Mah capar in vancungmi le minung caah a biapimi a kong pakhat kha kan hngalh khawh. Mah cu Jehovah i a liannganmi min thianternak kha a si. Jehovah uk ning a ṭha maw, ṭha lo timi cu Jehovah min thianternak he aa pehtlaimi a si. Cu bantuk in mi pakhat nih Pathian cung ah zumhfek tein a um lai maw, um lai lo timi zong Jehovah min thianternak timi a biapi tukmi kong he aa pehtlaimi a si ve.

Jehovah min le a min thianternak cu a biapi bikmi a si tiah zeicah a hleiin kan langhter? A ruang pathum kha zohhmanh hna u sih.

Pakhatnak, Eden dum ah Satan nih Jehovah min asiloah a minthiang kha a chiatter. Satan nih Evi a halmi biahalnak nih Jehovah cu a hnemmi le lamhruainak a pekmi hna cu a ding lomi a si ti kha a langhter. Cun Satan nih Jehovah chimmi bia he aa ralkah in a chim. Mah cu Pathian cu lih a chimmi a si a ti duhnak a si. Cucaah Jehovah min kha a thangchiat. Mah ruang ah anih cu “thangchiattu” tiah sullam a ngeimi “Khuachia” a hung si. (Johan 8:44) Evi nih Satan lihbia kha a zumh caah Pathian nawl kha a ngai lo i lianngan bik a sinak zong kha a rak ralchanh. (Gen. 3:1-6) Mah ni thawk in Satan nih Pathian min kha a thangchiat i Jehovah kong he aa tlaiin lihbia kha a chim lengmang. Mah lihbia a zummi hna nih Jehovah nawl kha an ngai duh lo. Cucaah Pathian miphun caah Jehovah i a thiangmi a min ralchanh cu a ṭha lo tukmi a si. Mah cu vawleicung ah ṭhatlonak a tam chinchinnak a hrampi a ruang a si.

Pahnihnak, sermi thil vialte nih ṭhathnemhnak an hmuh nakhnga Jehovah nih a min kha a thianter lai i a min a chiattertu vialte kha a hrawh dih hna lai. Mah cu Jehovah caah a biapi bikmi a si. Cucaah hitin a ti: “A liannganmi ka min cu ka thianter lai.” (Eze. 36:23) Cun Jesuh nih Jehovah i zumhfekmi salle dihlak thlacamnak ah zeidah biapi bik in an chiah awk a si ti kha hitin fiang tein a langhter: “Na min thiang cu upat si ko seh.” (Matt. 6:9) Baibal nih Jehovah min thianter a biapitnak kong kha a hleiin atu le atu a langhter. Tahchunhnak tlawmpal in zohhmanh u sih: “BAWIPA cu amah min he aa tlakmi sunparnak cu pe ko u.” (1 Chan. 16:29; Salm 96:8) “A sunglawimi a min kha hla in thangṭhat u.” (Salm 66:2) “Na [min, NWT] lianngannak cu a zungzal in ka chim lai.” (Salm 86:12) Voikhat cu Jerusalem i biakinn ah Jesuh nih “ka Pa, na min cu upatnak pe ko” tiah a ti lioah amah Jehovah theng nih vancung in hitin bia a rak leh: “Upatnak cu ka pek cang i ka pek ko rih lai.”—Johan 12:28. a

Pathumnak, Jehovah aa tinhnak cu a min he aa pehtlai zungzal. Mah kong hi ruathmanh: Khrih Kum Thongkhat Uknak a dihnak, hmanung bik hneksaknak hnuah zeidah a cang lai? Mah caan chung ah sermi thil vialte nih Jehovah min kong he aa tlaiin zeitindah an um lai? Mah biahalnak  a phi hngalh awkah minung zumhfehnak le van le vawlei ah cungnung bik sinak aa pehtlaih ning a kong pahnih in zohhmanh hna u sih. Mah caan chung ahcun mi nih an zumhfehnak kha langhter a hau ti lai lo. Annih cu tling tein hneksak an si lai i mitling an si cang lai. Zungzal nunnak zong an hmu lai. Cun Jehovah uk ning cu a ṭha bik a si ti langhter zong a hau ti lai lo. Mah caan chung ah vancung le vawleicung ah a ummi dihlak cu an lung aa ruang cang lai i Jehovah uknak kha an cohlan lai. Asinain Jehovah min kong ah tah zeitin?

Mah caan ahcun mikip nih Jehovah kong biatak kha an hngalh lai i Pathian min cu tling tein thianter a si lai. Asinain van le vawlei ah a ummi a salle dihlak caah a biapi bikmi cu Jehovah min thianter kha a si rih lai. Zeicah? Jehovah nih khuaruahhar thil a tuahmi kha an hmuh lai caah a si. Mah hi ruathmanh: Jesuh nih uknak vialte Jehovah sinah a pek ṭhan tikah Pathian nih “zeizong vialte kha a uk dih cikcek hna lai.” (1 Kor. 15:28) Mah hnuah vawleicung ah a ummi mi pawl nih “Pathian fale hna luatnak a sunglawimi” kha an i nuamhpi lai. (Rom 8:21) Cun van le vawlei ah a ummi a fale pawl in a lung aa rualmi chungkhar pakhat ka ser lai timi aa tinhnak kha Jehovah nih a tlinter lai.—Efe. 1:10.

Mah thil vialte a can hnuah van le vawlei ah a ummi Jehovah chungkhar cu zeitindah an um lai? Jehovah min thangṭhat kan duh peng rih lai ti cu a fiang ko. Salm caṭialtu David nih hitin a ti: “Pathian cu thangṭhat ko u, . . . a sunparnak cu vawleicung dihlak ah khat seh.” (Salm 72:18, 19) Zungzal caah thil thar pawl kawl in lung cawlcangh awk ngai a simi thil pawl tuah kha kan duh peng lai.

Jehovah min nih amah he aa pehtlaimi thil vialte kha a aiawh. Jehovah min kong kan ruah tikah a dawtnak kong kha kan ruahchih. (1 Johan 4:8) Jehovah nih a kan dawtnak kha a kan ser tik le tlanhnak man a kan pek tikah a langhter ti kha kan i cinken zungzal lai. Cun a uk ning cu a dingmi le dawtnak aa telmi a si ti zong kha kan i cinken zungzal lai. Cun Jehovah nih a sermi thil cung ah dawtnak a langhtermi zong kha kan hmuh peng lai. Zungzal in kan Pa he i naih awk le a min thiang thangṭhatnak hla sak awkah forhfial kan si lai.—Salm 73:28.