1. Jehovah cu hnuk a din liomi nu pakhat he zeitindah aa lawh?

“NU NIH a fa cu a philh kho hnga maw?” Mah cu Jehovah nih profet Isaiah chan lioah a rak halmi hna biahalnak pakhat a si. Pathian nih a miphun pawl kha “nu nih hin cun a philh hmanh a philh kho hnga, sihmanhsehlaw kei nih cun kaan philh bal hna lai lo” tiah a ti hna. (Isa. 49:15) Amahle amah kha fa a ngeimi nu pakhat bantukin aa tahchunh lengmang lo. Asinain hika ahcun amahle amah kha fa a ngeimi nu pakhat he aa tahchunh. Jehovah nih zeitlukin dah a dawt hna ti kha a salle nih hngal hna seh ti a duh caah a salle cung i a intuarnak kha nu pakhat nih a fa cungah a fekmi dawtnak a ngeihmi he a rak tahchunh. Nule tam deuh nih unaunu Jasmin bantukin an intuar ve. Hitin a ti: “Na fa hnuk na dinh tikah a nunchung a hmunmi dawtnak na sermi a si.”

2. A fa pakhat cu amah sinin aa hlat tikah Jehovah nih zeitindah a intuar?

² Jehovah nih a sal pakhat cu zeitikah dah aa pumh ti lo i zeitikah dah phungchim a kal ti lo kha a hngalh. Kum fatinte a cawlcang ti lomi * a salle thong tampi kong he aa tlaiin Jehovah cu a ngaih a chia tuk.

3. Jehovah nih zeidah a duh?

³ A cawlcang ti lomi unau tampi cu Khrihfabu ah an kir ṭhan caah kan i lawm tuk. Jehovah nih a sinah kir ṭhan hna seh ti a duh bantukin kannih zong nih kan duh ve. (1 Pet. 2:25) Cutin an kir ṭhan khawh nakhnga zeitindah kan bawmh khawh hna? Mah biahalnak kan leh hlanah pumhnak le phungchim rian ṭuannak a kan ngolter khomi thil cheukhat kong hngalh cu a ṭhami a si.

4. Pawcawmnak rian nih mi cheukhat kha zeitindah a hnorsuan khawh hna?

⁴ Mi cheukhat nih pawcawmnak rian kha biapi bik ah an hun chiah. Asia ah a ummi unaupa Hung * nih hitin a ti: “Ka pawcawmnak rian caah caan tamtuk le thazaang tamtuk ka rak hman. Tangka tam deuh ka ngeih ahcun Jehovah rian kha ṭha deuh in ka ṭuan khawh lai tiah hrut ngaiin ka rak ruah. Cucaah caan tampi pek in rian ka ṭuan. Duhsah tein kaa hun i pum ti lo i a donghnak ahcun kaa pum beh ti lo. Satan nih vawlei hmangin mi pawl kha an lung a vaivuanhter hna caah mi pawl nih duhsah tein Pathian biak kha an hun ngol.”

5. A tonmi buaibainak nih unaunu pakhat kha zeitindah a hnorsuan?

⁵ Cheukhat unau pawl cu buaibainak tampi an ngeih caah an lung a dong. Britain ah a ummi fa panga a ngeimi Anne nih hitin a ti: “Ka fapa pakhat cu pum tlamtling lo a si. A hnuah ka fanu pakhat cu bu chung chuah a si i a dang ka fapa pakhat cu lungthinlei zawtnak a hun ngei. Ka lungre a theih tuk caah kaa pum ti lo i phungchim zong ka vak ti lo. A donghnak ah a cawlcang ti lomi ka hung si.” Anne le a chungkhar, cun anmah bantukin harnak a tong vemi hna cungah zaangfahnak taktak kan ngei ko lai.

6. Kolose 3:13 chimmi bia zulh lonak nih mi pakhat kha zeitindah Jehovah miphun he a hlatter khawh?

⁶ Kolose 3:13 rel. Jehovah salle cheukhat cu Khrihfabu i unau pakhat tuahsernak ruangah an thin a hung. Lamkaltu Paul nih a caan ah unau pakhatkhat cungah “lungsilonak” kan ngei lai ti kha a hngalh. A ding loin pehtlaihnak hmanh kan tong men lai. Kan i ralrin lo ahcun kan thin a hung kho. Mi pakhat cu a thin a hun ahcun Jehovah miphun he aa hlat kho men. Thlanglei America ah a ummi unaupa Pablo kong hi ruathmanh. Pablo cu a hmaan loin sualpuh a si caah Khrihfabu ah a hmuhmi tinvo sung kha a rak sung. Zeitindah a lehrulh? Pablo nih “ka thin a hung tuk i duhsah tein Khrihfabu he ka hun i hlat” tiah a ti.

7. Mi pakhat nih sualnak ka ngei timi ruahnak a ngeih ahcun zeidah a cang kho?

⁷ Asiloah mi pakhat nih hlanah sualnak ngan a rak tuah ahcun caan saupi tiang sualnak ka ngei timi ruahnak a ngei men lai. Cucaah Pathian nih a ka daw kho ti lai lo tiah a ruah men lai. A sualnak aa ngaihchih i zaangfahnak a hmu ṭhan ko nain Pathian miphun pakhat si awkah kaa tlak ti lo timi ruahnak a ngei men lai. Unaupa Francisco zong cu bantuk ruahnak a rak ngei. Hitin a ti: “Nulepa sualnak ka tuah ko nain a hmasa ahcun kaa pumh rih. Asinain a hnuah ka lungre a hung thei i Jehovah miphun si awkah kaa tlak ti lo tiah ka ruah. Sualnak ka ngei timi ruahnak ka ngei peng i Jehovah nih ka sualnak zong a ka ngaithiam lai lo tiah ka rak ruah. A donghnak ah pungchim ka vak ti lo i a pumh zong kaa pum ti lo.” A cunglei ah langhtermi thil sining bantuk a tong vemi unau pawl kha zeitindah na hmuh hna? An cungah zaangfahnak na ngei maw? A biapi deuhmi cu anmah kong he aa tlaiin Jehovah nih tah zeitindah a intuar?

8. Jehovah nih a rian a ṭuan balmi kha a philh hna maw? Fianter.

⁸ Jehovah nih amah rian a rak ṭuan i caan tawite chung a miphun a si lomi hna kha a philh hna lo. A rian an rak ṭuanmi zong kha a philh lo. (Heb. 6:10) Profet Isaiah nih Jehovah nih a salle pawl zeitlukin dah a zohkhenh hna ti kha tahchunhnak pakhat in a rak langhter. Isaiah nih “a tuurun kha tuukhal nih an tuu an  zohkhenh hna bangin a zohkhenh hna lai; tuufa tete kha a pumh hna lai i a kut in a cawi hna lai” tiah a ti. (Isa. 40:11) Tuurun in a tuu pakhat lam a tlau tikah Tuukhal Ngan nih zeitindah a intuar? Jesuh nih a zultu pawl biahalnak a tuah hna lioah Jehovah intuarnak kha hitin a rak langhter: “Tuu zakhat a ngeimipa nih a tuu pakhat cu a tlau ahcun zeidah a tuah hnga, tiah nan ruah? Tlang cungah a tlongmi sawm kua le pakua cu a kaltak hna lai i a tlaumi cu a kawl lai. A hmuh tikah sawm kua le pakua a tlau lomi cung nakkhan hi tuu pakhat cungah hin aa lawm deuh.”—Matt. 18:12, 13.

9. Baibal chan ah tuukhal ṭha pawl nih an tuu kha zeitindah an pehtlaih hna? (A phaw hmantlak zoh.)

⁹ Jehovah kha tuukhal pakhat he zeicah kan tahchunh khawh? Baibal chan lioah tuukhal ṭha pakhat nih a tuu pawl kha ṭha tein a zohkhenh hna caah a si. Tahchunhnak ah, David nih a tuurun kilven awkah chiandeih le vom kha a rak doh hna. (1 Sam. 17:34, 35) Tuukhal ṭha nih cun a tuu pakhat a tlau hmanhah ṭha tein a hngalh. (Johan 10:3, 14) A dang tuu pawl kha kawm chungah a chiah hna asiloah a dang tuukhal pawl kha an tuu pawl an him nakhnga ṭha tein zohkhenh dingin a fial hna. Cun a tlaumi tuu pakhat kha a kawl. Jesuh nih mah tahchunhnak kha hmangin a biapimi biatak kong kha a kan cawnpiak: “Vancung khua i a ummi nan Pa nih hi ngakchia tete pakhatte hmanh hi tlauter a duh hna lo.”—Matt. 18:14.

10. Ezekiel 34:11-16 ningin a tlaumi tuu caah Jehovah nih zei tuah dingin dah bia aa kam?

¹⁰ Jehovah nih tuurun chungin a tlaumi “ngakchia tete” telin kan dihlak in a kan dawt. Pathian nih profet Ezekiel hmangin a tlaumi a tuu pawl kha ka kawl hna lai i amah he a ṭhami pehtlaihnak ngeih ṭhan awkah ka bawmh hna lai tiah bia aa kam. Cun a tuu pawl kha ka khamh hna lai tiah a ti. Tuu pakhat a tlau ahcun Israel tuukhal pakhat nih a tuah bantukin Pathian nih ka tuah lai tiah a ti. (Ezekiel 34:11-16 rel.) A hmasa bik ah tuukhal nih a tuu kawl awkah a caan le thazaang tampi a hman a hau. A tlaumi a tuu kha a hmuh ṭhan tikah tuurun  sinah a rak kirpi ṭhan lai. Tuu cu hma a put asiloah a rawl a ṭam ahcun a tha a dermi tuu kha dawtnak in a bawmh awk, a hma a menpiak awk, a cawi awk le rawl a pek awk a si. ‘Pathian tuurun’ a zohkhenhtu Khrihfa upa hna nih Khrihfabu he aa hlatmi hna kha cu bantuk lam in an bawmh ve hna awk a si. (1 Pet. 5:2, 3) Khrihfa upa pawl nih a tlaumi tuu kha an kawl hna i tuurun ah an kir ṭhan nakhnga an bawmh hna. Cun thlarau lei ah an herhmi an bawmh hnanak thawngin an cungah dawtnak kha an langhter. *

11. Tuukhal ṭha nih zeidah a hngalhthiam?

¹¹ Tuukhal ṭha nih cun a tlaumi tuu pawl kha a hngalhthiampiak hna. Tuu pakhat nih tuurun kha a kaltak ahcun tuukhal nih puarhrangpi in a pehtlai lai lo. Jehovah nih caan tawite chung a sinin lam a pialmi a salle cheukhat bawmh awkah zohchunhawk ṭha a chiahmi kong kha ruathmanh.

12. Jehovah nih Jonah kha zeitindah a rak pehtlaih?

¹² Profet Jonah nih a rian kha a rak tliktak. Asinain Jehovah cu Jonah cungah a thin a rak hung colh lo. Tuukhal ṭha bantukin Jehovah nih a khamh i a rian a liim khawh nakhnga a herhmi thazaang a hmuh ṭhan nakhnga a rak bawmh. (Jonah 2:7; 3:1, 2) Mah hnuah, Pathian nih minung nunnak a sunlawi ning kong kha a hngalhthiam nakhnga umruang hmangin a rak bawmh. (Jonah 4:10, 11) Mah in zeidah kan cawn khawh? Khrihfa upa hna zong a cawlcang ti lomi hna cungah an lung a dong colh lo. Mah canah Khrihfa upa pawl nih tuu pakhat tuurun he aa hlatnak a ruang kha hngalhthiam awkah an i zuam. Cun Jehovah sin an kir ṭhan tik zongah Khrihfa upa hna nih an cungah dawtnak le siaherhnak an langhter peng.

13. Jehovah nih Salm 73 a ṭialtu pa a lehrulh ningin zeidah kan cawn khawh?

¹³ Salm 73 a ṭialtu cu mi ṭhalo pawl an ṭhanchomi a hmuh tikah a lung a rak dong. Pathian duhnak tuah cu a phumi a si maw tiah biahalnak a rak tuah. (Salm 73:12, 13, 16) Jehovah nih zeitindah a lehrulh? Pathian nih mah pa kha mawhchiat loin Baibal tu ah mah kong kha a rak ṭialter. A donghnak ah salm caṭialtu nih  Jehovah he hawikom si nakin a ṭha deuhmi zei thil hmanh a um lo ti kha a hun hngalh. (Salm 73:23, 24, 26, 28) Zeidah kan cawn khawh? Khrihfa upa pawl nih Jehovah rian ṭuannak in hmuhmi ṭhathnemhnak he aa tlaiin biahalnak a tuahmi hna kha an mawhchiat colh hna awk a si lo. Mawhchiat canah Khrihfa upa pawl nih zeicah mah bia kha an chim i zeicah cutin thil an tuah timi kong tu kha hngalhthiam awkah an i zuam awk a si. Cun anmah thazaang pek awkah Khrihfa upa pawl nih Baibal zong an hman khawh.

14. Elijah nih zeicah bawmhnak a herh, Jehovah nih zeitindah a rak bawmh?

¹⁴ Profet Elijah cu Siangpahrangnu Jezebel sinin a rak zam. (1 Siang. 19:1-3) Jehovah caah profet pakhat in rian a ṭuanmi ahohmanh an um ti lo tiah a ruah i amah a ṭuanmi rian zong kha man a ngei ti lo tiah a rak ruah. Cucaah Elijah cu a lungre a thei tuk i thih hmanh a rak duh. (1 Siang. 19:4, 10) Jehovah nih Elijah kha mawhchiat canah amah lawng a tangmi a si lo ti kha a hngalhter. Mah tikah Pathian ṭhawnnak kha aa bochan khawh i a ṭuan awk rian tampi a um ti zong a hun hngalh. Jehovah nih Elijah lungretheihnak kong kha ṭha tein a ngaihpiak i rian thar zong a rak pek. (1 Siang. 19:11-16, 18) Mah in zeidah kan cawn khawh? Kan dihlak in a hleiin Khrihfa upa hna nih Jehovah tuu pawl kha zaangfahnak he an pehtlaih hna awk a si. Mi pakhat nih a thinhunnak bia a chim tik asiloah Jehovah zaangfahnak hmuh awkah kaa tlak lo tiah a ruah tikah Khrihfa upa nih a intuarnak a chimmi kha an ngaihpiak lai. Cun Jehovah nih a tlaumi a  tuu zeitluk in dah a sunsak ti kha a zumh nakhnga an i zuam awk a si.

15. Johan 6:39 ningin Jesuh nih a Pa tuu pawl kha zeitindah a hmuh hna?

¹⁵ Jehovah nih a tlaumi a tuu kong he aa tlaiin zeitindah hmu hna seh ti a kan duh? Jesuh nun ning in kan cawn khawh. Jehovah tuu pawl cu Jehovah caah a sunglawimi an si ti kha Jesuh nih a hngalh. Cucaah Jesuh nih “Israel mi lak i a tlaumi tuu hna” kha Jehovah sin an kir ṭhan nakhnga a tuah khawhmi thil vialte kha a tuah dih. (Matt. 15:24; Luka 19:9, 10) Jesuh cu tuukhal ṭha a si caah Jehovah tuu pawl an tlau nakhnga lo a tuah khawhmi thil vialte kha a rak tuah.—Johan 6:39 rel.

16-17. Khrihfa upa pawl nih Khrihfa bu he aa hlatmi unau pawl bawmhnak kong he aa tlaiin zeitindah an ruah awk a si? (“ A Tlaumi Tuu Pakhat A Intuar Ning” timi rinli kulh ah zoh.)

¹⁶ Lamkaltu Paul nih Efesa khua i Khrihfa upa pawl kha Jesuh nunning i zohchunh awkah a forh hna. “A dermi kha kan bawmh hna awk a si ti cu kaan hmuhsak cang hna i Bawipa Jesuh zong nih khan zeitindah a rak ti ti ahcun, ‘Pek lei ah hin hmuh lei nakin lunglawmhnak a um deuh,’ a rak ti; cucu kan philh lo awk a si tiah a ti.” (Lam. 20:17, 35) Mah Baibal caang nih Khrihfa upa hna cu Jehovah tuu pawl zohkhenh awkah a biapi tukmi rian an ngei ti kha a langhter. Spain ah a ummi Khrihfa upa Salvador nih hitin a ti: “Jehovah nih a tlaumi a tuu pawl zeitlukin dah a zohkhenh hna timi kong ka ruah tikah anmah bawmh awkah ka tuah khawhmi thil vialte kha tuah dih dingin a ka forh. Thlaraulei tuukhal pakhat in Jehovah nih anmah pawl zohkhenhter a ka duh ti kha ka hngalh.”

¹⁷ Hi capar ah langhtermi lam a pialmi vialte hna cu Jehovah sinah kir ṭhan dingin bawmh an si. Atu zongah lam a tlaumi tampi nih cutin tuah an duh ve. A hnu capar ah Jehovah sin an kir ṭhan nakhnga mah unau pawl kan bawmh khawh hna ning kong a dikthliar kha kan i ruah hna lai.