A ummi cazin ah kal

A ummi cazin ah kal

CAWN AWK CAPAR 28

Pakhat Le Pakhat I Zuamnak Kha Hrial Law Daihnak Kha Karhter

Pakhat Le Pakhat I Zuamnak Kha Hrial Law Daihnak Kha Karhter

“Mah zawnlawng ruahnak, pakhat le pakhat i zuamnak, pakhat le pakhat i nahchuahnak ngei hlah u sih.”—GAL. 5:26, NW.

HLA 101 Lungrual Tein Ṭuanṭinak

LANGHTERNAK *

1. Pakhat le pakhat i zuam duhnak lungput ruangah mi nih zeidah an tuah?

TUCHAN ah mi tampi cu pakhat le pakhat i zuam duhnak lungput an ngei. Tahchunhnak ah, chawlettu pawl nih a dang chawlettu pawl nakin an hlawh a tlin deuh nakhnga an i zuam men lai. Zaanglente aa celhmi hna nih teinak an hmuh nakhnga a dang zaanglente aa celhmi phu hna kha hma an put nakhnga hramhram in an i zuam. Siangngakchia pawl nih mark tampi an hmuh nakhnga caminpuai an phit tikah ca an i fir hna. Khrihfa hna nih cun mah bantuk thil tuah cu a palh i a ṭha lomi “sining” a si ti kha an hngalh. (Gal. 5:19-21) Asinain Khrihfabu ah kan i hngalh loin pakhat le pakhat i zuam duhnak lungput a um nakhnga kan tuah sual kho maw? Mah nih Khrihfabu lungrualnak kha a hnorsuan khawh caah mah cu a biapi tukmi biahalnak a si.

2. Hi capar ah zei kong dah kan i ruah hna lai?

2 Hi capar ah pakhat le pakhat i zuam duhnak lungput a ngeihter khomi thil kong kha kan i ruah hna lai. Cun pakhat le pakhat i zuam duhnak lungput a ngei lomi hlanlio zumhfekmi Jehovah salle pawl kong zong kan i ruah hna lai. A hmasa bik ah kan lungput kan i dothlat khawh ning kong kha i ruah hna u sih.

Na Lungthin Kha I Dothlat

3. Kanmahle kanmah zei biahalnak dah kan i hal awk a si?

3 Atu le atu kan lungthin i dothlat cu a ṭhami a si. Kanmahle kanmah hitin kan i hal awk a si: ‘Midang he i tahchunh hnu lawngah keimahle keimah a ṭha deuhmi ka si tiah kaa ruat maw? Ka tuahmi thil paohah a thiam bikmi in ka hmu hna seh ti duh ah a tuahmi ka si maw? Unau dang nakin a ṭha deuhmi in ka hmu hna seh timi lungput he ka ṭuan maw? Asiloah Jehovah lunglawmhter ka duh caah fakpi in rian aa zuammi ka si maw?’ Zeicah cutin kan i hal awk a si? Baibal chimmi hi i cinken.

4. Galati 6:3, 4 ningin midang he i tahchunh kha zeicah kan hrial awk a si?

4 Baibal nih midang he kan i tahchunh awk a si lo tiah a kan ti. (Galati 6:3, 4 rel.) Zeicah? Unau dang nakin kan ṭha deuh tiah kan i ruah ahcun kan hun i porhlaw lai i kan nauta deuh tiah kan ruah ahcun kan lung a dongh lai caah a si. Mah ruahnak hna cu a ṭha lomi an si. (Rom 12:3) Greece ah a ummi unaunu Katerina * nih hitin a ti: “Keimah nakin aa dawh deuhmi, phungchim a thiam deuhmi le hawikom tam deuh a ngeimi hna he kaa tahchunh peng caah keimahle keimah san a tlai lomi in kaa hmu.” Jehovah nih kan i dawh ruang, biachim kan thiam ruang asiloah kan min a than ruangah si loin amah kan dawt ca le a Fapa bia kan ngaih caah a sinah a kan hnuhmi a si ti kha philhhlah.—Johan 6:44; 1 Kor. 1:26-31.   

5. Unaupa Hyun hmuhtonnak in zeidah kan hngalh?

5 Mah hi a dang kanmahle kanmah kan i hal khawh rihmi biahalnak a si: ‘Daihnak a sertu pakhat in asiloah midang he bia al a duhmi pakhat in mi nih hngalhmi ka si maw?’ Korea ah a ummi unaupa Hyun hmuhtonnak hi ruathmanh. Unaupa nih Khrihfabu ah tinvo sung a hmumi hna kha a ral bantukin a hmuh hna. Hitin a ti: “Mah unaupa pawl kha an sualnak ka kawl hna i an chimmi kha ka doh hna.” A phichuak cu zeidah a si? Uanupa nih “ka lungput ruangah Khrihfabu ah lungrualnak a um ti lo” tiah a ti. A hawile cheukhat nih buaibainak kong kha a hngalhthiam nakhnga an bawmh caah Hyun nih thlennak a tuah i atu cu a ṭha tukmi Khrihfa upa pakhat a si cang. Cucaah kannih zong daihnak karhter duhnak lungput nakin pakhat le pakhat i zuam duhnak lungput kan ngei deuh ti kha kan hngalh ahcun thlennak kan tuah colh awk a si.

Porhlawtnak Le Nahchuahnak Lungput Kha Hrial

6. Galati 5:26 ningin zei lungput hna nih dah pakhat le pakhat i zuam duhnak lungput a kan ngeihter khawh?

6 Galati 5:26, NW rel. * Zei lungput ruangah dah pakhat le pakhat i zuam duhnak lungput kan ngeih khawh? Pakhat cu mah zawnlawng ruahnak a si. Amah zawnlawng aa ruahmi pakhat cu aa porhlawmi a si. Cun a dang pakhat cu nahchuahnak a si. Nahchuahnak a ngeimi nih cun midang ngeihmi kha a duh lawng si loin an ngeihmi zong kha sung hna seh ti a duh. Nahchuahnak cu huatnak phunkhat a si ve. Mah bantuk ruahnak kha chawnh khawhmi zawtnak bantukin hlatpi in kan hrial a hau.

7. Mah zawnlawng ruahnak le nahchuahnak nih zeitindah a kan hnorsuan khawh ti kha tahchunhnak pe.

7 Mah zawnlawng ruahnak le nahchuahnak cu vanlawng datsi chungah aa telmi hmunthur fate bantuk a si. A hmasa ahcun vanlawng cu a zuang kho ko nain datsi kalnak lam kha hmunthur fate nih a phih caah a engine ah datsi a lut kho ti lo i vanlawng cu a tla kho. Cu bantukin mi pakhat nih Jehovah kha a biak ko nain mah zawnlawng ruahnak le nahchuahnak a ngeih ahcun a rawk lai. (Ptb. 16:18) Jehovah kha biak ti loin a um lai i amah le midang cungah harnak a chuahter lai. Mah zawnlawng ruahnak le nahchuahnak kan ngeih nakhnga lo zeitindah kan hrial khawh?

8. Mah zawnlawng ruahnak kha zeitindah kan doh khawh?

8 Paul nih Filipi Khrihfa hna sinah ruahnak a cheuhmi hna “pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u” timi bia kha kan ngaih ahcun porhlawtnak kha kan hrial khawh lai. (Fil. 2:3) Midang cu kanmah nakin an ṭha deuh tiah kan ruah ahcun kanmah nakin pahrang a ngei deuhmi le sining a ngei deuhmi hna he kan i tahchunh lai lo. Mah canah an caah kan i lawm lai. A hleiin an sining hna kha Jehovah thangṭhatnak caah an hman tikah kan lawmhpi hna awk a si. Cun unau pawl zong nih Paul ruahnak cheuhnak kha an zulh ahcun kan sining ṭha hna kha biapi ah an chiah lai i an sunsak lai. Cutin a si ahcun Khrihfabu ah daihnak le lungrualnak a karh chin lai.

9. Nahchuahnak lungput kan ngeih nakhnga lo zeitindah kan hrial khawh?

9 Thil cheukhat he aa tlaiin ri kan ngei ti kha kan hngalh, phundang in cun tangdornak kan ngeih ahcun nahchuahnak lungput kha kan hrial khawh lai. Aa tangdormi kan si ahcun midang nakin ka thiam deuh i ka ṭha deuh ti langhter awkah kan i zuam lai lo. Mah canah kanmah nakin a thiam deuhmi hna sinin cawn kan duh lai. Tahchunhnak ah, Khrihfabu i unaupa pakhat cu phungchim a thiam tuk hei ti u sih. Na phungchimnak caah zeitindah naa timhtuah tiah kan hal khawh. Unaunu pakhat cu rawlchuan a thiam tukmi a si ahcun a sinah ruahnak cheuhnak kan hal khawh. Cun Khrihfa mino pakhat nih hawikom i ser kha aa harh ahcun hawikom tampi a ngeimi unau dang sinah ruahnak cheuhnak a hal khawh hna. Cutin kan tuahnak thawngin nahchuahnak lungput kha kan hrial khawh lai i kan sining zong a ṭhangcho chin lai.

Baibal Chung I An Kong Ṭialmi Hna Sinin Cawng

Gideon cu aa toidor caah Efraim mi pawl he daihnak a rak ser khawh (Catlangbu 10-12 zoh)

10. Gideon nih zei zuamcawhnak dah a rak ton?

10 Manasseh miphun Gideon le Efraim miphun hna kong hi ruathmanh. Jehovah nih Gideon le a ralkap 300 pawl kha raltuknak ah teinak an hmuh nakhnga a rak bawmh hna. Cutin teinak an hmuh caah i porhlawt khawh a si. Pathian ral pawl an doh hna lioah Gideon nih Efraim miphun pawl kha a sawm hna lo caah annih cu an thin a hung tuk. Cucaah Efraim pa cheukhat nih Gideon kha an hmuh tikah thangṭhat canah an rak mawhchiat. Mi nih an miphun kha an kan upat lai lo ti an phan tuk caah a si. Asinain mah nakin a biapi deuhmi cu Gideon nih Jehovah min thangṭhat awk le a miphun pawl kilven awkah a bawmhmi kha an philh.—Biac. 8:1.

11. Gideon nih Efraim pa pawl kha zeitindah a rak lehrulh hna?

11 Gideon nih toidor tein Efraim pa pawl kha “nanmah he tahchunh awk tlak in zeidah ka tuah?” tiah a ti hna. Cun Jehovah nih thluachuah a pekmi hna cuset khaset timi a kong pakhat kha a chimh hna tikah an lung “a dai” ṭhan. (Biac. 8:2, 3) Gideon nih Pathian miphun lakah daihnak a um nakhnga nahchuahnak lungput kha a rak hrial.

12. Efraim pa hna le Gideon sinin zeidah kan cawn khawh?

12 Mah kong in zeidah kan cawn khawh? Jehovah thangṭhatnak nakin kanmahle kanmah kan i thangṭhat deuh awk a si lo ti kha Efraim mi hna sinin kan cawn khawh. Innchungkhar lu le Khrihfa upa hna nih Gideon sinin an cawn khawh. Kan tuahmi thil ruangah mi pakhat cu a thin a hun ahcun zeicah a thin a hun ti kha hngalhthiam awkah kan i zuam awk a si. A ṭhami a tuahsernak caah kan thangṭhat khawh. A hleiin a palh ti kan hngalh ko nain cutin kan thangṭhat khawh nakhnga caah toidornak ngeih a hau. Asinain kanmah thangṭhatnak nakin daihnak um awkah i zuam cu a biapi deuhmi a si.

Jehovah nih a ka bawmh lai ti kha a zumh caah Hannah cu lungdaihnak a hmu ṭhan (Catlangbu 13-14 zoh)

13. Hannah nih zei zuamcawhnak dah a ton i mah kha zeitindah a rak tei?

13 Hannah kong zong hi ruathmanh. Anih cu amah a daw tukmi Levi mi Elkanah he an i um. Asinain Elkanah cu Peninnah timi nupi dang zong a ngei. Elkanah nih Peninnah nakin Hannah kha a dawt deuh. Asinain “Peninnah cu fa a ngei, sihmanhsehlaw Hannah cu fa a ngei lo.” Cucaah Peninnah nih Hannah kha “a thin hunter awkah ṭhalo tein a ti hram tawn.” Mah tikah Hannah cu zeitindah a um? A ngaih a chia tuk, “a ṭap i rawl ei kha a duh lo.” (1 Sam. 1:2, 6, 7) Asinian Baibal chung ah Hannah nih Peninnah kha teirul cham awkah aa zuam timi a um lo. Mah canah Jehovah nih a ka bawmh lai ti kha a zumh i lungtak tein thla a cam. Hannah cungah Peninnah lungput cu aa thleng maw? Mah kong cu Baibal ah a chim lo. Asinain Hannah cu “ngaihchia mithmai a pu ti lo” tiah a ti caah lungdaihnak a hmu ṭhan ti kha kan hngalh khawh.—1 Sam. 1:10, 18.

14. Hannah kong in zeidah kan cawn khawh?

14 Hannah kong in zeidah kan cawn khawh? Pakhatkhat nih nangmah he i tahchunh awkah aa zuam ahcun thil sining na tawnghtham khawh ti kha i cinken. Nangmahle nangmah kha buaibainak i tonter hlah. Ṭhatlonak kha ṭhatlonak in lehrulh canah amah he daihnak ser awkah i zuam. (Rom 12:17-21) Cutin na tuah ahcun aa thlen duh lo hmanhah na lung a dai lai i naa nuam lai.

Jehovah cu an rianṭuannak ah thluachuah a kan petu a si ti kha an hngalh caah Apollo le Paul cu pakhat le pakhat an rak i zuam lo (Catlangbu 15-18 zoh)

15. Apollo le Paul cu zei an i lawhnak dah a um?

15 A donghnak ah, Apollo le lamkaltu Paul sinin kan cawn khawhmi kong kha kan i ruah hna lai. An pahnih in Baibal lei ah fimnak a ngeimi an si i a min a thangmi le cawnpiak a thiam tukmi zong an si. Cun mi tampi kha zultu si awkah an bawmh hna. Asinain annih cu pakhat le pakhat cungah nahchuahnak an ngei lo.

16. Apollo cu zei bantuk minung dah a si?

16 Apollo cu mi nih fim an cawnnak a min a thang tukmi hmun a simi “Alekzandria khuami” a si. Anih cu biachim a thiam tukmi le “cathiang kha ṭha tein a hngalmi” zong a si. (Lam. 18:24) Korin khua a um lioah Khrihfabu i unau cheukhat nih Paul i telin a dang unaupa pawl nakin Apollo kha an rak duh deuh. (1 Kor. 1:12, 13) Cutin ṭhencheunak a ummi kha Apollo nih a cohlang maw? A cohlang lo. Korin khua in Apollo a chuah hnuah cuka hmun ah kal ṭhan dingin Paul nih a rak forh. (1 Kor. 16:12) Apollo nih Khrihfabu kha a ṭhencheuter tiah a ruah ahcun Paul nih Apollo kha cuka hmun ah kal ṭhan dingin a forh lai lo. Apollo nih thawngṭha chim awk le unau pawl tha pek awkah a thazaang kha a ṭhatnak in a hman ti cu a fiang ko. Apollo cu aa toidormi pakhat zong a si. Tahchunhnak ah, Baibal chungah Aquila le Priscilla nih “Pathian lam kong kha hmaan deuh chin in an cawnpiak” tikah Apollo cu a thin a hung timi kong a um lo.—Lam. 18:24-28.

17. Paul nih daihnak a um nakhnga zeitindah a rak tuah?

17 Lamkaltu Paul nih Apollo tuahmi thil ṭha hna kha a hngalhthiam. Asinain mi nih amah nakin Apollo cu a thiam deuhmi in an hmuh lai kha a phang lo. Korin Khrihfa hna sin ca a kuatmi hna in Paul cu aa toidormi, a lung a nemmi le a tlarimi a si ti kha kan hngalh khawh. Mi nih “kei cu Paul lei ṭang ka si” tiah an ti ruangah aa rak i porhlaw lo. Mah canah Jehovah Pathian le Jesuh cungah lungthin a rak pek.—1 Kor. 3:3-6.

18. Apollo le Paul sinin 1 Korin 4:6, 7 ningin zeidah kan cawn khawh?

18 Apollo le Paul kong in zeidah kan cawn khawh? Jehovah caah fakpi in rian kan ṭuan i mi tampi kha tipil in dingin an ṭhancho nakhnga kan bawmh men hna lai. Asinain kan hmuhmi hlawhtlinnak vialte cu Jehovah thluachuah thawng lawngin a si ti kha kan hngalh a hau. Cun Apollo le Paul kong in a dang kan cawn khawh rihmi pakhat cu Khrihfabu ah rian tam deuh pek kan si ahcun Khrihfabu ah daihnak a um deuh nakhnga tinvo sung tam deuh kan hmu tinak a si. Khrihfa upa le bu rianṭuantu hna nih pakhat le pakhat karah daihnak le lungrualnak a um nakhnga an kan bawmh tikah kan i lawm tuk. Annih nih Baibal hmangin ruahnak an kan cheuh tikah cutin an tuah. A biapimi si awkah an i zuam lo nain Khrihfabu dihlak nih Jesuh nawl an ngaih nakhnga le a nunning kha an i zohchunh nakhnga an bawmh hna.—1 Korin 4:6, 7 rel.

19. Pakhat cio nih zeidah kan tuah khawh? (“ Pakhat Le Pakhat I Zuam Duhnak Lungput Kha Hrial” timi rinli kulh ah zoh.)

19 Kan dihlak in Pathian pekmi pahrang asiloah sining kan ngei cio. Mah laksawng kha “midang ca ṭhatnak ah” kan hman khawh. (1 Pet. 4:10) Kan tuah khawhmi cu thil hmete lawng a si tiah kan ruah khawh men. Asinain inn pakhat sak awkah thing pakhat cio a herh bantukin thil fate kan tuahmi nih Khrihfabu dihlak ah lungrualnak a umter khawh. Cucaah pakhat le pakhat i zuam duhnak lungput kan ngeih nakhnga lo i zuam hna u sih. Cun Khrihfabu ah daihnak le lungrualnak a um chin nakhnga kan si khawh chungin i zuam awkah biakhiak hna u sih.—Efe. 4:3.

 

HLA 80 Jehovah A Ṭhatzia Kha Tep U

^ cat. 5 A kakmi fate nih tlakum kha a kuaiter khawh bantukin cheukhat nih pakhat le pakhat i zuam duhnak lungput nih Khrihfabu kha a ṭhencheuter khawh. Khrihfabu ah lungrualnak a um ti lo ahcun Pathian kha dai tein an bia kho lai lo. Hi capar ah pakhat le pakhat i zuam duhnak lungput kha zeicah kan hrial awk a si timi kong le Khrihfabu ah daihnak a um nakhnga zeidah kan tuah khawh timi kong kha kan i ruah hna lai.

^ cat. 4 An min cheukhat thlen a si.

^ cat. 6 Galati 5:26 (NW): “Mah zawnlawng ruahnak, pakhat le pakhat i zuamnak, pakhat le pakhat i nahchuahnak ngei hlah u sih.”