Careltu Hna Sinin Biahalnak
Satan nih Evi kha a ṭha le a ṭhalo hngalhnak pe khotu thingkung a thei na ei ahcun na thi lai lo tiah a ti tikah tuchan ah a laar ngaimi a thi kho lomi thlarau a um tiah a ti duhnak a si maw?
A si lo. Khuachia nih Evi kha thlauhmi thingthei na ei ahcun na pum cu a thi lai nain na thlarau cu kaa khatkhat ah a nung peng lai tiah a ti lo. Satan nih rul hmangin a chawnh lioah Evi kha thingthei na ei ahcun ‘na thi hrimhrim lai lo’ tiah a ti. Mah cu zungzal in a nung peng lai, vawlei ah a nuam deuhmi nunnak le Pathian i bochan a hau lomi nunnak a hmu lai tiah a ti duhnak a si.—Gen. 2:17; 3:3-5.
A hmaan lomi cawnpiaknak a simi a thi kho lomi thlarau zumhnak cu Eden dum in aa thawkmi a si lo ahcun zeitik in dah aa thawk? Fiang tein cu kan chim kho lo. Noah chan i buanchukcho lioah a hmaan lomi biaknak vialte cu hrawh dih an si ti kha kan hngalh. Mah lioah a luatmi cu zumhfekmi Noah le a chungkhar lawng an si caah zeibantuk a hmaan lomi cawnpiaknak hmanh a um lo.
Cucaah minung nih a thi kho lomi thlarau kan ngei timi cawnpiaknak cu buanchukcho hnu in aa thawkmi a si. Pathian nih Babel ah an holh a danter i “vawleicung khuazakip ah” a ṭhek dih hna lioah minung nih a thi kho lomi thlarau kan ngei timi zumhnak kha an karhtermi a si ti cu a fiang ko. (Gen. 11:8, 9) A thi kho lomi thlarau zumhnak cu zeitik lio in aa thawkmi a si hmanhah mah zumhnak hnulei ah “lih vialte pa” a simi Satan Khuachia a um i mah zumhnak a karhmi a hmuh tikah aa nuam tuk lai ti kha kan zumh khawh.—Johan 8:44.