1. A tuu pakhat khamh a si tikah Jehovah nih zeitindah a intuar?

A HMASA capar ah kan i ruah cang bantukin Jehovah nih amahle amah kha a tuu pakhat cio ṭha tein a zohkhenhmi, tuukhal ṭha pakhat he aa tahchunh. Cucaah a tlaumi a tuu paoh kha a kawl hna. Jehovah nih amah a kaltakmi Israel mi pawl kha “ka sinah nan ra kir ahcun, nan sinah ka ra kir ve lai” tiah a ti hna. ‘Kei cu aa thleng lomi’ Pathian ka si tiah a ti caah atu tiang cutin a intuar rih ti kha kan hngalh khawh. (Mal. 3:6, 7) A sal pakhat a sin i a kir ṭhan tikah Jehovah le vancungmi hna cu an i lawm tuk tiah Jesuh nih a ti.—Luka 15:10, 32.

2. Hi capar ah zei kong dah kan i ruah hna lai?

² Jehovah sinin lam a pialmi hna bawmh khawh ning kong he aa tlaiin Jesuh chimmi tahchunhnak pathum kong kha i ruah hmanh hna u sih. A tlaumi tuu pawl Pathian sin an kir ṭhan khawh nakhnga bawmh awkah a herhmi sining cheukhat kong kha kan i ruah hna lai. A cawlcang ti lomi pawl an kir ṭhan khawh nakhnga bawmhnak ah fakpi in kan i zuam ahcun lunglawmhnak tampi kan hmu lai timi kong zong kan i ruah hna lai.

3-4. Luka 15:8-10 ah a langhter bantukin nu pakhat nih a thlaumi a tangka drachma kha zeicah ṭha tein a kawl?

³ Jehovah sin kir ṭhan a duhmi hna kha fakpi in kan kawl hna a hau. Jesuh nih Luka Thawngṭha cauk ah a man a sung tukmi hlanlio Greek mi hna tangka (drachma) a thlaumi nu pakhat kong kha a chim. Mah tuanbia a biapitnak kong cu a thlaumi tangka kawlnak ah zeitlukin dah aa zuam timi kha a si.—Luka 15:8-10 rel.

⁴ Jesuh nih a tlaumi a tangka a hmu ṭhanmi nu i a intuarnak kong kha a langhter. Jesuh chan lioah Judah mi nu cheukhat nih va a ngeimi an fanule kha an puai ni ah drachma tangka phar hra kha an pek tawn hna. Cucaah a nu nih a pekmi tangka a si caah mah tangka cu a caah a sunglawi tukmi a si men lai. Mah nu nih tangka phar cu zel ah a tla tiah a ruah. Cucaah meiinn a van  i a pawngkiang kha a kawl, a sinain zeihmanh a hmu lo. Meiinn cu a ceu tuk lo caah ngun rong a simi mah tangka phar kha a hmu kho lo. A donghnak ah, a inn kha ṭha tein a phiah. A phiahmi hmunthur kha mei in a ceuh i ṭha tein a kawl tikah a thlaumi a tangka phar kha a hmuh ṭhan. A hmuh ṭhan caah aa nuam tuk. Cucaah mah nu nih tangka phar a hmuh ṭhannak kong kha a hawile le a innpa kha a chimh hna.

5. A cawlcang ti lomi unau pawl kha zeicah fakpi in kan kawl hna awk a si?

⁵ Kannih zong Jesuh chimmi mah tahchunhnak in thil pakhatkhat kan thlau tikah ṭha tein kan kawl awk a si ti kha kan cawn khawh. A cawlcang ti lomi hna kong he aa tlai zongin cutin a si ve. Cucaah anmah kawl awkah fakpi in kan i zuam a hau. Kanmah he pehtlaihnak an tuah ti lonak cu caan saupi a si cang men lai. Cuka hmun i a ummi unau pawl nih an hngalh lonak hmun ah an i ṭhial ca zongah a si kho men. Asinain mah a cawlcang ti lomi unau cheukhat nih a tu ahcun Jehovah sinah kir ṭhan an duh ti kha kan zumh khawh. Unau pawl he Jehovah rian kha ṭuanṭi ṭhan an duh, asinain kan bawmh hna lo ahcun cutin an tuah kho lai lo.

6. A cawlcang ti lomi unau pawl kawlnak ah Khrihfabu chung dihlak in zeitindah kan i tel khawh?

⁶ A cawlcang ti lomi pawl kawlnak ah ahonih dah an bawmh khawh hna? Khrihfa upa, hmaikal le an chungkhar i telin thawngthanhtu kan dihlak in kan bawmh khawh hna. A cawlcang ti lomi hawikom asiloah rualchan na ngei maw? Innkhat hnu innkhat asiloah zapi lak phungchimnak ah a cawlcang ti lomi pakhat he nan i ton ahcun zeitin? Mah a cawlcang ti lomi unaunu asiloah unaupa nih a sinah len a duh ahcun a umnak address asiloah a phone nambar kha nan Khrihfa upa pawl sinah na pek khawh hna.

7. Khrihfa upa Thomas chimmi in zeidah na cawn khawh?

⁷ Jehovah sinah kir ṭhan a duhmi a cawlcang ti lomi pawl kawl cu a hleiin Khrihfa upa rian a si. Cutin zeitindah an tuah khawh? Spain ah a ummi Khrihfa upa Thomas * chimmi kong kha zohhmanh hna u sih. Khrihfa bu ah an kir ṭhan khawh nakhnga unau 40 leng kha a rak bawmh hna. Hitin a ti: “A hmasa bik ah a cawlcang ti lomi pawl an umnak hmun kha unau pawl sinah ka hal hna. Asiloah aa pumh lonak a sau cangmi an hngalhmi unau pawl an umnak kha thawngthanhtu sinah ka hal hna. Khrihfabu chung i tam deuh nih mah kawlnak rian ah kan i tel awk a si tiah an ruah caah lungtho tein an ka bawmh. A hnuah a cawlcang ti lomi unau pawl sin ka len hna tikah an fale kong le an rualchan pawl kong kha ka hal hna. A cawlcang ti lomi cheukhat nih an fale kha an pumhpi hna. Mah an fale cu a hlanah thawngthanhtu a rak si balmi an si men lai. Jehovah sinah an kir ṭhan nakhnga an nu le an pa zong nih an bawmh khawh ve hna.”

8. Luka 15:17-24 ah kan hmuh bantukin fapa tlau kong tuanbia ah a pa nih aa ngaichihmi a fapa kha zeitindah a rak pehtlaih?

⁸ Jehovah sinah kir ṭhan a duhmi hna bawmh khawh awkah zei sining hna dah kan ngeih a hau? Jesuh chimmi, fapa tlau tuanbia in kan cawn khawhmi kong kha i cinken. (Luka 15:17-24 rel.) Mah fapa tlau nih a hnuah zeitlukin dah a hruh ti kha a hngalh i inn ah kir ṭhan dingin biakhiahnak a tuahnak kong kha Jesuh nih a fianter. A pa nih tlik in a donmi le a kuhmi nih zeitlukin dah a pa nih a ka dawt ti kha a hngalhter. A rak tuahmi thil ruangah a fapa nih ka sual tuk timi ruahnak a ngei i a fa si dingin kaa tlak ti lo tiah a rak ruah. A fapa nih a intuarnak kong a chimh tikah a pa nih a zaangfak tuk. Cun a fapa inn i a kir ṭhan caah aa lawmhnak kha thil cheukhat a tuahnak thawngin a rak  langhter. A fapa kha sal bantukin si loin dawtmi fapa bantukin a rak pehtlaih. A fapa a dawt le a conglawmh kha langhter awkah a pa nih aa ngaichihmi a fapa kha puai a tuahpiak i thilpuan ṭha a rak pek.

9. A cawlcang ti lomi pawl Jehovah sinah an kir ṭhan nakhnga bawmh khawh awkah zei sining hna dah kan ngeih a herh? (“ Kir Ṭhan A Duhmi Hna Bawmh Khawh Ning” timi rinli kulh ah zoh.)

⁹ Jehovah cu mah fapa tlau tuanbia chung i a pa bantuk a si. A cawlcang ti lomi kan unau pawl kha a dawt hna i a sinah kir ṭhan hna seh ti a duh. Kannih zong Jehovah kan i zohchunhnak thawngin a cawlcang ti lomi unau pawl kha Pathian sinah an kir ṭhan nakhnga kan bawmh khawh ve hna. Cutin tuah khawh awkah lungsaunak, zawnruahnak, zaangfahnak le dawtnak kan langhter a hau. Mah sining hna kha zeicah kan langhter a herh, cutin zeitindah kan tuah khawh?

10. Mi pakhat kha Jehovah he naih tein a um ṭhan khawh nakhnga kan bawmh tikah zeicah lungsaunak kan ngeih a herh?

¹⁰ Mi pakhat cu Jehovah sinah a kir ṭhan nakhnga a caan pek a hauh caah lungsaunak kan ngeih a hau. A cawlcang ti lomi mi tampi nih Khrihfa upa pawl le Khrihfabu i unau pawl nih voi tampi an kan len hnu lawngah Jehovah rian kan hung ṭuan kho ṭhan tiah an ti. Asia ah a ummi unaunu Nancy nih hitin a ti: “Khrihfabu chung i ka hawikom ṭha pakhat nih tampi a ka bawmh. A u pakhat bantukin a ka dawt. Hlan lio i kan rak i hawikomhnak kong kha a ka chimh ṭhan. Ka intuarnak kong ka chimh tikah lungsau tein a ka ngaihpiak i ruahnak cheuh awkah aa cungcang lo. Keimah bawmh awkah a zungzal in timhcia tein a umnak thawngin hawikom ṭha a si kha a langhter.”

11. A lung a fakmi hna hnemh awkah zeicah zawnruahnak kan ngeih a herh?

 ¹¹ Zawnruahnak cu a ṭha tukmi sii bantuk a si, mah nih lungfahnak kha a damter khawh. A cawlcang ti lomi cheukhat cu hlan lioah Khrihfabu chung i unau pakhatkhat nih an thin an hunter hna caah atu tiang lungfak le thinhung in an um rih men lai. Cutin a si caah Jehovah sinah kir ṭhan an duh ti lo. Cun cheukhat nih a ding loin pehtlaih kan si tiah an ruah men lai. Cucaah an bia ngaihpiak le an intuarnak kha hngalhthiampiak an hau men lai. (Jeim 1:19) Hlanah a rak cawlcang lomi María nih “ka intuarnak a ka ngaihpiakmi, a ka hnemmi le a ṭhami ruahnak a ka cheu i a ka bawm khomi mi pakhat ka herh” tiah a ti.

12. Jehovah dawtnak cu zeitindah hri he aa lawh?

¹² Jehovah nih a mi pawl a dawt hnanak cu hri bantuk a si tiah Baibal nih a langhter. Pathian dawtnak cu zeiti lam in dah hri he aa lawh? Mah tahchunhnak hi ruathmanh: Ti a thuhnak rili ah na tla i mi pakhat nih nunnak khamhnak angki aan rak chanh tiah na mitthlam ah cuanter hmanh. Luat awkah fakpi naa zuam caah aan bawmhmi kha na sunsak tuk ko lai. Asinain na nun khawh nakhnga mah angki i hruk lawngin a za lo. Ti cu a kih tuk caah lawng cungah na phanh khawh lo ahcun na nung kho lai lo. Cucaah pakhatkhat nih lawng lei na panh khawh nakhnga hri chanh in an in hnuh a hau. Jehovah nih a sinin lam a pialmi Israel mi kong he aa tlaiin hitin a ti: “Hruainak hri in ka khih hna i dawtnak in ka hruai hna.” (Hos. 11:4) Tuchan zongah Pathian nih a rian ṭuan a ngolmi hna le buaibainak le lungretheihnak a teimi hna kong he aa tlaiin cutin a ruah ve. A dawt hna kha hngal hna seh ti a duh i a sinah kir ṭhan dingin a bawmh hna. Cun Jehovah nih a dawtnak langhter awkah nangmah kha aan hman khawh.

13. Kan dawt hnanak nih mi cheukhat kha Jehovah sinah kir ṭhan dingin a bawmh khawh hna ti kha Pablo hmuhtonnak nih zeitindah a langhter?

 ¹³ A cawlcang ti lomi hna kha Jehovah nih a dawt hna i kanmah zong nih kan dawt ve hna ti hngalhter cu a biapi tukmi a si. A hmasa capar ah langhtermi Pablo cu kum 30 leng a cawlcang ti lomi a rak si. Hitin a ti: “Zingkhat cu inn in ka chuah lioah zaangfahnak a ngeimi kum upa unaunu pakhat he kan i tong i ṭha tein a ka chawnhbiak. Cucaah ngakchia pakhat bantukin ka ṭap. Jehovah nih keimah he bia i ruah awkah aan thlahmi a lo tiah ka ti. Mah caan tawite chungah Jehovah sinah kir ṭhan dingin bia ka khiah.”

14. Luka 15:4, 5 i bianabia ningin tuukhal nih a tlaumi tuu a hmuh tikah zeidah a tuah?

¹⁴ A cawlcang ti lomi hna nih kan sinin bawmhnak an herh peng. Jesuh chimmi tahchunhnak chung i fapa tlau bantukin an lungfahnak a dam ṭhan khawh nakhnga a caan tampi lak a hau. Cun Satan vawlei ah an um caah hlan bantukin Jehovah he an i naih kho ti men lai lo. Cucaah Jehovah cungah an zumhnak a feh ṭhan nakhnga kan bawmh hna a hau. A tlaumi tuu bianabia chungah tuu khal nih a tuu kha a liang in aa khinh i tuurun sinah a kirpi ṭhan ning kong kha Jesuh nih a langhter. Tuukhal nih a tlaumi tuu kawlnak ah a caan le a thazaang tampi kha a hman. Asinain tuu cu amah thazaang in a kir ṭhan khawh lai lo caah amah nih cawi in tuukawm ah a kirpi ṭhan a hau ti kha a hngalh.—Luka 15:4, 5 rel.

15. Jehovah sinah kir ṭhan a duhmi, a tha a dermi hna kha zeitindah kan bawmh khawh hna? (“ A Man A Sung Tukmi Hriamnam” timi rinli kulh ah zoh.)

¹⁵ A cawlcang ti lomi hna nih an derthawmnak kha an tei khawh nakhnga a caan le thazaang tampi pek in kan bawmh hna a hau. Asinain Jehovah  thiang thlarau, Baibal le bupi chuahmi cauk hna hmangin thlaraulei ah an ṭhawn ṭhan khawh nakhnga kan bawmh khawh hna. (Rom 15:1) Cutin zeitindah kan tuah khawh? Hmuhtonnak a ngeimi Khrihfa upa pakhat nih hitin a ti: “Jehovah sinah kir ṭhan dingin biakhiahnak a tuahmi a cawlcang ti lomi tam deuh cu Baibal cawnpiak an hau.” * Cucaah a cawlcang ti lomi pakhat nih Baibal cawnpiak dingin aan hal ahcun mah cu na cohlan awk a si ko lo maw? Mah Khrihfa upa nih hitin a ti chap: “Baibal a cawnpiaktu cu a cawlcang ti lomi i a hawikom ṭha le a lungchung bia a chimh ngammi thawngthanhtu pakhat a si a hau.”

16. Vancungmi nih an kan bawmh lai ti kha zeitindah kan hngalh khawh?

¹⁶ Hmuhtonnak tampi nih Jehovah sinah kir ṭhan a duhmi a cawlcang ti lomi hna kawlnak ah vancungmi nih an kan bawmh ti kha a langhter. (Biat. 14:6) Tahchunhnak ah, Ecuador ah a ummi Silvio cu Khrihfabu ah kir ṭhan dingin bawmhnak hmuh awkah lungthin tak tein thla a cam. Thla a cam lioah Khrihfa upa pahnih nih a kutka an kingh. An len lioah a herhmi bawmhnak kha lunglawm tein an pek.

17. Thlaraulei ah a dermi hna bawmhnak in zei laksawng dah kan hmuh lai?

¹⁷ Thlaraulei ah a dermi hna kha Jehovah sinah kir ṭhan dingin kan bawmh hna ahcun lunglawmhnak tampi kan hmu lai. A cawlcang ti lomi pakhat kha lungthin tak tein a bawmmi hmaikal unaupa Salvador nih hitin a ti: “Mah lioah kaa lawmh tuknak ah ka mitthli a tla. A sunglawi tukmi a sal pakhat kha Satan vawlei in chuah awk le Khrihfabu ah kir ṭhan dingin bawmhnak ah Jehovah he rian kan ṭuanṭi khawh caah kaa lawm tuk.”—Lam. 20:35.

18. A cawlcang ti lomi na si ahcun zeidah na zumh khawh?

¹⁸ A cawlcang ti lomi na si ahcun Pathian nih aan dawt peng rih ti kha philhhlah. A sinah kir ṭhan seh ti aan duh. A sinah kir ṭhan khawh awkah kehlan cheukhat na hlan a hau lai. Asinain Jesuh chimmi fapa tlau bianabia chung i a pa bantukin Jehovah nih na kir ṭhan lai caan kha aan hngah i na kir tikah lunglawm tein aan conglawmh ve lai.