Baibal kan rel tikah kan relmi kong kan i fian deuh nakhnga hlathlainak hriamnam a phunphun kha kan hman khawh. Asinain hlathlainak kan tuahmi cu Baibal kong tam deuh hngalhnak ca men lawng ah siter kan duh lo. Jehovah kan dawtnak a karhter chin dingmi, a sunglawi tukmi pumpak a sining kong hna kha tam deuh in hngalh kan duh. Cutin tuah khawh awkah kanmah le kanmah hitin kan i hal kho, ‘Mah Baibal caang nih Jehovah kong zeidah a ka cawnpiak?’

Tahchunhnak ah, Jehovah nih a langhtermi dawtnak, fimnak, dinnak le ṭhawnnak kong hna kha tam deuh in hngalh awkah naa zuam kho. Asinain na cawn khawhmi a dang a ṭha tukmi Jehovah sining tampi zong a um rih. Jehovah sining kong he aa tlaiin khoika ah dah tam deuh in na hmuh khawh?

Vennak Innsang Cauk Index cauk chung i “Jehovah” timi biatlangpi tang le “A Min Nih A Langhtermi A Sining Hna” timi biatlangte tang ah langhtermi a dang a sining 50 leng kha zoh. Na relmi Baibal kong he aa tlakmi a konglam hna kha hlathlai. (Jehovah Tehte Hna i Baibal Hlathlainak Ca Lamhruainak timi cauk lawng na ngeih ahcun “Jehovah Pathian” timi biatlang tang i “Jehovah Sining Hna” timi biatlangte tang ah zoh.)