BAIBAL ah ‘kanmah bantuk minung a si vemi’ zumhfekmi pa pawl intuarnak kong kha kan hmuh. (Jeim 5:17) Tahchunhnak ah, Rom 7:21-24 ah langhtermi bia a chim tikah Paul nih zeidah a chim duhmi a si ti kha fawi tein kan hngalh khawh. Hitin a ti: “Thil umtuning cu hi ti hin a si ti kha ka hngalh, a ṭhami thil tuah ka duh tikah khan kaa thim khawh mi cu ṭhatlonak lawng kha a si ko. . .  Mi lungrethei ka va si dah.” Cu bantuk intuarnak nih kan tlinlonak kan doh tikah zumhnak ngeih dingin a kan bawmh lai.

Paul nih a dang a intuarnak kong zong a langhter. Hitin a ti: “A ka daw i ka ca i a nunnak a pemi Pathian Fapa . . . thawngin ka nung.” (Galati 2:20) Paul nih mah kha a zumh. Nangtah cu bantuk intuarnak na ngei ve maw? A zungzal cun a si men lai lo.

Hlan ah kan rak tuahmi sualnak ruangah kaa tlak lo timi ruahnak kan ngeih ahcun Jehovah nih a kan dawt i a kan ngaihthiam ti kha kan zum men lai lo, cun Jesuh tlanhnak man kha pumpak laksawng in hmuh awk zong ah kan i harh tuk kho. Jesuh nih tlanhnak man kha laksawng in hmuhter a kan duh taktak maw? Cu a si ah cutin hmuh awkah zeinihdah a kan bawmh khawh? Mah biahalnak pahnih kha i ruah hna u sih.

Jesuh nih tlanhnak man kha pumpak laksawng in hmu hna seh ti a kan duh. Mah kha zeitindah kan zumh khawh? Luka 23:39-43 ah aa ṭialmi kong hi na mitthlam ah cuanter hmanh. Pa pakhat cu Jesuh pawng i tung cungah thlai a si. Hlan i a rak tuahmi palhnak ruangah ka sual ti kha a cohlan. A ṭha lo tukmi thil a tuahmi misual lawnglawng kha tung cungah an thlai hna caah mah sualnak cu a nganmi a si a hau. Mah pa cu a lungre a thei tuk i Jesuh kha “Siangpahrang in na rat tikah ka philh te hlah” tiah a nawl.

Jesuh nih zeitindah a lehrulh? Jesuh cu mah misualpa lei a hun i mer tikah zeitluk in dah a fah lai khi na mitthlam ah cuanter hmanh. A fak tuk ko nain Jesuh cu a ni i mi pa kha a hnemh. Hitin a ti: “Mah hihi kan chimh nihin ah, Paradis ah keimah sinah na um lai.” Jesuh nih mi pa kha ‘Mi Fapa cu mi tampi ca i a nunnak pek awkah’ a rat kha a hngalhter. (Matt. 20:28) Asinain Jesuh nih tlanhnak man cu mah pa he zong aa pehtlai ti kha nem tein a chimh. “Keimah” le “na” timi biafang hna a hmanmi nih hawikom bantukin a pehtlaih ti kha a langhter. Cun mi pa kha vawlei paradis ah na um lai tiah a ti.

Mah pa nih tlanhnak man kha pumpak laksawng in cohlang seh ti kha Jesuh nih a duh ti cu a fiang ko. Jesuh nih Pathian biak awkah caanṭha a hmu lomi misualpa cung hmanhah cu bantukin a intuar ahcun Pathian a bia i tipil a ing cangmi hna cung ahcun cu bantukin a intuar hrimhrim lai. Hlan ah sualnak kan rak tuah hmanhah Khrih tlanhnak man nih kanmah pumpak theng ṭhatnak a kan pek lai ti kha zumh awkah zeinihdah a kan bawmh khawh?

Paul nih Jesuh tlanhnak man a hmuhning cu a phungchimnak cungah huham a ngei. Zeitin in dah? Hitin a ti: “Ka rianṭuannak ah thazaang a ka petu kan Bawipa Khrih Jesuh cu ka lawmh. Amah rian ṭuantu ah ser awk tlak i a ka ruah caah a cungah kaa lawm. Hlan ah cun ka rak thangchiat i ka rak hrem i ka rak serhsat.” (1 Tim. 1:12-14) Paul cu Jesuh nih a dawt, a zaangfah i a zumh ti kha Paul hmuhmi rian nih a langhter. Jesuh nih pakhat cio kha thawngṭha chim awkah rian a kan pek. (Matt. 28:19, 20) Phungchimnak rian nih Jesuh cu kanmah ca zongah a thi ve ti kha hngalhthiam awkah a kan bawm maw?

Buchung chuah a si in kum 34 dengmang hnuah Jehovah sinah a kir ṭhanmi Albert nih hitin a ti: “Ka sualnak kha ka philh kho lo. Asinain phungchim ka kal tikah lamkaltu Paul bantukin Jesuh nih phungchim rian kha keimah theng a ka pek tiah ka ruah. Mah nih a ka nuamhter deuh i keimah pumpak kong ah siseh, ka nunnak le hmailei kong he aa tlaiin siseh a ṭhami hmuhnak a ka ngeihter deuh.”—Salm 51:3.

Biatak a cawn hlanah sualnak tampi a tuah i a puarhrang tukmi Allan nih hitin a ti: “Mi cungah ka tuahmi harnak hna kha ka ruat peng. A caan ah mah nih ka ngaih a ka chiahter. Asinain Jehovah nih midang sinah thawngṭha chim dingin a ka awnh caah kaa lawm tuk. Mi nih thawngṭha an lehrulhmi ka hmuh tikah mah nih Jehovah cu zeitluk in dah a ṭhat i dawtnak a ngeih ti kha a ka hngalhter ṭhan. Keimah bantukin hnulei sining a ngeimi hna bawmh awkah a ka hman tiah ka ruah.”

Phungchim kan kal tikah a ṭhami thil kha kan tuah i kan ruah. Jesuh nih a kan zaangfah, a kan dawt i a kan zumh ti kha mah nih a langhter.

Satan vawlei hrawh a si hlan tiang hlan i kan rak tuahmi sualnak ruangah kan ngaih a chia peng men lai. Cu bantuk intuarnak kha doh khawh awkah zeinihdah a kan bawmh lai?

A no lioah nunning pahnih in a nun caah sualnak ka ngei tiah a ruat lengmangmi Jean nih “‘Pathian cu kan lung nakin a ngan deuh’ caah ka duh tuk” tiah a ti. (1 Johan 3:19, 20) Kannih zong kan sualnak he aa tlaiin Jehovah le Jesuh nih kanmah nakin an hngalhthiam deuh timi hngalhnak nih hnemhnak a kan pek. A tlingmi minung caah si loin a sualnak aa ngaichihmi hna caah dawtnak he tlanhnak man a kan pek ti kha i cinken.—1 Tim. 1:15.

Jesuh nih mitlinglo a simi minung a pehtlaih hnaning kan ruah tik le a kan pekmi phungchim rian ah kan si khawh chungin kan i tel tikah tlanhnak man cu kanmah pumpak caah a si ve ti kha kan hun zumh. Cutin na tuah ahcun Paul bantukin na chim khawh ve lai: “A ka daw i ka ca i a nunnak a pemi Pathian Fapa . . . thawngin ka nung.”