CAWN AWK CAPAR 51
Jehovah Kha Zeitindah Ṭha Tein Na Hngalh Khawh?
“Maw BAWIPA, nangmah an hngalmi nih cun an in bochan lai, nangmah sinah a rami cu ahohmanh na kaltak bal hna lo.” —SALM 9:10.
HLA 56 Biatak Kha Na Ta Siter
LANGHTERNAK *
1-2. Angelito hmuhtonnak nih zei tuah awkah dah a kan cawnpiak?
JEHOVAH Tehte a simi nulepa sinin a ṭhangmi na si maw? Na si ahcun Jehovah he a ṭhami pehtlaihnak cu nulepa sinin na hmuh khawhmi a si lo ti kha i cinken. Kan nu le kan pa cu Jehovah a biami an si zong, si lo zongah Jehovah he kan i hawikomhnak cu kanmah tein kan fehter a hau.
2 Unaupa Angelito kong hi ruathmanh. Anih cu Jehovah Tehte chungkhar in a ṭhangmi a si. Asinain a no lioah Pathian he kan i naih tiah a ruat lo. Hitin a ti: “Ka chungkhar nih an tuahmi kha tuah ka duh ve caah Jehovah kha a phungmen in ka biak.” Asinain Angelito nih Baibal rel awk le ṭha tein ruah awkah a caan tam deuh pek dingin bia a khiah i Jehovah sinah atu le atu thla a cam. A phichuak cu zeidah a si? Angelito nih hitin a ti: “Ka dawtmi ka Pa, Jehovah he i naih khawhnak lam pakhat cu keimah theng nih Jehovah ka hngalhnak thawngin a si ti kha kan hun hngalh.” Angelito hmuhtonnak nih a biapimi mah biahalnak hna hi a chuahter: Jehovah kong tlawmpal lawng hngalh le ṭha tein hngalh cu zeitindah aa dan? Jehovah kha zeitindah kan hun hngalh khawh?
3. Jehovah kong tlawmpal hngalh le ṭha tein hngalh cu zeitindah aa dan?
3 A min, a chimmi asiloah a tuahmi thil cheukhat kong kan hngalh ca men ah Jehovah kha kan hngalh tiah kan ruah men lai. Asinain mah cu ṭha tein kan hngalh tinak a si lo. Jehovah
kong le a ṭha tukmi a sining kong cawn awkah a caan kan pek a hau. Mah lawngah Jehovah nih zeicah cutin a chim i a tuah ti kha kan hun hngalhthiam khawh lai. Mah nih kan ruahnak, kan biakhiahnak le kan tuahsernak cu Jehovah nih a cohlang maw, cohlang lo ti kha hngalh awkah a kan bawmh lai. Jehovah nih tuahter a kan duhmi kan hngalh ahcun mah ningin kan tuah a hau.4. Baibal ah an kong ṭialmi hna nih zeitindah a kan bawmh khawh?
4 Mi cheukhat nih Jehovah biak kan duh caah an kan nihsawh men lai i kan hun i pumh tikah a ral hmanh an kan ralchanh men lai. Asinain Jehovah kha kan i bochan ahcun zeitikhmanh ah a kan kaltak bal lai lo. Cun kan nunchung vialte a hmun hngami Pathian he hawikomhnak kan ser khawh lai. Jehovah kha ṭha tein kan hngal kho taktak maw? Kan hngalh khawh. Mah kha Moses le Siangpahrang David ti bantuk mitlinglo a simi pa hna kong nih a langhter. Zeidah an rak tuah timi kong kan i ruah tikah mah biahalnak pahnih i a phi kha kan theih hna lai: Jehovah kha zeitindah an hun hngalh? An kong in zeidah kan cawn khawh?
Moses nih “Hmuh Khawh lomi Pathian kha” a Hmuh
5. Moses nih zei tuah awkah dah aa thim?
5 Moses nih Jehovah biak awkah aa thim. Moses nih kum 40 hrawng a si lioah “Faraoh fanu fapa” sinak nakin Pathian miphun a simi, Israel mi he i hawikomh ding tu kha a rak i thim. (Heb. 11:24) Moses nih minthannak kha a rak kaltak. Israel mi a bawmh hna tikah Faraoh cu a thin a hung tuk lai ti kha a hngalh. Faraoh cu a ṭhawng tukmi Siangpahrang a si i Izipt mi nih pathian bantukin an ruahmi a si. Mah nih Moses cu a fekmi zumhnak a ngei ti kha a langhter. Moses nih Jehovah kha aa bochan. Cutin aa bochan caah Jehovah he a fekmi hawikomhnak a ngei.—Ptb. 3:5.
6. Moses sinin zeidah kan cawn khawh?
6 Mah in zeidah kan cawn khawh? Kannih zong Moses bantukin biakhiahnak kan tuah ve a hau: Pathian biak awk le a miphun pawl he i hawikomh awkah kan i thim lai maw? Pathian biak awkah mahca ṭhatnak kan hlawt a hau men lai i Jehovah a hngal lomi hna nih an kan ralchanh men lai. Asinain vancung kan Pa kan i bochan ahcun a kan bawmh lai ti kha kan zumh khawh.
7-8. Moses nih zeidah a cawn peng?
7 Moses nih Jehovah sining hna kha a cawn i a duhnak kha a tuah peng. Tahchunhnak ah, Jehovah nih Izipt ram in Israel mi pawl chuahpi dingin a fial tikah Moses cu mahle mah zumhnak a ngei lo i Jehovah kha atu le atu sining ka tlinh lo tiah a ti. Pathian nih zaangfahnak he a lehrulh i a rak bawmh. (Ex. 4:10-16) A phichuak cu Moses nih Faraoh sinah a fakmi biaceihnak kong kha a chim khawh. Cun Jehovah nih a ṭhawnnak hmangin Rili Sen ah Israel mi pawl a khamhmi hna le Faraoh le a ralkap pawl a hrawhmi hna zong kha a hmuh.—Ex. 14:26-31; Salm 136:15.
8 Moses nih Izipt ram in a chuahpi hna hnuah Israel mi pawl cu atu le atu an phunzai. Asinain sal sinak in a luattermi Israel mi hna cungah Jehovah cu zeitluk in dah a lung a sau ti kha Moses nih a hmuh. (Salm 78:40-43) Cun Moses nih a nawl bantukin Israel mi pawl a hrawh ṭhan hna lonak thawngin toidornak a langhtermi zong kha a hmuh.—Ex. 32:9-14.
9. Hebru 11:27 ningin Moses le Jehovah an i pehtlaihnak cu zeitluk in dah a feh?
9 Israel mi Izipt ram in an chuah hnuah Moses le Jehovah an i pehtlaihnak cu a fek chin. Mah cu vancung a Pa a hmuh bantuk a si. Hebru 11:27 rel.) Mah an i pehtlaihnak cu zeitluk in dah a feh ti kha Baibal nih hitin a langhter: “Minung nih a minung hawi bia a ruah bantukte khin BAWIPA nih Moses cu hmaitonh tein bia a ruah.”—Ex. 33:11.
(10. Jehovah kong ṭha tein hngalh awkah zeidah kan tuah a hau?
10 Mah in zeidah kan cawn khawh? Jehovah kong ṭha tein hngalh awkah a sining kong cawn lawng si loin a duhnak zong kan tuah a hau. “Mi vialte nih khamhnak hmu hna seh ti le biatak kha hngal hna seh” ti kha Jehovah nih a duh. (1 Tim. 2:3, 4) Pathian duhnak tuah khawhnak lamkhat cu midang kha Jehovah kong kan cawnpiak hnanak thawngin a si.
11. Midang kha Jehovah kong kan cawnpiak hna tikah zeitindah Jehovah kha ṭha deuh in kan hun hngalh?
11 Midang kha Jehovah kong kan cawnpiak hna tikah kanmah theng nih Jehovah kha ṭha deuh in kan hun hngalh. Tahchunhnak ah, Jehovah nih a hawi si a duhmi hna hmuh awkah a kan bawmh tikah zaangfahnak a langhtermi kha kan hmuh. (Johan 6:44; Lam. 13:48) Baibal kan cawnpiakmi hna nih a ṭha lomi an ziaza kha an hlawt i an i thlen tikah Pathian Bia a ṭhawnnak kha kan hmuh. (Kol. 3:9, 10) Cun lohmun i mi pawl bawmh awkah atu le atu a kan thlah caah minung cung i Pathian lungsaunak zong kha kan hmuh.—Rom 10:13-15.
12. Exodus 33:13 ah a langhter bantukin Moses nih zeidah a hal, zeicah?
12 Moses nih Jehovah he an i hawikomhnak kha a sunsak. Moses nih Pathian min in khuaruahhar thil tampi a tuah hnu hmanhah a kong kha ṭha deuh in a hngalh khawh nakhnga Jehovah sinah upatnak tein bawmhnak a rak hal. (Exodus 33:13 rel.) Jehovah sin bawmhnak a hal lioah Moses cu kum 80 leng a si cang nain vancung a Pa kong cu ka cawn zungzal a hau ti kha a hngalh.
13. Pathian he kan i pehtlaihnak kan sunsak ti kan langhter khawhnak lam pakhat cu zeidah a si?
13 Mah in zeidah kan cawn khawh? Jehovah kan biaknak cu zei can a si cang hmanhah Jehovah he kan i pehtlaihnak kha kan sunsak zungzal a hau. Pathian he kan i pehtlaihnak kan sunsak ti kan langhter khawhnak lam pakhat cu thlacamnak thawngin a si.
14. Jehovah kong cawnnak ah thlacamnak cu zeicah a biapit tuk?
14 Mi pakhat he hawikom ṭha si na duh ahcun amah he bia naa ruah lengmang a hau. Cucaah Pathian he hawikom ṭha si awkah a sinah thla cam lengmang law na ruahnak le na intuarnak kong chim kha ṭih hlah. (Efe. 6:18) Turkey ah a ummi Krista nih hitin a ti: “Thlacamnak in ka ruahnak kong kha ka phuan i a ka bawmhmi ka hmuh tikah Jehovah ka dawtnak le ka zumhnak cu a fek chin. Ka thlacamnak a ka lehmi ka hmuhmi nih Jehovah kha ka Pa le ka Hawi bantukin hmuh awkah a ka bawmh.”
Jehovah Lung a Tongmi Pa
15. Siangpahrang David kong he aa tlaiin Jehovah nih zeitindah a chim?
15 Siangpahrang David hrin a si lioah a nu le a pa i telin a pawngkammi hna cu Jehovah a biami lawngte an si. Asinain David nih Jehovah a biaknak a ruang cu a chungkhar nih Jehovah an biak caah a si lo. Amah theng nih Pathian he an i pehtlaihnak kha a fehter i Jehovah nih a dawt tuk. Jehovah theng nih David cu “ka duhmi phun a si” tiah a ti. (Lam. 13:22) David cu Jehovah he zeitindah an hun i naih chin?
16. David nih sermi thil a zohnak thawngin Jehovah kong zeidah a cawn?
16 Sermi thil in David nih Jehovah kong kha a cawn. A no lioah David nih a pa tuu pawl cawnghnak ah a caan tampi a rak hman. Mah Salm 19:1, 2) David nih minung ser an sinak kong a ruah tikah Jehovah cu zeitluk in dah a fim ti kha a hngalh. (Salm 139:14) David nih Jehovah thil sermi kong ṭha tein a ruah tikah Pathian he tahchunh ahcun zeihmanh a si lo kha a hngalh.—Salm 139:6.
lioah Jehovah sermi thil kong kha ṭha tein a hun ruah men lai. Tahchunhnak ah, David nih zan ah van a zoh tikah arfi tampi a hmuh lawng si loin a Sertu i a sining zong kha a hmuh. David nih hitin a ti: “Van nih khin Pathian sunparnak fiang tein a langhter i a tuahmi thil kha fiang tein a kan hmuhsak.” (17. Sermi thil kong kan ruah ahcun zeidah kan hngalh lai?
17 Mah in zeidah kan cawn khawh? Sermi thil cungah hngalh duhnak ngeih a hau. Jehovah nih a sermi aa dawh tukmi hi vawlei kong hngalh awkah a caan pe. Mah nih na khuaruah aan harter men lai. Nifatin na pawngkam ah a ummi thingkung, saram le minung ti bantuk sermi thil kong ṭha tein ruahnak nih Jehovah kong aan cawnpiak lai. Cutin na tuah ahcun nifate na dawtmi na Pa kong kha tam deuh in na hngalh khawh lai. (Rom 1:20) Mah tikah Pathian na dawtnak a feh chinmi kha na hmuh lai.
18. Salm 18 ah a langhter bantukin David nih zeidah a hngalh?
18 Jehovah nih a ka bawmh ti kha David nih a hngalh. Tahchunhnak ah, David nih a pa tuu pawl kha chiandeih le vom kut in a huhphenh hna lioah mah a ṭhawng tukmi saram pawl thah awkah Jehovah nih a ka bawmh ti kha a hngalh. Mi nganpi ralkap Goliath a tei lio zongah Jehovah nih a ka bawmh ti kha a hngalh. (1 Sam. 17:37) Cun nahchuah a hmangmi Siangpahrang Saul kut in a luat lio zongah Jehovah nih a ka khamh ti kha a hngalh. (Salm 18, biatlangpi) Aa porhlawmi a si ahcun David nih mah thil hna cu keimah tein ka tuah khawhmi a si tiah a ruah ko lai. Asinain David cu aa toidormi a si caah a nunnak cu Jehovah kut ah a um ti kha a hngalh.—Salm 138:6.
19. David kong in zeidah kan cawn khawh?
19 Mah in zeidah kan cawn khawh? Jehovah sinah bawmhnak hal lawngin a za lo. Zeitikah le zeitindah a kan bawmh ti zong kha hngalh kan i zuam a hau. Kan i toidor ahcun kanmah tein zei thil hmanh kan tuah kho lo ti le kan tuah khawh lomi thil tuah khawh awkah Jehovah nih a kan bawmh ti kha kan hngalhthiam lai. Cun Jehovah nih a kan bawmhmi kan hmuh tikah kan i pehtlaihnak cu a fek chin lai. Fiji ah kum tampi chung Jehovah rian a ṭuanmi unaupa Isaac nih mah cu a hmaan ti kha a hngalh. Hitin a ti: “Hnulei ka sining kong ka ruah ṭhan tikah Jehovah nih Baibal ka cawn hramthawk in nihin tiang a ka bawmh ti kha ka hngalh. Jehovah cu ka caah a um taktakmi a si.”
20. David le Pathian an i pehtlaihnak in zeidah kan cawn khawh?
20 David nih Jehovah sining kha aa zohchunh. Jehovah nih a sining i zohchunh kho dingin a kan ser. (Gen. 1:26) Jehovah sining kong tam deuh kan cawn ahcun Jehovah kha ṭha deuh in kan i zohchunh khawh lai. David nih vancung a Pa kong kha ṭha tein a hun hngalh. Cucaah midang he an i pehtlaih tikah Jehovah kha aa zohchunh khawh. Tahchunhnak pakhat in zohhmanh hna u sih. David nih Bath-sheba he nupa sualnak a tuah i a vapa a thah tikah Jehovah kha a ralchanh. (2 Sam. 11:1-4, 15) Asinain midang cungah zaangfahnak a langhtermi David cungah Jehovah nih zaangfahnak a rak langhter ve. David cu Jehovah he a ṭhami pehtlaihnak a ngeih caah Israel mi nih an dawt tukmi siangpahrang pakhat a hung si. Cun Jehovah nih a dang Israel mi siangpahrang pawl caah zohchunh awk ṭha pakhat in a rak hman.—1 Si. 15:11; 2 Si. 14:1-3.
21. Efesa 4:24 le 5:1 ningin Pathian kan i zohchunh tikah zei ṭhatnak dah a chuak?
21 Mah in zeidah kan cawn khawh? Pathian kha kan i zohchunh a hau. Cutin tuahnak nih kanmah theng ṭhatnak a kan hmuhter lawng si loin Pathian kong zong tam deuh in hngalh awkah a kan bawmh. Pathian sining kan i zohchunh tikah Pathian fa kan si ti kan langhtermi zong a si.—Efesa 4:24; 5:1 rel.
Jehovah Kong Tam Deuh In Hngalh Khawh Ning
22-23. Jehovah kong kan cawnmi ningin kan zulh ahcun zei ṭhatnak dah kan hmuh lai?
22 Kan hngalh cang bantukin sermi thil hna le a Bia, Baibal in Jehovah kong kha kan cawn khawh. Baibal ah Moses le David ti bantuk kan i zohchunh khawhmi hna zumhfekmi Pathian salle kong tampi a um. Jehovah nih a tuah dingmi cu a tuah dih cang. Cucaah kanmahlei in kan tuah dingmi kha kan tuah a hau i kan si khawh chungin Jehovah kong kha kan cawn a hau.
23 Jehovah kong cawn kha zeitikhmanh ah kan ngol awk a si lo. (Pct. 3:11) A biapimi cu zeitluk in dah Jehovah kan hngalh ti kha si loin kan hngalhmi ningin kan tuahmi tu kha a si. Kan cawnmi ningin kan zulh i dawtnak a ngeimi kan Pa kha kan i zohchunh ahcun Jehovah nih a kan naih zungzal lai. (Jeim 4:8) Pathian nih amah a kawlmi hna cu zeitikhmanh ah ka kaltak bal hna lai lo tiah Baibal ah bia a kan kamh.
HLA 80 Jehovah a Ṭhatzia kha Tep U
^ cat. 5 Mi tampi nih Pathian a um ti cu an zumh, asinain Pathian cu an hngal taktak lo. Jehovah hngalh timi cu zei sullam dah a si? Pathian he a ṭhami pehtlaihnak ngeih khawh ning kong he aa tlaiin Moses le Siangpahrang David sinin zeidah kan cawn khawh? Hi capar ah mah biahalnak a phi kha kan i ruah hna lai.