1-2. (a) Sualnak cu zeidah a si, zeitindah kan tei khawh? (“Biafang Fianternak” zong zoh.) (b) Hi capar le mah Vennak Innsang i a dang capar hna ah zei kong dah kan i ruah hna lai? (Hi mekazin i “Careltu Hna Cinken Awk” zong zoh.)

 JEHOVAH nih zeitluk in dah aan dawt? Sualnak le thihnak in khamh na si nakhnga Jehovah nih a tuahmi kong na hlathlai tikah zeitluk in dah aan dawt ti kha na hngalh lai. Sualnak a cu ṭih a nung tukmi ral a si. Nangmah thazaang in cun na tei kho lai lo. Kan dihlak in nifatin sualnak kan tuah i misual kan si caah kan thi. (Rom 5:12) Asinain thawngṭha a um. Jehovah bawmhnak thawng in sualnak kha kan tei khawh i kan tei hrimhrim lai ti cu a fiang!

² Jehovah nih sualnak doh awkah minung a kan bawmhnak cu kum 6,000 hrawng a si cang. Zeicah? A kan dawt caah a si. Jehovah nih minung hi a serka tein a dawt hna. Cucaah sualnak an doh khawh nakhnga lam tampi in a rak bawmh hna. Sualnak nih thihnak a chuahter ti kha Pathian nih a hngalh. Thi hna seh ti a kan duh lo. Zungzal in nung hna seh ti a kan duh. (Rom 6:23) Nang zong zungzal in nung seh ti aan duh. Hi capar ah mah biahalnak pathum hi kan i ruah hna lai: (1) Jehovah nih zeitindah misual mi kha ruahchannak a pek hna? (2) Baibal chan i misual mi hna nih Jehovah mithmai ṭha zeitindah an rak hmuh? (3) Jesuh nih misual mi vialte khamh awkah zeidah a rak tuah?

 Jehovah nih Zeitindah Misual Mi kha Ruahchannak a Pek Hna?

 3. A hmasa bik kan nu le kan pa cu zeitindah misual an hung si?

³ Jehovah nih a hmasa bik nupa a rak ser hna tikah i nuam hna seh ti a duh. Aa dawh tukmi umnak hmun, ṭhitumnak laksawng le lungthawh awk ngai a simi rian zong a pek hna. Vawleicung pumpi kha an tefa in an khahter lai i Eden dum bantuk in paradis ah an canter lai. Nawlbia a pekmi hna cu pakhat lawng a si. Hramhram in an ralchanh i mah nawlbia an buar ahcun nan thi lai tiah ralrin a pek hna. Mah hnuah zeidah a cang ti kha kan hngalh. Pathian cung le an cung ah dawtnak a ngei lomi vancungmi ṭhalo nih Pathian nawlngaih lo awkah Adam le Evi kha a rak tukforh hna. Annih nih mah vancungmi ṭhalo Satan a duhnak kha an rak zulh. An cung ah dawtnak a ngeimi an Pa kha zumh loin sualnak tu an tuah. Kan hngalh cang bantuk in Jehovah chimmi bia cu a hung tling. Mah ni thawk in sualnak nih a chuahtermi harnak kha an ing. An hun tar i a donghnak ah an thi.—Gen. 1:28, 29; 2:8, 9, 16-18; 3:1-6, 17-19, 24; 5:5.

 4. Zeicah Jehovah nih sualnak kha a huat i doh khawh awkah a kan bawmh? (Rom 8:20, 21)

⁴ Mah ngaihchiat awk ngai a simi a konglam kha kanmah ṭhatnak caah Jehovah nih Baibal ah a ṭialter hna. Mah nih sualnak a huatnak a ruang kha hngalhthiam awkah a kan bawmh. Sualnak nih kan Pa he a kan hlatter i thihnak a chuahter. (Isa. 59:2) Satan nih Jehovah le minung kha a huat hna. Cucaah Adam le Evi kha a rak tukforh hna i tuchan tiang mi kha a tukforh hna. Adam le Evi nih sualnak an tuah tikah minung ca i Jehovah tinhnak cu a rawk cang tiah Satan nih a ruah men lai. Asinain Jehovah cu zeitluk in dah dawtnak a ngeih ti kha a hngal lo. Pathian nih Adam le Evi tefa caah aa tinhnak cu a thleng bal lo. Minung kha a kan dawt caah ruahchannak a kan pek colh. (Rom 8:20, 21 rel.) Adam le Evi tefa cheukhat nih amah dawt awkah an i thim lai ti kha Jehovah nih a hngalh. Cun sualnak an doh khawh nakhnga a sinah bawmhnak an hal lai ti zong a hngalh. An Pa le an Sertu a simi Jehovah nih amah he an i naih khawh nakhnga le sualnak le thihnak in an luat khawh nakhnga lam a sialpiak hna. Cutin a si khawh nakhnga Jehovah nih zeidah a tuah?

 5. Zeitik in dah misual mi hna caah ruahchannak a hung um? Fianter. (Genesis 3:15)

⁵ Genesis 3:15 rel. Jehovah nih Satan hrawh a si lai tiah a chimle cangka in minung caah ruahchannak a hung um. Pathian nih minung a khamhtu ding “tefa” a chuak lai tiah a chimchung. Mah tefa nih Satan kha a hrawh lai i Eden dum ah a chuakmi ṭhatlonak vialte zong a hloh dih lai. (1 Joh. 3:8) Asinain Satan nih tefa kedil kha a cuk hmasa lai, phundang in cun a thi lai. Mah nih Jehovah lung kha a fahter tuk lai nain rel cawk lo a simi minung cu sualnak le thihnak in khamh an si lai. Cucaah Jehovah nih tefa kha thihnak nawl a awnh.

Baibal Chan i Misual Mi nih Jehovah Mithmai Ṭha Zeitindah An rak Hmuh?

 6. Abel le Noah i telin zumhfekmi hna nih Jehovah he pehtlaihnak ṭha ngeih awkah zeidah an rak tuah?

⁶ Misual mi hna nih Pathian he pehtlaihnak ṭha an ngeih khawh ning kha kumzabu tampi chung Jehovah nih duhsah duhsah in a fianter. Eden dum i ralchanhnak a chuah hnuah Adam le Evi i a pahnihnak an fapa Abel cu Jehovah cung ah zumhnak a langhter hmasa bikmi a si. Abel nih Jehovah kha a dawt, a  lung lawmhter a duh i Amah he i naih a duh caah raithawinak a pek. Abel cu tuukhal a si caah a tuufa kha a thah hna i Jehovah sinah a pek. Jehovah nih zeitindah a lehrulh? “Abel le a laksawng cung ah khan a lung a si.” (Gen. 4:4) Mah leng ah Noah i telin Jehovah a daw i aa bochanmi hna pekmi raithawinak zong kha Jehovah nih a cohlan. (Gen. 8:20, 21) Mah raithawinak hna a cohlanmi nih misual mi hna cu Jehovah mithmai ṭha an hmu kho i amah he pehtlaihnak ṭha an ngei kho ti kha a langhter. b

 7. Abraham nih a fapa raithawinak caah pek a sianmi in zeidah kan cawn khawh?

⁷ Abraham cu Jehovah cung ah a fekmi zumhnak a ngei. Jehovah nih a caah a har tukmi thil tuah awkah a fial. Mah cu a fapa Isak raithawinak in pek ding kha a si. Abraham cu a lung a fak tuk ko lai nain Jehovah nawl kha a rak ngaih. Asinain a fapa a thah lai te ah Jehovah nih a thlauh ṭhan. Mah nih hmailei ah Jehovah nih a tuah dingmi kong kha a kan cawnpiak. Mah cu a dawt tukmi a Fapa raithawinak in pek a sianmi kha a si. Jehovah nih minung kha cu tluk cun a kan dawt.—Gen. 22:1-18.

 8. Nawlbia ning in pekmi saram raithawinak hna nih zeidah an langhter chung? (Levitikas 4:27-29; 17:11)

⁸ Jehovah nih Israel mi kha Nawlbia a pek hna lioah an sualnak ngaihthiam a si nakhnga saram raithawinak pek ding in a fial hna. (Levitikas 4:27-29; 17:11 rel.) Mah raithawinak hna nih sualnak in mi vialte a khamh khotu, a ngan deuhmi raithawinak kha an langhter chung. Pathian profet hna nih biakammi tefa kong kha an rak chimchung. Mah tefa cu Pathian dawt bikmi fapa a si i anih cu harnak a ing lai, raithawinak caah pekmi tuu bantuk in thah a si lai tiah an fianter. (Isa. 53:1-12) Nangmah i telin mi vialte sualnak le thihnak in khamh awkah Jehovah nih a dawt tukmi a Fapa raithawinak caah a timhtuahmi kha na mitthlam ah cuanter hmanh!

Jesuh nih Zeitindah a Kan Khamh?

 9. Tipil Petu Johan nih Jesuh kong he aa tlaiin zeidah a chim? (Hebru 9:22; 10:1-4, 12)

⁹ AD 29 ah Pathian sal a simi Tipil Petu Johan nih Nazareth khuami Jesuh kha a hmuh tikah hitin a ti: “Vawlei sualnak a kalpitu Pathian Tuufa khi zoh hmanh u!” (Johan 1:29) Mah bia nih Jesuh cu a nunnak kha raithawinak in a pe dingmi biakammi tefa a si ti kha a langhter. Sualnak in mi vialte a khamh khotu Jehovah tefa cu ahodah a si ti kha fiang tein a lang cang!—Hebru 9:22; 10:1-4, 12 rel.

10. Misual mi hna ‘auh awkah a rat’ kha Jesuh nih zeitindah a langhter?

¹⁰ Jesuh nih sualnak ruang ah a lung a dongmi hna kha a hleiin lungthin a pek hna i a bawmh hna. Cun a zultu si awkah a sawm hna. Harnak a hrampi cu sualnak a si ti kha a hngalh. Cucaah misual in hngalh a simi hna kha a hleiin bawmh a duh hna. Tahchunhnak hmang in hitin a fianter: “A dammi nih siibawi an herh lo, a zawmi lawng nih an herh.” Cun hitin a ti chap: “Miding mi hna auh awkah ka ra lo, misual mi hna auh awk tu ah ka ra.” (Matt. 9:12, 13) Jesuh nih a chimmi ning in a rak tuah taktak. Misual in hngalhmi nu pakhat nih Jesuh ke kha a mitthli in a hnawhpiak lioah Jesuh nih nem tein a chawnhbiak i a sualnak kha a ngaihthiam. (Luka 7:37-50) Tikhor pawng ah a tonmi Samaria minu zong a ziaza a rawkralmi a si ti kha a hngalh ko nain a biapi tukmi biatak  kong kha a cawnpiak. (Joh. 4:7, 17-19, 25, 26) Pathian pekmi ṭhawnnak thawng in sualnak nih a chuahtermi thihnak hmanh kha Jesuh nih a hloh khawh. Zeiti lam in dah? Nu, pa le ngakchia i telin a thimi kha Jesuh nih a thawhter ṭhan hnanak thawng in a si.—Matt. 11:5.

11. Misual mi hna cu zeicah Jesuh pawng ah um an duh?

¹¹ Sualnak a tuahmi hna hmanh nih Jesuh pawng ah um an duhmi cu khuaruahhar awk a si lo. Jesuh nih an cung ah zawnruahnak le zaangfahnak a langhter caah zalong tein an fuhpanh ngam. (Luka 15:1, 2) Zumhnak an ngeih caah Jesuh nih a thangṭhat hna. (Luka 19:1-10) Jesuh nih a Pa zaangfahnak kha tling tein a langhter. (Joh. 14:9) Jesuh chimmi le a tuahsernak hna kan zoh tikah zaangfahnak in a khatmi a Pa nih minung a dawt hna i sualnak tei awkah bawmh a duh hna ti kha kan hngalh. Misual mi hna nih i thlen duhnak lungput le amah zulh duhnak lungput an ngeih nakhnga Jesuh nih a bawmh hna.—Luka 5:27, 28.

12. A thihnak kong he aa tlaiin Jesuh nih a zultu pawl kha zeidah a cawnpiak hna?

¹² Jesuh nih zeidah ka ton lai ti kha a hngalh. Rawi ka si lai i tung cung ah thah ka si lai tiah a zultu pawl kha voi tampi a chimh hna. (Matt. 17:22; 20:18, 19) Johan le profet hna nih an chimchung bantuk in Jesuh nih ka pek dingmi raithawinak cu vawlei sualnak a kalpitu a si lai ti kha a hngalh. A thih hnuah “mi vialte kha ka sinah ka hnuh hna lai” ti zong in a cawnpiak hna. (Joh. 12:32)  Misual mi hna nih Jesuh kha an Bawipa in an cohlan i an i zohchunh ahcun Jehovah lung an lawmhter khawh lai. Cutin an tuahnak thawng in “sualnak in luatter” an si lai. (Rom 6:14, 18, 22; Joh. 8:32) Mah kha a hngalh caah Jesuh nih a fak tukmi thihnak kha lungtho tein le ralṭha tein a in.—Joh. 10:17, 18.

13. Jesuh cu zeitindah a thih, a thihnak nih Jehovah Pathian kong zeidah a kan cawnpiak? (Hmanthlak zong zoh.)

¹³ Jesuh cu a hawikom ṭha pakhat nih a rawi. Cun a ral pawl nih an tlaih, an nihsawh, an thangchiat, a ding loin sual an puh i an hrem. A donghnak ah ralkap pawl nih Jesuh kha tung cung ah thir in an khenh i an thah. Mah fahnak kha Jesuh nih zumhfek tein a in. Asinain amah nakin fahnak a ing deuhmi Pakhat a um. Amah cu Jehovah Pathian a si. Jehovah cu a Fapa nih a inmi fahnak hlohpiak awkah ṭhawnnak a ngei ko nain cutin a tuah lo. Jehovah nih a Fapa kha a dawt tuk ko nain zeicah cutin fahnak in buin thih awkah nawl a awnh? A kan dawt tuk caah a si. Jesuh nih hitin a ti: “Pathian nih hi vawlei hi a dawt tuk caah a Fapa ngeihchunhte kha a pek, cucaah amah a zummi paoh cu an rawk lai lo, zungzal nunnak an hmu lai.”—Joh. 3:16.

14. Jesuh raithawinak nih zeidah a langhter?

¹⁴ Jehovah nih Adam le Evi tefa a dawt tuk hna ti kha Jesuh raithawinak nih a langhter. Jehovah nih nangmah zong aan dawt tuk ti kha a langhter. Sualnak le thihnak in nangmah khamh awkah a fak tukmi ngaihchiatnak kha a rak in. (1 Joh. 4:9, 10) Sualnak kan doh khawh i kan tei khawh nakhnga pakhat cio bawmh a kan duh!

15. Pathian pekmi tlanhnak man laksawng in ṭhatnak hmuh awkah zeidah kan tuah a hau?

¹⁵ Pathian nih a Fapa ngeihchunhte thawng in tlanhnak man a kan pek. Mah laksawng thawng in kan sualnak ngaihthiam kan si kho. Asinain ngaihthiam kan si nakhnga zeidah kan tuah a herh? Mah kong he aa tlaiin Tipil Petu Johan le Jesuh Khrih nih hitin an ti: “I ngaichih u, vancung Pennak cu a nai cang.” (Matt. 3:1, 2; 4:17) Cucaah sualnak kha doh in a kan dawtu kan Pa he pehtlaihnak ṭha ngeih kan duh ahcun kan i ngaihchih a hau. I ngaihchih timi cu zeidah a si? Mah nih sualnak tei khawh awkah zeitindah a kan bawmh? A hnu capar ah mah kong kha kan i ruah hna lai.