1. Jehovah nih pakhat cio kan caah zeidah a kan tuahpiak?

JEHOVAH nih kan dihlak in a sinah a kan hnuh. (Johan 6:44) Mah cu zei sullam dah a si ti kha ruathmanh. Jehovah nih vawleicung ah a ummi mi nuai tampi kha ṭha tein a dothlat hna caah lungthin ṭha na ngeihmi le amah na dawtmi kha a hngalh. Mah cu Jehovah caah a sunglawi tukmi a si. (1 Chan. 28:9) Jehovah nih aan hngalh i aan theihthiam i aan dawt. Mah cu hnemtu taktak a si.

2. Jehovah cu a tuu pakhat kip cio cungah zawnruahnak a ngei ti kha Jesuh hmanmi tahchunhnak nih zeitindah a langhter?

² Jehovah nih ṭha tein aan zohkhenh bantukin Khrihfa unau dihlak zong kha a zohkhenh hna. Mah kong kha hngalhthiam awkah Jesuh nih Jehovah kha tuukhal pakhat he a tahchunh. Tuu 100 a ngeimi pa nih a tuu pakhat a tlau ahcun zeidah a tuah lai? “Tlang cungah a tlongmi sawm kua le pakua cu a kaltak hna lai i a tlaumi cu a kawl lai.” A hmuh tikah a cung ah a thin a hung lai lo i aa lawm tuk lai. Zeidah a chim duhmi a si? Tuu dihlak cu Jehovah caah a sunglawimi an si. Jesuh nih hitin a ti: “Cu bantukte cun, vancung khua i a ummi nan Pa nih, hi ngakchia tete pakhatte hmanh hi tlauter a duh hna lo.”—Matt. 18:12-14.

3. Hi capar ah zei kong dah kan i ruah hna lai?

³ Kan unau pawl lung a donghtertu si cu ahohmanh nih kan duh lai lo. Cucaah midang tlukrilhter kha zeitindah kan hrial khawh? Mi pakhat nih kan lung a kan fahter ahcun zeidah kan tuah khawh? Hi capar ah mah biahalnak a phi kha kan theih hna lai. Asinain Matthai 18 ah a langhtermi “hi ngakchia tete” timi kong kha tam deuh in i ruah hmasa hna u sih.

4. “Hi ngakchia tete” timi cu ahote dah an si?

⁴ “Hi ngakchia tete” timi cu kum khua aa khat lomi Jesuh zultu  dihlak kha an si. Jesuh cawnpiakmi kong kha lungtho tein ngaih an duh caah annih cu “ngakchia bantuk” an si. (Matt. 18:3) Annih cu hnulei sining, nunphung le hmuhnak aa khat lomi an si ko nain an dihlak in Jesuh Khrih an zumh kha an langhter. Cucaah Jesuh nih a dawt tuk hna.—Matt. 18:6; Johan 1:12.

5. Mi pakhat nih a miphun pakhat kha fahnak a pek asiloah a tlukrilhter ahcun Jehovah cu zeitindah a um?

⁵ “Hi ngakchia tete” hna cu an dihlak in Jehovah caah a sunglawimi an si. Jehovah intuarnak kong hngalhthiam awkah na fale cungah na intuarnak kong kha ruathmanh. Annih cu kan caah a sunglawimi an si. Upa bantukin thazaang, hmuhtonnak le fimnak an ngeih lo caah annih kha kilven kan duh hna. Midang nih fahnak an pekmi hna kha hmuh kan duh lo i a hleiin mi pakhat nih fahnak an pek hna tikah kan thin hmanh a hung. Cu bantuk lam in Jehovah zong nih kilven a kan duh i mi pakhat nih a miphun pakhat kha fahnak a pek asiloah a tlukrilhter ahcun a thin hmanh a hung.—Isa. 63:9; Mar. 9:42.

6. Vawlei mi hna nih 1 Korin 1:26-29 ningin Jesuh zultu pawl kha zeitindah an hmuh hna?

⁶ Jesuh zultu pawl “ngakchia tete” he an i lawhnak a dang lamkhat cu zeidah a si? Vawlei nih ahote kha dah a biapimi in a hmuh hna? A rummi, a min a thangmi le ṭhawnnak a ngeimi hna kha an si. Asinain Jesuh zultu pawl cu cutin an si lo. Cucaah vawlei nih annih kha a biapi lomi, a nautami le “ngakchia tete” in an hmuh hna. (1 Korin 1:26-29 rel.) Asinain Jehovah nih cun cutin a hmu hna lo.

7. Unau dang kong he aa tlaiin Jehovah nih zei bantuk ruahnak dah ngei hna seh ti a kan duh?

⁷ Jehovah nih kum saupi amah a bia cangmi an si ah asiloah biatak a hngalkami an si ah a salle dihlak kha a dawt hna. Jehovah caah kan unau pawl cu a biapimi an si caah kanmah ca zongah a biapimi an si ve awk a si. Cucaah anmah lak i mi cheukhat lawng si loin ‘zumhnak i kan unau a simi paoh kha dawt’ kan duh hna. (1 Pet. 2:17) Anmah zohkhenh awk le kilven awkah zei thil paoah kha lungtho tein kan tuah awk a si. Mi pakhat kha a lung kan fahter asiloah a thin kan hunter ahcun aa titer tuk, a kan ngaihthiam ding a si asiloah mah kong kha a philh awk a si tiah kan ruah awk a si lo. Mi cheukhat cu zeicah an thin a hun khawh men? An hnulei sining ruang ah unau cheukhat cu midang nakin kan nauta deuh timi ruahnak an ngei kho men. Biatak a hngalkami hna nih midang tlinlonak tawnghtham ning kha an hngal rih men lai lo. Zei bantuk thil sining a si hmanhah kan tuah khawhmi a hmaanmi thil kha kan tuah peng awk a si. Mah lengah midang cungah atule atu a thin a hungmi pakhat nih a thinhunnak kha i sum awkah kaa zuam a hau ti kha a hngalh a hau. Cutin a tuah ahcun aa nuam lai i unau dang he zong a ṭhami pehtlaihnak an ngei lai.

8. Zei a laar ngaimi ruahnak nih dah Jesuh zultu pawl kha a rak iap hna?

⁸ Jesuh nih “hi ngakchia tete” timi kong kha zeicah a chim? A zultu pawl nih hitin biahalnak an rak tuah: “Vancung Pennak ah ahodah a ngan bik?” (Matt. 18:1) Judah mi tampi nih midang nih a biapimi in kan hmu hna seh ti an duh. Baibal lei mifim pakhat nih hitin a ti: “Midang sinin upatnak le minṭhatnak hmuh cu an caah a biapi bikmi a si.”

9. Jesuh zultu pawl nih zeidah an tuah awk a si?

⁹ Jesuh nih Judah mi tampi cu midang nakin a biapi deuhmi si awkah an i zuam caah a zultu pawl zong nih cu bantuk ruahnak kha fakpi in an doh a hau ti kha a hngalh. Cucaah hitin a ti hna: “Nan lak i a ngan bik kha a ngakchia bik bantuk a si awk a si i hruaitu a simi kha sal  bantuk a si awk a si.” (Luka 22:26) “Mi dang nakin ka ṭha deuh” timi ruahnak kan ngeih lo tikah “ngakchia bik” bantuk ziaza kan ngeihmi a si. (Fil. 2:3) Mah ziaza kha kan ṭhanter deuh ahcun midang kha kan tlukrilhter hna lai lo.

10. Paul nih kan zulh awk a simi zei ruahnak dah a kan cheuh?

¹⁰ Kan unau pawl cu lamkhatkhat asiloah a dang lam in kanmah nakin an ṭha deuh. An ngeihmi ziaza ṭha ah lungthin kan pek ahcun cutin ruah cu a fawi lai. Lamkaltu Paul nih Korin mi hna ruahnak a cheuhmi hna kha kan zulh awk a si. Hitin a ti: “Midang nakin cungnung deuh ah ahonih dah aan ser? Pathian pek a si lomi na ngeihmi zeital a um maw? Cucaah cun nan hmuhmi cu a lak in hei hmu hlah u law cu bang, zeitindah nan i porhlawt khawh lai?” (1 Kor. 4:7) Cucaah midang nih zohchomi si kha kan duh awk a si lo asiloah midang nakin ka ṭha deuh timi ruahnak kha kan ngeih awk a si lo. Tahchunhnak ah, unaupa pakhat nih a ṭha tukmi phung a chim asiloah unaunu pakhat nih Baibal cawnpiaknak a thawk khawh ahcun cutin an tuah khawh ruangah Jehovah kha an thangṭhat awk a si.

11. Jesuh nih siangpahrang pa le a salpa kong tahchunhnak in zeidah a kan cawnpiak?

¹¹ Jesuh nih a zultu pawl kha midang tlukrilhternak kong he aa tlaiin ralrin a pek hna hnuah siangpahrang pa le a salpa kong tahchunhnak kha a chimh hna. Siangpahrang pa nih leiba a cham kho ti lomi a salpa kha a ngaihthiam. A hnuah mah a salpa nih leiba tlawmte a batu a sal hawi kha a ngaithiam duh lo. A donghnak ah, siangpahrang pa nih zaangfahnak a ngei lomi mah a salpa kha thong ah a rak thlak. Mah in zeidah kan cawn khawh? Jesuh nih hitin a ti: “Nannih nih nan u nan nau kha nan lungchung taktak in nan ngaihthiam hna lo ahcun cu bantuk cun vancung khua i a ummi ka Pa nih nannih zong cu aan tuah ve hna lai.”—Matt. 18:21-35.

12. Ngaihthiam duh loin kan um ahcun midang kha zeitindah harnak kan pek khawh hna?

¹² Mah salpa tuahsernak nih amah lawng si loin midang zong kha harnak a pek hna. Pakhatnak, a sal hawi cungah zaangfahnak ngei loin “thong ah khan a leiba a cham dih hlantiang” a thlaknak thawngin harnak a pek. Pahnihnak, a tuahsernak a hngalmi midang a sal hawile zong kha harnak a pek hna. Cun mah kha “a sal hawi midang nih khan an hmuh tikah an ing a puang ngaingai.” Cu bantukin kan tuahsernak nih midang kha a hnorsuan khawh hna. Mi pakhat nih a ṭhatlonaklei in a kan pehtlaih tikah kan ngaihthiam lo ahcun zeidah a cang kho? Pakhatnak, kan ngaihthiam duh lonak thawngin, zei rel loin kan umnak thawngin le a cungah dawtnak kan langhter lonak thawngin harnak kan pek. Pahnihnak, amah he kan i rem lomi kha Khrihfabu i unau dang pawl nih an hngalh tikah lungnuam loin kan umter hna.

13. Hmaikal pakhat hmuhtonnak in zeidah na cawn khawh?

¹³ Unau pawl kha kan ngaihthiam hna tikah kanmah le midang zong ṭhatnak an hmu. Crystal timi hmaikal unaunu pakhat zong cu bantuk hmuhtonnak a rak ngei. An Khrihfabu i unaunu pakhat nih a lung a rak fahter. Crystal nih hitin a ti: “A caan ah a chimmi bia nih namchunh bantukin a ka chunh. Amah he phu pakhat ah phungchim kalṭi hmanh kha ka duh lo. Cucaah phungchim rianṭuannak ah kaa zuamnak le kaa lawmhnak kha a hung tlau.” Crystal nih a thin a hunmi cu a ruang ṭha a um caah a si tiah a ruah. Asinain mah unaunu cungah a thin a hung zungzal lo asiloah amah intuarnak lawng kha biapi ah a rak chia peng lo. Zeicah? 1999, October 15, Vennak Innsang [Myanmar]  “Lungtak Tein Ngathiam Hna U” timi capar i ruahnak cheuhnak kha toidor tein a zulh caah a si. A hnuah mah unaunu kha a ngaihthiam. Crystal nih hitin a ti: “Atu cu kan dihlak in thlennak tuah awkah kan i zuam ti le Jehovah cu kanmah bawmh awkah nifatin timhcia a si ti kha ka hngalh cang. Ka lung zong a dam cang i nuamhnak zong ka hmu ṭhan cang.”

14. Matthai 18:21, 22 ningin lamkaltu Peter cu zei buaibainak dah ngeih dawh a rak si i Jesuh chimmi in zeidah na cawn khawh?

¹⁴ Midang ngaihthiam cu thilṭha tuah a si ti kha kan hngalh. Asinain cutin tuah cu kan caah a fawi men lai lo. Lamkaltu Peter zong a caan ah cu bantuk ruahnak a rak ngei men lai. (Matthai 18:21, 22 rel.) Zeinihdah aan bawmh khawh? Pakhatnak, Jehovah nih zeitlukin dah aan ngaihthiam timi kong kha ruat. (Matt. 18:32, 33) Ngaihthiam awkah kan i tlak lo nain Pathian nih lungtho tein a kan ngaihthiam. (Salm 103:8-10) Caankhat te ah “kannih zong pakhat le pakhat kan i dawt ve awk a si.” Cucaah ngaihthiam timi cu kan tuah hrimhrim dingmi thil a si. Kan unau pawl kha ngaihthiam hna awkah rian kan ngei. (1 Johan 4:11) Pahnihnak, kan ngaihthiam hna tikah zeidah a cang ti kha ruat. Kan cungah palhnak a tuahmi pakhat kha kan bawmh ahcun Khrihfabu ah lungrualnak a um lai. Cun Jehovah he kan i hawikomhnak kha kan kilven khawh lai i a cungah kan thinhunnak zong a tlau lai. (2 Kor. 2:7; Kol. 3:14) Pathumnak, midang ngaihthiam dingin a kan haltu Pathian sinah thlacam. Nangmah le unau pawl karah a ummi daihnak kha Satan nih a hrawh nakhnga nawl awnh hlah. (Efe. 4:26, 27) Satan rap kha kan hrial ahcun Jehovah nih kan herhmi bawmhnak kha a kan pek lai.

15. Kolose 3:13 ningin unau pawl tuahsernak ruangah kan thin a hun ahcun zeidah kan tuah khawh?

¹⁵ Asinain unau pakhat nih na lung aan fahter ah tah zeitin? Zeidah na tuah awk a si?  Daihnak ser awkah na tuah khawhmi paoh kha tuah. Cun Jehovah sinah lungtak tein thlacam. Jehovah sinah na thin aan huntertu kha a bawmh nakhnga le a ziaza ṭha pawl kha na hmuh khawh nakhnga bawmhnak hal. (Luka 6:28) Unau pakhat nih a rak tuahmi kong ah na ngaihthiam khawh lo ahcun amah he biaruah khawh ning lam kha kawl. Ka lungfahter awkah hramhram in aa zuammi a si lo tiah ruah cu a ṭha tukmi a si. (Matt. 5:23, 24; 1 Kor. 13:7) Amah he bia nan i ruah tikah a ṭhami tinhnak a ngei tiah ruat. Asinain daihnak ser a duh lo ah tah zeitin? “Lungsilonak nan i ngeih tikah” na unau cungah na lungdong hlah. (Kolose 3:13 rel.) A biapi bikmi cu mah nih Jehovah he nan i pehtlaihnak kha a hrawh khawh caah a cungah thinhung in um zungzal hlah. Zei thil hmanh i tlukrilhter hlah. Cutin na tuah ahcun zeidang vialte nakin Jehovah na dawt kha na langhtermi a si lai.—Salm 119:165.   

16. Kan dihlak in zei rian dah kan ngeih?

¹⁶ “Tuukhal pakhat” tangah “tuurun runkhat” in Jehovah rian lungrual tein ṭuan khawhnak tinvo sung kan hmuh caah kan i lawm tuk. (Johan 10:16) Jehovah Duhnak Tuah awkah Dirhnak timi [Myanmar] cauk cahmai 165 ah hitin a ti: “Mah lungrualnak in ṭhathnemhnak na hmuh caah mah kong kilven peng dingin rian na ngei.” Cucaah “Jehovah nih a hmuh hna bantukin unau pawl kha” kan hmuh ve hna a hau. Jehovah caah kan dihlak in a sunglawimi “ngakchia tete” kan si. Cucaah unau pawl kha zeitindah na hmuh hna awk a si? Jehovah nih anmah na bawmhmi hna le na zohkhenhmi hna kha a hmuh i a sunsak tuk.—Matt. 10:42.

17. Zei tuah dingin dah bia kan khiah awk a si?

¹⁷ Unau pawl kha kan dawt tuk hna. Cucaah “unau tlukrilhternak le sualnak chung i tlakternak ding caah zeihmanh tuah lo” dingin kan i zuam. (Rom 14:13) Cun kan unau pawl kha kanmah nakin a ṭha deuhmi in kan hmuh hna i lungthin tak tein ngaihthiam kan duh hna. Cun midang ruangah kanmahle kanmah zong kan i tlukrilhter awk a si lo. Mah canah “daihnak a chuahtertu thil le pakhat le pakhat thazaang i peknak a bawmtu thil” kha tuah dingin i thim hna u sih.—Rom 14:19.