Naa Cinken Maw?
2019 Vennak Innsang ah hram aa bunhmi mah biahalnak hna hi na phi kho lai maw?
“Sermi hriamnam zeihmanh nih khan nangmah cu aan pem kho lai lo” timi Pathian biakam cu zei sullam dah a si? (Isa. 54:17)
Jehovah nih ‘mipuar mi hna dennak’ in a kan huhphenh lai ti kha kan zumh khawh. (Isa. 25:4, 5) Kan ral pawl nih harnak pek dingin an i zuamnak cu a hlawh a tling lai lo.—w19.01, cc. 6-7.
Pathian nih Kanaan mi le nawl a ngai lomi Israel mi pawl a pehtlaih hna ning nih a dinnak kha zeitindah a langhter?
Pathian nih fih a nungmi nupa sualnak a tuahmi asiloah nu le ngakchia a ding loin a pehtlaimi hna kha bia a ceih hna. Zumhawktlak tein a um i midang ding tein a pehtlaimi hna kha cu Jehovah nih thluachuah a pek hna.—w19.02, cc. 22-23.
Zumlotu pakhat nih thla a cam lioah kan um ve ahcun zeidah kan tuah awk a si?
Upatnak tein le dai tein kan um kho nain midang he kan kut kan i tlai lai lo asiloah “amen” zong kan pe lai lo. Kanmah tein a thli tein thla kan cam kho.—w19.03, ca. 31.
Ngakchia tlaihhremnak cu zeitluk in dah sualnak ngan a si?
Ngakchia tlaihhrem cu tlaihhrem a tongmi, Khrihfabu, cozah nawlngeitu hna le Pathian cungah sual a si. Ngakchia tlaihhremnak kong he aa tlaiin nawlngeitu hna sinah chim ding timi upadi a umnak hmunah Khrihfa upa hna nih upadi kha an zulh.—w19.05, cc. 9-10.
Na lungthin le na ruahnak kha zeitindah na thlen khawh?
A biapimi kehlan hna: Thlacamnak in Jehovah sinah biachim. Na kong kha ṭha tein ruat. Hawikom kha fimkhur tein i thim.—w19.06, ca. 11.
Hremnak caah atu in zeitindah kan i timhtuah khawh?
Jehovah he kan i pehtlaihnak kha kan fehter a hau. A kan dawt i a kan kaltak bal lai lo ti kha zum. Nifate in Baibal rel law thla cam zungzal. Pathian Pennak cu a ra taktak lai ti kha zum. Na duh bikmi Baibal caang le Jehovah thangṭhatnak hla kha baihat khawh i zuam.—w19.07, cc. 2-4.
Kan chungkhar mi pawl nih khamhnak an hmuh nakhnga bawmh awkah zeidah kan tuah khawh?
Zawnruahnak langhter, zohchunh awk ṭha chiah, lungsau tein um le fimkhur tein um cu a biapi tukmi a si.—w19.08, cc. 15-17.
Matthai 11:28 ah Jesuh nih bia a kan kamh bantukin zeitindah hrimhnak kan hmuh khawh?
Dawtnak a ngeimi hruaitu le a ṭha bikmi hawikom kan ngeih hna, cun a ṭha bikmi rian zong kan ngei.—w19.09, ca. 23.
Pathian nih zeitindah tuah duhnak lungthin le tuah khawhnak ṭhawnnak a kan pek? (Fil. 2:13)
Baibal kan rel i kan ruah tikah Pathian nih thazaang a kan ngeihter, cun a duhnak tuah duhnak lungthin le tuah khawhnak ṭhawnnak zong a kan pek. A thiang thlarau thawngin kan ngeihmi thiamnak hna kha a ṭhanchoter khawh.—w19.10, ca. 21.
A biapimi biakhiahnak kan tuah hlanah zei thil hna dah kan tuah awk a si?
Tuah dingmi thil panga: Ṭha tein hlathlainak tuah. Fimnak hmuh awkah thla cam. Bia na khiahnak a ruang kha ṭha tein dothlat. Cuset khaset tiin hmuitinh ngei. Thil sining taktak a hmu thiammi si.—w19.11, cc. 27-29.
A thi kho lomi thlarau zumhnak cu Satan nih Evi sinah a chimmi bia in aa thawkmi a si maw?
A si lo. Satan nih Evi kha na pum lawng a thi lai tiah a ti lo, na thi hrimhrim lai lo tiah a ti. Buanchukcho lioah a hmaan lomi cawnpiaknak vialte cu hrawh dih a rak si. A thi kho lomi thlarau zumhnak cu Babel innsang a sami pawl Pathian nih a ṭhek dih hna hlan ah a chuakmi a si men lai.—w19.12, ca. 15.