1-2. Jehovah Tehte Hna caah zei kong dah a biapi tuk?

TUCHAN ah Pathian cungnung bik a sinak le a min thianternak kong he aa tlaiin a biapi tukmi thil sining kan tong. Jehovah Tehte a simi kannih nih mah lungthawh awk ngai a simi a kong hna kha i ruah kan duh. Asinain Pathian cungnung bik a sinak le a min thianternak cu aa pehtlai lo tinak a si maw? A si lo.

² Kan dihlak in Pathian min thianter a hau ti kha kan hngalh. Mah lengah Jehovah cungnung bik a sinak asiloah a uk ning cu a ṭha bikmi a si timi kong zong kha kan cawn. Cucaah mah a kong pahnih cu a biapi tukmi an si.

3. Jehovah min ah zeidah aa tel?

³ Jehovah min ah a uk ning i telin Pathian kong he aa tlaimi a dihlak aa tel. Cucaah Jehovah min thianter cu a biapi tukmi a si tiah kan chim tikah Jehovah uk ning cu a ṭha bikmi a si tiah kan chimmi bantuk a si. Jehovah min cu lianngan bik Uktu a sinak he aa pehtlaimi a si.—“ A Biapi Tukmi Kongkau Hna” timi rinli kulh ah zoh.

4. Pathian min kong he aa tlaiin Salm 135:13 nih zeitindah a chim, hi capar ah zei biahalnak a phi dah kan theih hna lai?

⁴ Jehovah min cu aa thleidang tukmi a si. (Salm 135:13 rel.) Zeicah Pathian min cu a biapit tuk? Zeitindah thangchiat a rak si hmasa bik? Pathian nih a min kha zeitindah a thianter? Cun a min runvennak ah zeitindah kan bawmh khawh? Mah biahalnak a phi kha i ruah hna u sih.

5. Pathian min thianter a hau ti an theih tikah mi cheukhat nih zei biahalnak dah an tuah khawh men?

⁵ “Na min thiang cu upat si ko seh.” (Matt. 6:9) Jesuh nih thla kan cam tikah mah kong kha a biapi bik in kan telh awk a si tiah a ti. Asinain Jesuh chimmi bia cu zei sullam dah a si? Thil pakhatkhat thianter timi cu thiang tein tuah asiloah thiang tein  chiah kha a si. Asinain mi cheukhat nih ‘Jehovah min cu a thiang ciami a si ko lo maw?’ tiah biahalnak an tuah men lai. Mah biahalnak leh khawh awkah a min ah zeidah aa tel ti kha ṭha tein kan ruah a hau.

6. Zeinihdah min kha man a ngeihter?

⁶ Min timi cu catlap in ṭialmi asiloah auhnak men lawng a si lo. Baibal chimmi hi i cinken: “Min ṭhat maw chawva tampi dah naa thim lai, ti na si ahcun, min ṭhat kha vaa thim deuh.” (Ptb. 22:1; Pct. 7:1) Zeicah min cu a biapit tuk? Zeicahtiah mah ah kan konglam le midang nih an kan hmuh ning hna aa tel caah a si. Cucaah catlap cungah ṭialmi kan min asiloah a kan auh ning cu a biapi bikmi a si lo. A biapi bikmi cu kan min an hmuh tik asiloah an theih tikah midang nih zeitindah an kan ruah asiloah an kan hmuh ti kha a si.

7. Mi nih Pathian min kha zeitindah an doh?

⁷ Mi nih Jehovah kong he aa tlaiin lihbia an chim tikah a min thiang an dohmi a si. A min thiang an doh tikah a min hrawh awkah an i zuammi a si. A hmasa bik minu le mipa ser an si tlawmpal ah Pathian min cu a voikhatnak thangchiat le doh a rak si. Mah dohnak in kan cawn khawhmi kong kha i ruah hna hmanh u sih.

8. Adam le Evi nih zeidah an hngalh, a dang zei biahalnak dah kan i hal khawh?

⁸ Adam le Evi nih Pathian min cu Jehovah a si ti kha an hngalh, cun a kong he aa tlaiin a biapimi thil tampi zong kha an hngalh. Tahchunhnak ah, Jehovah cu Sertu, nunnak petu, aa dawh tukmi Paradis inn a petu le a tlingmi innchunghawi a petu hna a si kha an hngalh. (Gen. 1:26-28; 2:18) Asinain Jehovah nih a tuahpiakmi hna thil vialte kong kha an ruat zungzal maw? Jehovah an dawtnak le a cungah an i lawmhnak kha an ṭhanter zungzal maw? Pathian ral nih a hneksak hna tikah mah a phi cu a hung fiang.

9. Genesis 2:16, 17 le 3:1-5 ningin Jehovah nih hmasa bik nupa hna kha zeidah a chimh hna, Satan nih zeitindah biatak kha a merh?

⁹ Genesis 2:16, 17 le 3:1-5 rel. Satan nih rul hmangin Evi kha hitin biahalnak a tuah: “Dum chung i a ummi thingthei hi a zeihmanh nan ei lai lo tiah Pathian nih aan ti taktak hna maw?” Satan biahalnak ah Pathian kong lihbia aa tel,  cucaah Evi nih Pathian kong he aa tlaiin a ṭhatlonak leiin ruahnak a hun ngei. Pathian nih thingthei pakhat dah ti lo cu zei bantuk thingthei paoh nan ei khawh ko tiah a ti hna. Adam le Evi nih thingkung a phunphun i a thei tampi kha an ei khawh ko. (Gen. 2:9) Cucaah Jehovah cu a siang tukmi a si ti cu a fiang ko. Asinain Pathian nih Adam le Evi kha thingkung pakhat i a thei tu cu nan ei lai lo tiah a ti hna. Cucaah Satan nih biatak kha merh in biahalnak a tuah. Satan biahalnak nih Pathian cu a siang lomi a rak lawhter. Mah ruangah Evi nih ‘Pathian nih thilṭha a ka pe duh lo’ tiah a ruah khawh men.

10. Satan nih Pathian min kha direct in zeitindah a rak thangchiat, a phichuak cu zeidah a si?

¹⁰ Satan nih biahalnak a tuah lioah Evi nih Jehovah nawl a rak ngaih rih ko. Pathian chimmi kong kha Satan sinah fiang tein a rak chimh. Cun mah thingkung cu a tongh zong kan tongh awk a si lo tiah a ti chap. Pathian ralrin peknak kha zei rel loin kan um ahcun kan thi lai ti kha a hngalh. Asinain Satan nih “cucu a hmaan lo; nan thi lai lo” tiah a ti. (Gen. 3:2-4) Satan nih Evi sinah Jehovah cu lih a chimmi a si tiah a tinak thawngin Pathian kha direct in a thang a rak chiat. Cuticun Satan cu khuachia asiloah thangchiattu a hung si. Evi cu hlen a si caah Satan kha a rak zumh. (1 Tim. 2:14) Evi nih Jehovah nakin Satan kha a rak zumh deuh. Mah nih Evi kha fawi teiin a ṭhalo tukmi biakhiahnak a rak tuahter. Cucaah Jehovah nawl ngaih lo awkah bia a rak khiah i Jehovah nih a thlauhmi hna thingthei kha a rak ei. Mah hnuah Adam zong kha a pek ve.—Gen. 3:6.

11. Hmasa bik kan nu le kan pa nih zeidah an rak tuah, asinain zeidah an rak tuah lo?

¹¹ Evi nih Satan cu zeitindah a leh awk a si ti kha chikkhat in ruat ta hmanh. Hitin a leh tiah na mitthlam ah cuanter hmanh: “Aho na si kha kaan hngal lo, asinain ka Pa, Jehovah cu ka hngalh, cun amah cu ka dawt i ka zumh. Kan ngeihmi vialte cu amah nih a kan pekmi a si. Zeitindah a kong kha a chiatnak in na chim ngam? Kal zok.” Jehovah nih a dawtmi a fanu sinin cu bantuk bia hna kha thei sehlaw zeitlukin dah aa nuamh lai. (Ptb. 27:11) Evi cu Jehovah cungah a hmunmi dawtnak a ngei lo; Adam zong nih mah dawtnak kha a langhter ve lo. An Pa cungah cu bantuk dawtnak an ngeih lo caah Adam le Evi nih Pathian min thangchiat a sinak kha an rak kilveng kho lo.

12. Satan nih Evi lungthin chungah lunghrinhnak thlaici kha zeitindah a vorh, Adam le Evi nih zeidah an rak tuah lo?

¹² Kan hngalh cang bantukin Satan nih Jehovah cu a ṭhami Pa a si ma, si lo timi kong he aa tlaiin Evi nih lunghrinhnak a ngeih nakhnga aa zuamnak thawngin Pathian min kha a rak doh. Adam le Evi nih Satan chimmi lihbia kha doh in Jehovah min kha an rak kilveng lo. Mah nih Satan bia ngaih awk le an Pa ralchanh awkah a fawiter. Tuchan zongah Satan nih cu bantuk lam kha a hman. Satan nih Jehovah min a thangchiatnak thawngin Pathian kha a doh. Satan lihbia a zummi hna caah Jehovah i a dingmi uknak kha ralchanh awkah a fawiter.

13. Ezekiel 36:23 nih Baibal ah a ummi a biapimi a kong kha zeitindah a langhter?

¹³ Jehovah nih cu bantuk thangchiatnak kong he aa tlaiin zeihmanh tuah loin a um maw? A um lo. Eden dum ah Pathian kong he aa tlaiin thangchiat a simi cu a hmaan lomi a si ti langhter awkah Jehovah nih a tuahmi kong kha Baibal ah a langhter. (Gen. 3:15) Cucaah Baibal ah a ummi a biapimi a kong kha a tawinak in hitin kan langhter khawh: A Fapa nih a uk dingmi Pennak thawngin le vawlei ah dinnak le daihnak a umter lainak thawngin Jehovah nih a min kha a thianter. Jehovah nih a min thianternak caah rian a ṭuan ning hngalhthiam awkah Baibal ah aa telmi a konglam hna nih a kan bawmh.—Ezekiel 36:23 rel.

14. Jehovah nih Eden dum ah a min thangchiat a si tikah zeitindah a lehrulh?

¹⁴ Jehovah tinhnak a tlin nakhnga lo Satan nih a tuah khawhmi paoh kha a tuah dih. Asinain Satan cu a sung lengmang. Baibal nih Jehovah nih zeitindah thil a tuah timi kong kha a langhter. Mah nih Jehovah Pathian bantuk ahohmanh an um lo ti kha a langhter. Ralchanhtu Satan le amah lei ah a ṭangmi hna nih Jehovah lung an fahter tuk ti cu a hmaan ko. (Salm 78:40) Asinain Jehovah nih mah zuamcawhnak kha fimnak, lungsaunak le dinnnak in a rak tawnghtham. Cun a liannganmi a ṭhawnnak zong kha lam tampi in a rak langhter. A biapi bikmi cu a tuahmi thil vialte ah dawtnak a langhtermi kha a si. (1 Johan 4:8) Jehovah cu a min thianternak caah rian a ṭuan zungzal.

15. Tuchan ah Satan nih Pathian min kha zeitindah a thangchiat, a phichuak cu zeidah a si?

¹⁵ Tuchan tiang Satan nih Pathian min kha a thangchiat peng. Pathian cu a ṭhawngmi, a dingmi le dawtnak a ngeimi a si timi kong he aa tlaiin mi nih lunghrinnak an ngeih nakhnga aa zuam. Tahchunhnak ah, Satan nih Jehovah cu Sertu a si lo tiah mi nih an zumh nakhnga aa zuam. Mi nih Pathian a um ti an zumh ahcun Pathian le a phunglam hna cu mi a khengkham tukmi asiloah a ding lomi a si tiah an zumh nakhnga a lem hna. Jehovah cu dawtnak a ngei lomi le hell mei in mi a hremmi, a puarhrang tukmi Pathian a si ti hmanh in a cawnpiak hna. Mi nih mah thangchiatnak kha an  zumh tikah Jehovah i a dingmi uknak doh cu an caah a hung fawi. Hrawh a si hlang tiang Satan nih Jehovah kha a thangchiat peng ko lai i Pathian he naa hlat ve nakhnga aa zuam zungzal ko lai. Satan cu a hlawh a tling lai maw?

16. Adam le Evi nih an rak tuah lomi zei thil dah na tuah khawh?

¹⁶ Jehovah nih a tling lomi minung kha a min thianter awkah nawl a awnh hna. Cucaah Adam le Evi nih an rak tuah lomi thil kha na tuah khawh. Vawlei cu Jehovah min a thangchiatmi minung in an khat ko nain Jehovah min kha na kilven khawh i mi pawl sinah Jehovah cu a thiangmi, a dingmi, a ṭhami le dawtnak a ngeimi a si timi kong kha na chimh khawh hna. (Isa. 29:23) Pathian uknak kha na bawmh khawh. Jehovah uknak lawng hi a ding bikmi a si i mah lawng nih sermi thil vialte caah daihnak le lawmhnak a chuahter khawh timi kong kha mi nih an hngalhthiam nakhnga na bawmh khawh hna.—Salm 37:9, 37; 146:5, 6, 10.

17. Mi nih a Pa min an hngalh nakhnga Jesuh nih zeitindah a tuah?

¹⁷ Jehovah min kan kilven tikah Jesuh Khrih nun ning kan i zohchunhmi a si. (Johan 17:26) Jesuh nih mi kha a Pa min hngalhter lawng si loin Jehovah cu zeibantuk Pathian dah a si timi kong zong kha a rak cawnpiak hna. Tahchunhnak ah, Jehovah cu a puarhrangmi, thil tampi hal a hmangmi, naih awkah a harmi le zaangfahnak a ngei lomi Pathian a si tiah a ruatmi Farasi pawl he Jesuh cu aa thleidang. Jesuh nih a Pa cu a tlarimi, a lung a saumi, dawtnak a ngeimi le ngaihthiam a hmangmi Pathian a si ti kha mi nih an hngalh nakhnga a rak bawmh hna. Cun Jesuh nih nifatin a nunnak ah a Pa sining kha tling tein aa zohchunhnak thawngin mi nih Jehovah an hngalh nakhnga a rak bawmh hna.—Johan 14:9.

18. Jehovah kong he aa tlaiin lihbia le thangchiatnak kha zeitindah kan leh khawh?

¹⁸ Jesuh bantukin Jehovah kong kan hngalhmi kha midang sinah kan chim khawh. Cun Jehovah cu zeitlukin dah dawtnak le zaangfahnak a ngeimi Pathian a si ti kha midang kan cawnpiak khawh hna. Cutin kan tuah tikah Jehovah kong he aa tlaiin lihbia le thangchiatnak kha kan lehmi a si. Jehovah min kha kan thianter khawh, cun midang lungthin le ruahnak zong a thian nakhnga kan tuah khawh. Cutin  tuah khawh awkah Jehovah kha kan i zohchunh khawh. Mitlinglo kan si ko nain cutin kan tuah khawh ko. (Efe. 5:1, 2) Kan biachim le kan tuahsernak in Jehovah cu zeibantuk Pathian dah a si ti kha kan langhter khawh i a min a thian nakhnga kan bawmh khawh. Mi nih Pathian kong biatak an hngalh nakhnga kan bawmh hnanak thawngin a min kha kan thianter khawh. * Cun a tling lomi minung zong nih Pathian cungah zumhfek tein um khawh a si ko ti kha kan langhter khawh.—Job 27:5.

19. Kan cawnpiaknak ah a bik in kan hmuitinh cu zeidah a si awk a si ti hngalh awkah Isaiah 63:7 nih zeitindah a kan bawmh?

¹⁹ Jehovah min thianter awkah kan tuah khawhmi a dang thil a um rih. Midang kha Baibal biatak kan cawnpiak hna tikah Pathian cungnung bik a sinak, Jehovah cu van le vawlei uktu si awkah aa tlaknak kong le mah cu a hmaan taktakmi a si ti kha a hleiin atu le atu kan chimh hna awk a si. Pathian nawlbia cawnpiak cu a biapi tukmi a si ko nain a bik in kan hmuitinh cu kan Pa a simi Jehovah an dawt nakhnga le a cungah zumh awk tlak tein an um nakhnga bawmh kha a si. Jehovah i duh a nungmi a sining pawl kan langhter lengah Jehovah tiah min a ngeimi Pathian cu zeibantuk Pathian dah a si timi kong zong kha a hleiin kan chim a hau. (Isaiah 63:7 rel.) Cutin kan cawnpiak hna ahcun Pathian cungah zumh awk tlak tein um a duhmi hna kha Pathian dawt awk le a nawl ngaih awkah kan bawmh khawh hna lai.

20. A hnu capar ah zei kong dah kan i ruah hna lai?

²⁰ Jehovah min an hngalh nakhnga le an naih nakhnga kan tuahsernak le kan cawnpiak hnanak ah zeitindah kan langhter khawh? A hnu capar ah mah biahalnak a phi kha kan i ruah hna hna lai.