jehovah sinah a chimmi mah bia hi David nih a cohlan ko lai: “Van le vawlei run zoh awkah hin a rung kuun. Sifakmi kha . . . siangpahrang fale hawikom ah khan a ser hna.” (Salm 113:6-8) Hi capar ah Jehovah nih mah ziaza a langhter ning kan i ruahnak thawngin toidornak kong he aa tlaimi a biapimi thil cheukhat kong kha kan i ruah hmasa hna lai. Cun Siangpahrang Saul, profet Daniel le Jesuh sinin kan cawn khawhmi toidornak kong zong kan i ruah hna lai.

3. Jehovah nih zeitindah a kan pehtlaih, mah nih zeidah a langhter?

³ Jehovah nih a tlinglomi minung a pehtlaih hna ningin aa toidormi a si kha a langhter. Kan biaknak a cohlan lawng si loin a hawile zongin a kan hmuh. (Salm 25:14) A hawikom kan si khawh nakhnga a hmasa bik ah Jehovah nih kan sualnak ngaihthiam awkah a Fapa kha raithawi dingin a timhtuah. Jehovah cu zaangfahnak a ngei taktakmi a si.

4. Jehovah nih zeidah a kan pek, zeicah?

 ⁴ Jehovah nih toidornak a langhter ning a dang kong kha i ruah hna u sih. Sertu a si caah Jehovah nih kan nunnak ah mah tein i thim khawhnak sining ngeih lo dingin a kan ser khawh. Asinain cutin a kan ser lo. Amah he i lo in a kan ser i zalonnak zong a kan pek. Pathian nih amah kan dawt caah lungthin tak tein ka bia hna seh ti a duh, cun a nawl kan ngaih ahcun ṭhatnak kan hmu lai ti zong kan hngalh. (Deut. 10:12; Isa. 48:17, 18) Jehovah cu aa toidor tukmi a si ti kan hngalh caah kan i lawm tuk.

5. Jehovah nih aa toidormi si awkah zeitindah a kan cawnpiak? (A phaw hmanthlak zoh.)

⁵ Jehovah nih a kan pehtlaih ningin toidornak ngeih awkah a kan cawnpiak. Jehovah cu van le vawlei ah a fim bikmi a si. Asinain midang nih ruahnak an cheuhmi kha lungtho tein a cohlan. Tahchunhnak ah, Jehovah nih thil vialte a sernak ah a Fapa kha aa bawmhter. (Ptb. 8:27-30; Kol. 1:15, 16) Jehovah cu lianngan bik a si ko nain midang kha rian cheukhat a pek ve hna. Tahchunhnak ah, Jesuh kha Pennak ah Siangpahrang in rian a pek i amah he uktu ṭuanṭi dingin minung 144,000 kha nawl ngeihnak a pek hna. (Luka 12:32) Jehovah nih Jesuh kha Siangpahrang le Tlangbawi Ngan si dingin a cawnpiak ti cu a fiang ko. (Heb. 5:8, 9) Cun Jesuh he uktu a ṭuanṭi dingmi hna nih an rian an liim khawh nakhnga zong a cawnpiak hna, asinain an rian ṭuan ning he aa tlaiin uk awkah aa zuam lo. Mah canah annih nih a duhnak an tuah lai ti kha a zumh.—Biat. 5:10.

6-7. Midang rian peknak kong he aa tlaiin vancung kan Pa sinin zeidah kan cawn khawh?

⁶ Aho sin hmanhin bawmhnak a herh lomi vancung kan Pa nih midang kha nawlngeihnak a pek hna ahcun kannih zong nih zeitluk in  dah cutin kan tuah chinchin ve awk a si. Tahchunhnak ah, nang cu innchungkhar lu asiloah Khrihfa upa pakhat na si maw? Midang rian na pek hnanak thawngin le an rian ṭuan ning he aa tlaiin uk awkah naa zuam lonak thawngin Jehovah kha i zohchunh. Jehovah naa zohchunh tikah na rian ṭuanmi kha liim lawng si loin midang zong kha na cawnpiak khawh hna lai, cun mahle mah zumhnak an ngeih khawh nakhnga zong na bawmh khawh hna lai. (Isa. 41:10) Nawlngeitu hna nih Jehovah sinin zeidah an cawn khawh rih?

⁷ Baibal ah Jehovah nih vancungmi a fapa le ruahnak kha hngalh a duh tiah a ti. (1 Siang. 22:19-22) Nulepa hna, Jehovah kha zeitindah nan i zohchunh khawh? Aa tlak ahcun rian ṭuan ning kong he aa tlaiin nan fale ruahnak kha hal hna u. A si khawh ahcun mah ningin tuah i zuam u.

8. Jehovah nih Abraham le Sarah kha lungsaunak he zeitindah a pehtlaih hna?

⁸ Jehovah nih lungsaunak a langhter ning a dang kong kha i ruah hna u sih. Tahchunhnak ah, a biakhiahnak he aa tlaiin amah a biami hna nih biahalnak an tuah tikah Jehovah cu a lung a sau. Sodom le Gomorrah khua hrawhnak kong he aa tlaiin Abraham nih a lungretheihnak kong a chimh tikah a bia a rak ngaihpiak. (Gen. 18:22-33) Cun Jehovah nih Abraham nupi Sarah a pehtlaih ning zong kha i cinken. Na tar hnuah fa na pawi lai timi Pathian biakam a theih tikah Sarah cu a rak ni, asinain Pathian cu a thin a hung lo. (Gen. 18:10-14) Mah canah, Sarah kha upatnak he a rak pehtlaih.

9. Nulepa le Khrihfa upa hna Jehovah sinin zeidah nan cawn khawh?

⁹ Nulepa le Khrihfa upa hna Jehovah sinin zeidah nan cawn khawh? Nan fale asiloah Khrihfabu unau cheukhat nih nan biakhiahnak an cohlan lo tikah zeitindah nan lehrulh hna awk a si? Nan palh tiah na ti colh hna lai maw? Asiloah an hmuhning kha theihthiam awkah naa zuam lai maw? Nawlngeitu hna nih Jehovah an i zohchunh tikah chungkhar le Khrihfabu unau pawl cu ṭhathnemhnak an hmu. Jehovah sinin kan cawn khawhmi toidornak kong kha kan i ruah cang hna. Atu cu Baibal chung i zohchunhawk a ṭhami hna sinin kan cawn khawhmi toidornak kong kha i ruah hna u sih.

10. Kanmah cawnpiak awkah Jehovah nih a dang zei tahchunhnak dah a hman?

¹⁰ A kan ‘Cawnpiaktu’ Jehovah nih kanmah cawnpiak awkah Baibal chung i tahchunhnak tampi kha a hman hna. (Isa. 30:20, 21) Toidornak i telin Baibal chung i Pathian ṭihnak a langhtermi hna kong kha kan i ruah hna lai. Cun Pathian ṭihnak a langhter lomi hna cungah zeidah a cang timi kong zong kha kan i ruah hna lai.—Salm 37:37; 1 Kor. 10:11.

11. A ṭha lomi Saul nunning in zeidah kan cawn khawh?

¹¹ Siangpahrang Saul cungah zeidah a cang ti kha ruat hmanh. A no lioah cun aa toidormi pakhat a rak si. Cun ri a ngeihmi kha aa hngalh i rian tam deuh pek a si tikah cohlan ding hmanh in a rak i cungcang. (1 Sam. 9:21; 10:20-22) Asinain a hnuah Saul cu aa porhlawmi a hung si. Siangpahrang a si tlawmpal ah thil ṭha lo a hun tuah. Voikhat cu profet Samuel a hngah lioah lungsaunak a rak langhter lo. Israel mi aiawh in Jehovah i bochan canah Saul nih tuahnak nawl a ngeih lomi khanghthawinak kha a rak tuah. Cucaah Saul nih Jehovah mithmai ṭha a sung i a donghnak ah siangpahrang sinak a rak sung. (1 Sam. 13:8-14) Mah tahchunhnak in kan cawn i porhlawtnak kha kan hrial ahcun a fimmi kan si lai.

12. Daniel nih zeitindah toidornak a rak langhter?

 ¹² A ṭha lomi Saul nunning he i ralkah in zohchunh awk a ṭhami profet Daniel kong kha zohhmanh hna u si. A nun chung dihlak Daniel cu aa toidor peng i lamhruainak hmuh awkah Jehovah sinah a hal zungzal. Tahchunhnak ah, Jehovah nih Nebukhadnezzar mang leh awkah a rak hman lioah Daniel nih amah le amah kha upatnak aa pe lo. Mah canah Jehovah tu kha upatnak a rak pek. (Dan. 2:26-28) Mah in zeidah kan cawn khawh? Unaupa pawl nih kan phungchimmi a ṭha an ti tik asiloah lohmun ah hlawhtlinnak kan hmuh tikah Jehovah kha upatnak pek kan duh. Jehovah bawmhnak tel loin zeihmanh kan tuah kho lo ti kha kan i cinken awk a si. (Fil. 4:13) Cutin kan tuah tikah Jesuh kan i zohchunhmi zong a si. Zeitin in dah?

13. Johan 5:19, 30 ningin Jesuh sinin toidornak kong zeidah kan cawn khawh?

¹³ A tlingmi Pathian fapa a si ko nain Jesuh nih Jehovah kha aa bochan. (Johan 5:19, 30 rel.) Vancung a Pa sinin nawlngeihnak kha lak awkah zeitikhmanh ah aa zuam bal lo. Filipi 2:6 ah Jesuh cu “hramhram in Pathian tluk si awk kha a ruat lo” tiah a ti. Jesuh nih nawl a ngaimi Fapa pakhat in ri a ngeihmi kha a hngalh i a Pa nawlngeihnak kha a upat.

14. Nawl a ngeih lomi thil tuah dingin hal a si tikah Jesuh nih zeitindah a lehrulh?

¹⁴ Jeim le Johan an nu nih Jesuh sinah nawl pek awkah tinvo sung a hal tikah Jesuh nih zeitindah a leh ti kha ruathmanh. Jesuh nih ka orhlei ah anih ṭhu seh, ka kehlei ah anih ṭhu seh tiin biakhiahnak a tuah khotu cu vancung ka Pa lawnglawng a si tiah a leh colh. (Matt. 20:20-23) Jesuh nih ri a ngeihnak a upat kha a langhter. Jesuh cu aa toidormi a si. Jehovah nih tuah dingin nawlngeihnak a pek lomi kha zeitikhmanh ah a tuah bal lo. (Johan 12:49) Jesuh i a ṭhami tuahsernak kha zeitindah kan i zohchunh khawh?

15-16. Kuatkhat Korin 4:6 ah kan hmuhmi Baibal ruahnak cheuhnak kha zeitindah kan zulh khawh?

¹⁵ Jesuh tuahsernak kha kan i zohchunh khawh nakhnga 1 Korin 4:6 i Baibal ruahnak cheuhnak kha kan zulh a hau. Hitin a kan ti: “Phung leng lonh hlah u.” Cucaah midang nih kan ruahnak an cohlan nakhnga kan hnek hna awk a si lo asiloah mah kong he aa tlaiin ruah hmasa loin bia kan chim awk a si lo. Mah  canah Baibal phunglam le Baibal hrambunh in chuahmi cauk tu ah lungthin kan pek colh awk a si. Cutin kan tuahnak thawngin ri kan ngeihmi kha kan i hngalh lai. Cun toidornak kan ngeihnak thawngin “thil ding” a tuahtu Lianngan Bik Pathian kha upat kan pek khawh lai.—Biat. 15:3, 4.

¹⁶ Jehovah kha upatnak pek in toidornak kan langhter awk a sinak a dang a ruang a um. Toidornak nih zeitindah nuamhnak a chuahter i midang kha zeitindah a bawmh hna? Mah kong kha atu kan i ruah hna lai.

17. Aa toidormi cu zeicah an i nuamh?

¹⁷ Toidornak kan langhter tikah kan i nuam deuh. Zeicah? Ri kan ngeihnak kha kan i hngalh tikah midang sinin kan hmuhmi zei bantuk bawmhnak paoh kha kan i nuamhpi khawh lai. Tahchunhnak ah, Jesuh nih thinghmui zawtnak a ngeimi pahra a damter hna lio caan kong kha ruathmanh. Mi pakhat lawng nih a zawtnak a dam caah Jesuh sinah lawmhnak chimh dingin a rak kir ṭhan. Mah mipa nih Jesuh bawmhnak tel loin amah tein aa damter khawhmi a si lo ti kha a hngalh. Cucaah a hmuhmi bawmhnak caah lawmhnak bia a rak chim i Pathian kha thangṭhatnak a rak pek.—Luka 17:11-19.

18. Toidornnak nih midang he ṭha deuh in i komh awkah zeitindah a kan bawmh? (Rom 12:10)

¹⁸ Aa toidormi hna cu midang he ṭha deuh in an i kom kho i hawikom ṭha zong an ngei deuh. Zeicah? Zeicahtiah midang nih ziaza ṭha an ngeihmi kha an hngalh i an cungah zumhnak an langhter caah a si. Midang nih rian pek an simi ah hlawhtlinnak an hmuh tikah aa toidormi hna cu an i nuam, an thangṭhat colh hna i upatnak an pek colh hna.—Rom 12:10 rel.

19. Porhlawtnak kan hrial awk a sinak a ruang cu zei hna dah an si?

 ¹⁹ Mah he i ralkah in aa porhlawmi hna nih cun midang thangṭhat kha an i harh i anmah thangṭhatnak hmuh tu kha an duh deuh. Midang he an i tahchunh i midang nakin ṭhat deuh awkah an i zuam. Midang cawnpiak le nawlngeihnak pek canah nuamhnak hmuh khawh ning lam cu “thil pakhat kha ṭha tein dih na duh ahcun nangmah tein na tuah a hau” ti bantukin an chim. Aa porhlawmi pakhat nih midang nakin a biapi deuhmi si kha a duh i midang nih amah nakin ṭha deuh in thil an tuah khawh tikah a nahchuah hna. (Gal. 5:26) Cu bantuk minung pawl cu hawikom ṭha an ngei kho lo. Buaibainak pakhat he aa tlaiin porhlawtnak kan ngei ti kan hngalh ahcun mah a ṭhalomi ziaza kha kan lungthin chungah thukpi in hram aa sih nakhnga lo Jehovah sinah ‘kan lungthin a dihumnak in’ thla kan cam awk a si.—Rom 12:2.

20. Zeicah kan i toidor awk a si?

²⁰ Jehovah cungah kan i lawm tuk. A salle a pehtlaih hna ning ah aa toidornak kha kan hmuh i amah kha i zohchunh kan duh. Mah lengah Baibal chungah Pathian he kalṭinak tinvo sung a hmumi aa toidormi hna zong kha i zohchunh kan duh hna. Jehovah kha a hmuh awk a simi thangṭhatnak le upatnak kan pek zungzal awk a si. (Biat. 4:11) Cutin kan tuah ahcun toidornak a ngeimi hna a dawtu vancung kan Pa he kalṭi awkah sining kan tlinh ve lai.