1. Jehovah nih na caah zeidah aan tuahpiak?

ZEITINDAH Jehovah Tehte pakhat na hung si? “Thawngṭha” kha na nu le na pa, na rian ṭuanṭi hawi, sianginn na kaiṭi hawi asiloah innkhat hnu innkhat phungchim a kalmi Jehovah Tehte Hna sinin na theihmi a si kho men. (Mar. 13:10) Pakhatkhat nih a caan le a thazaang tampi pek in Baibal kha an in cawnpiak. Mah tikah Jehovah kha na hun dawt i amah nih aan dawt zong kha na hun hngalh. Jehovah nih biatak ah aan hnuh caah atu ahcun Jesuh Khrih zultu pakhat in zungzal nunnak ruahchannak zong na ngei cang. (Johan 6:44) Jehovah nih mi pakhatkhat kha nangmah biatak cawnpiak awkah a forh i a sal pakhat in aan cohlan caah naa lawm tuk lai ti cu a fiang ko.

2. Hi capar ah zei kong dah kan i ruah hna lai?

² Atu ah biatak kha kan hngalh cang i midang zong kanmah he nunnak lam cungah an kalṭi khawh nakhnga bawmhnak tinvo sung kan hmu. Mi sinah thawngṭha chim cu a fawi ko nain mi pakhat he Baibal cawnpiaknak tuah tu cu kan caah a har kho men. Nangtah cutin na ruat ve maw? Na ruah ve ahcun hi capar i ruahnak cheuhnak cu na caah bawmtu a si lai. Zultu siternak rian ah i tel awkah zeinihdah a kan forh timi kong le Baibal cawnpiaknak tuah awkah zuamcawhnak hna zeitindah kan tei khawh timi kong kha kan i ruah hna lai. A hmasa bik ah phungchimtu lawng si loin cawnpiaktu si zong zeicah a biapit timi kong kha i ruah hna u sih.

3. Zeicah phung kan chim?

³ Jesuh nih vawleicung a um lio i a zultu pawl rian a pekmi hna ah phunhnih aa tel. Phunkhatnak cu Pennak kong  thawngṭha chim kha a si i zeitindah chim ding a si timi zong kha a hmuhsak hna. (Matt. 10:7; Luka 8:1) Tahchunhnak ah, Jesuh nih a zultu pawl kha mi nih Pennak kong thawngṭha an cohlan tikah zeidah an tuah awk a si ti le an cohlan lo tikah zeidah an tuah awk a si ti kha a chimh hna. (Luka 9:2-5) Cun a zultu pawl nih “miphun vialte hna ca i tehte si awkah” thawngṭha an chim lai i zeitluk kau in dah an chim lai timi kong zong kha a chimchung. (Matt. 24:14; Lam. 1:8) Jesuh nih a zultu pawl kha mi nih an cohlan zong, cohlan lo zongah Pathian Pennak kong le mah nih a liim dingmi kong kha chim dingin a rak fial hna.

4. Matthai 28:18-20 ningin Pennak kong chim lengah zeidah kan tuah awk a si rih?

⁴ Jesuh nih a zultu pawl a fialmi hna phunhnihnak rian cu zeidah a si? Nawl a pekmi hna dihlak an ngaih nakhnga cawnpiak kha a si. Jesuh nih phungchim awk le cawnpiak awkah a fialmi hna cu kumzabu pakhatnak i Khrihfa pawl lawng pei an si ko cu tiah mi cheukhat nih an ti men lai. Asinain mah cu a hmaan maw? A hmaan lo. Jesuh nih mah a biapi tukmi rian cu “caan dongh tiangin” ṭuan a si lai tiah a ti. (Matthai 28:18-20 rel.) Jesuh nih mah rian kha a zultu 500 leng sin i aa langhter lioah a fialmi hna a si kho men. (1 Kor. 15:6) Cun Jesuh nih Johan langhnak a pekmi chungah zultu dihlak nih midang nih Jehovah kong an hngalh nakhnga bawm hna seh ti a duhnak kong kha a langhter.—Biat. 22:17.

5. Phungchimnak le cawnpiaknak aa pehtlaih ning langhter awkah Paul nih 1 Korin 3:6-9 ah zei tahchunhnak dah a hman?

⁵ Lamkaltu Paul nih zultu siternak rian kha thlaikung cinthlaknak rian he a tahchunh i thlaici tuhtu nih a cinnak lawngin a za lo ti kha a langhter. Korin Khrihfa hna kha hitin a ti hna: “Kei nih a ci ka tuh, Apollo nih a kung kha ti a toih . . . nannih cu Pathian lo nan si.” (1 Korin 3:6-9 rel.) “Pathian lo” ah rian a ṭuanmi in kannih nih thlaici tuh lawng si loin ti kan toih lai i a ṭhan le ṭhan lo hmaan tein kan check lai. (Johan 4:35) Asinain a ṭhantertu cu Pathian a si ti kha kan hngalh a hau.

6. Cawnpiaknak ah zei hna dah aa tel?

⁶ “Zungzal nunnak hmuh awkah thim a simi hna” kha kan kawl hna. (Lam. 13:48) Cucaah zultu an hung si khawh nakhnga Baibal in an cawnmi kong hna kha (1) an hngalhthiam, (2) an cohlan i (3) an zumh nakhnga kan bawmh hna a hau. (Johan 17:3; Kol. 2:6, 7; 1 Thes. 2:13) Khrihfabu dihlak nih Baibal a cawngmi hna kha an i pumh tikah kan conglawmh hnanak thawngin an cungah dawtnak kan langhter khawh. (Johan 13:35) Baibal a cawnpiaktu zong nih a caan le thazaang tampi pek in a cawnpiakmi nih “ralhruang fekfek” bantuk a simi a hlan i a zumhnak le phunglam hna kha a hlawt khawh nakhnga a bawmh a hau. (2 Kor. 10:4, 5) Tipil in ding tiangin a ṭhancho nakhnga thla tampi a rau kho men. Asinain zuam man cu a phu ko.

7. Phungchimnak le zultu siternak rian ah i tel dingin zeinihdah a kan forh?

⁷ Phungchimnak le zultu siternak rian ah zeicah kan i tel? Pakhatnak, Jehovah kan dawt caah a si. Phungchim u law zultu va siter hna u timi Jesuh nawl pekmi zulh awkah na si khawh chungin naa zuam tikah Pathian na dawt kha na langhtermi a si. (1 Johan 5:3) Jehovah na dawt caah innkhat hnu innkhat phungchimnak ah naa tel. Mah nawlbia ningin zulh cu a fawi maw? A fawi lo. A hmasa bik phung na chim lioah na ṭih maw? Na ṭih lai ti cu a fiang ko. Asinain Jesuh nih cutin tuahter a ka duh ti kha na hngalh caah a chimmi ningin na tuah. Caan a rauh deuh tikah  phungchimnak ah i tel kha na hun i fawih deuh. Asinain Baibal cawnpiaknak tah zeitin? Mah kong na ruah tikah na ṭih maw? Asinain ṭihnak na ngeihmi tei khawh awk le Baibal cawnpiaknak tuah khawh awkah ralṭhatnak na ngeih nakhnga Jehovah nih aan bawmh khawh.

8. Marka 6:34 ningin midang cawnpiak awkah zeinihdah a kan forh khawh rih?

⁸ Pahnihnak, minung hawi kan dawtnak nih anmah kha biatak cawnpiak hna awkah a kan forh. Voikhat cu Jesuh le a zultu pawl phungchim rian an ṭuan dih hnuah an tha a ba tuk. I dinh awk i an kal tikah mi bupi nih an hmuh hna. A ba tuk ko nain a zaang an fah ngaingai caah Jesuh nih “thil tampi” a cawnpiak hna. (Marka 6:34 rel.) A tha a ba tuk ko nain fakpi in rian a rak ṭuan. Zeicah? A cawnpiakmi hna hmun in aa umter caah a si. Zeitlukin dah harnak an ton ti le zeitlukin dah ruahchannak an herh ti kha a hngalh i bawmh a duh hna. Tuchan mi hna sining zong cutin a si ve. A lenglei zohnak lawngin phundang in ruat hna hlah. Annih cu khaltu a ngei lomi, lam a tlaumi tuu bantuk an si. Lamkaltu Paul nih Pathian kha an hngal lo i ruahchannak zong an ngei lo tiah a ti. (Efe. 2:12) Annih cu “rawhralnak lam cungah” an um. (Matt. 7:13) Kan lohmun ah a ummi hna nih zeitlukin dah Pathian kong hngalh an herh timi kong kan ruah ahcun dawtnak le zaangfahnak nih anmah bawmh dingin a kan forh lai. A ṭha bik lam in kan bawmh khawh hnanak lam cu Baibal kan cawnpiak hnanak thawngin a si.

9. Filipi 2:13 ningin Jehovah nih zeitindah aan bawmh khawh?

⁹ Baibal cawnpiak awk le i timhtuah awkah a caan tampi pek a hauh caah cutin tuah awkah naa cungcangmi a si kho men. Cutin na si ahcun na intuarmi kong kha Jehovah sinah chim. Midang Baibal cawnpiaknak tuah duhnak lungthin na ngeih nakhnga Jehovah sinah bawmhnak hal. (Filipi 2:13 rel.) Lamkaltu Johan nih amah duh ningin kan hal ahcun a kan leh lai tiah a ti. (1 Johan 5:14, 15) Cucaah zultu siternak rian ah i tel duhnak lungthin na ngeih nakhnga Jehovah nih aan bawmh lai ti kha na zumh khawh.

10-11. Baibal cawnpiaknak tuah awkah zeicah kan i cungcang khawh men?

¹⁰ Zultu siternak rian ah kan duh tlukin kan i tel khawh lo hmanhah mah rian kha kan sunsak tuk. Kan tonmi zuamcawhnak cheukhat cu zei hna dah an si timi kong le mah kha zeitindah kan tei khawh timi kong kha i ruah hna u sih.

¹¹ Kan sining ruangah ri kan ngei timi ruahnak kan ngei men lai. Tahchunhnak ah, thawngthanhtu cheukhat cu an kum a upa asiloah an ngan a dam lo. Nangtah cutin na si ve maw? Na si ahcun COVID-19 pulrai in kan cawn khawhmi a kong pakhat kha ruathmanh. Kan phone asiloah a dang electronic thilri hmangin hmual a ngeimi Baibal cawnpiaknak tuah khawh a si ti kha kan hngalh cang. Cucaah na inn in Baibal cawnpiaknak kha na tuah khawh cang. A dang a ṭhatnak pakhat a um rih. Cheukhat cu Baibal cawn an duh ko nain unau pawl phungchim an kal lioah an i manh lo. Asinain annih cu zingka asiloah zan ah an i manh men lai. Mah caan ah Baibal na cawnpiak kho hna lai maw? Nikodemu nih zan ah Baibal cawn a duh caah Jesuh nih a rak cawnpiak.—Johan 3:1, 2.

12. Hmualngei tein Baibal a cawnpiaktu kan si kho timi zumhnak ngeih awkah zeinihdah a kan bawmh khawh?

¹² Baibal cawnpiaknak tuah awkah sining ka ngei lo tiah kan ruah men lai. Mah cu mi  pakhat Baibal cawnpiak awkah hngalhnak asiloah thiamnak ka ngei lo tiah na ruah caah a si kho men. Cutin na ruah ahcun mahle mah zumhnak na ngeih nakhnga aan bawm khomi a kong pathum hi ruat. Pakhatnak, Jehovah nih midang cawnpiak awkah sining na tlinh tiah a hmuh. (2 Kor. 3:5) Pahnihnak, ‘vancung le vawleicung i a ummi nawlngeihnak vialte pek’ a simi Jesuh nih cawnpiak awkah nawl aan pek. (Matt. 28:18) Pathumnak, midang bawmhnak kha naa bochan khawh. A Pa nih a cawnpiakmi kha Jesuh nih aa bochan bantukin nang zong naa bochan khawh ve. (Johan 8:28; 12:49) Baibal cawnpiaknak tuah khawh awkah lohmun zohkhenhtu, sining a ngeimi hmaikal asiloah hmuhtonnak a ngeimi thawngthanhtu sinah bawmhnak na hal khawh hna. Anmah pawl he Baibal cawnpiaknak ah nan kalṭi ahcun zumhnak zong na ngei deuh lai.

13. Lam thar ningin zeicah thlennak kan tuah a herh?

¹³ Lam thar le hriamnam thar hna kha hman awkah kan i harh kho men. Baibal cawnpiaknak tuah ning cu aa thleng cang. Atu ah a bik in Baibal cawnpiaknak ah Nunnak Kha Zungzal In I Nuamhpi! timi cauk kha hman a si cang lai. Baibal cawnpiaknak tuah ning cu hlan he aa lawh ti lo caah ṭha tein i timhtuah a hau. Catlangbu rel ding cu tlawmte lawng a si i i ruah dingmi a tam deuh. Kan cawnpiak hna tikah video le JW Library^® ti bantuk electronic thilri hna kha tam deuh in hman a hau. Mah hna kha na hman thiam lo ahcun pakhatkhat sinah bawmhnak hal hna. Kan hman lengmang ahcun kan thiamte ko lai. Lam thar hna hman cu a fawi lo. Asinain Jehovah le a dang bawmhnak thawngin thlennak tuah awkah kan i fawih deuh lai i Baibal cawnpiaknak tuahnak zongah kan i nuam deuh lai. Mah lam thar nih “Baibal cawnpiaktu he a cawngmi he a kan nuamhter” tiah hmaikal pakhat nih a ti.   

14. Mi nih ngaih an duh lonak hmun ah phung a chimmi kan si ahcun zeidah kan philh lo awk a si? 1 Korin 3:6, 7 nih zeitindah thazaang a kan pek?

¹⁴ Baibal cawnpiaknak thawk a harnak hmun ah kan um kho men. Mi nih kan chimmi thawngṭha kha ngaih an duh men lai lo asiloah a ral hmanh an kan ralchanh men lai. Cu bantuk hmun ah a ṭhami lungput ngeih peng awkah zeinihdah a kan bawmh khawh? A ṭhalomi hi vawlei ah mi pawl i an sining cu khulrang in aa thleng kho i a hmasa ah ngaih a duh lomi hna hmanh nih a hnuah an nunnak ah Pathian lamhruainak kan herh ti kha an hngalh ṭhan khawh ti kha philhhlah. (Matt. 5:3) A hlanah kan cauk a cohlang lomi cheukhat nih a hnuah Baibal cawnpiaknak kha an cohlan ṭhan tawn. Cun Jehovah cu rawl ṭuan uktu Bawi a si ti zong kha kan hngalh. (Matt. 9:38) Jehovah nih a kung kha ti toih hna seh ti a kan duh ko nain a ṭhantertu cu amah rian a si. (1 Kor. 3:6, 7) Atu ah Baibal cawnpiaknak kan tuah rih lo hmanhah a phichuak cungah si loin kan i zuamnak cungah Jehovah nih thluachuah a kan pek ti hngalh cu thazaang petu taktak a si. *

15. Mi pakhat nih Baibal cawnpiaknak a cohlan tik le a cawnmi ningin a zulh tikah Jehovah cu zeitindah a um?

¹⁵ Mi pakhat nih Baibal biatak kha a cohlan i a hngalhmi kong kha midang sin i a chim tikah Jehovah cu aa lawm. (Ptb. 23:15, 16) Tuchan zongah a miphun pawl nih an tuahmi a hmuh tikah Jehovah cu aa nuam tuk lai. Tahchunhnak  ah, vawleicung ah pulrai a um ko nain 2020 rianṭuannak kum chungah Baibal cawnpiaknak 7,705,765 an tuah i Jehovah sinah i pumpek awk le tipil in awkah minung 241,994 an bawmh khawh hna. Mah zultu thar hna nih midang kha Baibal an cawnpiak ve hna i zultu si dingin an bawmh hna. (Luka 6:40) Zultu siternak rian kan i tel tikah Jehovah cu aa lawm tuk lai ti cu a fiang ko.

16. Zei hmutinh dah kan ngeih awk a si?

¹⁶ Zultu siternak rian cu a har ko nain Jehovah bawmhnak thawngin mah rian ah kan i tel kho. Pathian an dawt khawh nakhnga mithar pawl zong kha kan bawmh khawh hna. A tlawm bik ah Baibal cawnpiaknak pakhat thawk dingin hmuitinh na ngei kho lai maw? Kan tonmi hna paoh kha aa tlak tik paohah Baibal cawnpiaknak tuah khawh dingin kan i zuam ahcun a ṭha tukmi a phichuak kan hmu lai. Kan i zuamnak cungah Jehovah nih thluachuah a kan pek lai ti kha kan zumh khawh.

17. Baibal cawnpiaknak kan tuah ahcun zeitindah kan um lai?

¹⁷ Midang sinah biatak kong chim le cawnpiak cu tinvo sung a si. Mah rian nih nuamhnak taktak a kan hmuhter. Thessalonika khuami hna zultu si dingin a bawmtu lamkaltu Paul nih “kan Bawipa Jesuh a rat tik i a hmaika i kan dir tikah kan ca i ruahchannak le lawmhnak le thangṭhatnak cu nan si lai. Nanmah cu kan hmaihngalnak le kan i lawmhnak nan si taktak ko” tiah a ti. (1 Thes. 2:19, 20; Lam. 17:1-4) Tuchan zongah mi tampi nih cutin an ruah ve. A vapa he tipil in dingin mi tampi a bawmmi unaunu Stéphanie nih hitin a ti: “Jehovah sinah an i pumpek nakhnga midang kan bawmhmi hna nakin a kan nuamhter deuhmi zei thil hmanh a um lo.”