NANGMAHLE nangmah kha lawmh a hngalmi in naa hmu maw? Mah biahalnak kha kan dihlak in kan ruah a herh. Kan chan he aa tlaiin Baibal nih mi tampi cu “lawmh a hngal lomi” an si lai tiah a chimchung. (2 Tim. 3:2) Midang sinin pakhatkhat tuahpiak dingin le pek dingin aa ruahchanmi pawl kha na hmuh bal ko hna lai. Annih nih an hmuhmi thil caah lunglawmhnak langhter a hau lo tiah an ruah men lai. Cu bantuk mi hna pawngah um cu a nuam lo ti kha na hna a tla ve ko lai.

Mah he i ralkah in Pathian salle cu “lunglawmhnak in khat u” tiah forh an si. ‘Zeibantuk thil kan ton hmanhah lunglawm tein kan um.’ (Kol. 3:15; 1 Thes. 5:18) Kan caah lunglawmhnak langhter a ṭhatnak a ruang tampi a um.

Lunglawmhnak langhter a biapitnak a ruang pakhat cu mah nih kanmahle kanmah a ṭhatnak in a kan hmuhter caah a si. Mi pakhat nih thil pakhatkhat caah lawmhnak bia a chim tikah amah zong aa nuam i a chimhmi zong aa nuam ve. Lunglawmhnak langhternak nih midang he, kanmah he zeicah a kan nuamhter? Tahchunhnak ah, mi pakhatkhat nih naa tlak tiah an in ruah caah thil pakhat kha lungtho tein an in tuahpiak hei ti u sih. Mah cu an in siaherh caah a si. Mah kha na hngalh tikah naa nuam tuk. Ruth sining zong kha kan mitthlam ah kan cuanter khawh. Boaz nih Ruth cungah siannak a rak langhter. Mah kha a hngalh tikah Ruth cu aa nuam tuk lai.—Ruth 2:10-13.

A hleiin Pathian cungah lunglawmhnak langhter cu aa tlakmi a si. Pathian nih thlaraulei he, pumsalei he laksawng tampi aan pek zungzalmi kong kha na ruah tawn ko lai. (Deut. 8:17, 18; Lam. 14:17) Asinain Pathian ṭhatnak kong kha caan tawite lawng ruah canah na dawtmi hna i telin Pathian nih thluachuah aan pekmi hna kong kha ṭha tein ruah awkah a caan pe. Sertu i a siannak kong ṭha tein ruahnak nih amah kha sunsak chin awkah aan bawmh lai. Cun amah zong nih zeitluk in dah an dawt i an sunsak ti kha hngalh chin awkah aan bawmh lai.—1 Johan 4:9.

Jehovah nih a kan pekmi kong kha kan ruah awk a si. Cun a ṭhatnak ca zongah kan i lawmhnak kha kan langhter awk a si. (Salm 100:4, 5) “Midang cungah lunglawmhnak langhternak nih mi kha a lawmhter hna” tiah an chim tawn.

Lunglawmhnak langhter a ṭhatnak a dang a ruang pakhat cu mah nih hawikomhnak a fehter chin caah a si. Kan dihlak in sunsakmi kan si timi ruahnak kan ngeih a hau. A ṭhami an tuahsernak ruangah midang cungah lungtak tein lunglawmhnak na langhter tikah pakhat le pakhat nan hun i naih chin lai. (Rom 16:3, 4) Mah lengah lunglawmhnak a langhtermi hna nih midang kha tam deuh an bawmh khawh hna. Midang nih an cungah zaangfahnak an langhtermi an hmuh tikah midang cungah zaangfahnak langhter ve awkah mah nih a forh hna. Midang bawmhnak nih lunglawmhnak a chuahter. Jesuh nih hitin a ti: “Peklei ah hin hmuhlei nakin lunglawmhnak a um deuh.”—Lam. 20:35.

California Sianghleiruun ah director bawmtu a simi Robert Emmons nih lunglawmhnak kong kha a hlathlai i hitin a ti: “Lunglawmhnak langhter khawhnak cu pakhat le pakhat cungah aa hngatmi a si ti kha kan hngalhthiam a hau. Midang kan pek hna caan a um i an sinin kan hmuh caan zong a um.” Kan nunnak le kan i nuamhnak  cu lam tampi in midang nih a kan bawmhnak cungah aa hngat. Tahchunhnak ah, eidin an kan pek men lai asiloah siithlopnak caah an kan bawmh men lai. (1 Kor. 12:21) Lawmh a hngalmi nih cun midang nih a caah an tuahmi kha a sunsak. Nangtah midang nih na caah an tuahmi cungah lunglawmhnak langhter kha na zia ah na canter maw?

Lunglawmhnak langhter a ṭhatnak a dang a ruang pakhat cu a chiatnaklei in si loin a ṭhatnaklei in hmuhnak ngeih awkah aan bawmh caah a si. Na ruahnak cu fingrilh bantuk a si. A ṭhami kha an lakter i a ṭhalomi kha an hlonhter. Lawmh a hngalmi nih cun buaibainak ah lungthin pe loin ṭhatnak tu ah lungthin a pek. Lunglawmhnak na langhter deuh tikah ṭhatnak tam deuh na hmu lai, mah nih lunglawmhnak langhter chin awkah an forh lai. Lunglawmhnak na langhter khawhmi thil kha lungthin na pek ahcun lamkaltu Paul nih a kan forhmi ningin na tuah khawh lai. Hitin a ti: “Bawipa chung i nan nunnak ah khan i lawm zungzal ko u.”—Fil. 4:4.

I lawmh zungzalnak nih a chiatnaklei in hmuhnak ngeih lo awkah aan bawmh lai. Caankhat te ah nahchuahnak, ngaihchiatnak asiloah thinhunnak hna zong kan ngeih khawh caah i lawmh cu a har tukmi a si. Lawmh a hngalmi nih cun thilri chawva kha biapi ah an chia lo. An ngeihmi thil cungah lungsinak an ngei i tam deuh ngeih awk zongah an i zuam lo.—Fil. 4:12.

Satan nih hi donghnak caan i na tonmi harnak hna ruangah na ngaihchia sehlaw na lungdong seh ti aan duhmi kha na hngalh. A ṭha lomi lungput na ngeihmi le zei kong paohah na phunzaimi kha Satan nih a duh. Cu bantuk mi na si ahcun thawngṭha na chim tikah mi nih ngaih awkah an i harh lai. Lawmhnak le Pathian thlarau nih a chuahtermi ziaza cu aa pehtlaimi a si. Tahchunhnak ah, Pathian nih a kan pekmi thil kha kan hmuh ca le hmailei a biakam kan zumh caah kan i nuam.—Gal. 5:22, 23.

Jehovah Tehte pakhat in hi capar ah a chimmi lunglawmhnak kong hi na cohlan ve ko lai. I lawmh le a ṭhatnaklei in hmuhnak ngeih zungzal cu a fawi lo ti kha na hngalh. Asinain na lung dong hlah. Lunglawmhnak lungput na ngei kho peng i na kilven khawh. Zeitin in dah? Nifatin na nunnak ah naa lawmh khawhnak thil cheukhat kong ruah awkah a caan pe. Cutin na tuah deuhdeuh tikah lawmhnak lungput na ngei deuhdeuh ve lai. Mah nih harnak biapi ah a chiami hna nakin aan nuamhter deuh lai. Pathian le midang nih an tuahmi, thazaang a pemi thil ṭha kong hna kha ruat, mah nih aan nuamhter lai. Mah kong hna kha na ṭial khawh. Cun nifatin na lung an lawmhtermi thil pahnih asiloah pathum kong zong kha na ṭial khawh.

Hlathlaitu hna nih “midang cungah lunglawmhnak kan langhter lengmang tikah kan nunnak ah kan i nuamh deuh nakhnga kan thluak rianṭuan ning kha mah nih a thlen khawh” tiah an ti. Lawmh a hngalmi cu aa nuammi an si. Cucaah na hmuhmi ṭhatnak kong hna kha ruat, na tonmi thil ṭha cungah i lawm law lunglawmhnak kha langhter zungzal. Na hmuhmi thil ṭha ca lawngah si loin ‘BAWIPA kha lawm, zeitintiah amah cu a ṭha.’ “Zeibantuk thil nan ton hmanhah lunglawm in um u.”—1 Chan. 16:34; 1 Thes. 5:18.