1. Jehovah rian tam deuh in ṭuan awkah mi tampi cu zeitindah an i zuam?

 HI VAWLEI donghnak caan cu a naih chin bantukin ṭuan awk rian zong tampi kan ngei. (Matt. 24:14; Luka 10:2; 1 Pet. 5:2) Cucaah kan dihlak in kan si khawh chungin Jehovah rian kha ṭuan kan duh. Mi tampi nih an phungchim rian kha an kauhter. Mi cheukhat cu hmaikal ṭuan dingin timhnak an ngei. Cheukhat cu Bethel rian asiloah a dang Pathian rian ṭuan dingin timhnak an ngei. Cun unaupa tampi cu bu rianṭuantu asiloah Khrihfa upa ṭuan dingin hmuitinh an ngei. (1 Tim. 3:1, 8) A miphun pawl nih lungtho tein a rian an ṭuanmi a hmuh tikah Jehovah cu zeitlukin dah aa lawmh lai.—Salm 110:3; Isa. 6:8.

2. Jehovah rianṭuannak ah kan hmuitinh kan phanh khawh lo ahcun zeitindah kan um khawh?

² Asinain Jehovah rian caan saupi kan ṭuan hnuah kan hmuitinh cheukhat kha kan phanh khawh lo ahcun kan lung a dong kho men. Asiloah kan kum a upat ruang le a dang thil hna ruangah Jehovah bupi ah tinvo sung hna kan hmuh lo ca zongah kan lung a dong kho men. (Ptb. 13:12) Melissa * cu cutin a rak si. Bethel asiloah Pennak Kong Thawngṭha Chimmtu hna caah Tinṭan kai kha a duh nain hitin a ti: “Mah rianṭuan awkah ka kum a upa tuk cang. Cucaah a caan ah ka lung a dong.”

3. Jehovah rianṭuannak ah a dang rian pek awkah sining an tlinh nakhnga mi cheukhat nih zeidah an tuah a hau men lai?

³ A no i a ngan a dammi cheukhat zong a dang rianṭuan  dingin timhcia an si hlanah sining cheukhat kha an ngeih a hau men lai. Tahchunhnak ah, cheukhat cu fimnak a ngeimi, khulrang tein biakhiahnak a tuah khomi le rianṭuan duhnak lungput a ngeimi an si men lai. Asinain lungsau awk, ṭha tein rian ṭuan khawh awk le midang upat deuh awkah an cawn a hau men lai. Ṭhancho na herhmi sining hna ah lungthin na pek ahcun naa ruahchanmi rian kha unaupa hna nih an in pek men lai. Nick hmuhtonnak kong hi ruathmanh. Kum 20 a si lioah bu rianṭuantu pakhat in rian pek a si lo caah a lung a rak dong tuk. Hitin a ti: “Palhnak pakhatkhat ka tuah caah a si lai tiah ka ruah.” Asinain Nick cu a lung a dong lo. Khrihfabu le phungchim rianṭuannak ah a si khawh chungin aa zuam. Atu ahcun Zung Ṭengnge Kawmiṭi chungtel pakhat in rian a ṭuan cang.

4. Hi capar ah zei kong dah kan i ruah hna lai?

⁴ Jehovah rianṭuannak ah na hmuitinh cheukhat kha na phanh khawh rih lo caah na lung a dong maw? Cutin na si ahcun lungtak tein Jehovah sinah thlacam. (Salm 37:5-7) Mah lengah Pathian rianṭuannak ah zeitindah na ṭhancho khawh timi kong he aa tlaiin hmuhtonnak a ngeimi unau dang sinah ruahnak cheuhnak hal hna. Cun an in pekmi ruahnak cheuhnak ningin zulh awkah na si khawh chungin i zuam. Cutin na tuah ahcun mah hmuitinh kha na phanh khawh lai. Asinain a hmasa ah langhtermi Melissa bantukin Jehovah caah tuah na duhmi thil kha atu ah na tuah kho rih men lai lo. Cutin na si ahcun zeitin? Zeitindah naa nuamh peng khawh? Mah biahalnak a phi hngalh awkah hi capar ah (1) nuamhnak aan pe khomi, (2) naa nuamh khawh deuh ning kong le (3) naa nuamh khawh deuh nakhnga na chiah khawhmi hmuitinh phun kong kha kan i ruah hna lai.

5. Kan i nuamh khawh nakhnga zei cungah dah lungthin kan pek awk a si? (Phungchimtu 6:9)

⁵ Phungchimtu 6:9 ah nuamhnak a kan pe khomi kong hna kha a fianter. (Rel.) A “ngeihmi cungah” lungthin a pemi pakhat cu a ngeihmi thil le atu i a sining cungah lungsinak a ngei. Asinain ngeih chin lengmang duhnak lungthin a ngeimi pakhat cu zeitikhmanh ah lungsinak a ngei bal lai lo. Cucaah mah in zeidah kan cawn khawh? Kan i nuamh khawh nakhnga kan ngeihmi le kan phanh khawhmi hmuitinh cungah lungthin kan pek awk a si.

6. Zei tahchunhnak kong dah kan i ruah hna lai, mah in zeidah kan cawn khawh?

⁶ Na ngeihmi thil ah lungsinak ngeih timi cu a si kho taktak maw? Mi tampi nih thil thar tuah ningcang kha cawn kan duh peng caah mah cu a si kho lo tiah an ruah. Asinain mah cu a si khomi a si. Atu i kan “ngeihmi” thil cungah kan i nuam kho. Zeitindah kan i nuamh khawh? Matthai 25:14-30 ah langhtermi Jesuh hmanmi tangka tahchunhnak kong kha i ruah hna hmanh u sih. Zeitindah kan i nuamh khawh timi kong le atu kan sining ah zeitindah kan i nuamh chinchin khawh timi kong kha kan theih hna lai.

7. Jesuh chimmi tangka tahchunhnak kong kha a tawinak in chim.

⁷ Mah tahchunhnak ah mipa pakhat cu khualtlawn aa tim. A tlawn hlanah a salle kha a auh hna i chawlehnak caah tangka a pek cio hna. * Mah mipa nih a salle ngeihmi sining cu aa khat cio lo ti kha a hngalh. Cucaah pakhat kha thongnga, pakhat kha thonghnih le pakhat kha thongkhat tiin a pek hna. Sal pakhatnak le pahnihnak nih cun an bawipa caah  tangka tam deuh an hmuh nakhnga fakpi in rian an ṭuan. Asinain sal pathumnak nih cun pek a simi tangka kha zeihmanh a tuahnak lo caah a rian in phuah a rak si.

8. Tahchunhnak chung i sal pakhatnak cu zeicah aa nuamh tuk?

⁸ A pakhatnak sal cu tangka thongnga pek a si caah aa lawm tuk. A tam taktakmi tangka a si caah mah nih a bawipa nih a zumh tuk ti kha a langhter. A pahnihnak sal kong he aa tlaiin tah zeitin? A pakhatnak sal tlukin tangka pek a si lo caah a lung a dong kho. Asinain zeidah a rak tuah?

9. Sal pahnihnak kong he aa tlaiin Jesuh nih zeidah a chim lo? (Matthai 25:22, 23)

⁹ Matthai 25:22, 23 rel. Jesuh nih a pahnihnak sal cu tangka thonghnih lawng pek a si caah a ngaih a chia i a thin a hung tiah a chim lo. Cun mah sal cu a phunzai i hitin a chim ti zongin a ti lo: ‘Ka bawipa nih zeicah tlawm deuh a ka pek? Thongnga pek a simi sal bantukin fakpi in rian ka ṭuan ve ko cu ta. Ka bawipa nih sal ṭha in a ka hmuh lo ahcun tangka kha ka phum awk le amah caah si loin keimah caah ka hman awk a si ko.’

10. Sal pahnihnak nih a tangka kha zeitindah a tuah?

¹⁰ Sal pakhatnak bantukin sal pahnihnak zong nih pek a simi rian cu a biapi tukmi a si ti kha a hngalh i a bawipa caah fakpi in rian a ṭuan. Cucaah tangka thonghnih kha thongli ah a rak karhter. A bawipa nih rian aa zuamnak cungah thluachuah a rak pek. Cun a bawipa nih a thangṭhat lawng si loin rian hmanh tam deuh a rak pek.

11. Zeitindah kan i nuamh khawh deuh?

 ¹¹ Cu bantukin Jehovah rian kan ṭuannak ah kan si khawh chungin kan i zuam tikah kan i nuam deuh. Cucaah phungchim rianṭuannak caah kan “caan kha a dihlak in” hmang hna u sih law Khrihfabu he fakpi in rianṭuanṭi hna u sih. (Lam. 18:5; Heb. 10:24, 25) Cun hmual a ngeimi a phi na pek khawh nakhnga pumhnak caah ṭha tein i timtuah. Zarhlai pumhnak ah pek na simi zei rian paoh kha a biapimi in hmu. Khrihfabu ah rian pakhatkhat bawmh dingin hal na si ahcun a caan a hmaanmi le zumhawk a tlakmi si. Pek na simi rian kha a biapi lomi in le mah caah a caan pek in tuah a hau lo tiah ruat hlah. Ṭha tein na ṭuan khawh nakhnga fakpi in i zuam. (Ptb. 22:29) Jehovah caah fakpi in na ṭuan ahcun amah he nan i hawikomhnak cu a fek chin lai i a nuamh zong naa nuam chinchin lai. (Gal. 6:4) Cun na duhmi rian kha midang pek an si tikah a lawmh zong na lawmhpi khawh hna lai.—Rom 12:15; Gal. 5:26.

12. Melissa le Nick kha i nuamh deuh awkah zeinihdah a bawmh hna?

¹² Catlangbu 2nak ah langhtermi Bethel asiloah Pennak Kong Thawngṭha Chimtu hna caah Tinṭan kai a duhmi Melissa kong kha naa cinken maw? A caah a si kho lo tiah a ruah ko nain hitin a ti: “Hmaikal rian kha ka si khawh chungin ka ṭuan i phungchim ning a phunphun kha ka hman. Mah nih nuamhnak taktak a ka hmuhter.” Bu rianṭuantu pakhat in rian pek a si lo tikah a lungdonghnak kha Nick nih zeitindah a rak tawnghtham? “Pumhnak ah a phi pek awk le phungchim kal awk ti bantuk ka tuah khawhmi thil cungah lungthin ka pek. Cun Bethel ah rianṭuan dingin form ka phih i a hmai kum ah ka phihmi form kha an rak cohlan.”

13. Atu i pek na simi rian cungah lungthin na pek ahcun a phichuak cu zeidah a si lai? (Phungchimtu 2:24)

¹³ Atu i pek na simi rian cungah lungthin na pek ahcun hmailei ah a ngan deuhmi rian pek na si lai maw? Nick cungah cutin a rak cang. Cutin a si lo hmanhah Melissa bantukin naa nuam deuh kho i Jehovah caah na tuahmi kong he aa tlaiin naa hun i nuam tuk lai. (Phungchimtu 2:24 rel.) Mah lawng si loin kan Bawipa, Jesuh Khrih lung ka lawmhter ti kha na hngalh caah naa nuam chinchin lai.

14. Thlaraulei hmuitinh kong he aa tlaiin zeidah kan i cinken peng awk a si?

¹⁴ Atu ah Jehovah rian kha kan si khawh chungin kan ṭuan ahcun a caah tam deuh in ṭuan awkah i zuam peng a hau ti lo tinak a si maw? A si lo. Phungchim le cawnpiak a thiam deuhmi si awk le unau pawl a bawm khomi si awkah thlaraulei hmuitinh kan chiah a hau. Kanmah si loin midang bawmhnak tu kha fimkhur te le toidor tein lungthin kan pek ahcun mah hmuitinh kha kan phanh khawh lai.—Ptb. 11:2; Lam. 20:35.

15. Naa nuamh deuh nakhnga aan bawm khomi hmuitinh cheukhat cu zei hna dah an si?

¹⁵ Zei hmuitinh dah na chiah khawh? Na phanh khawh dingmi hmuitinh kong hngalh awkah Jehovah sinah bawmhnak hal. (Ptb. 16:3; Jeim 1:5) Hi capar i  catlangbu pakhatnak ah langhtermi manhcaan hmaikal asiloah hmaanhmaan hmaikal, Bethel asiloah biakinn saknak ti bantuk a dang Pathian rian ṭuan ding timi hmuitinh pakhat kha phanh awkah naa zuam kho lai maw? Asiloah holh dang cawn in thawngṭha chim awkah khuadang ah naa ṭhial kho men. Jehovah Duhnak Tuah awkah Dirhnak timi [Myanmar] cauk ṭhen 10nak na hlathlainak thawngin le nan  Khrihfabu i Khrihfa upa pawl he bia nan i ruahnak thawngin mah hmuitinh cheukhat kong kha tam deuh in na cawn khawh. * Mah hmuitinh hna phanh dingin naa zuam tikah midang nih na ṭhanchonak kha an hmuh lai i naa nuam deuh lai.

16. Cuset khaset timi na hmuitinh kha na phanh khawh lo ahcun zeidah na tuah khawh?

¹⁶ Asinain a cunglei ah langhtermi hmuitinh hna kha na phanh khawh lo ah tah zeitin? Na phanh khawh dingmi a dang hmuitinh chiah awkah i zuam. A si khomi a tanglei kong hna hi zohhmanh.

17. Unaupa pkhat nih 1 Timote 4:13, 15 ningin cawnpiak a thiam deuhmi a si nakhnga zeidah a tuah khawh?

¹⁷ Kuatkhat Timote 4:13, 15 rel. Tipil a ing cangmi unaupa na si ahcun phungchim le cawnpiak a thiam deuhmi si awkah naa zuam kho. Zeicah? Carel, biachim le cawnpiak a thiam deuhmi si awkah naa zuammi kha “an hmuh” tikah na bia a ngaimi hna cu thluachuah an hmuh lai caah a si. Relnak le Cawnpiaknak Ah I Zuam timi brochure chung i biachim ning kong kha hlathlai awk le mah ningin zulh awkah hmuitinh chia. Voikhat ah sining pakhat kong kha hlathlai, inn ah tuahchun law phung na chim tikah mah ningin chim awkah i zuam. Cun ruahnak cheutu a bawmtu asiloah a dang “phungchim le cawnpiak i a ṭangmi” Khrihfa upa hna sinah ruahnak cheuhnak hal hna. * (1 Tim. 5:17) Mah brochure chung in na hngalhmi kong lawng si loin na bia a ngaitu hna an zumhnak a feh nakhnga asiloah an cawnmi ningin an zulh nakhnga  forh hna awkah lungthin pe. Cutin na tuahnak thawngin nangmah he anmah he nan i nuam chinchin lai.

18. Lohmun rianṭuannak ah kan hmuitinh kan phanh khawh nakhnga zeinihdah a kan bawmh khawh?

¹⁸ Kan dihlak in phungchim awk le zultu siter awkah rian kan ngei. (Matt. 28:19, 20; Rom 10:14) Mah a biapimi rian ah na sining kha ṭhanchoter na duh maw? Cawnpiaknak brochure kha hlathlai law mah ningin zulh awkah aan bawm khomi hmuitinh hna kha chia. Nunning le Rianṭuannak—Tuahchunhnak Cauk le zarh lai pumhnak ah piahmi chim ningcang video hna zongin bawmtu a simi ruahnak cheuhnak hna kha na hmuh khawh. Mah ruahnak cheuhnak kha na zulh ahcun phungchim a thiam deuhmi na hung si lai i mah nih nuamhnak aan hmuhter chinchin lai.—2 Tim. 4:5.

19. Khrihfa sining kha zeitindah na ṭhanchoter khawh?

¹⁹ Na chiah khawhmi hmuitinh lakah a biapi bikmi pakhat cu Pathian lung a lawmhtermi sining hna ṭhanchoter a si ti kha philhhlah. (Gal. 5:22, 23; Kol. 3:12; 2 Pet. 1:5-8) Mah hmuitinh phanh awkah zeidah na tuah khawh? Tahchunhnak ah, a fekmi zumhnak ngeih na duh men lai. Na zumhnak a feh nakhnga a ṭha tukmi ruahnak cheuhnak aa telmi kan cauk pawl kha na rel men lai. Cun hneksaknak a phunphun lakah zumhnak ah zohchunhawk ṭha a simi unau pawl kong aa telnak JW Broadcasting^® na zohnak thawng zongin ṭhathnemhnak na hmu ko lai. Cun an zumhnak naa zohchunh khawh ning lam zong kha ruat.

20. Kan i nuamh deuh nakhnga le kan lungretheihnak a zor deuh nakhnga zeidah kan tuah khawh?

²⁰ Kan dihlak in atu ah kan tuah khawhmi nakin Jehovah caah tam deuh in tuah kan duh lai ti cu a fiang ko. Pathian vawlei thar ah a rian kha tling tein kan ṭuan khawh cang lai. Mah caan a phanh hlan tiang atu ah kan si khawh chungin kan i zuam ahcun kan i nuam deuh lai i kan lungretheihnak zong a zor deuh lai. Mah nakin a biapi deuhmi cu ‘aa nuammi kan Pathian’ Jehovah kha thangṭhatnak le upatnak kan pek khawh lai. (1 Tim. 1:11, NW) Cucaah kan hmuhmi tinvo sung cungah i nuam hna u sih.