KAN dihlak in Jehovah cu hi “ni hmanung bik” ni ah a miphun pawl lam a hruaitu le amah he i naih khawh awkah an herhmi a petu hna a si ti kha kan zumh. (2 Tim. 3:1) Asinain kan dihlak in Jehovah nawl kan ngaih a hau. Kan sining cu thetse ram ah a vaimi Israel mi hna he tahchunh khawh a si. Israel mi nih muko tum thawng kha an rak lehrulh.

Jehovah nih Moses kha “mi zapi kawhnak le riahhmun in thawhter hnanak caah” ngun muko pahnih a rak serter. (Nam. 10:2) Mi nih zeidah kan tuah lai ti an hngalh nakhnga tlangbawi pawl nih muko kha lam tampi in an tum. (Nam. 10:3-8) Tuchan ah Pathian mi phun pawl zong lam tampi in lamhruainak an hmu. Hi capar ah kan hmuhmi lamhruainak pathum kong, cun mah le hlanlio Israel mi hna i muko tum thawng kan tahchunh khawh ning kong kha kan i ruah hna lai. Tuchan ah Pathian miphun pawl cu pumhnak nganpi ah i pumh dingin sawm an si, cun rianpek a simi Khrihfa upa pawl nih cawnpiaknak an hmu i Khrihfabu lamhruainak kong he aa tlaiin a thar a um tik asiloah remh a si tikah lamhruainak an hmu.

Jehovah nih puan biakinn i nichuahlei luhnak ah a ummi “tonnak thlam” ah i pum hna seh ti a duh tikah tlangbawi pawl nih muko pahnih kha an tum. (Nam. 10:3) Puan biakinn velchum pali ah a ummi Israel miphun vialte nih aa khat lomi muko tum thawng kha an theih. An riahhmun le biakinn cu aa naih caah mi pawl cu caan tlawmpal chungah puan biakinn ah an phan kho. Mi cheukhat cu a hlatnak hmun ah an um caah puan biakinn an phanh khawh nakhnga caan tam deuh pek in an i zuam a hau. An umnak cu a naih ah siseh, a hlat ah siseh an dihlak in i pum hna sehlaw mah in ṭhathnemhnak hmu hna seh tiah Jehovah nih a duh.

Tuchan ah cun puan biakinn ah kan i pum ti lo nain Pathian miphun pawl cu i pumh awkah sawm kan si. Mah ah pengkomh civui le a dang special pumhnak hna aa tel i mah in a biapi tukmi lamhruainak hna kan hmuh. Vawileicung pumpi ah a ummi Jehovah miphun pawl cu mah program in ṭhatnak an hmu. Cucaah mah sawmnak a cohlangmi hna cu aa nuammi phu pakhat in hmunkhat ah an i pum. Mi cheukhat cu lamhlapi in an ra. Asinain mah sawmnak a cohlangmi hna nih an i zuam man cu a phu ti kha an hngalh.

Anmah te lawng lamhlat ah a ummi hna tah mah pumhnak in ṭhathnemhnak an hmu maw? Tuchan i sehlei fimthiamnak ruangah lamhlat i a ummi unau pawl cu, cu bantuk program in ṭhathnemhnak an hmu, cun pumhnak nganpi ah aa pum vemi bantuk in an i ruat. Tahchunhnak ah, zungpi aiawhtu pakhat nih a tlawn hna lioah Benin zung ṭengnge ah tuahmi phungchimnak  kha lungmeihol chuahnak, Sahara Thetse Ram i Niger, Arlit ah an thlah. Unau pawl le lungthawhnak a ngeimi 21 hna cu an i pum. Annih cu lam hlatpi in a rami an si i civui nganpi ah aa pummi unau 44,131 pawl i an lungrualnak kha an hmuh. Unaupa pakhat nih hitin a ti: “Mah an thlahmi phungchimnak nih a kan lawmhter tuk. Mah nih zeitlukin dah nan kan dawt ti kha a langhter.”

Israel mi tlangbawi pawl nih muko kha voikhat lawng an tum tikah “hruaitu hna, Israel phun i an lu hna” cu pumhnak ah an ra. (Nam. 10:4) Mah tikah Moses sinin lamhruainak le cawnpiaknak kha an theih khawh. Mah nih an rian a simi an miphun pawl kha zohkhenh awkah a bawmh hna lai. Mah hruaitu hna lakah pakhat na si ahcun ṭhathnemhnak hmuh awkah atu ah na tuah khawhmi poah kha tuah loin na um lai maw?

Tuchan ah Khrihfa upa pawl cu “hruaitu” an si lo, cun Pathian tuurun an zohkhenh hna tikah a uk in an uk hna lo. (1 Pet. 5:1-3) Mah canah tuurun kha a ṭha bikmi lam in an zohkhenh hna. Cucaah Pennak Rianṭuannak Tinṭan ti bantuk a dang cawnpiaknak tinṭan ah sawm an si tikah an cohlan colh. Tinṭan an kai chungah Khrihfabu kongkau he aa tlaiin hmualngei tein zohkhenh khawh ning kong kha an cawn. A phichuak cu kan dihlakin thlaraulei ah kan ṭhangcho. Mah tinṭan a kaimi na si lo hmanhah tinṭan a kaimi hna sinin ṭhathnemhnak na hmu kho ve.

Israel mi tlangbawi pawl nih a caan ah ralrin peknak muko kha an tum. Jehovah nih riahhmun in i ṭhial hna seh ti a duh kha mah muko thawng nih a langhter. (Nam. 10:5, 6) Mi pawl cu riahhmun in an i ṭhial tikah ningcang tein an i ṭhial. Asinain mah cu mi kip caah a har tukmi a si. A caan ah Israel mi cheukhat cu riahhmun in ṭhial an si tikah an duh men lai lo. Zeicah?

Mi cheukhat nih atu le atu asiloah ruahlopi in kan i ṭhial lengmang tiah an ti men lai. “Cun voi khatkhat cu minmei cu zanlei in zinglei tiang a caam.” A caan ah “nihnih a si ah, thlakhat a si ah, caan sau deuh zong a si ah” minmei cu aa ṭhial. (Nam. 9:21, 22) Riahhmun cu voi zeizat dah aa ṭhial? Nambar dal 33 ah Israel mi pawl riahhmun, hmun 40 hrawng kha a langhter.

A caan ah Isareal mi pawl nih thladem a umnak hmun ah an riahhmun kha an sak. “A kau le ṭih a nungmi ramlak” ah thladem a umnak hmun ah a ummi an riahhmun nih a lawmhter tuk hna lai. (Deut. 1:19) Cucaah ṭih a nungmi a dang hmun i ṭhial ding kong an ruah tikah an caah tukforhnak a si kho men.

An riahhmun in an i ṭhial tikah mi cheukhat cu an i ṭhial khawh nakhnga lungsau tein hngah an hau men lai. An dihlak in ralrin peknak muko tum thawng an theih tikah caankhatte ah an i ṭhial kho colh lo. Ralrin peknak muko an tummi nih nichuahlei ah a ummi Judah, Issakhar le Zebulun phun pawl cu an i ṭhial awk a si ti kha a langhter. (Nam. 2:3-7; 10:5, 6) Mah phun thum an i ṭhial dih hnuah tlangbawi pawl nih ralrin peknak muko a voi hnihnak an tum tikah thlanglei kap ah a ummi, Israel mi, phun thum hna cu an i ṭhial awk a si. Tlangbawi pawl nih riahhmun dihlak an i ṭhial dih hlan tiang cutin an tuah peng.

Nang zong bupi ah thlennak a um tikah cohlan awkah naa harh men lai. Zeicah? Zeicahtiah thlennak a tam tuk tiah na ruah caah a si men lai. Asiloah a hmasa lamhruai ning kha na duh caah thlennak an tuahmi kha na duh lo i a si men lai. Mah ruangah na lungsaunak cu hneksak a si kho men, cucaah thlennak tuah awkah a caan pe. Mah thlennak cu a harmi a lawh hmanhah kan tuah awk a simi kha kan tuah ahcun Pathian nih thluachuah a kan pek lai.

Jehovah nih Moses chan lioah pa, nu le ngakchia mi nuai tampi kha thetse ram ah lam a rak hruai hna. Pathian zohkhenhnak le lamhruainak a um lo ahcun an nung kho lai lo. Tuchan zongah Jehovah nih ṭih a nungmi donghnak caan ah lam a kan hruai. Amah he kan i naih nakhnga le kan zumhnak a feh nakhnga a kan bawmh. Cucaah kan dihlak in aa khat lomi muko tum thawng a ngaimi zumhfekmi Israel mi bantukin si ve awkah bia khiak hna u sih.