Asinain Jehovah nih ri a khiahmi caan tiang lungsau tein hngak hna seh ti a kan duh. Zeicah cutin hngahter a kan duh? Kan hngah lioah i nuamh ding in zeinihdah a kan bawmh khawh?

Jehovah Nih Zeicah Hngahter A Kan Duh?

Baibal nih hitin a ti: “Nan cung ah a velngeihnak langhter duh ah BAWIPA nih aan hngah ko hna. Amah nih cun a dingmi thil kha a tuah zungzal caah nanmah zaangfah awk kha aa tim ko. Lunglawmhnak hi BAWIPA i bochannak chung in a chuakmi a si.” (Isa. 30:18) Isaiah nih a lung a khongmi Judah mi hna kha a chim duhmi hna a si. (Isa. 30:1) Asinain an lakah zumhfek tein a ummi Judah mi an um i mah bia nih ruahchannak a ngeihter hna. Mah bia nih tuchan i zumhfek tein a ummi Jehovah salle zong ruahchannak a ngeihter hna.

Jehovah nih lungsau tein a hngah caah kannih zong lungsau tein kan hngah ve a hau. Hi chan ṭha lo a donghter lai caan kha ri a khiah cang i mah ni le mah caan a phanh lai caan kha a hngah. (Matt. 24:36) Mah caan a phanh tikah Satan nih Jehovah le amah a biami hna an palh tiah sual a puhmi hna cu fiang tein a hung lang lai. Pathian nih Satan le a lei ah a ṭangmi hna kha a hrawh hna lai, asinain kan cung ah cun “zaangfahnak” a langhter lai.

Atu lioah Jehovah nih kan tonmi harnak kha a kan hlohpiak men lai lo. Asinain mah caan kan hngah lioah nuamhnak nan hmu kho tiah bia a kan kamh. Isaiah nih a chim bantuk in thil ṭha pakhatkhat a can lai kan hngah lioah kan i nuam kho. (Isa. 30:18) a Mah nuamhnak kha zeitindah kan hmuh khawh? A kong pali nih a kan bawmh khawh.

Kan Hngah Lioah I Nuamh Khawh Ning

Thil ṭha cung ah lungthin pe. Siangpahrang David nih a nunchung ah thil ṭhalo tampi a hmuh. (Salm 37:35) Asinain hitin a ti: “BAWIPA hmai ah cun dai tein um ko law zeidah a tuah lai ti kha lungsau in hngak ko; thil ṭha lo an i tinhmi a tuah kho lengmangmi hna le an rianṭuannak ah a hlawh a tlingmi hna kong ah zei poi loin va um ko.” (Salm 37:7) David nih khamhnak ruahchannak cung ah lungthin a peknak thawng in mah ruahnak cheuhnak  kha a zulh. Cun Jehovah nih a tuahpiakmi thil ṭha dihlak cung zong ah aa lawm tuk. (Salm 40:5) Kannih zong thil ṭha lo cung ah si loin thil ṭha cung ah lungthin kan pek ahcun Jehovah hngah kha kan i fawih deuh lai.

Caanṭha na hmuh fatin Jehovah kha thangṭhat. Salm 71 a ṭialtu David nih Jehovah kha hitin a ti: “Chun nitlak in na dinnak kha ka chim lai, zeicahtiah harnak pek a ka duhmi kha an sung cang i ningzahnak an phan cang.” (Salm 71:14) David nih Jehovah kha zeitindah a thangṭhat? Midang sinah Jehovah kong kha a chimh hna i Pathian thangṭhatnak hla kha a sak. (Salm 71:16, 23) Kannih zong David bantuk in Jehovah kan hngah lioah kan i nuam kho. Phung kan chimnak thawng in, kan chungkhar le kan hawile sinah Pathian kong kan chimh hnanak thawng in le hla kan saknak thawng in Jehovah kha kan thangṭhat khawh. A hnu i Pennak hla na sak tikah a biafang le mah nih zeitindah thazaang aan pek ti kha ṭha tein ruat.

Unau pawl sin in thazaang i lak. David nih zuamcawhnak a ton lioah Jehovah sinah hitin a ti: “Na mi hna lakah nangmah ṭhatnak kha ka chim zungzal lai.” (Salm 52:9) Kannih zong unau pawl sinin thazaang kan i lak khawh, pumhnak le phungchim vahnak lawng ah si loin i hawikomhnak zong in thazaang kan hmu kho.—Rom 1:11, 12.

Naa ruahchannak kha fehter. Salm 62:5 ah hitin a ti: “Pathian lawnglawng kha kaa bochan, amah lawnglawng kha kaa ruahchan.” A hleiin kan i ruahchanmi caan ah donghnak a phanh lo tikah kan i ruahchannak fehter cu a biapi tukmi a si. Zei can hngah a hauh hmanh ah Jehovah biakam cu a tling hrimhrim lai ti kha kan zumh khawh. Baibal kan hlathlainak thawng in kan i ruahchannak kha kan fehter khawh. Tahchunhnak ah, a tling cangmi Baibal chimchungbia kong, Baibal ṭialtu cu an i lo hna lo nain an ṭialmi aa ralkah lonak kong le Jehovah nih a kong a phuan ning a dikthliar kong hna kha ruat. (Salm 1:2, 3) Cun Jehovah nih a kan kamhmi zungzal nunnak biakam kan hngah lioah Pathian he pehtlaihnak ṭha kan ngeih peng nakhnga “thiang thlarau ṭhawnnak” kha kan hal peng zong a hau.—Judas 20, 21.

Siangpahrang David bantuk in Jehovah nih amah a hngakmi hna kha a zohkhenh hna i an cung ah a fekmi dawtnak a langhter ti kha kan zumh khawh. (Salm 33:18, 22) Thil ṭha cung ah lungthin na peknak thawng in, Pathian na thangṭhatnak thawng in, unau pawl sinin thazaang naa laknak thawng in le naa ruahchannak na fehternak thawng in Jehovah kha lungsau tein hngak peng.