1. Jehovah nih mikip kha zeidah a duhpiak hna?

 JEHOVAH nih minung a kan ser tikah zalong tein duh thimnak nawl a kan pek. Nifatin biakhiahnak kan tuah tikah mah laksawng kha kan hman. A biapi bikmi biakhiahnak cu Jehovah sin i pumpek ding le a chungkhar ah i tel ding in kan i thimmi kha a si. Mikip nih cutin tuah hna seh ti kha Jehovah nih a duh. Zeicah? A kan dawt i kan caah a ṭha bik a kan duhpiak caah a si. Amah he pehtlaihnak ṭha ngei hna seh law zungzal in nung hna seh ti a kan duh.—Deut. 30:19, 20; Gal. 6:7, 8.

 2. Aa ngaichih lomi sualnak a tuahtu kha Jehovah nih zeitindah a hmuh hna? (1 Johan 2:1)

² Asinain Jehovah nih amah biak awkah ahohmanh a kan hnek lo. Zeidah kan tuah lai timi kong he aa tlaiin i thimnak nawl a kan pek. A si ahcun tipil a ing cangmi Khrihfa pakhat nih Pathian nawlbia a buar i sualnak ngan a tuah ah tah zeitin? Aa ngaihchih lo ahcun Khrihfabu chung in chuah a si lai. (1 Kor. 5:13) Zeitin a si hmanh ah Jehovah nih sualnak a tuahtu kha a sinah kir ṭhan seh ti a duh. Cucaah aa ngaichihmi sualnak a tuahtu a ngaihthiam khawh hna nakhnga tlanhnak man a timhtuah. (1 Johan 2:1 rel.) A kan dawtu Pathian  nih sualnak a tuahtu hna kha i ngaihchih ding in a forh hna.—Zek. 1:3; Rom 2:4; Jeim 4:8.

 3. Hi capar ah zei kong dah kan i ruah hna lai?

³ Jehovah nih sualnak le sualnak a tuahtu hna kong he aa tlaiin a hmuh ning kha i zohchunh hna seh ti a kan duh. Hi capar ah cutin tuah khawh awkah a kan bawmmi biahalnak pathum kong kan i ruah hna lai. Pakhatnak, Korin Khrihfabu nih sualnak ngan kha zeitindah an tawnghtham? Pahnihnak, sualnak ngan a tuahtu aa ngaihchih tikah lamkaltu Paul nih zei lamhruainak dah a pek hna? Pathumnak, mah Baibal tuanbia nih sualnak ngan a tuahmi Khrihfa cung i Jehovah hmuhnak kong zeidah a langhter?

Kumzabu Pakhatnak ah Sualnak Ngan an Tawnghtham Ning

 4. Kumzabu pakhatnak i Korin Khrihfabu ah zei thil sining dah a cang? (1 Korin 5:1, 2)

⁴ Korin Kuatkhatnak 5:1, 2 rel. Paul nih a voithumnak khual a tlawn lioah dirhkami Korin Khrihfabu kong he aa tlaiin thawngpang chia a rak theih. Mah Khrihfabu i unaupa pakhat cu a pa nupi he nupa sualnak an tuah. Cu bantuk tuahsernak cu a ṭhalo tukmi a si i “miphun dang hna lak hmanh ah a um lo.” Mah pa tuahsernak kha Khrihfabu nih an cohlan leng ah a uan hmanh i uanthlarpi dawh an si. Unau cheukhat nih mitlinglo cung ah Jehovah nih a langhtermi zaangfahnak kan i zohchunhmi a si tiah an ruah men lai. Asinain Jehovah nih Khrihfabu ah cu bantuk tuahsernak kha a cohlang lo. Mah pa nih zah hngal loin a tuahmi thil ruang ah Khrihfabu min a chia. Mah leng ah amah he aa kommi a dang Khrihfa hna zong a tuahsernak nih a iap khawh hna. Cucaah Paul nih Khrihfabu kha zei lamhruainak dah a pek hna?

 5. Paul nih Khrihfabu kha zei lamhruainak dah a pek hna, zeicah? (1 Korin 5:13) (Hmanthlak zong zoh.)

⁵ Korin Kuatkhatnak 5:13 rel. Jehovah nih Paul kha Korin Khrihfabu sinah cakuat a ṭialter. Mah cakuat ah Paul nih aa ngaichih lomi sualnak a tuahtu pa kha Khrihfabu in chuah awkah lamhruainak a pek hna. Zumhfekmi Khrihfa hna nih mah pa kha zeitindah an pehtlaih awk a si? Paul nih amah he ‘i hawikom lo’ ding in lamhruainak a pek hna. Mah ah zeidah aa tel? Paul nih “rawl hmanh eiṭi hlah u” tiah a ti hna. (1 Kor. 5:11) Mi pakhat he rawl kan eiṭi tikah amah he caan kan hmangṭi i bia tampi kan i ruah. Komh zong  kan hun i kom deuh. Cucaah Paul nih mah pa kha naih tein komhter a duh hna lo ti cu a fiang ko. Mah lawng ah Khrihfabu cu a ṭhalomi a tuahsernak in huhphenh a si lai. (1 Kor. 5:5-7) Cutin an komh lo tikah mah pa nih zeitluk in dah Jehovah a lung ka fahter ti kha a hngalh lai. A ning a zak lai i aa hun i ngaichih men lai.

 6. Khrihfabu le sualnak a tuahtu pa nih Paul cakuat kha zeitindah an lehrulh?

⁶ Korin Khrihfabu nih a cakuat zeitindah an lehrulh lai ti kha Paul nih theih a duh. Lamhruainak a pek hna ning in mah pa kha Khrihfabu chung in an chuah cang tiah Titas nih a chimh tikah Paul cu a lung aa lawm tuk. (2 Kor. 7:6, 7) Mah leng ah Khrihfabu nih cutin an tuah hnu tlawmpal ah sualnak a tuahtu pa cu aa ngaichih i a ṭhalomi a tuahsernak le a lungput kha a thlen. Cun Jehovah i a dingmi a phunglam tu kha a rak zulh! (2 Kor. 7:8-11) Paul nih Khrihfabu kha zei lamhruainak dah a pek ṭhan hna?

 Khrihfabu nih Aa Ngaichihmi Sualnak a Tuahtu Pa an Pehtlaih Ning

 7. Sualnak a tuahtu pa kha Khrihfabu in an chuahmi nih zei ṭhathnemhnak dah a chuahter? (2 Korin 2:5-8)

⁷ Korin Kuathnihnak 2:5-8 rel. “Mi tam deuh nih nan chimhhrinhmi cu mah pa caah a za cang ko” tiah Paul nih a ti. Phundang in cun, Khrihfabu in chuah a si caah sualnak a tuahtu pa cu aa ngaichih cang. Cucaah Khrihfabu nih an chimhhrinh len a hau ti lo.—Heb. 12:11.

 8. Paul nih Khrihfabu kha zei lamhruainak dah a pek ṭhan hna?

⁸ Paul nih Khrihfabu kha hitin lamhruainak a pek hna: “Mah pa kha lungtak tein nan ngaihthiam awk le nan hnemh awk a si. . . . Amah nan dawt taktak kha a hngalh nakhnga va langhter u.” Khrihfabu ah sualnak a tuahtu pa kha cohlan ṭhan lawng in a za lo. Mah nak tam deuh in an tuah a hau. Paul nih an biachim le an tuahsernak zong in an ngaihthiam i an dawt taktak ti kha langhter hna seh ti a duh. Cutin an tuah ahcun Khrihfabu ah a rak kir ṭhanmi pa nih lunglawm tein an ka conglawmh ti kha a hngalh lai.

 9. Aa ngaichihmi sualnak a tuahtu pa ngaihthiam awkah mi cheukhat cu zeicah an i harh khawh men?

⁹ Aa ngaichihmi sualnak a tuahtu pa a kir ṭhan tikah unau cheukhat nih cohlan awkah an i harh men lai. Baibal nih cun fiang tein a chim lo nain zeicah cutin kan chim khawh? Khrihfabu ah buaibainak tampi a chuahter caah a cheu cu an thin a hung rih men lai. A cheu tu cu pumpak in a hnorsuan hna caah an lung a rawk tuk rih men lai. Cun nuncan ziazalei ah thianghlim tein um aa zuammi cheukhat nih cun unau pakhat in cohlan ṭhan cu aa tlak lo tiah an ruah men lai. (Luka 15:28-30 he tahchunh.) Asinain Khrihfabu ah a rak kir ṭhanmi unaupa cung ah dawtnak taktak langhter cu zeicah a biapit?

10-11. Khrihfa upa nih aa ngaichihmi sualnak a tuahtu pa kha an ngaihthiam duh lo ahcun zeidah a cang kho?

¹⁰ Aa ngaichihmi sualnak a tuahtu pa a rak kir ṭhan tikah Khrihfa upa pawl nih an cohlan lo asiloah unau pawl nih a cung ah dawtnak an langhter lo ahcun zeidah a cang kho ti kha ruathmanh. “A ngaih a chia tuk lai i a lung a dong sual lai.” Ruahchannak ka ngei ti lo ti zong in a ruah khawh. Pathian he pehtlaihnak ṭha ngeih ṭhan awkah i zuam hmanh a duh ti men lai lo.

¹¹ Unau pawl nih aa ngaichihmi sualnak a tuahtu pa kha ngaihthiam an duh lo ahcun zeidah a cang kho rih? Jehovah he an i pehtlaihnak a rawk kho. Zeicah? Cutin an tuah ahcun Jehovah i ngaihthiamnak lungput kha si loin zaangfahnak a ngei lomi Satan lungput an i zohchunhmi a si lai. Mah leng ah aa ngaichihmi unaupa nih Jehovah a biak ti nakhnga lo Satan nih ngaihthiam a duh lomi unau pawl kha hriamnam in a hman khawh hna.—2 Kor. 2:10, 11; Efe. 4:27.

12. Khrihfabu nih Jehovah kha zeitindah an i zohchunh khawh?

¹² Korin Khrihfabu nih Satan si loin Jehovah kha zeitindah an i zohchunh khawh? Jehovah bantuk in aa ngaichihmi sualnak a tuahtu pa an ngaihthiamnak thawng in a si. Baibal ṭialtu cheukhat nih Jehovah kong zeidah an chim ti kha i cinken. David nih Jehovah cu ‘a ṭha i ngaihthiamnak in a khat’ tiah a ti. (Salm 86:5) Mikah nih “Bawipa, nangmah bantuk Pathian ahodah a um? Nang nih cun kan ṭhatlonak kha na kan ngaihthiam i na mi a tangmi hna kan sualnak  kha na lanhtak” tiah a ti. (Mik. 7:18) Isaiah zong nih hitin a ti: “Miṭhalo nih an zulhmi an lam kha hlaw hna seh law an ruah ning kha thleng hna seh. BAWIPA kan Pathian lei ah cun i mer hna seh, amah cu mi zaangfah a thiam i khulrang in mi a ngaithiam khotu a si.”—Isa. 55:7.

13. Aa ngaichihmi sualnak a tuahtu pa Khrihfabu ah luhter ṭhan cu zeicah aa tlak? (“ Korin Khuami Pa cu Zeitik Ah dah Bu Chung ah Luhter Ṭhan a Si?” timi rinli kulh zoh.)

¹³ Jehovah i zohchunh awkah Korin Khrihfabu nih aa ngaichihmi pa kha an cohlan ṭhan awk a si i an dawtnak kha an langhter awk a si. Aa ngaichihmi sualnak a tuahtu kha cohlang u timi Paul lamhruainak an zulhnak thawng in “zeizong kip ah nawl a ngaimi” an si kha an langhter. (2 Kor. 2:9) Bu chung in an chuahnak cu thla tlawmpal lawng a si rih nain aa ngaichih cang. Cucaah Khrihfabu chung luhter ṭhan awkah Khrihfa upa hna nih saupi an hngah a hau ti lo.

Jehovah Dinnak le Zaangfahnak i Zohchunh Khawh Ning

14-15. Korin Khrihfabu ah a cangmi in zeidah kan cawn khawh? (2 Peter 3:9) (Hmanthlak zong zoh.)

¹⁴ Korin Khrihfabu ah a cangmi kong Baibal ah ṭial a simi cu “kanmah cawnpiaknak caah a si.” (Rom 15:4) Mah in sualnak ngan a tuahmi cu Khrihfabu ah Jehovah nih a cohlang hna lo ti kha kan hngalh. Mi cheukhat nih Jehovah cu zaangfahnak a ngeimi a si  caah aa ngaichih lomi hna kha Khrihfabu ah umnak nawl a awnh hna lai tiah an ruah. Asinain mah cu Jehovah nih zaangfahnak a langhter ning a si lo. Jehovah cu zaangfahnak a ngei ti cu a hmaan ko, asinain zeipaoh a cohlangmi a si lo. A hmaan, hmaan lo kong he aa tlaimi a phunglam cu aa thleng bal lo. (Jud. 4) Jehovah nih aa ngaichih lomi sualnak a tuahtu kha Khrihfabu ah a umter peng ahcun Khrihfabu caah ṭih a nung kho. Mah cu dawtnak a langhtermi a si lai lo.—Ptb. 13:20; 1 Kor. 15:33.

¹⁵ Zeidah kan cawn khawh rih? Jehovah nih ahohmanh hrawh si hna hlah seh ti a duh. A si khawh chung in mi kha khamh a duh hna. A lungput aa thleng i amah he pehtlaihnak ṭha ngeih ṭhan a duhmi hna cung ah zaangfahnak a langhter. (Ezek. 33:11; 2 Peter 3:9 rel.) Korin khua i sualnak a tuahtu pa cu aa ngaihchih i a nunning aa thlen tikah ngaihthiam awk le cohlan ṭhan awkah Paul hmang in Jehovah nih lamhruainak a pek hna.

16. Korin khua i a cangmi kong na hngalh tikah zeitindah na um?

¹⁶ Korin Khrihfabu ah a cangmi kong in Jehovah cu dawtnak a ngei i a dingmi a si ti kha kan hngalh. (Salm 33:5) Mah nih kan Pathian Jehovah kha thangṭhat chinchin awkah a kan forh, a si ko lo maw? Kan dihlak in misual kan si caah ngaihthiamnak kan herh. Jehovah nih a kan pekmi tlanhnak man thawng in ngaihthiam kan si khawh caah kan i lawm tuk. Jehovah nih a kan dawt tuk i kan caah a ṭha bik a kan duhpiak ti hngalh cu zeitluk in dah hnemtu a si!

17. A hnu capar hna ah zei kong dah kan i ruah hna lai?

¹⁷ Tuchan ah tah sualnak ngan kha zeitindah tawnghtham awk a si? Khrihfa upa hna nih Jehovah dawtnak i zohchunh in sualnak a tuahtu kha i ngaihchih awkah zeitindah an bawmh khawh? Khrihfa upa nih mi pakhat bu chung in an chuah asiloah an luhter ṭhan tikah Khrihfabu nih zeitindah an lehrulh awk a si? Mah biahalnak hna kha a hnu capar hna ah kan i ruah lai.