1. Jesuh zultu pawl nih mibupi kha zeidah an chimh hna?

MIBUPI cu Jerusalem lei ah an kal. Annih cu ram kip in a rami an si i holh a phunphun a hmangmi an si. Mah ni ah khuaruahhar thil cheukhat a rak cang. Judah mi cheukhat cu an sinah a rak tlawngmi hna hmanmi holh in an holh kho. Judah mi hna chimmi bia nih an khuarauh a harter hna i a hleiin lamkaltu Peter chimmi bia nih an khuaruah a harter chinchin hna. Mah ah Jesuh Khrih an zumh an langhternak thawngin khamhnak hmuh khawh a si timi kong aa tel. Mah bia nih mibupi kha an lung a suk tuk hna. Cucaah annih nih “zeidah kan tuah kun lai?” tiah biahalnak an tuah. Mah tikah Peter nih hitin a ti hna: “Tipilnak ing tuah u.”—Lam. 2:37, 38.

2. Hi capar ah zei kong dah kan i ruah hna lai? (A phaw hmanthlak zoh.)

² Mah hnuah a cangmi thil cu khuaruahhar taktak a si. Mah ni ah mi 3,000 hrawng cu tipil an ing i Khrih zultu an hung si. Mah cu Jesuh nih a zultu pawl sinah nawl a pekmi hna ka zultu ah va ser hna u timi rian a hramthawknak a si. A zultu pawl nih tuchan tiang mah rian kha an ṭuan rih. Tuchan ah suimilam tlawmpal lawng cawnpiaknak in mi pakhat kha tipil a in nakhnga kan bawm kho lai lo. Baibal a cawngmi pakhat nih tipil a in khawh nakhnga a thla asiloah a kum asiloah mahnak tam hmanh a rau men lai. Cucaah Khrih zultu a si nakhnga mi pakhat kan bawmh tikah fakpi in kan i zuam a hau. Atu ah mi pakhat he Baibal nan cawnṭi ahcun mah kha ṭha tein na hngalh ko lai. Hi capar ah Baibal na cawnpiakmi kha tipil in dingin sining a tlinh nakhnga na bawmh tikah na tuah khawhmi kong kha kan i ruah hna lai.

3. Matthai 28:19, 20 ningin Baibal a cawngmi pakhat nih tipil in dingin a ṭhancho nakhnga zeidah a tuah awk a si?

³ Baibal a cawngmi pakhat nih tipil a in hlanah Baibal cawnpiakmi ningin a zulh a hau. (Matthai 28:19, 20 rel.) A cawnmi ningin  a zulh tikah anih cu Jesuh chimmi tahchunhnak chung i lungcung ah inn a sami “mifim pa” bantuk a hung si lai. (Matt. 7:24, 25; Luka 6:47, 48) Baibal a cawngmi pakhat kha a cawnmi ningin a zulh nakhnga zeitindah kan bawmh khawh? Kan tuah khawhmi thil pathum kha i ruah hna u sih.   

4. Baibal a cawngmi pakhat kha tipil in dingin sining a tlinh nakhnga zeitindah kan bawmh khawh? (“ Baibal Na Cawnpiakmi Kha Hmuitinh Ngeih Dingin le Phanh Khawh Dingin Bawm” timi rinli kulh ah zoh.)

⁴ Baibal na cawnpiakmi nih hmuitinh a ngeih nakhnga bawm. Zeicah cutin na tuah awk a si? Mah tahchunhnak hi ruathmanh: Lamhlapi ah mawṭaw in khual na tlawn ahcun na kalnak lam i aa dawh tuknak hmun ah dirta dingin bia na khiah men lai. Cucaah na kalnak ding hmun cu a hlat tuk ko nain na lung a dong lo. Cu bantukin Baibal a cawngmi pakhat nih a phanh khawh dingmi caan tawi hmuitinh kha a chiah ahcun tipil in ding timi a hmuhtinh zong phanh khawh a si ti kha a hngalh lai. Baibal na cawnpiakmi a ṭhancho nakhnga na bawmh tikah Nunnak Kha Zungzal In I Nuamhpi! timi cauk chung i “Hmuitinh” timi kha hmang. Cawn dingmi pakhat cio i a donghnak ah a ummi hmuitinh timi kong nan i ruahnak nih Baibal na cawnpiakmi kha a cawnmi ningin zulh awkah a bawmh lai. Baibal na cawnpiakmi caah aa lo lomi hmuitinh na ngeih ahcun “A Dang” timi tangah ṭial. Baibal na cawnpiakmi nih caan tawi hmuitinh le caan sau hmuitinh a phanh khawh nakhnga i ruahṭi ṭhannak timi kha hmaan tein hmang.

5. Marka 10:17-22 ningin Jesuh nih mirum pa kha zei tuah awkah dah a fial, zeicah?

⁵ Baibal na cawnpiakmi nih a nunning a thlen nakhnga bawm. (Marka 10:17-22 rel.) A rummi pa pakhat nih a ngeihmi thilri dihlak zuar cu a caah a har lai ti kha Jesuh nih a hngalh. (Marka 10:23) Asinain Jesuh nih mah pa kha a nunning i thlen awkah a fial. Zeicah? Jesuh nih a dawt caah a si. A caan ah Baibal kan cawnpiakmi nih a herhmi thlennak tuah dingin timhcia a  si rih lo tiah kan ruah caah a cawnmi ningin zulh awkah tha kan pe men lai lo. An nunnak ah thlennak tuah dingin le mi thar i hruk dingin a caan lak a hau men lai. (Kol. 3:9, 10) Asinain Baibal na cawnpiakmi nih tuan deuh ah thlennak a tuah khawh nakhnga a herhmi thlennak kong kha na chimh colh a hau. Cutin na chimhmi nih a cungah siaherhnak na ngeih kha na langhtermi a si.—Salm 141:5; Ptb. 27:17.

6. Baibal kan cawnpiakmi kha zeicah a ruahnak kan hal awk a si?

⁶ Baibal kan cawnpiakmi kha a cawnmi kong he aa tlaiin a ruahnak kan halmi cu a biapi tukmi a si. Cutin biahalnak na tuah ahcun Baibal na cawnpiakmi nih a hngalhthiammi le a zumhmi kong kha na hngalh lai. Cutin hmaan tein na tuah ahcun cohlan awkah aa harhmi kong pawl kha i ruah awkah a fawi deuh lai. Nunnak Kha Zungzal In I Nuamhpi! timi cauk ah an ruahnak a hngalhter khomi biahalnak tampi aa tel. Tahchunhnak ah, cawn dingmi 04 ah hitin biahalnak a tuah: “A min na hman tikah Jehovah cu zeitindah a um lai tiah na ruah?” Cawn dingmi 09 ah hitin biahalnak a tuah: “Zei kong hna dah cam na duh?” A hmasa ah cun Baibal na cawnpiakmi nih mah biahalnak a phi kha leh awkah aa harh men lai. Cucaah mah cauk chung i hmanthlak le Baibal caang pawl kong kha ruah awkah na cawnpiaknak thawng in na bawmh khawh. 

7. A cang taktakmi hmuhtonnak hna kha hmualngei tein zeitindah kan hman khawh? 

⁷ Baibal na cawnpiakmi nih a tuah awk a simi kha a hngalhthiam tikah cutin a tuah khawh nakhnga a cang taktakmi hmuhtonnak kong kha hmangin tha pe. Tahchunhnak ah, Baibal na cawnpiakmi nih i pumh kha aa harh ahcun cawn dingmi 14 i “Hlathlai Chap” timi tang ah a ummi Jehovah Nih A Ka Zohkhenh timi video kha na piahpiak khawh. Nunnak Kha Zungzal In I Nuamhpi! timi cauk chungah cawn dingmi tampi a um. Cu bantuk hmuhtonnak hna kha “Tam Deuh In Hlathlai” asiloah “Hlathlai Chap” timi tang ah hmuh khawh a si. * Baibal na cawnpiakmi kha midang he tahchunh hlah. “Anih zong cutin a tuah ahcun nang zong na tuah khawh ve ko” ti bantuk biachim kha i ralring. Baibal a cawngmi nih amah tein biakhiahnak a tuah awk a si. Asinain mah video ah mi pakhat kha Baibaal cawnpiaknak pawl zulh awkah zeinihdah a bawmh timi a biapimi a kong pawl tu kha chim. A biapimi Baibal caang pakhat asiloah a rak cangmi thil cheukhat kong kha na chimh khawh. A si khawh tik paohah Jehovah nih mah mi pawl a bawmh hna ning kong kha a hleiin chim.

8. Baibal kan cawnpiakmi nih Jehovah kha a hun dawt deuh nakhnga zeitindah kan bawmh khawh?

⁸ Baibal na cawnpiakmi nih Jehovah a dawt nakhnga bawm. Zeitindah? Baibal na cawnpiakmi nih Jehovah sining ah tam deuh in lungthin a pek nakhnga caan ṭha na kawlnak thawngin a si. Baibal na cawnpiakmi nih Jehovah cu amah a dawmi hna a bawmtu, aa nuammi Pathian in a hmuh nakhnga bawm. (1 Tim. 1:11; Heb. 11:6) Baibal na cawnpiakmi kha lamhruainak a zulhnak thawngin ṭhathnemhnak a hmu lai ti hngalhter law cutin ṭhathnemhnak a hmuhmi cu Jehovah nih a dawt caah a si ti kha chim. (Isa. 48:17, 18) Baibal na cawnpiakmi nih Jehovah kha a dawt deuh tikah a herhmi thlennak tuah kha a hun duh deuh lai.—1 Johan 5:3.

9. Mark 10:29, 30 ningin mi pakhat kha tipil a ingmi zultu pakhat a hung si nakhnga mahca ṭhatnak hlawt awkah zeinihdah a bawmh khawh? 

⁹ Tipil in dingin a ṭhancho nakhnga Baibal a cawngmi pakhat nih mahca ṭhatnak tampi a  hlawt a hau lai. A hmasa ah langhtermi mirum pa bantukin Baibal a cawngmi cheukhat nih thilri chawva he aa tlaiin mahca ṭhatnak an hlawt men lai. An ṭuanmi rian cu Baibal phunglam he aa tlak lo ahcun a dang rian thar hmanh an kawl a hau kho men. Mi tampi nih Jehovah a daw lomi an hawile kha an kom ti men hna lai lo. Cheukhat cu Jehovah Tehte Hna a duh lomi an chungkhar mi hna nih an hlawt men hna lai. Jesuh nih mi cheukhat caah cu bantuk mahca ṭhatnak hlawt cu a har ti kha a hngalh. Asinain Jesuh nih amah hnu a zulmi hna kha nan lung a dong lai lo tiah bia a kamh hna. Cun annih cu dawtnak a ngeimi thlaraulei chungkhar laksawng pek an si lai. (Marka 10:29, 30 rel.) Baibal na cawnpiakmi nih mah a ṭha tukmi laksawng in ṭhathnemhnak a hmuh nakhnga zeitindah na bawmh khawh?

10. Manuel hmuhtonnak in zeidah na cawn khawh? 

¹⁰ Baibal na cawnpiakmi he nan i hawikomhnak kha fehter. Baibal na cawnpiakmi cungah siaherhnak langhter cu a biapi tukmi a si. Zeicah? Mexico ah a ummi Manuel nih a chimmi bia hi i cinken. Baibal a cawn lioah a cawnpiaktu nih a bawmh ning kong kha hitin a chim: “Baibal cawnpiaknak kan thawk hlanah a ka cawnpiaktu nih zeidah na lawh tiah a ka hal. Hrimhnak ka hmuh nakhnga le a sinah zei kong paoh ka chim nakhnga a ka bawmh. Mah nih ka cungah siaherhnak a ngei taktak timi ruahnak a ka ngeihter.” 

11. A caan kan hmanṭinak thawngin Baibal kan cawnpiakmi hna cu zeitindah ṭhathnemhnak an hmuh khawh?

¹¹ Jesuh nih a zultu pawl he a caan a hmanṭi bantukin Baibal na cawnpiakmi hna he a caan hmangṭi ve. (Johan 3:22) Aa tlak ahcun Baibal na cawnpiakmi kha na inn ah coffee dinṭi ding, rawl eiṭi dingin asiloah thla fatin chuahmi broadcasting zohṭi dingin sawm. A chungkhar pawl cu a hmaan lomi biaknak puai hna an tuah lioah Baibal na cawnpiakmi cu a li a leng men lai. Cucaah cutin na sawmmi cungah aa lawm tuk men lai. Uganda ah a ummi Kazibwe nih hitin a ti: “Baibal kan cawnmi lengah a ka cawnpiaktu he caan kan hmanṭinak in Jehovah kong kha tam deuh ka cawn khawh tiah ka  ruah. Jehovah nih a miphun pawl zeitlukin dah a zohkhenh hna ti le zeitlukin dah an i nuamh ti kha ka hmuh. Mah cu ka duhmi nunnak phun a si.”

12. Baibal cawnpiaknak ah unau dang kha zeicah kan sawm hna awk a si?

¹² Baibal cawnpiaknak ah unau dang kha sawm hna. A caan ah Baibal cawnpiaknak ah kanmah lawng asiloah unau pakhat he lawng kal cu a fawi deuh tiah kan ruah men lai. Cutin tuah cu kan caah a fawi deuh hmanhah Baibal cawnpiaknak ah unau dang kha kan sawm hna ahcun Baibal kan cawnpiakmi caah bawmtu a si lai. Moldova ah a ummi Dmitrii nih hitin a ti: “Baibal ka cawn lioah unau dang tampi cu an ra i Baibal kong he aa tlaiin aa thleidangmi lam in an ka cawnpiak. Mah nih ka cawnmi zulh khawh ning a dang lam tampi kha a ka hngalhter. Unau tampi he kan i hngalh cia cang caah a hmasa bik kaa pumh lioah ka ning a zak tuk lo.”

13. Baibal kan cawnpiakmi kha aa pumh nakhnga zeicah kan bawmh awk a si?

¹³ Baibal na cawnpiakmi kha Khrihfabu pumhnak ah i pumh dingin bawm. Zeicah? Zeicahtiah Jehovah nih amah a biami hna kha hmunkhat ah i pumh dingin nawl a pek hna i mah cu kan biaknak phunkhat a si. (Heb. 10:24, 25) Mah lengah unau pawl cu thlaraulei ah kan chungkhar an si. Kan i pumhṭi tikah inn ah a thawmi rawl kan eiṭimi bantuk a si. Baibal na cawnpiakmi kha i pumh dingin na bawmh tikah tipil a in khawh nakhnga a biapi tukmi kehlan pakhat hlan awkah na bawmhmi a si. Asinain Baibal a cawngmi caah mah kehlan hlan cu a har kho men. Nunnak Kha Zungzal In I Nuamhpi! timi cauk nih Baibal na cawnpiakmi kha a tonmi zuamcawhnak paoh tei awkah zeitindah a bawmh khawh?

14. Baibal kan cawnpiakmi kha aa pumh khawh nakhnga zeitindah thazaang kan pek khawh?

¹⁴ Baibal na cawnpiakmi thazaang pek awkah Nunnak Kha Zungzal In I Nuamhpi! timi cauk i cawn dingmi 10 kha hmang. Mah cauk chuah a si hlanah hmuhtonnak a ngeimi thawngthanhtu cheukhat kha mah cawn dingmi a kong hna kha Baibal cawnpiaknak ah hman dingin hal an si. Annih nih mah rian cu hlawh a tling tuk i Baibal an cawnpiakmi hna zong i pumh dingin kan bawmh khawh hna tiah an ti. Baibal na cawnpiakmi kha cawn dingmi 10 nan phanh hlan zongah i pumh dingin sawm. Aa pumh khawh colh nakhnga sawm law hmaan tein i pumh awkah tha pe. Baibal a cawngmi hna cu buaibainak a phunphun an ngei. Cucaah Baibal na cawnpiakmi i a herhmi cungah lungthin na pek ahcun a herhmi bawmhnak kha na pek khawh lai. Aa pumh khawh colh lo hmanhah na lungdong hlah. Lungsau tein um law aa pumh nakhnga sawm peng.

15. Baibal kan cawnpiakmi nih zei bantuk ṭihnak dah a ngeih khawh men?

¹⁵ Jehovah Tehte pakhat si dingin ṭihnak na rak ngeihmi kha naa cinken ti maw? Innkhat hnu innkhat phungchimnak ah zeitikhmanh ah kaa tel kho bal lai lo tiah na rak ruah men lai. Asiloah na chungkhar le na hawile nih an in ralchanh lai kha na ṭih men lai. Cutin na rak si ahcun Baibal na cawnpiakmi i a intuarnak kha na hngalhthiam khawh. Jesuh nih mi cheukhat cu mah bantuk ṭihnak an ngei lai tiah a ti. Asinain Jesuh nih a zultu pawl kha mah ṭihnak ruangah Jehovah an biakmi kha ngol lo dingin tha a pek hna. (Matt. 10:16, 17, 27, 28) Jesuh nih a zultu pawl kha ṭihnak ngeih lo dingin zeitindah a bawmh hna? Jesuh bantukin zeitindah na tuah khawh? 

16. Baibal kan cawnpiakmi nih midang sinah a zumhnak kong a chim nakhnga zeitindah kan cawnpiak khawh?

¹⁶ Baibal na cawnpiakmi kha midang sinah a zumhnak kong chim dingin cawnpiak. Jesuh zultu pawl cu phungchim dingin thlah an si tikah  an thin a rak phang men lai. Asinain Jesuh nih khoika hmun ah nan chim lai ti le zei kong dah nan chim lai ti kha a chimh hnanak thawngin a rak bawmh hna. (Matt. 10:5-7) Jesuh kha zeitindah naa zohchunh khawh? Baibal na cawnpiakmi nih khoika hmun ah dah ka chim lai ti kha a hngalh nakhnga bawm. Tahchunhnak ah, Baibal na cawnpiakmi kha Baibal biatak kong a cawnnak thawngin ṭhathnemhnak a hmumi mi pakhatkhat na hngal hna maw tiah hal. Cun midang sinah a a sawhsawh tein biatak kong chim ning na hmuhsaknak thawngin i timhtuah chung awkah bawm. Aa tlak ahcun Nunnak Kha Zungzal In I Nuamhpi! timi cauk chung i “Mi Cheukhat Chimmi” le “Mi Pakhat Hal Khawhmi” timi hmangin na bawmh khawh. Cutin na bawmh tikah na cawnpiakmi nih Baibal hmangin a sawhsawh te le hmual a ngeimi a phi a pek khawh nakhnga a bik in cawnpiak.

17. Baibal kan cawnpiakmi nih Jehovah aa bochan nakhnga kan bawmh tikah Matthai 10:19, 20, 29-31 kha zeitindah kan hman khawh?

¹⁷ Baibal na cawnpiakmi nih Jehovah aa bochan nakhnga bawm. Jesuh nih a zultu pawl kha Jehovah nih aan dawt hna caah aan bawmh hna lai tiah a ti hna. (Matthai 10:19, 20, 29-31 rel.) Anih zong Jehovah nih a bawmh ve lai ti kha Baibal na cawnpiakmi kha hngalhter. A hmuitinh kong he aa tlaiin thla nan camṭinak thawngin Jehovah kha i bochan awkah na bawmh khawh. Poland ah a ummi Franciszek nih hitin a ti: “Baibal a ka cawnpiaktu nih a thlacamnak ah ka hmuitinh kong kha a telh lengmang. Jehovah nih Baibal a ka cawnpiaktu i a thlacamnak a lehmi ka hmuh tikah thla ka cam colh ve. Pumhnak le civui hna ah kaa pumh khawh nakhnga ka rian thar in khunh lak awkah thla ka cam tikah Jehovah nih a ka bawmh tiah ka ruah.”

18. Cawnpiaktu hna i an rian kong he aa tlaiin Jehovah nih zeitindah a ruah?

¹⁸ Jehovah cu Baibal kan cawnpiakmi hna cungah zawnruahnak taktak a ngei. Mi nih amah an naih nakhnga le an dawt nakhnga cawnpiaktu hna i an i zuamnak kha a sunsak. (Isa. 52:7) Atu ah Baibal cawnpiakmi na ngeih lo hmanhah a dang unau pawl i Baibal cawnpiaknak an tuahmi ah na zulh hnanak thawngin Baibal a cawngmi hna kha tipil in dingin ṭhancho awkah na bawmh khawh hna.