Mah Baibal caang ah Khrihfa ziaza phunkua kong a langhter: “Thlarau nih a chuahtermi hna cu dawtnak, lawmhnak, daihnak, lungsaunak, zaangfahnak, ṭhatnak, zumh awk tlakmi sinak, toidornak le mahle mah i tei khawhnak te hna hi an si.” Asinain Pathian thiang thlarau nih mah ziaza hna kha ngeih lawng si loin ṭhanchoter awkah a kan bawmh khawh.

Lamkaltu Paul nih a hmasa cacaang ah a langhtermi kong hi i cinken: “Minung sining nih a tuah tawnmi cu . . . nu le pa sualnak te hna, a thurhnawmmi thil te hna, aa dawhcah lomi thil te hna, siasal biak te hna le dawih le eih te hna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat, an i ṭhen, ziar an i ngeih, zu an ri, an au an khuang i cu bantuk thil a dang tampi kha an tuah lengmang hna.” (Gal. 5:19-21) Paul nih “cu bantuk thil” timi in a bia a donghter, cucaah Kolose 3:5 ah a langhter bantukin “minung sining nih a tuah tawnmi” kong a dihlak kha a langhter ti lo. Cu bantukin a ṭhami ziaza phunkua kong a langhter hnuah hitin a ti: “Cu bantuk thil hna caah cun nawlbia zeihmanh a herh lo.” Cucaah Paul nih thiang thlarau bawmhnak thawngin a ṭhami ziaza pawl ṭhanchoter khawh ning kong a dihlak kha a chim lo.

Paul nih Efesa Khrihfabu kong he aa tlaiin a ṭialmi ceunak theitlai kong le thlarau nih a chuahtermi ziaza kong kan tahchunh tikah mah hi kan hngalhthiam: “Ṭhatnak a phunphun le dinnak a phunphun le biatak a phunphun a chuahtertu cu ceunak cu a si.” (Efe. 5: 8, 9) A si, “ṭhatnak,” dinnak le biatak timi ah ‘ceunak thleitlai’ lawng si loin “thlarau nih a chuahtermi” ziaza zong aa tel.

Cu bantukin, Paul nih Timote kha ziaza ṭha phunruk a simi “dinnak le Pathian hmaizahnak le zumhnak le dawtnak le inkhawhnak le lungnemnak kha tuah i zuam hna” tiah a forh. (1 Tim. 6:11) “Thlarau nih a chuahtermi” ziaza ah (zumhnak, dawtnak le toidornak) mah pathum kong lawng kha a langhter. Asinain Timote nih thiang thlarau bawmhnak thawngin a dang ziaza a simi dinnak, Pathian ṭihzahnak le inkhawhnak hna zong hi a langhter a hau.—Kolose 3:12; 2 Peter 1:5-7 he tahchunh.

Cucaah Galati 5:22, 23 ah Khrihfa hna nih kan ngeih awk a simi ziaza dihlak kha a langhter lo. “Thlarau nih a chuahtermi” ziaza phunkua kha ṭhanchoter awkah Pathian thlarau nih a kan bawmh khawh. Asinain Khrihfa nutling, patling kan si khawh nakhnga kan ṭhanchoter dingmi ziaza tampi a um. Mah cu “Pathian he aa loin sermi nan mihring thar kha i hruk u law cucu a dingmi le a thiangmi nunning i a langmi nunnak taktak kha a si”—Efe. 4:24.