Deuteronomi 22:25-27 nih nu cu sualnak a ngei lo ti kha a langhter duhmi a si. Pa cu sualnak a ngeimi in hmuh a si cang caah pa a sualnak kong kha a bikin a langhternak duhmi a si lo. A cungtang bia kha zoh.

A hmasa cacaang ah hammi ngaknu he “khua chungah” nupa sualnak a tuahmi pa pakhat kong kha a chim. Hammi nu cu aa ṭhium cangmi in hmuh a si caah pa cu sualnak a ngei. Nu kong ah tah zeitin? “Khua chungah a um nain bawmhnak hmuh awkah a au lo.” A au ahcun midang nih an theih lai i an bawmh lai. Asinain a au lo caah anih cu vacung in pa aa duhmi a si. Cucaah an pahnih ningin sualnak a ngeimi in biaceih an si lai.—Deut. 22:23, 24.

A dang thil sining pakhat ah Nawlbia nih hitin a langhter: “Sihmanhselaw, ramlak ah mipa pakhat nih hammi ngaknu pakhat cu a ton i mipa nih cun a tlaih i a ihpi ahcun, a ihpitu mipa lawng kha a thi lai. Ngaknu cungah cun zeihmanh nan tuah lai lo; ngaknu cungah cun thihnak in dantat awk tlak sualnak a um lo, zeitintiah hi kong cu mipa pakhat nih a innpa kha a tuk i a nawn bantuk a si; zeicahtiah ramlak ah a va pauh caah hammi ngaknu nih bawmhnak duh ah a au nain a chanhtu ahohmanh an um lo.”—Deut. 22:25-27.

Mah thil sining ah biaceihtu pawl nih nu cu “bawmhnak duh ah a au nain a chanhtu ahohmanh an um lo” tiah an zumh. Cucaah nu cu sualnak a ngei lo. Asinain pa nih hammi ngaknu kha “a tlaih i a ihpi” caah anih cu tlaihhremtu le a zuangzammi in sualnak a ngei.

Cucaah mah nawlbia nih nu cu sualnak a ngei lomi a si ti le pa cu tlaihhremtu le a zuangzammi in sualnak a ngei ti kha fiang tein a langhter. Biaceihtu pawl nih ‘fel tein an hlat lai’ i Pathian nih fiang tein atu le atu a langhtermi phunglam cungah i hngat in biakhiahnak an tuah lai ti kha kan zumh khawh.—Deut. 13:14; 17:4; Ex. 20:14.