1. Mi tampi nih zei bantuk mahca ṭhatnak dah an hlawt, zeicah cutin an tuah?

TUCHAN ah Pathian salle nuai tampi nih mahca ṭhatnak kha an hlawt. Unau tampi nih nupi, va ngeih lo dingin an i thim. Aa ṭhiummi nuva hna nih atu ah fa ngeih lo dingin bia an khiah. Cun chungkhar hna nih nunning sawhsawh tein nun peng dingin bia an khiah. An dihlak in cutin bia an khiahnak a biapitnak a ruang a um. Mah cu an si khawh chungin Jehovah rian tam deuh in ṭuan an duh caah a si. Lungsinak an ngei i Jehovah nih an herhmi paoh a kan bawmh lai ti kha an zumh. Mah ruangah an lung a dong lai maw? A dong lai lo. Zeitindah kan hngalh khawh? A luanciami caan ah Jehovah nih a salle pawl kha an herhmi thil vialte a pek hna caah a si. Tahchunhnak ah, Jehovah nih Abraham kha “mi vialte hna thlarau lei an pa” in thluachuah a pek.—Rom 4:11.

2. (a) Hebru 11:8-10, 16 ningin Abraham nih Ur khua kha zeicah lungtho tein a rak kaltak? (b) Hi capar ah zei kong dah kan i ruah hna lai?

² Abraham nih Ur khua i lungsi hnangamnak a pemi a nunning kha lungtho tein a kaltak. Zeicah? Zeicahtiah “zungzal in a hmunmi khuapi” kha a hngah caah a si. (Hebru 11:8-10, 16 rel.) Mah “khuapi” cu zeidah a si? Mah dirh a si dingmi khuapi a hngah lioah Abraham nih zei zuamcawhnak hna dah a ton? Abraham le tuchan ah amah aa zohchunmi hna bantukin zeitindah kan si khawh?

3. Abraham nih a hngahmi khuapi cu zeidah a si?

³ Abraham nih a hngahmi khuapi cu Pathian Pennak kha a si. Mah Pennak cu Jesuh Khrih le chiti thuhmi Khrihfa 144,000 in dirhmi a si. Paul nih mah Pennak kha “a nungmi Pathian khualipi  van Jerusalem” in a rak langhter. (Heb. 12:22; Biat. 5:8-10; 14:1) Jesuh nih a zultu pawl kha mah Pennak caah thlacam dingin a fial hna, cun vancung ah Pathian duhnak tuah a si bantukin vawlei cung zongah tuah a si ve nakhnga a halter hna.—Matt. 6:10.

4. Genesis 17:1, 2, 6 ningin Abraham nih Pathian biakam a simi khuapi asiloah Pennak kong he aa tlaiin zeitlukin dah a rak hngalh?

⁴ Abraham nih Pathian Pennak cu zeitindah dirh a si lai ti kha a dikthliar in a hngal maw? A hngal lo. Kumzabu tampi chung mah kong cu “biathli” a rak si. (Efe. 1:8-10; Kol. 1:26, 27) Asinain Abraham nih a tefa cheukhat cu siangpahrang an hung si lai ti kha a hngalh. Mah cu Jehovah nih amah he a hleiin a sermi biakamnak a si. (Genesis 17:1, 2, 6 rel.) Abraham nih Pathian Pennak Siangpahrang a si dingmi Chihti Thuhmi asiloah Messiah kha a hmuh bantukin Pathian biakam kong he aa tlaiin a fekmi zumhnak a rak ngei. Cucaah Jesuh nih a chan lio i Judah mi pawl kha hitin a rak ti hna: “Nan pu Abraham nih khan kan ni hmuh lai hi a rak i ngaih ngaingai, a hmuh taktak i aa lawm.” (Johan 8:56) Abraham nih a tefa cheukhat kha Jehovah nih Pennak a dirhter hna lai ti kha a hngalh, cucaah Jehovah biakam a tlin lai caan kha lungtho tein a rak hngah.

5. Abraham nih Pathian sermi khuapi a rak hngah ti kha zeitindah kan hngalh?

⁵ Abraham nih Pathian sermi khuapi asiloah Pennak a hngah kha zeitindah a langhter? Pakhatnak, Abraham cu zei bantuk vawlei pennak hmanhah a rak i tel lo. Hmunkhat hnu hmunkhat ah aa ṭhial, a zungzal in umnak caah inn a sa lo i zei bantuk siangpahrang hmanh kha a bawm hna lo. Cun Abraham nih amah tein pennak dirh awk zongah a rak i zuam bal lo. Mah canah Jehovah bia kha a ngaih zungzal i Pathian biakam a tlin lai caan kha a rak hngah. Cutin a tuahnak thawngin Abraham nih Jehovah kha zeitluk in dah a zumh ti kha a rak langhter. A tonmi zuamcawhnak cheukhat le a sinin kan cawn khawhmi kong kha zohhmanh hna u sih.

6. Ur cu zei bantuk khua dah a si?

⁶ Abraham nih a kaltakmi khua cu a himmi, a ṭhami le a nuammi khua a si. Mah khua  cu khuakulhnak nganpi le a thuk ngaimi ti kahcham hna nih kaa thum in an kulh caah a him. Cun khuami hna cu ca ṭialnak le kanaan tuaknak ah fimthiamnak a ngeimi an si. Thilhlun hlathlaitu hna nih mah khua ah chawlehnak he aa tlaimi ca tampi an hmuh caah Ur khua i mi tampi cu chawlehnak a tuahmi si dawh an si. An inn kha tlakrawh in an sak i vanpang kha sii raang an thuh. An inn cheukhat cu khaan 13 asiloah 14 a um i an inntual cu lung in phahmi an si.

7. Abraham nih amah le a chungkhar cu Jehovah nih a kan hupphenh lai tiah zeicah a zumh?

⁷ Abraham nih amah le a chungkhar cu Jehovah nih a kan huhphenh lai ti kha a zumh. Zeicah? Zeicahtiah Abraham le Sarah nih a himmi le a nuammi Ur khua i an inn kha an kaltak i Kanaan khuate lei ah thlam in an rak um caah a si. Annih cu a chahmi vanpang le a sangmi haukulhnak khua ah an rak um lo. Mah canah, a him lomi le an ral pawl nih fawi tein an doh khawh hnanak hmun ah an rak um.

8. Voikhat cu Abraham nih zeidah a rak ton?

⁸ Abraham cu Pathian duh ningin a nung, asinain caankhat cu a chungkhar he rawl a za in an rak ngei lo. Jehovah nih kal a fialnak hmun ah a fakmi mangṭam a rak tlung. Mangṭam cu a fah tuk caah Abraham nih a chungkhar he Izipt ah chikkhat zam dingin bia a rak khiah. Asinain Izipt an um lioah siangpahrang Faraoh nih a nupi kha a rak lakpiak. Jehovah nih Faraoh sinin Sarah a kirter ṭhan hlan tiang Abraham cu zeitlukin dah a lungre a theih lai ti kha na mithlam ah cuanter hmanh.—Gen. 12:10-19.

9. Abraham cu zei bantuk chungkhar buaibainak dah a ngeih?

⁹ Abraham le a chungkhar cu a harmi buaibainak an rak tong. A dawtmi a nupi Sarah cu fa a ngei kho lo. Cucaah mah kong he aa tlaiin kum saupi chung an lungre a rak thei. A donghnak ah, Sarah nih Abraham le amah nih fa an ngeih khawh nakhnga a salnu Hagar kha Abraham sinah a rak pek. Asinain Hagar nih Ishmael a pawi tikah Sarah kha a hun nautat. Thil sining cu a chiat chin caah Sarah nih Hagar kha inn in a rak ṭhawl.—Gen. 16:1-6.

10. Ishmael le Isak nih Abraham caah Jehovah i bochan dingin a harter khomi zei thil sining dah an chuahter?

¹⁰ A donghnak ah, Sarah cu fa a hung pawi i Abraham kha Isak timi fapa pakhat a hrinpiak. Abraham nih a fapale pahnih a simi Ishmael le Isak kha a dawt hna. Asinain Ishmael nih Isak kha a ṭhat lonaklei in a pehtlaih caah Abraham nih Ishmael le Hagar kha a ṭhawl hna. (Gen. 21:9-14) A hnuah, Jehovah nih Isak kha raithawi awkah Abraham kha a rak hal. (Gen. 22:1, 2; Heb. 11:17-19) Mah thil sining pahnih ah, Jehovah nih a donghnak ah a fapale kong he aa tlaimi a biakam cu a tlinter ti lai ti kha Abraham nih a rak zumh.

11. Abraham nih Jehovah kha zeicah lungsau tein a rak hngah?

¹¹ Mah caan chungah Abraham nih Jehovah kha lungsau tein hngah awkah a rak cawn. A chungkhar he Ur khua in an chuah lioah Abraham cu kum 70 leng si dawh a rak si. (Gen. 11:31–12:4) Kum zakhat chung hrawng Abraham cu thlam ah a um i Kanaan ram i khua hna ah a rak i ṭhial. Abraham cu kum 175 a si ah a thi. (Gen. 25:7) Asinain na tefa cu ram ka pek hna lai timi Jehovah biakamnak a tlinmi kha cu a rak hmu lo. Cun Pathian Pennak dirh a sinak khua zong a rak hmu lo. Asinain Abraham cu “chan tling cikcek in” a nung i lungsi hnangamnak a hmu tiah Baibal nih a langhter. (Gen. 25:8) Abraham cu harnak tampi a tong ko nain inkhawhnak a ngei, cun zumhfek tein a um peng i Jehovah kha lungtho tein a rak hngah. Abraham cu zeicah inkhawhnak a ngeih? Zeicahtiah a nunchung dihlak Jehovah nih a huhphenh i a hawi pakhat bantukin a rak  pehtlaih caah a si.—Gen. 15:1; Isa. 41:8; Jeim 2:22, 23.

12. Zeidah kan hngah i zei kong dah kan i ruah hna lai?

¹² Kannih zong Abraham bantukin zungzal in a hmunmi khuapi kha kan hngak. Asinain kannih cu sak a simi khua kha kan hngak lo. Pathian Pennak cu 1914 ah dirh a si i atu cu vancung in a uk cang. (Biat. 12:7-10) Asinain vawlei ah tling tein a uk lai caan kha kan hngak. Cutin kan hngah lioah Abraham le Sarah bantukin a harmi thil sining tampi kha kan inkhawh a hau. Tuchan i Jehovah salle tampi nih Abraham nunning kha an i zohchunh maw? Vennak Innsang cauk chung i an kong ṭialmi timi capar nih Abraham le Sarah bantukin tuchan i unau tampi cu zumhnak le lungsaunak an ngei ti kha a langhter. Mah capar chung in unau cheukhat hmuhtonnak kong le mah in kan cawn khawhmi kong kha i ruah hna u sih.

13. Unaupa Walden hmuhtonnak in zeidah na cawn khawh?

¹³ Lungtho tein mahca ṭhatnak kha hlaw. Kan nunnak ah Pathian khuapi a simi Pennak kha hmasa bik ah kan chiah ahcun Pathian lunglawmhter awkah lungtho tein mahca ṭhatnak a hlawmi Abraham bantuk kan si lai. (Matt. 6:33; Mar. 10:28-30) Unaupa Bill Walden kong kha zohhmanh hna u sih. * 1942 ah Bill cu Jehovah Tehte Hna he Baibal a cawng i mah lioah US sianghleiruun ah innsaknak lei in sianginn a rak dih cang. A sayapa pakhat nih Bill kha sianginn a dih in rian a kawlpiak nain Bill nih a rak al. Bill nih a sangmi rian cohlan canah Pathian rian tam deuh in ṭuan dingin biakhiahnak a tuahnak kong kha a chimh. Mah hnu tlawmpal ah cozah nih Bill kha ralkap tlak dingin nawl an pek. Mah tikah Bill nih upatnak he a al hna, asinain US dollar 10,000 an liamter i kum nga chung thongthlak dingin dan an tat. Asinain kum thum a tlak hnuah a rak luat. A hnuah, Bill cu Gilead Tinṭan kai dingin sawm a si i Africa ah missionary in rian a rak ṭuan. Cun Bill cu Eva he an i um i an pahnih in Africa ah rian an ṭuanṭi, annih cu mahca  ṭhatnak a hlawmi in hngalh an si. A hnuah Bill a nu zohkhenh awkah United States ah an kir ṭhan. A tawinak in, a kong ṭialmi ah Bill nih hitin a ti: “Kum 70 leng tiang Jehovah rian ṭuannak caanṭha ka hmuhmi kong ka ruah ṭhan tik caan paohah ka mitthli a ha. A rianṭuannak kha biapi bik ah chiah dingin lam a ka hruai ca zongah kaa lawm tuk.” Nangtah caantling phungchim rianṭuannak kha biapi bik ah na chia ve maw?

14-15. Unaupa le Unaunu Apostolidis hmuhtonnak in zeidah na cawn khawh?

¹⁴ Buaibainak ngeih lo dingin i ruahchan hlah. Abraham kong in Jehovah a biami hna cu an nunnak ah buaibainak tampi an ngei ti kha kan hngalh. (Jeim 1:2; 1 Pet. 5:9) Mah cu a hmaan ti kha Aristotelis Apostolidis hmuhtonnak nih a langter. * Anih cu 1946 ah Greece ah tipil a ing i 1952 ah amah he an hmuitinh aa khatmi unaunu Eleni he hamnak an tuah. Asinain, Eleni cu a thluak ah a bomi a um i a hung zaw. A bomi kha an lakpiak i mah hnuah an i um. Asinain kum tlawmpal hnuah a bomi kha a hung chuak ṭhan. Siibawi pawl nih an khuaihlai ṭhan, asinain Eleni cu a hrapcheu a zeng i a hlan bantukin a holh kho ti lo. Cozah pawl nih an hrem buin le a zawt buin lungtho tein phungchim rian kha a ṭuan peng.

¹⁵ Kum 30 chung Aristotelis nih a nupi kha a zohkhenh. Mah caan chungah Khrihfa upa pakhat in rian a ṭuan, cun civui kawmiṭi le Biakinn saknak bawmtu zongin rian a ṭuan. 1987 ah Eleni cu phungchim a vah lioah fakpi in accident a rak tong. Mah ruangah kumthum chung mah hngal loin a rak um, mah hnuah a rak thi. Mah hmuhtonnak nih zeitlukin dah a hnorsuan ti kha Aristotelis nih hitin a chim: “Kum tampi chung harnak, zuamcawhnak le ruahlopi in kaa ruahchan lomi thil sining hna ka ton caah lungtho tein phungchim rian ṭuan khawh awkah fakpi in kaa zuam a hau. Asinain, Jehovah nih mah buaibainak hna kha tei khawh awkah a herhmi thazaang a ka pek peng.” (Salm 94:18, 19) Jehovah nih buaibainak an ngei ko nain an si khawh chungin a rian a ṭuanmi hna kha a dawt tuk hna.

16. Unaupa Knorr nih a nupi kha a ṭha tukmi zei ruahnak dah a cheuh?

 ¹⁶ Hmailei thil ah lungthin pe. Jehovah nih a pek dingmi hmailei thluachuah cungah Abraham nih lungthin a rak pek, mah nih buaibainak hna kha inkhawh awkah a bawmh. Unaunu Audrey Hyde i a hmasa a vapa Nathan H. Knorr cu cancer zawtnak in a thi i a pahnihnak a vapa, Glenn Hyde cu Alzheimer zawtnak (thluak rianṭuannak nuarh) a hung ngei ko nain unaunu nih hmailei ruahchannak a ngeihmi kong kha a ruat zungzal. * Unaupa Knorr nih a thih hlan zarh i a chimhmi bia nih a bawmhnak kong kha a chim. Hitin a ti: “Nathan nih kan i ruahchanmi cu a fiang tukmi a si. ‘Kan thih hnuah cun zeitikhmanh ah fahnak kan ing ti lai lo’ tiah a ka ti. Cun hitin tha a ka pek: ‘Na laksawng cu hmailei ah a um caah hmailei lawng kha zoh ko.’ . . . Hitin a ti chap: ‘Na rian i tamter—na nunnak kha midang caah thil pakhatkhat tuahpiaknak caah hman i zuam. Mah nih lunglawmhnak hmuh awkah aan bawmh lai.’” Midang caah thilṭha kan tuah khawh nakhnga le ‘kan i ruahchanmi thawng khan kan tha a nuamh’ khawh nakhnga mah cu a ṭha tukmi ruahnak cheuhnak a si.—Rom 12:12.

17. (a) Hmailei thil cungah lungthin pek dingin zei a ruang ṭha dah kan ngeih? (b) Mikah 7:7 ah a langhtermi lamhruainak zulhnak nih hmailei thluachuah hmuh awkah zeitindah a kan bawmh khawh?

¹⁷ Hmailei thil ah lungthin pek deuh dingin hlan nakin tuchan ah a ruang tam deuh kan ngei. Vawlei ah a cangmi thil sining hna nih hi chan ṭha lo donghnak ni ah kan nung ti kha fiang tein a langhter. A rauhhlan ah, zungzal in a hmunmi khuapi nih vawleicung pumpi a uk cang lai caah caan saupi kan hngak ti lai lo. Thluachuah tampi lakah pakhat cu kan dawtmi a thimi hna an thawhṭhanmi kha kan hmuh hna lai. Mah caan chungah, Jehovah nih Abraham zumhnak le lungsaunak ruangah amah le a chungkharmi pawl cu vawleicung ah a nunter ṭhan hna lai. Anmah a conglawmhmi hna lakah naa tel ve lai maw? Abraham bantukin buaibainak na ton hmanhah na zumhnak kha naa tlaih peng i Jehovah kha lungsau tein hngah awkah na cawn ahcun mah ah naa tel kho ve lai.—Mikah 7:7 rel.