Careltu Hna Sinin Biahalnak
Jehovah Tehte Hna nih website hmangin innchunghawi kawlnak kha zeitindah an hmuh?
Jehovah nih aa ṭhiummi mi pahnih kha i nuam hna sehlaw pakhat le pakhat a fekmi pehtlaihnak ngei zungzal hna seh ti a duh. (Matt. 19:4-6) Nang zong nupi, va ngeih aa timmi na si ahcun a ṭhami innchunghawi zeitindah na hmuh khawh? Jehovah cu a kan Sertu a si caah a nuammi innchungkhar ngeih khawh awkah zeidah kan tuah a hau ti kha a hngalh. Cucaah a kan pekmi phunglam kha na zulh ahcun a ṭhami a phichuak kha na hmuh lai. Mah phunglam cheukhat kong kha zohhmanh hna u sih.
Pakhatnak, kan kong he aa tlaiin mah hi kan hngalhthiam a hau: “Lungthin hi zeizong vialte nakin a zer bik.” (Jer. 17:9) Ṭhitum dingin aa timmi mi pahnih cu an i hmu, an i helh i pakhat le pakhat an i duh tuk tikah an caah a ṭhami biakhiahnak tuah cu a har kho men. Mi cheukhat nih an intuarnak kha biapi ah an chiah caah i ṭhitum dingin biakhiahnak an tuah i a hnuah lungretheihnak an tong. (Ptb. 28:26) Cucaah pakhat le pakhat an intuarnak kong taktak an i chimh lomi asiloah pakhat le pakhat an i hngalh taktak hlanah biakamnak an tuahmi cu hruh a si.
Phungthlukbia 22:3 ah hitin a ti: “Mifim nih cun harnak a rat kha a hmuh tikah hrial khawhnak aa zuam, sihmanhsehlaw mihrut nih cun a pahchih thluahmah ko i a hnuah aa ngaichih.” Website hmangin innchunghawi kawl cu zeicah ṭih a nun khawh? Ngaihchiat awk ngai a simi cu mi cheukhat cu an theih bal lomi hna he Internet in an i kom, an i duh i a hnuah an hlenmi hna kha an hngalh tawn. Cun a dingfel lomi mi hna nih mindang in account an i tuah i sualnak a ngei lomi hna kha tangka zong an hlen hna. A caan ah mah a dingfel lomi hna nih Jehovah Tehte kan si tiah an ti.
A dang ṭih a nunnak kong zong ruathmanh. Mi a pehtonhmi bu cheukhat nih dingrep asiloah tuak ning hna kha hmangin aho le ahodah an i tlak lai ti kha bia an khiah. Asinain cu bantuk lam cu a hlawh a tling ti a langhtertu thil a um lo. A ṭhami innchunghawi hmuh a duhmi hna nih mah a biapimi thil cheukhat kong he aa tlaiin biakhiahnak an tuah tikah minung nih an sermi computer program i bochan cu fim a si lai maw? Computer program cu Baibal phunglam bantukin zumh awk a tlak lai maw?—Ptb. 1:7; 3:5-7.
Phunglam pakhat kong he aa tlaiin Phungthlukbia 14:15 ah hitin a ti: “Mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭha tein a zoh.” Cucaah ahodah a ṭhami innchunghawi a si lai timi kong he aa tlaiin biakhiahnak na tuah hlanah amah kha ṭha tein na hngalh hmasa a hau. Asinain Internet in nan i hngalhmi mi pakhat kong ṭha tein hngalh ti a fawi lo. Pakhat le pakhat nan kong nan i chim i caan saupi bia nan i ruah hmanhah amah kha ṭha tein ka hngalh tiah na ti kho lai maw? Dawtnak taktak ka hmuh cang tiah a ruatmi cheukhat nih pakhat le pakhat an i ton tikah an hngalhmi thil nih an khuaruah a harter tawn hna.
Salm caṭialtu pa nih hitin a ti: “Hlen hmangmi kha ka kom hna lo i mi hrokhrol zong kha ka kom hna lo.” (Salm 26:4) Mi tampi nih Internet chungah a taktak nakin aa dawh deuhmi an hmanthlak an taarmi cu a phung a si ko tiah an ruah. A ṭhalomi an ziaza kha an thuh asiloah Internet in pakhat le pakhat ca an i kuat tikah a ṭha lomi an ziaza kha an langhter lo. Mah biahalnak kong ruah hi a biapi tukmi a si: Mi cheukhat nih Jehovah Tehte kan si tiah an ti hmanhah annih cu tipil a ing cangmi an si taktak maw? Annih cu thlaraulei ah nutling, patling an si maw? Jehovah he a ṭhami pehtlaihnak tah an ngei maw? Khrihfabu tah an upat maw? Asiloah anih cu a ṭhalomi thil a tuahmi asiloah “hawi ṭhalo” tah an si maw? (1 Kor. 15:33; 2 Tim. 2:20, 21) Baibal phunglam ningin aa ṭhitummi an si maw? Mah biahalnak hna i a phi kha na hngalh a hau. Asinain amah ṭha tein a hngalmi a dang Jehovah Tehte Hna he bia nan i ruah lo ahcun a kong cu na hngal kho lai lo. (Ptb. 15:22) Cun zumhfekmi Jehovah sal pakhat nih cun zumlotu he “i fon cetcut tuk in” um cu a duh lai lo ti cu a fiang ko.—2 Kor. 6:14; 1 Kor. 7:39.
Innchunghawi kawlnak caah website hman cu ṭih a nun caah na innchunghawi a si dingmi kong ṭha tein hngalh khawh ning lam kawl cu a a ṭha tukmi a si. Cu a si ah a ṭhami innchunghawi cu khoika ah dah na hmuh khawh? Khrihfabu pumhnak, peng civui le pengkomh civui ti bantuk pakhat le pakhat kan i ton hna caan ah pakhat le pakhat kan kong kha ṭha deuh in i theihhngalh awkah kan tuah khawh.
Hmunkhat ah caan nan hmanṭi tikah nan hmuitinh le nan sunsakmi thil aa khahmi kha fiang deuh in na hngalh lai
COVID-19 pul rai chung ti bantuk caan chungah zapi pumhnak hna cu tuah khawh a si lo caah ectronic thilri hmangin Khrihfabu pumhnak hna kha tuah a si. Mah nih innchunghawi a ngei rih lomi Jehovah Tehte Hna he ṭha deuh in i hngalh awkah caan ṭha a kan hmuhter. Pumhnak ah phung an chimmi le a phi an pekmi in an zumhnak kha na hngalh khawh. (1 Tim. 6:11, 12) Cun pumh a dih hnuah pakhat le pakhat zong bia nan i ruah kho. Jehovah Tehte Hna he a phu in tuahmi hawikomhnak nan tuah chungah na tlaihchanmi nu asiloah pa nih midang a pehtlaih hna ning kha na hmuh khawh. Cuticun mah mipa asiloah mah minu ziaza hna kha ṭhe deuh in na hngalh khawh. (1 Pet. 3:4) Mah lengah pakhat le pakhat nan i theihhngalh deuh tikah nan hmuitinh aa khahmi kha na hmuh ahcun nan pahnih caah a ṭhami innchunghawi nan si kho.
Cucaah innchunghawi a ngei rih lomi hna nih innchunghawi kawlnak caah Baibal phunglam kha an zulh ahcun an innchungkhar cu a nuam deuh lai. Hi bantuk hi an si lai: “Nupi aa hmuhmi cu thil ṭha aa hmuhmi a si, BAWIPA cu na cungah a ṭha ti kha a langhter.”—Ptb. 18:22.