1. Mi pakhat cu sualnak ngan a tuah hnuah zeidah a cang kho?

 A HMASA capar ah lamkaltu Paul nih Korin Khrihfabu i sualnak ngan a tawnghtham ning kong kha kan i ruah. Sualnak a tuahtu cu aa ngaihchih lo caah bu chung in chuah a si. Asinain a bik in lakmi cacaang ning in sualnak ngan a tuahtu cheukhat cu Pathian bawmhnak thawng in an i ngaichih kho. (Rom 2:4) Cu a si ah Khrihfa upa hna nih tah i ngaihchih awkah zeitindah an bawmh khawh hna?

2-3. Unau pakhat nih sualnak ngan a tuah ti kha kan hngalh ahcun zeidah kan tuah awk a si, zeicah?

² Unau pakhat nih sualnak ngan a tuah ti kha an hngalh lo ahcun Khrihfa upa nih an bawm kho lai lo. A si ahcun unau pakhat nih sualnak ngan a tuah i bu chung hmanh in chuah a si kho ti kha kan hngalh hei ti u sih. Mah tikah zeidah kan tuah awk a si? Sualnak a tuahtu kha Khrihfa upa sinah bawmhnak hal ding in thazaang kan pek awk a si.—Isa. 1:18; Lam. 20:28; 1 Pet. 5:2.

³ Sualnak a tuahtu nih Khrihfa upa sinah chim a duh lo ah tah zeitin? Cutin a si ahcun kanmah nih Khrihfa upa kha kan chimh hna awk a si. Mah lawng ah sualnak a tuahtu nih a herhmi bawmhnak a hmuh khawh lai. Kan unau kha sungh kan duh lo caah cutin kan tuahmi cu dawtnak kan langhtermi a si. Sualnak a tuahtu nih a nuncan ziaza a thlen lo ahcun Jehovah he an i pehtlaihnak a rawk chin lai. Mah leng ah Khrihfabu min zong a chiatter khawh. Cucaah Jehovah le kan unau kha kan dawt caah Khrihfa upa sinah ralṭha tein kan chim awk a si.—Salm 27:14.

 Khrihfa Upa Nih Sualnak Ngan a Tuahtu an Bawmh Khawh Hna Ning

 4. Khrihfa upa hna nih sualnak ngan a tuahtu he an i ton tikah zei hmuitinh dah an chiah awk a si?

⁴ Khrihfabu ah mi pakhat nih sualnak ngan a tuah tikah Khrihfa upa phu nih an lakin unaupa pathum kha an thim hna. Cun Khrihfa upa kawmiṭi in rian an pek hna. a Mah pa hna cu aa tangdormi le aa toidormi an si awk a si. Sualnak a tuahtu nih aa ngaihchih nakhnga an bawmh khawh ko nain i thlen awkah an hnek kho lo ti kha an hngalh. (Deut. 30:19) Sualnak a tuahtu an dihlak in cun Siangpahrang David bantuk in an i ngaichih lai lo ti kha Khrihfa upa nih an hngalh. (2 Sam. 12:13) Sualnak a tuahtu cheukhat nih Jehovah chimhrinhnak kha zei ah an rel men lai lo. (Gen. 4:6-8) Zeitin a si hmanh ah sualnak a tuahtu kha i ngaihchih ding in bawmh awkah Khrihfa upa hna nih hmuitinh an chiah. A si ahcun Khrihfa upa hna nih sualnak a tuahtu he an i ton tikah zei phunglam dah an zulh?

 5. Khrihfa upa hna nih sualnak a tuahtu he an i ton tikah zei bantuk sining dah an langhter awk a si? (2 Timote 2:24-26) (Hmanthlak zong zoh.)

⁵ Khrihfa upa hna nih sualnak a tuahtu kha a sunglawimi le a tlaumi tuu bantuk in an hmuh. (Luka 15:4, 6) Cucaah sualnak a tuahtu he an i ton tikah an biachim le an fuhpanh ning in zaangfahnak an langhter awk a si i biahalnak tuah awk men ah kan ton tiah an ruah awk a si lo. 2 Timote 2:24-26 ah kan hmuhmi sining hna kha an langhter awk a si. (Rel.) Khrihfa upa hna nih sualnak a tuahtu a lung an suk khawh nakhnga nemnak le zaangfahnak he an pehtlaih awk a si.

 6. Khrihfa upa hna nih sualnak a tuahtu an ton hlanah zeitindah an lungthin an i timhtuah? (Rom 2:4)

⁶ Khrihfa upa hna nih an lungthin an i timhtuah. “Na cung ah zaangfahnak a ngeihmi cu i ngaichih seh ti aan duh caah a si” timi Paul nih a chimmi kha an i cinken. Cucaah sualnak a tuahtu an pehtlaih tikah Jehovah kha an i zohchunh. (Rom 2:4 rel.) Jesuh Khrih lamhruainak tang ah a ummi tuukhal an si kha an i cinken a hau. (Isa. 11:3, 4; Matt. 18:18-20) Khrihfa upa kawmiṭi nih sualnak a tuahtu kha an ton hlanah i ngaihchih awkah bawmh ding timi an hmuitinh kong kha thlacam buin an i ruah lai. Cun Baibal le kan cauk pawl hmang in hlathlainak an tuah lai i thleidan thiamnak ngeih awkah thla an cam lai. Sualnak a tuahtu a ruahnak, a lungput le a tuahsernak cung ah huham a ngei khomi, an hngalh a herhmi a hnulei sining kong zong an i ruah lai.—Ptb. 20:5.

7-8. Khrihfa upa hna nih sualnak a tuahtu he an i ton tikah Jehovah lungsaunak zeitindah an i zohchunh khawh?

 ⁷ Khrihfa upa hna nih Jehovah lungsaunak an i zohchunh. Hlanlio i sualnak a tuahtu hna Jehovah nih a pehtlaih hna ning kha an i cinken. Tahchunhnak ah, Jehovah cu Kain cung ah a lung a sau. Thlennak a tuah lo ahcun zeidah a ton lai i a nawl a ngaih ahcun zei thluachuah dah a hmuh lai ti kha a chimh. (Gen. 4:6, 7) David kha profet Nathan hmang in Jehovah nih a rak chimhhrinh. Nathan nih Siangpahrang David a lung a su dingmi tahchunhnak a hman. (2 Sam. 12:1-7) Mah leng ah Jehovah nih lam a pialmi Israel mi sinah profet kha ‘ngol lo tein a thlah hna.’ (Jer. 7:24, 25) Jehovah nih a mi pawl kha bawmh awkah an i ngaihchih tiang a hngak lo. Sualnak an tuah lio hmanh ah i ngaihchih ding in a forh hna.

⁸ Khrihfa upa nih sualnak ngan a tuahmi an bawmh hna tikah Jehovah kha an i zohchunh. 2 Timote 4:2 ning in “lungsau tein” an pehtlaih hna. Cucaah sualnak a tuahtu nih a hmaanmi thil a tuah khawh nakhnga Khrihfa upa hna cu lungdai te le lungsau tein an um a hau. Khrihfa upa nih thinhun bu le aipuang in a pehtlaih ahcun sualnak a tuahtu nih a ruahnak cheuhnak kha a ngai duh lai lo. I ngaihchih hmanh a duh lai lo.

9-10. Sualnak a tuahtu nih a tuahsernak a palh ti a hngalhthiam khawh nakhnga Khrihfa upa nih zeitindah an bawmh khawh?

⁹ Khrihfa upa hna nih sualnak a tuahtermi thil sining kha hngalh an i zuam. Zeinihdah Jehovah he an i pehtlaihnak a derter? Hmaan tein Baibal hlathlainak le phungchim vahnak ah a rak daithlang maw? Jehovah sinah thlacam ti loin a um maw? Pumsa duhnak kha a rak i teiter maw? Ahote he dah a rak i komh? Zei bantuk nuamhsaihnak dah a rak i thim? Aa thimmi cu a ruahnak cung ah zeitindah huham a ngeih? A biakhiahnak le a tuahsernak nih zeitluk in dah a Pa Jehovah lung a fahter ti kha a hngal maw?

¹⁰ Zeicah Jehovah he kan i pehtlaihnak a hun der i sualnak ka tuah ti kha ṭha tein a ruah khawh nakhnga Khrihfa upa nih sualnak a tuahtu kha biahalnak an tuah khawh. Asinain a herh loin pumpak a sining kong kha cu a dikthliar in an hal awk a si lo. (Ptb. 20:5) Nathan nih tahchunhnak hmang in David a rak bawmh bantuk in a tuahsernak a palh ti kha a hngalhthiam khawh nakhnga Khrihfa upa nih tahchunhnak hmang in an bawmh khawh ve. A voikhatnak an i ton lio hmanh ah sualnak a tuahtu cu a ngaih a chia tuk kho men. A ngaih hmanh aa ngaichih kho men.

11. Jesuh nih sualnak a tuahtu kha zeitindah a pehtlaih hna?

¹¹ Khrihfa upa hna nih Jesuh kha an i zohchunh. A tho ṭhanmi Jesuh nih Tarsus khuami Saul kha a lung a su dingmi biahalnak a rak tuah: “Saul, Saul, zeicah na ka hrem?” Cuticun a tuahsernak a palh kha a hngalh khawh nakhnga Jesuh nih a rak bawmh. (Lam. 9:3-6) Cun “Jezebel” b kong ah Jesuh nih “thlennak caan kha ka pek ko” tiah a ti.—Biat. 2:20, 21.

12-13. Sualnak a tuahtu aa ngaihchih nakhnga Khrihfa upa nih zeitindah a caan an pek khawh? (Hmanthlak zong zoh.)

¹² Khrihfa upa hna nih Jesuh i zohchunh in sualnak a tuahtu cu aa ngaichih bal lai lo tiah bia an khiak colh lo. A voikhatnak Khrihfa upa kawmiṭi he an i ton lioah a cheu cu an i ngaichih cang men lai nain a cheu tu cu a caan sau deuh pek an hau men lai. Cucaah Khrihfa upa hna nih sualnak a tuahtu kha voikhatnak tam deuh in ton awkah an timhtuah khawh. A  voikhatnak an ton hnuah sualnak a tuahtu nih an rak chimhmi kong kha ṭha tein a ruah men lai. Toidor tein Jehovah sin zong ah ngaihthiamnak a hal men lai. (Salm 32:5; 38:18) A hnu an ton ṭhan tikah a lungput cu a hmasa ah a rak ngeihmi lungput he aa lo ti men lai lo.

¹³ Sualnak a tuahtu kha i ngaihchih ding in bawmh awkah Khrihfa upa nih zawnruahnak le zaangfahnak an langhter. Jehovah nih an i zuamnak cung ah thluachuah a pek hna nakhnga thla an cam. Lam a pialmi Khrihfa cu a lung a fim te lai i aa ngaichih te lai timi ruahchannak zong an ngei.—2 Tim. 2:25, 26.

14. Sualnak a tuahtu aa ngaihchih tikah ahodah kan thangṭhat awk a si, zeicah?

¹⁴ Sualnak a tuahtu aa ngaihchih tikah kan i lawm tuk! (Luka 15:7, 10) Cutin aa ngaihchih caah ahodah kan thangṭhat awk a si? Khrihfa upa hna maw? Sualnak a tuahtu hna kong he aa tlaiin Paul nih a ṭialmi hi i cinken: “An i ngaihchih . . . nakhnga Pathian nih caanṭha a pekmi hna a si kho men.” (2 Tim. 2:25) Cucaah Khrihfa pakhat a lungput le a ruahnak aa thlen nakhnga a bawm khotu cu minung si loin Jehovah a si. Mi pakhat cu aa ngaihchih tikah zei ṭhatnak dah a chuak kho ti kha Paul nih a fianter. Biatak kha hmaan deuh in a hun hngalh lai, a lung a fim lai i Satan rap in a luat lai.—2 Tim. 2:26.

15. Khrihfa upa hna nih aa ngaichihmi sualnak a tuahtu pakhat kha zeitindah an bawmh peng?

¹⁵ Sualnak a tuahtu aa ngaihchih tikah Khrihfa upa kawmiṭi nih tuukhal lennak tuah ding in an timhtuah lai. Satan rap ah a tlak nakhnga lo le a hmaanmi thil a tuah khawh nakhnga mah nih a bawmh lai. (Heb. 12:12, 13) Khrihfa upa hna nih sualnak a tuahmi kong kha a dikthliar in ahohmanh an chimh hna awk a si lo. Asinain Khrihfabu nih zeidah an hngalh a herh?

“Zapi Hmaiah Chimhhrinh” Hna

16. Timote Kuatkhatnak 5:20 ning in Paul nih “zapi” tiah a ti tikah zeidah a chim duhmi a si?

¹⁶ Timote Kuatkhatnak 5:20 rel. Paul nih “sualnak a tuah lengmangmi” kha “zapi” hmaiah chimhhrinh hna tiah Khrihfa upa a simi Timote kha a forh. Paul nih sualnak a  tuahtu cu Khrihfabu dihlak hmaiah chimhhrinh awk a si tiah a ti duhnak a si maw? A si lo. A sualnak kong a hngal cangmi, mi tlawmpal lawng kha a chim duhmi an si. Annih cu sualnak a tuah ti kha an mit in a hmu taktakmi asiloah sualnak a tuahtu nih a chimhmi hna an si men lai. Anmah lawng kha Khrihfa upa nih sualnak a tuahtu cu chimhhrinh a si cang tiah an theihter hna lai.

17. Mi pakhat nih sualnak ngan a tuahmi kong kha unau tampi nih an hngalh asiloah a hnuah an hun hngalh khawh ahcun zeidah thanh awk a si, zeicah?

¹⁷ A caan ah cun mi pakhat nih sualnak ngan a tuahmi kha unau tampi nih an hngalh khawh men asiloah a hnuah an hun hngalh khawh men. Mah bantuk thil sining ah “zapi” timi nih Khrihfabu dihlak kha a chim duhmi a si. Cucaah mah unau cu chimhhrinh a si cang ti kha Khrihfa upa pakhat nih Khrihfabu dihlak sinah thawng a thanh khawh. Zeicah? Paul nih hitin a ti: Sualnak an tuah nakhnga lo “midang caah ralrin peknak a si lai.”

18. Kum 18 tang a simi mino pakhat nih sualnak ngan a tuah ahcun Khrihfa upa nih zeitindah an tawnghtham lai? (Hmanthlak zong zoh.)

¹⁸ Kum 18 tang a simi mino pakhat nih sualnak ngan a tuah ah tah zeitin? Khrihfa upa pahnih nih mah mino kha Khrihfa a simi a nu le a pa c he ton ding in Khrihfa upa phu nih an timhtuah lai. An fa nih thlennak a tuah i aa ngaihchih khawh nakhnga zeitindah an rak bawmh cang ti kha a nu le a pa an hal hna lai. Mah mino nih a nu le a pa ruahnak cheuhnak kha a zulh i a nuncan ziaza a thlen ahcun mah Khrihfa upa pahnih nih zeihmanh tuah a hau  ti lo tiah bia an khiah khawh. Jehovah nih fale chimhhrinh awkah rian a pekmi hna cu nulepa an si ti kha Khrihfa upa nih an hngalh. (Deut. 6:6, 7; Ptb. 6:20; 22:6; Efe. 6:2-4) A caan ah Khrihfa upa nih a nu le a pa kha an fa nih a herhmi bawmhnak a hmuh le hmuh lo kha an hal hna lai. Asinain kum 18 tang a simi, tipil a ing cangmi mino pakhat nih thlennak a tuah duh lo ah tah zeitin? Mah bantuk thil sining ah Khrihfa upa pathum nih mah mino kha a nu le a pa he an ton lai.

Jehovah cu “Zaangfahnak le Zawnruahnak in a Khat”

19. Sualnak a tuahtu an pehtlaih hna tikah Khrihfa upa nih Jehovah kha zeitindah an i zohchunh khawh?

¹⁹ Kawmiṭi chungtel a simi Khrihfa upa hna cu Khrihfabu thianghlim tein chiah awkah rian an ngei. (1 Kor. 5:7) Asinain sualnak a tuahtu nih aa ngaihchih khawh nakhnga an si khawh chung in bawmh an duh. Cutin tuah khawh awkah Khrihfa upa hna cu a ṭhami hmuhnak an ngeih peng a hau. Zeicah? “Zaangfahnak le zawnruahnak in a khatmi” Jehovah i zohchunh an duh caah a si. (Jeim 5:11) Kum upa a simi lamkaltu Johan nih cu bantuk lungput kha zeitindah a langhter? Hitin a ṭial: “Ka fale hna, hi ca kan kuat hna cu sualnak kha nan tuah nakhnga lo caah a si; sihmanhsehlaw pakhatkhat nih sualnak nan tuah ahcun a dingmi Jesuh Khrih, Pa sin i bia a kan chimpiaktu kha kan ngei ko.”—1 Joh. 2:1.

20. A hnu capar ah zei kong dah kan i ruah lai?

²⁰ Ngaihchiat awk ngai a simi cu sualnak a tuahtu cheukhat nih i ngaihchih kha an duh lo. Cutin aa ngaichih duh lomi hna cu bu chung in chuah an hau. Khrihfa upa hna nih mah bantuk sualnak ngan kha zeitindah an tawnghtham? A hnu capar ah mah kong kha kan i ruah lai.