1. Kuatkhat Peter 5:2 ning in Khrihfa upa pawl nih zei a biapimi rian dah an ṭuan awk a si?

 KHRIHFA upa pawl cu a sunglawimi Jehovah tuu pawl zohkhenh awkah zumhnak he rian pek an si. Mah zumhfekmi pa pawl nih unau pawl zohkhenh ding timi an rian kha an sunsak i “tuukhal” si awkah fakpi in rian an ṭuan. (Jer. 23:4; 1 Peter 5:2 rel.) Khrihfabu ah cu bantuk pa pawl kan ngeih hna caah zeitluk in dah lunglawmh awk a si.

2. Khrihfa upa cheukhat nih zei hneksaknak hna dah an ton khawh?

² An rian an ṭuannak ah Khrihfa upa pawl cu zuamcawhnak tampi an tong. Pakhat cu Khrihfabu zohkhenh awkah fakpi in rian an ṭuan a hau. United States ah Khrihfa upa a ṭuanmi Tony nih a cohlanmi rian a tam deuh tikah toidornak ngeih deuh ding in a rak cawn. Hitin a ti: “COVID-19 pulrai aa thawk ka ah pumhnak le phungchim rianṭuannak tlangtlak awkah fak deuh in kaa zuam. Asinain zeitluk in kaa zuam hmanh ah ṭuan dingmi cu tampi a um peng. A donghnak ah Baibal relnak, hlathlainak le thlacamnak caah a caan ka pe kho ti lo.” Kosovo i Khrihfa upa a simi Ilir zong a dang zuamcawhnak a tong ve. Raltuknak hmun a um lioah bupi sinin a rami lamhruainak kha zulh awkah aa harh. Hitin a ti: “Zung ṭengnge nih ṭih a nungmi hmun i unau pawl zohkhenh awkah rian an ka pek tikah ka ralṭhatnak cu hneksak a rak si. Ka ṭih tuk i mah lamhruainak cu zulh awkah aa tlak lomi a lo.” Asia ah missionary rian a ṭuanmi Tim cu nifatin a tuah awk a simi thil hna kha tuah dih awkah a rak i harh. Hitin a ti: “A caan ah lungthinlei le ruahnaklei in ka baa tuk.” Cu bantuk zuamcawhnak a tongmi Khrihfa upa pawl kha zeinihdah a bawmh khawh hna?

3. Kan dihlak in Biaceihtu Gideon kong ruahnak in zeitindah ṭhathnemnak kan hmuh khawh?

³ Khrihfa upa pawl nih Biaceihtu Gideon kong in an cawn khawh. (Heb. 6:12; 11:32) Anih cu Pathian miphun pawl a  kilvengtu le a khaltu a si. (Biac. 2:16; 1 Chan. 17:6) Gideon bantuk in Khrihfa upa pawl zong a har tukmi caan chung ah Pathian mi pawl zohkhenh ding in rian pek an si ve. (Lam. 20:28; 2 Tim. 3:1) Gideon sinin lungnemnak, toidornak le nawlngaihnak kha kan cawn khawh. A rian a ṭuan lioah inkhawhnak a ngeihmi kha hneksak a rak si. Khrihfa upa kan si zong, si lo zong ah kan Khrihfa upa pawl kan sunsak hnanak kha kan ṭhanchoter khawh. Rian fakpi in aa zuammi mah thlaraulei pa hna kha kan bawmh khawh hna.—Heb. 13:17.

4. Gideon nih lungnemnak le toidornak kha zeitindah a langhter?

⁴ Gideon cu a lung a nemmi le aa toidormi pa a si. b Jehovah vancungmi nih a ṭhawng tukmi Midian mi hna kut in Israel mi pawl khamh awkah thim na si tiah a chim lioah aa toidormi Gideon nih hitin a leh: “Ka phun cu Manasseh chung ah a der bik a si i kanmah innchungkhar chung ah keimah cu a hme bik ka si.” (Biac. 6:15) Gideon nih mah rian ṭuan awkah sining ka tlinh lo tiah a ruah ko nain Jehovah nih a tuah khawh lai ti kha a hngalh. Jehovah bawmhnak thawng in Gideon nih a rian kha hlawhtling tein a rak liim.

5. Khrihfa upa pawl i lungnemnak le toidornak cu zeitindah hneksak a si khawh?

⁵ Khrihfa upa pawl nih zei thil paoh ah lungnemnak le toidornak langhter awkah an si khawh chung in an i zuam. (Mik. 6:8; Lam. 20:18, 19) Cun an sining le an liimmi thil ruang ah an i porhlaw lo. Asinain a caan ah Khrihfa upa caah lungnemnak le toidornak langhter cu a har kho men. Tahchunhnak ah, rian tampi pek a simi kha a cohlan i a hnuah mah rian kha liim awkah aa harh kho men. Asiloah rian pakhat a ṭuan ning he aa tlaiin soiselnak a tong kho men asiloah a dang rian a ṭuan ning he aa tlaiin thangṭhatnak a tong kho men. Cu bantuk thil sining ah Khrihfa upa pawl nih Gideon sinin zeidah an cawn khawh?

6. Khrihfa upa pawl nih Gideon sinin lungnemnak kong zeidah an cawn khawh? (Hmanthlak zong zoh.)

⁶ Bawmhnak hal hna. A lung a nemmi nih cun ri a ngeihmi kha a hngalh. Gideon nih a lung a nemmi a si kha midang sinah  bawmhnak a hal hnanak thawng in a langhter. (Biac. 6:27, 35; 7:24) Fimnak a ngeimi Khrihfa upa pawl zong nih cutin an tuah ve. A hmasa ah langhtermi Tony nih hitin a ti: “Ka ngakchiat lio i cawnpiak ka si ning ruang ah ka tuah khawhmi leng in rian kha ka cohlan. Cucaah chungkhar pumhnak ah lungnemnak kong telh ding in bia ka khiah i ka nupi kha a ruahnak ka hal. Cun jw.org ah taarmi Jesuh i Zohchunh in Midang kha Cawnpiak Hna, Zum Hna, Nawlngeihnak Pe Hna timi video zong kha ka zoh ṭhan.” Tony nih a rian bawmh awkah midang kha bawmhnak a hal hna. A phichuak cu zeidah a si? Tony nih hitin a ti: “Khrihfabu zohkhenhnak rian kha ka ṭuan khawh i Jehovah he kan i pehtlaihnak fehter awkah a caan zong tam deuh ka ngei.”

7. Soisel an si ahcun Khrihfa upa pawl nih Gideon kha zeitindah an i zohchunh khawh? (Jeim 3:13)

⁷ Soisel na si ahcun nem tein lehrulh hna. Khrihfa upa pawl caah a dang zuamcawhnak an tonmi cu soiselnak a si. Gideon kong nih a bawmh khawh ṭhan hna. Gideon nih mitlinglo a si kha a hngalh caah Efraim mi pawl nih an soisel tikah nem tein a rak lehrulh hna. (Biac. 8:1-3) Gideon nih thinhung in a lehrulh hna lo. A lung a nemmi a si kha an chimmi bia ṭha tein a ngaihnak thawng in le nem tein a chawnhbiak hnanak thawng in a rak langhter. Mah nih an lung a daihter. Fimnak a ngeimi Khrihfa upa pawl nih soisel an si tikah nem tein an lehrulh i an bia ṭha tein an ngaihpiak hnanak thawng in Gideon kha an i zohchun. (Jeim 3:13 rel.) Mah nih Khrihfabu ah daihnak a umter.

8. Thangṭhat an si tikah Khrihfa upa pawl nih zeitindah an lehrulh awk a si? Tahchunhnak pe.

⁸ Jehovah kha thangṭhatnak dihlak pe. Midian mi pawl a tei hna ruang ah mi nih an thangṭhat tikah Gideon nih Jehovah kha lungthin a pek colh. (Biac. 8:22, 23) Rian pekmi unaupa hna nih Gideon kha zeitindah an i zohchunh khawh? An liimmi rian caah Jehovah kha an thangṭhat khawh. (1 Kor. 4:6, 7) Tahchunhnak ah, Khrihfa upa pakhat cu a cawnpiak ning he aa tlaiin thangṭhat a si ahcun cawnpiaknak hrampi a simi Baibal asiloah Jehovah bupi sinin a hmuhmi lamhruainak cung ah lungthin a pek khawh colh. A caan ah Khrihfa upa pawl nih anmah le anmah cung ah a hleihluat tuk in lungthin kan i pe maw, pe lo ti kha an ruah awk a si. Timothy timi Khrihfa upa hmuhtonnak kong kha ruathmanh. Khrihfa upa a ṭuan ka ah zapi ca phungchimnak pek kha a duh tuk. Hitin a ti: “A hnokmi bia hram thawknak le tahchunhnak hna chim kha ka duh tuk. Mah ruang ah mi nih an ka thangṭhat tawn. Asinain mah nih aa pummi kha Baibal asiloah Jehovah cung ah si loin keimah cungtu ah lungthin a pekter hna.” A hnuah Timothy nih midang nih a cung ah a hleihluat tuk in lungthin an pek nakhnga lo a phungchim ning thlen a hau ti kha a hun hngalh. (Ptb. 27:21) A phichuak cu zeidah a si? Hitin a ti: “Atu ahcun unau pawl nih na phungchimmi nih buaibainak tawnghtham awk, hneksaknak inkhawh awk asiloah Jehovah he i naih chin awkah a kan bawmh tiah an ka ti. Mah thangṭhatnak bia nih a hlan i an rak ka thangṭhatmi nakin a ka nuamhter deuh.”

9. Gideon nawlngaihnak le ralṭhatnak cu zeitindah hneksak a rak si? (A phaw hmanthlak zoh.)

⁹ Gideon cu biaceihtu in rianpek a si tikah a nawlngaihnak le a ralṭhatnak cu hneksak a rak si. A pa i Baal biakṭheng pawl hrawh awkah Jehovah nih ṭih a nungmi rian a rak pek. (Biac. 6:25, 26) A hnuah, ralkap pawl a khomh hna hnuah Pathian nih a ralkap pawl kha ṭhumh ṭhan ding in voihnih tiang a rak  fial. (Biac. 7:2-7) A donghnak ah, a ral pawl kha zan ṭim ah doh ding in a rak fial.—Biac. 7:9-11.

10. Khrihfa upa pawl i an nawlngaihnak cu zeitindah hneksak a si khawh?

¹⁰ Khrihfa upa pawl cu “nawlngaih awkah timhcia” tein an um awk a si. (Jeim 3:17, NW) Nawl a ngaimi Khrihfa upa cu Baibal chimmi le Pathian bupi sinin a rami lamhruainak kha zulh awkah timhcia tein a um. Midang caah zohchunhawk ṭha a chiah. Asinain a nawlngaihnak cu hneksak a si kho men. Tahchunhnak ah, lamhruainak tampi a hmuh men lai asiloah ruahlopi in thlennak a um kho men i mah kha zulh awkah aa harh kho men. Thil sining cheukhat ahcun mah lamhruainak cu zulh awkah aa tlak maw asiloah fimnak aa telmi a si taktak maw tiah a ruah khawh men. Asiloah a rian i dinh ding hmanh in a ruah khawh men. Cu bantuk thil sining ah Khrihfa upa pawl nih Gideon nawlngaihnak kha zeitindah an i zohchunh khawh?

11. Khrihfa upa pawl kha nawlngaih awkah zeinihdah a bawmh khawh hna?

¹¹ Lamhruainak kha ṭha tein ngai law mah ning in zul. Pathian nih Gideon kha a pa biakṭheng zeitindah hrawh ding, Jehovah caah biakṭheng thar khoika ah dah sak ding ti le zei bantuk saram dah raithawi ding ti kha a chimh. Gideon nih mah lamhruainak he aa tlaiin biahalnak a tuah lo i Jehovah chimmi ning in a tuah colh. Tuchan zong ah Khrihfa upa pawl nih Jehovah bupi sinin cakuat, thawngthanhnak, thlaraulei le pumsalei he aa tlaiin bawmtu a simi lamhruainak hna kha an hmuh. Bupi lamhruainak zumhfek tein an zulh caah Khrihfa upa pawl kha kan dawt tuk hna. Khrihfabu dihlak zong ah ṭhathnemhnak a um.—Salm 119:112.

12. Bupi lamhruainak aa thlen ahcun Khrihfa upa pawl nih Hebru 13:17 kha zeitindah an zulh khawh?

¹² Thlen duhnak lungput ngei. Jehovah nih Gideon kha a ralkap pawl zatuak ah 99 leng ṭhumh ding in a rak fialmi kha i cinken. (Biac. 7:8) Mah tikah Gideon nih hitin a ruah khawh men: ‘Mah thlennak cu a herh taktak maw? Mah cu a tlam a tling lai maw?’ Asinain Gideon nih Pathian nawl kha a ngaih. Tuchan Khrihfa upa pawl zong nih bupi lamhruainak aa thlen tikah mah ning in an zulhnak thawng in Gideon kha an i zohchunh. (Hebru 13:17 rel.) Tahchunhnak ah, 2014 ah Uktu Bu nih Biakinn le Civui tuahnak innsaknak caah tangka hman ning he aa tlaiin thlennak an tuah. (2 Kor. 8:12-14) Khrihfabu nih an cawimi tangka kha cham ṭhan a hau ti lo. A hlan ahcun bupi nih biakinn saknak caah Khrihfabu kha tangka an cawih hna i Khrihfabu nih an cham ṭhan hna. Asinain atu ahcun bupi nih thawhlawm tlawmpal lawng a ngeimi Khrihfabu an si hmanh ah, a herhnak hmun poah ah Biakinn le Civui tuahnak innsak awkah vawleicung pumpi Khrihfabu sinin an hmuhmi thawhlawm kha an hman. José nih mah thlennak kong a theih tikah a tlam a tling hnga maw  tiah lunghrinnak a ngei i hitin a ruah: ‘Biakinn pakhat hmanh sak a si rih lo. Cucaah vawleicung pumpi ah zeitindah cutin sak a si khawh lai?’ Mah lamhruainak zulh awkah José kha zeinihdah a bawmh? Hitin a ti: “Phungthlukbia 3:5, 6 nih Jehovah kha i bochan awkah a ka hngalhter ṭhan. A phichuak cu khuaruahhar taktak a si. Biakinn tampi kan sak khawh lawng si loin hmun kip ah aa ruan dih nakhnga lam a phunphun in thawhlawm kan pek khawh ti zong kan hngalh.”

13. (a) Gideon nih zeidah a zumh? (b) Khrihfa upa pawl nih Gideon kha zeitindah an i zohchunh khawh? (Hmanthlak zong zoh.)

¹³ Jehovah duhnak kha ralṭha tein tuah. Gideon nih ṭih a nungmi rian pek a si tikah ṭihnak a rak ngei kho men, asinain Jehovah nawl kha a ngaih. (Biac. 9:17) Gideon nih Jehovah sinin biakamnak a hmuh hnuah Pathian miphun a kilven hnanak ah Pathian nih a ka bawmh lai ti kha a zumh. Kan rianṭuannak khenkhamnak hmun ah a ummi Khrihfa upa pawl nih Gideon kha an i zohchunh. Thongthlaknak, kherhhlainak, rian sunghnak asiloah zaangennak lakah pumhnak le phungchim rianṭuannak kha ralṭha tein lam an hruai. c Harnak nganpi chung ah Khrihfa upa pawl nih zulh awkah ṭih a nungmi a si hmanh ah an hmuhmi lamhruainak poah kha zulh awkah ralṭhatnak an ngeih a hau lai. Mah lamhruainak cu rial ngan pipi in langhtermi thawngpang thanhnak le Magog ram i Gog dohnak in luatnak he aa pehtlaimi a si kho men.—Ezek. 38:18; Biat. 16:21.

14. Gideon inkhawhnak cu zeitindah hneksak a rak si?

¹⁴ Gideon cu biaceihtu pakhat in fakpi in rian aa zuammi a si. Zan ṭim ah Midian mi pawl raltuknak in an zam tikah Gideon nih thingkung tampi a umnak hmun a si kho menmi Jezreel Nelrawn in Jordan Tiva tiang a dawi hna. (Biac. 7:22) Gideon cu Jordan ah aa din maw? Aa din lo! A baa tuk ko nain a mi 300 he Jordan tiva kha tan in an rak dawi  peng hna. A donghnak ah Midian mi pawl kha an phanh hna i an rak tei hna.—Biac. 8:4-12.

15. Khrihfa upa pawl i an inkhawhnak cu zeitik ah dah hneksak a si khawh men?

¹⁵ Khrihfa upa pawl cu a caan ah Khrihfabu le an chungkhar pawl an zohkhenh hnannak ah pumsalei, lungthinlei le ruahnaklei in an tha a baa tuk kho men. Cu bantuk thil sining ah Khrihfa upa pawl nih Gideon kha zeitindah an i zohchunh khawh?

16-17. Gideon kha inkhawhnak ngeih awkah zeinihdah a bawmh, Khrihfa upa pawl nih zeidah an zumh khawh? (Isaiah 40:28-31) (Hmanthlak zong zoh.)

¹⁶ Jehovah nih thazaang aan pek lai ti kha zum. Gideon nih Jehovah nih thazaang a ka pek lai ti kha a zumh i a lung a dong lo. (Biac. 6:14, 34) Voikhat cu Gideon le a mi pawl nih kalauk in a zammi Midian siangpahrang pahnih kha an ke in an dawi hna. (Biac. 8:12, 21) Asinain Pathian bawmhnak thawng in an phanh hna i an rak tei hna. Khrihfa upa pawl nih ‘zeitikhmanh ah a baa bal lo i a thazaang a tlawm bal lomi’ Jehovah kha an i bochan khawh. Jehovah nih an herh tikah thazaang a pek hna lai.—Isaiah 40:28-31 rel.

¹⁷ Siizung Pehtlaihnak Kawmiṭi chungtel a simi Matthew hmuhtonnak kong kha ruathmanh. Inkhawhnak ngeih awkah zeinihdah a bawmh? Matthew nih hitin a ti: “Filipi 4:13 chung i Jehovah bia in thazaang ka hmu. Ka tha a bat tuk caan le ka rian ka peh kho ti lai lo tiah ka ruah caan ah thla fakpi in ka cam i ka unau pawl ka bawmh khawh hna nakhnga a herhmi pumsalei le lungthinlei thazaang ka pe tiah Jehovah sinah thla ka cam. Cu bantuk caan ah Jehovah thlarau nih inkhawhnak ngeih awkah a ka bawmh tiah ka ruah.” Gideon bantuk in Khrihfa upa pawl zong a har caan hmanh ah Jehovah miphun zohkhenh awkah fakpi in rian an ṭuan. Pumsalei le lungthinlei ah ri kan ngei ti kha an hngalh a hau i mah ri an ngeihmi ning zong in an tuah a hau. Asinain Jehovah nih bawmhnak an halmi kha a theih lai i inkhawhnak ngeih awkah thazaang a pek hna lai ti kha an zumh khawh.—Salm 116:1; Fil. 2:13.

18. Kan i ruah cang bantuk in Khrihfa upa pawl nih Gideon kha zeitindah an i zohchunh khawh?

¹⁸ Khrihfa upa pawl nih Gideon kong in tampi an cawn khawh. Rian zeizat dah kan cohlan lai timi kong ah siseh, an ṭuanmi rian he aa tlaiin midang nih an soisel hna asiloah an thangṭhat hna tik zong ah siseh toidornak an langhter a hau. A hleiin hi vawlei donghnak caan a naih chin cang caah Khrihfa upa pawl nih nawlngaihnak le ralṭhatnak an langhter a hau. Zei bantuk dawnkhantu thil an ton hmanh ah Pathian nih thazaang a kan pek khawh ti kha an zumh a hau. Cu bantuk rian aa zuammi tuukhal pawl kha kan sunsak hna i ‘mah bantuk mi kha kan hmaizah hna.’—Fil. 2:29.