1. Aa ngaichihmi pakhat nih zeidah a tuah?

 PALHNAK pakhatkhat kan tuah tikah i ngaihchih cu a biapi tuk. Aa ngaichihmi pakhat nih a tuahsernak he aa tlaiin a lungput kha a thlen, cu bantuk tuahsernak kha a ngol i tuah ti lo ding in biakhiahnak a tuah tiah Baibal nih a langhter.—Matt. 3:8; Lam. 3:19; 2 Pet. 3:9.

 2. Ngaihchihnak kong kha kan dihlak in zeicah kan hngalh a herh? (Nehemiah 8:9-11)

² Mi vialte nih ngaihchihnak kong kha kan hngalh a hau. Zeicah? Kan dihlak in nifatin sualnak kan tuah caah a si. Adam le Evi tefa kan si caah sualnak le thihnak ro kan co. (Rom 3:23; 5:12) Sualnak a ngei lomi ahohmanh kan um lo. Lamkaltu Paul bantuk zumhfekmi hna hmanh nih sualnak kha fakpi in an doh a hau. (Rom 7:21-24) Cu a si ah sualnak ruang ah ngaihchia in kan um zungzal awk a si tinak a si maw? A si lo. Jehovah cu zaangfahnak a ngei i nuamhter a kan duh. Nehemiah chan ah a nungmi Judah mi hna kong kha ruat hmanh. (Nehemiah 8:9-11 rel.) Jehovah nih hlanah an rak tuahmi sualnak he aa tlaiin ngaihchia tuk in umter a duh hna lo. Mah canah nuam tein ka bia hna seh ti a duh. I ngaihchihnak nih lunglawmhnak a chuahter ti kha Jehovah nih a hngalh. Cucaah mah kong he aa tlaiin a kan cawnpiak. Kan sualnak kan i ngaihchih ahcun zaangfahnak a ngeimi kan Pa nih a kan ngaihthiam lai ti kha kan zumh khawh.

 3. Hi capar ah zei kong dah kan i ruah hna lai?

³ Ngaihchihnak kong kha tam deuh in hlathlai hna u sih. Hi capar ah a kong pathum kan i ruah hna lai. Pakhatnak, ngaihchihnak kong he aa tlaiin Jehovah nih Israel mi kha  zeidah a cawnpiak hna? Pahnihnak, misual mi hna nih an i ngaihchih khawh nakhnga Jehovah nih zeitindah a bawmh hna? Pathumnak, Ngaihchihnak kong he aa tlaiin Jesuh nih a zultu pawl kha zeidah a cawnpiak hna timi kong kan i ruah hna lai.

Jehovah nih Israel Mi kha Ngaihchihnak Kong Zeidah a Cawnpiak Hna?

 4. Ngaihchihnak kong he aa tlaiin Jehovah nih Israel mi kha zeidah a cawnpiak hna?

⁴ Jehovah nih Israel mi kha miphun pakhat in a dirh hna lioah nawlbia a pek hna i mah ning in kan zulh lai tiah bia an i kam. A nawlbia kha an zulh ahcun Jehovah nih a huhphenh hna lai i thluachuah a pek hna lai. A nawlbia kong he aa tlaiin hitin a ti: “Nihin ah kan pekmi hna nawlbia hi nan caah a har tukmi le nan phak leng a si lo.” (Deut. 30:11, 16) Asinain pathian dang an biak i Jehovah kha an ralchanh ahcun thluachuah an hmu ti lai lo i harnak an tong lai. Mah cu Jehovah mithmai ṭha zeitik hmanh ah an hmu kho ti lai lo tinak a si lo. ‘BAWIPA an Pathian sinah an kir ṭhan kho i a aw an ngaih’ khawh. (Deut. 30:1-3, 17-20) Phundang in cun an i ngaichih kho. Cutin an tuah ahcun Jehovah he pehtlaihnak ṭha an ngei ṭhan lai i thluachuah an hmu ṭhan lai.

 5. Jehovah nih a miphun cung ah a lung a dong lo ti kha zeitindah a langhter? (2 Siangpahrang 17:13, 14)

⁵ A miphun nih Jehovah kha atu le atu an ralchanh. Siasal an biak leng ah a dang sualnak zong tampi an tuah. Cucaah harnak an tong. Asinain Jehovah cu lam a pialmi a miphun cung ah a lung a dong lo. I ngaihchih in a sinah an kir ṭhan nakhnga profet kha atu le atu a thlah hna i ralrin a pek hna.—2 Siangpahrang 17:13, 14 rel.

 6. Jehovah nih profet pawl hmang in a miphun kha i ngaihchih a biapitnak kong zeitindah a cawnpiak hna? (Hmanthlak zong zoh.)

⁶ A miphun ralrin pek awk le chimhhrinh awkah Jehovah nih profet pawl a hman hna. Tahchunhnak ah, Jeremiah hmang in Pathian nih hitin a ti hna: “Zumhawktlak lo Israel, rak kir tuah . . . Nangmah cu thinhunnak  in kaan zoh ti lai lo, zeicahtiah kei cu zaangfah thiammi ka si . . . Zungzal in ka thin a hung lai lo. Palhnak na tuahmi kha ka tuah taktak ti ko law BAWIPA na Pathian na dohnak kha i phuang ko.” (Jer. 3:12, 13) Joel hmang in Jehovah nih hitin a ti hna: “Nan lungtak tein i ngaihchih u.” (Joel 2:12, 13) Isaiah zong kha hitin a thanhter: “Thiang tein i kholh u. Nan tuah lengmang ka hmuhmi ṭhatlonak hi ngol hna u. Ṭhatlonak cu tuah ti hna hlah u.” (Isa. 1:16-19) Cun Ezekiel hmang in Jehovah nih hitin a ti ṭhan hna: “Miṭhalo mi thih cu maw ka duhmi cu a si? A ziaza kha aa remh i a nun kha ka duhmi a si deuh lo maw? . . . Zeicahdah nan thih lai ee, Israel mi hna? Ahohmanh nan thih cu ka duh ṭung lo.” (Ezek. 18:23, 32) Jehovah nih mi pawl kha zungzal in nung hna seh ti a duh i an sualnak an i ngaihchih tikah a lung aa lawm tuk. Cucaah sualnak a tuahtu hna kha an i ngaihchih hnu lawng ah bawmh ding in Jehovah nih a hngak hna lo. Tahchunhnak cheukhat zoh hna u sih.

 7. Profet Hosea le a nupi kong in Jehovah nih a miphun kha zeidah a cawnpiak hna?

⁷ Profet Hosea le a nupi Gomer hmang in Jehovah nih a miphun kha zeidah a cawnpiak hna? Gomer cu a zuangzam i pa dang he umṭi awkah Hosea kha a kaltak. Gomer cu a ziaza aa thleng kho ti lai maw? Kan lungthin a hngaltu Jehovah nih Hosea sinah hitin a ti: ‘BAWIPA keimah nih Israel mi hna cu pathian dang kha an bia nain, siasal pekchanhmi mitsur tlai car changreu thlum kha an duh nain ka dawt ṭhiamṭhiam ko hna bantuk in va kal law midang nih an duhmi, va cung pa duh nu, nu pakhat cu va daw tuah.’ (Hos. 3:1; Ptb. 16:2) Pathian nih cutin a chim lioah Gomer nih sualnak ngan a tuah rih ti kha i cinken. Asinain Jehovah nih Gomer kha ngaihthiam awk le a nupi in cohlan ṭhan awkah Hosea kha a forh. a Cu bantuk in Jehovah cu a lung a hakmi a miphun cung ah a lung a dong lo. A ṭhalo tukmi sualnak an tuah ko nain a dawt hna. An i ngaihchih khawh nakhnga le thlennak an tuah khawh nakhnga a bawmh peng hna. “Minung lung cu BAWIPA nih a hneksak” ti kha Hosea le Gomer kong nih a langhter. Cun mi pakhat nih sualnak ngan a tuah lio hmanh ah i ngaihchih ding in a bawmh lai ti zong kha a langhter. (Ptb. 17:3) Jehovah nih zeitindah cutin a tuah ti kha zoh hna u sih.

Jehovah nih i Ngaihchih awkah Misual Mi kha Zeitindah a Bawmh Hna?

 8. Jehovah nih Kain kha i ngaihchih khawh awkah zeitindah a bawmh? (Genesis 4:3-7) (Hmanthlak zong zoh.)

⁸ Kain cu Adam le Evi fater a si. A nu le a pa sinin sualnak ro a co. Mah leng ah Kain kong he aa tlaiin Baibal nih hitin a ti: ‘Amah tuahmi thil kha a ding lo.’ (1 Joh. 3:12) Cucaah Jehovah cu ‘Kain le a laksawng cung ah a lung a si lo.’ A tuahsernak kha i thlen loin “Kain cu a thin a hung i a hmai a chia.” Mah hnuah Jehovah nih zeidah a tuah? Kain kha bia a ruah. (Genesis 4:3-7 rel.) Jehovah nih Kain kha ṭhatnak na tuah ahcun thluachuah na hmuh lai tiah nem tein a chimh. Cun na thin a hun peng ahcun thil ṭhalo na tuah khawh ti zong in ralrin a pek. Asinain Kain nih Jehovah bia kha a ngai lo. I ngaihchih ding in Jehovah nih a bawmhmi kha a cohlang lo. Kain nih cutin a lehrulh ko nain Jehovah nih a dang misual mi hna kha bawmh ti lo ding in bia a khiak lo!

 9. Jehovah nih David kha aa ngaihchih nakhnga zeitindah a bawmh?

 ⁹ Jehovah nih Siangpahrang David kha a dawt tuk. “Anih cu ka lung duhmi phun a si” tiah a ti. (Lam. 13:22) Asinain David cu zuanzamnak le lainawnnak ti bantuk sualnak ngan a rak tuah. Moses Nawlbia ning in David cu thihnak in dantat awkah aa tlak. (Lev. 20:10; Nam. 35:31) Asinain David cu aa ngaihchih khawh nakhnga Jehovah nih a bawmh. b David nih i ngaihchihnak a langhter rih lo nain Jehovah nih profet Nathan kha a sinah a thlah. Nathan nih David kha bianabia pakhat a chimh. Mah nih a lung a suk tuk i David cu aa ngaichih. (2 Sam. 12:1-14) Lungtak tein aa ngaihchihnak kong a langhtermi salm hla pakhat kha David nih a ṭial. (Salm 51, NWT biatlangpi) Mah salm hla nih misual mi tampi kha hnemhnak a pek hna i an i ngaihchih khawh nakhnga a bawmh hna. Jehovah nih David kha a bawmh caah kan i lawm tuk.

10. Misual mi hna cung ah Jehovah lungsaunak le ngaihthiamnak kong na ruah tikah zeitindah na um?

¹⁰ Jehovah nih sualnak kha a huat, zei bantuk sualnak hmanh a cohlang lo. (Salm 5:4, 5) Asinain kan dihlak in misual kan si ti kha a hngalh. Cucaah kan cung ah dawtnak a langhter i sualnak kan doh khawh nakhnga a kan bawmh. A sual tukmi hna hmanh kha i ngaihchih ding in le amah he i naih ding in a bawmh peng hna. Mah cu hnemtu taktak a si! Jehovah lungsaunak le ngaihthiamnak kong ruahnak nih zumhfek tein um ding le sualnak kan tuah hmanh ah i ngaihchih colh ding in a kan forh. Atu ngaihchihnak kong he aa tlaiin Jesuh nih a zultu pawl zeidah a cawnpiak hna ti kha zoh hna u sih.

Jesuh nih a Zultu Pawl kha Ngaihchihnak Kong Zeidah a Cawnpiak Hna?

11-12. A pa ngaihthiamnak kong cawnpiak awkah Jesuh nih zei bianabia dah a hman? (Hmanthlak zoh.)

¹¹ AD 29 ah Messiah a phan cang. A hmasa capar ah a langhter bantuk in Jehovah nih Tipil Petu Johan le Jesuh Khrih hmang in  mi pawl kha i ngaihchih a biapitnak kong a cawnpiak hna.—Matt. 3:1, 2; 4:17.

¹² Vawleicung a um lioah Jesuh nih a Pa ngaihthiamnak kong kha fapa tlau bianabia hmang in a cawnpiak hna. Mah mino pa cu inn in a chuak i sualnak tampi kha a tuah. Asinain “a lung a hung pem” i inn ah a kir ṭhan. A pa nih zeitindah a lehrulh? “A pa nih lam hlat in a hmuh tikah a zaang a fak tuk i a va tlik hnawh, cun a kuh i a hnamh” tiah Jesuh nih a ti. A fapa nih a pa sinin ngaihthiamnak hmuh awkah aa ruahchan lo. Cucaah a sinah rianṭuantu in umnak nawl pek awkah a hal. Asinain a pa nih lungtho tein a ngaihthiam. “Ka fapa” tiah a auh i a chungkhar ah a cohlan ṭhan. A pa nih “a rak tlau i ka hmuh ṭhan cang” tiah a ti. (Luka 15:11-32) Jesuh nih vawleicung a rat hlanah a Pa nih aa ngaihchihmi misual tampi a ngaihthiammi hna kha a hmuh ko lai. Jesuh chimmi bianabia nih kan Pa Jehovah cu ngaihthiamnak in a khatmi a si ti kha a langhter. Mah cu hnemtu taktak a si!

13-14. Lamkaltu Peter nih i ngaihchihnak kong he aa tlaiin zeidah a cawn, midang tah zeidah a cawnpiak hna? (Hmanthlak zong zoh.)

¹³ Lamkaltu Peter nih Jesuh sinin i ngaihchihnak le ngaihthiamnak kong tampi a cawn. Peter nih palhnak atu le atu a tuah nain Jesuh nih lungtho tein a ngaihthiam. Tahchunhnak ah, Peter nih Bawipa Jesuh kha ka hngal lo tiah voithum tiang aa rak i pheh. Cutin a rak i pheh hnuah a ngaih a chia tuk. (Matt. 26:34, 35, 69-75) Asinain Jesuh nih a thawhṭhan hnuah Peter kha amah lawng in a um lioah a va ton. (Luka 24:33, 34; 1 Kor. 15:3-5) Peter cu aa ngaichih ti kha Jesuh nih a hngalh caah a ngaihthiam ti kha hngalhter a duh.—Mar. 16:7.

¹⁴ Peter nih i ngaihchihnak le ngaihthiamnak kong kha ṭha tein a hngalhthiam. Cucaah mah kong kha midang sin zong ah a cawnpiak  hna. Pentekos puai a dih hnu tlawmpal ah Peter nih Judah mi sinah Messiah an rak thahnak kong kha a fianter. Asinain hitin tha a pek hna: “Nan sualnak hnawhpiak nan si nakhnga i ngaichih u law Pathian sinah i mer u. Cuticun Jehovah sinin hrimhnak caan nan hmu lai.” (Lam. 3:14, 15, 17, 19) Misual mi pakhat cu aa ngaihchih tikah a ṭhalomi a ruahnak le a tuahsernak kha a thlen i Pathian lung a lawmhtermi thil tu kha a tuah tiah Peter nih a langhter. Cutin aa ngaichihmi hna i an sualnak kha Jehovah nih a hlohpiak dih cikcek hna lai ti zong kha a langhter. Kum tampi a rauh hnuah Peter nih Khrihfa pawl kha hitin tha a pek ṭhan hna: ‘Bawipa cu . . . nanmah cung ah lungsaunak a ngei . . . Zeitintiah pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duhmi a si.’ (2 Pet. 3:9) Sualnak ngan kan tuah hmanh ah lungtak tein kan i ngaihchih ahcun Jehovah nih a kan ngaihthiam lai ti hngalh cu hnemtu taktak a si!

15-16. (a) Lamkaltu Paul nih ngaihthiamnak kong kha zeitindah a rak cawn? (1 Timote 1:12-15) (b) A hnu capar ah zei kong dah kan i ruah hna lai?

¹⁵ Tarsus khuami Saul nih thil ṭhalo tampi a rak tuah. Khrih zultu pawl kha puarhrang ngai in a hrem hna. Khrihfa tampi nih aa thleng kho bal lai lo tiah an ruah men lai. Asinain Saul cu aa thleng kho i aa ngaihchih kho ti kha Jesuh nih a hngalh. Jesuh le a Pa nih Saul a ṭhatnak kha an hmuhpiak. “Ka kong tehte khangtu ding ah ka thimmi a si” tiah Jesuh nih a ti. (Lam. 9:15) Jesuh nih Saul kha aa ngaihchih nakhnga khuaruahhar lam in a bawmh. (Lam. 7:58–8:3; 9:1-9, 17-20) A hnuah lamkaltu Paul in hngalh a simi Saul cu aa ngaichih i Khrihfa a hung si. Jehovah le Jesuh nih a cung ah zaangfahnak an langhter caah Paul nih aa lawmhnak kong kha atu le atu a chim. (1 Timote 1:12-15 rel.) Cun Paul nih “Na cung ah zaangfahnak a ngeihmi cu i ngaichih seh ti aan duh caah a si” tiah unau pawl kha a cawnpiak hna.—Rom 2:4.

¹⁶ Paul nih Korin Khrihfabu ah ziaza rawhralnak a ummi kong a theih tikah zeitindah a tawnghtham? Paul nih mah sualnak ngan a tawnghtham ning in dawtnak aa telmi Jehovah chimhhrinhnak kong tampi kan cawn khawh. Cun zaangfahnak langhter a biapitnak kong zong kan cawn. A hnu capar ah mah kong kha a dikthliar in kan i ruah hna lai.