1. Salm 15:1-5 i ruahnak in zeicah ṭhathnemhnak kan hmuh khawh?

 A HMASA capar ah Jehovah sinah a pum aa pemi hna le amah he a ṭhami pehtlaihnak a ngeimi hna cu langhternak a thlam chung ah khual an si kho timi kong kan theih cang hna. Asinain a khual si awkah zeidah kan tuah a hau? Salm 15 ah mah kong kha tampi a langhter. (Salm 15:1-5 rel.) Mah ah Pathian hawi si awkah kan tuah awk a simi kong kha a langhter.

2. Salm caṭialtu David nih Jehovah thlam kong a chim lioah zei kong dah a ruah khawh men?

² Salm 15 cu mah biahalnak in aa thawk: “BAWIPA, na biakinn chung ah ahodah a um lai? Na tlang thiang Zion cung ah ahodah a um lai?” (Salm 15:1) Salm caṭialtu David nih Jehovah “biakinn, [thlam, NWT]” kong a chim lioah mah chan lio i Gibeon khua ah a ummi puan biakinn kong kha a ruahmi a si kho men. Pathian “tlang thiang” tiah a timi zong nih Jerusalem khua i Zion Tlang kong a ruahmi a si kho men. Jerusalem cu Gibeon in thlanglei meng tlawmpal aa hlatnak ah a um. David nih thlam kha a bunh i biakinn sak dih a si hlan tiang biakamnak kuang kha thlam chung ah a chiah.—2 Sam. 6:17.

3. Salm 15 kha zeicah hngalh kan duh awk a si? (Hmanthlak zong zoh.)

³ Israel mi tam deuh cu biakinn ah rianṭuannak nawl an ngei lo i mi tlawmte lawng biakamnak kuang an chiahnak thlam chung ah an lut bal. Asinain zumhfekmi Jehovah salle dihlak cu Jehovah hawikom an hung sinak le an si pengnak thawng in langhternak a thlam chung ah khual an si kho. Mah cu kan  dihlak in kan duhmi a si. Salm 15 ah Jehovah hawikom si peng awkah zeidah kan tuah a hau timi kong kha a langhter.

Palhnak Tuah Kha Hrial Law A Hmaanmi Thil Kha Tuah

4. Jehovah nih tipil innak lawng a kan halmi a si lo ti kha zeitindah kan hngalh khawh? (Isaiah 48:1)

⁴ Salm 15:2, NWT ah Pathian hawi pakhat cu “Palhnak tuah kha a hrial i a hmaanmi thil a tuahmi” in a langhter. Mah cu kan tuah peng a haumi thil kha a chim duhmi a si. Asinain ‘palhnak tuah kha kan hrial’ kho taktak lai maw? Kan hrial khawh ko. Mitling lo kan si ko nain kan si khawh chung in a nawl kan zulh ahcun Jehovah nih ‘palhnak tuah a hrialmi’ in a kan hmuh lai. Pathian sinah kan pum kan i pek i tipil kan inmi cu a hramthawknak lawng a si rih. Tahchunhnak ah, Baibal chan lioah mi pakhat cu Israel mi a sinak men in Jehovah khual a si tinak a si lo. Mi cheukhat nih Pathian sinah thla an cam ko nain ‘an chimmi cu pakhat hmanh a sullam an ruahmi a si lo.’ (Isaiah 48:1 rel.) Cucaah Israel mi hna nih Jehovah khual si an duh taktak kha langhter an duh ahcun Pathian nih a halmi hna kong kha an cawn a hau i mah ning in an zulh a hau. Cu bantuk in tuchan zong ah Jehovah hawikom si kan duh ahcun tipil innak le Jehovah Tehte pakhat sinak men in a za lo. ‘A hmaanmi thil tuah zungzal’ a hau. Cutin zeitindah kan tuah khawh?

5. Zei thil paoh ah Jehovah nawlngaih timi ah zeidah aa tel?

⁵ Jehovah hmuhnak ah ‘palhnak tuah lo’ le ‘a hmaanmi thil tuah’ timi cu Biakinn ah hmaan tein i pumhnak lawng in a za lo. (1 Sam. 15:22) Kanmah lawng kan um tik caan i tel in zei thil kan tuah hmanh ah Pathian nawlngaih awkah kan i zuam a hau. (Ptb. 3:6; Pct. 12:13, 14) A biapi tuk lomi thil  a lawh hmanh ah Jehovah nawlngaih awkah i zuam cu a biapimi a si. Cutin kan tuahmi cu amah kan dawt taktak ti kan langhtermi a si i mah nih Pathian kha kanmah dawt chinchin awkah a forh lai.—Johan 14:23; 1 Johan 5:3.

6. Hebru 6:10-12 ning in hlanlio i kan rak tuahmi thil ṭha nakin zeidah a biapi deuh?

⁶ Jehovah nih a caah kan rak tuahpiakmi kha a sunsak tuk. Asinain a hlan i kan rak tuahmi thil ṭha ruang men ah Jehovah thlam ah khual kan si peng lai tinak cu a si lo. Mah kha Hebru 6:10-12 ah kan hmuh khawh. (Rel.) Jehovah nih hlan ah kan rak tuahmi thil ṭha kha a philh lo. Asinain “a dongh tiang” kan lunghtin dihlak in ka bia hna seh ti a duh. “Kan ngol lo ahcun” a hawi kan si kho zungzal lai.—Gal. 6:9.

Bia Hmaan Le Biatak Kha Chim

7. Bia hmaan le biatak chim timi ah zeidah aa tel?

⁷ Jehovah thlam ah khual si a duhmi pakhat nih cun “bia hmaan le biatak” a chim a hau. (Salm 15:2) Mah cu lihbia chim lo lawng kha a si lo. Jehovah nih kan chimmi le kan tuahmi paoh a hmaanmi si seh ti a duh. (Heb. 13:18) “Mi lungthin ṭhalo cu BAWIPA caah fihnung an si i miding mi cu Pathian nih a zumhmi an si” timi hi a biapimi a si.—Ptb. 3:32.

8. Zeibantuk ziaza dah kan hrial a hau?

⁸ ‘Bia hmaan le biatak a chimmi’ hna nih cun mi hmuhnak ah Pathian nawl an ngaih i anmah lawng an um tik zong ah thil ṭha lo an tuah lo. (Isa. 29:13) Dingfel tein an um. A dingfel lomi nih cun Jehovah nawlbia cu a ṭha bikmi a si zungzal hnga maw timi ruahnak a hun ngei. (Jeim 1:5-8) A caah a biapi tuk lomi thil a lawh ahcun Jehovah nawl a ngai ti lo. Cun nawl a ngaih lo ruang ah thil ṭha lo zei hmanh a ton lomi a lawh ahcun mah nakin a ṭha lo deuhmi thil kha a hun tuah men lai. Pathian ka biak tiah a ruah ko nain Jehovah nih a biaknak kha a cohlang lai lo. (Pct. 8:11) Asinain kannih cu zei thil paoh ah a dingfelmi si kan duh.

9. Jesuh le Nathanael an i ton hmasa bik lio kong in zeidah kan hngalh khawh? (Hmanthlak zong zoh.)

⁹ Bia hmaan le biatak chim a biapitnak kong kha Jesuh le Nathanael an i ton hmasa bik lio  kong in kan hngalh khawh. Filip nih Jesuh ton ding in a hawikom Nathanael a ratpi lioah cinken awk tlak thil cheukhat a rak cang. Jesuh nih Nathanael kha a hmu bal lo nain hitin a ti: “Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si.” (Johan 1:47) Jesuh nih a dang zultu pawl zong a dingfelmi an si ti kha a hngalh. Asinain Nathanael cu a hleiin a dingfelmi a si. Kanmah bantuk in anih zong mitling lo a si ko nain titer a hmang lo i zei thil paoh ah a dingfelmi a si. Mah kha Jesuh nih a duh i cucaah Nathanael kha a thangṭhat. Kannih zong Jesuh nih cutin kan ruat ve seh ti kan duh lai ti cu a fiang ko.

10. Zeicah mi congoih kha kan hrial awk a si? (Jeim 1:26)

¹⁰ Salm 15 ah langhtermi a herhmi thil kong tam deuh cu midang zeitindah kan pehtlaih hna timi kong he aa pehtlaimi a si. Salm 15:3 ah Jehovah thlam ah khual a si dingmi cu “mi congoih a hmang lo i a hawikom cung ah ṭhatlonak a tuah lo i a innpa kong ah bia a vahpi lo” tiah a ti. Midang kha kan congoih hna ahcun mah nih harnak a pek khawh hna i Jehovah thlam ah khual kan si kho ti lai lo.—Jeim 1:26 rel.

11. Mi congoih timi cu zeidah a si? I ngaihchih duh loin mi congoih a hmangmi hna cu zeitindah tuah an si lai?

¹¹ Salm caṭialtu pa nih mi congoihnak kong kha a hleiin a langhter. Mi congoih timi cu zeidah a si? A huap in chim ahcun mi pakhat a min a chiatter khomi a hmaan loin bia chim kha a si. I ngaihchih duh loin mi congoih a hmangmi hna cu Khrihfabu in chuah an si lai.—Jer. 17:10.

12-13. Zei bantuk thil sining hna ah dah ruahlopi in bia kan vahpinak thawng in palhnak a tuahmi kan si khawh? (Hmanthlak zong zoh.)

¹² Salm 15:3 ah Jehovah khual pawl nih cun a hawikom cung ah ṭhatlonak a tuah lo i a innpa kong ah bia a vahpi lo ti zong in a ti. Mah ah zeidah aa tel kho?

¹³ A kong he aa tlaiin a hmaan lomi  thawngpang kan karhternak thawng in mi pakhat kong kha ruahlopi in bia kan vahpi khawh. Tahchunhnak ah: (1) unaunu pakhat cu caantling rian in aa din, (2) nuva tuahkhat cu Bethel ah rian an ṭuan ti lo asiloah (3) unaupa pakhat cu Khrihfa upa asiloah bu rianṭuantu a si ti lo. Mah unau hna nih sualnak an tuah caah cutin an sining aa thlenmi a si tiah midang sinah chim cu aa tlak lai maw? Kan hngalh lomi a kong hna tampi a um kho men. Mah leng ah Jehovah thlam ah khual a simi nih cun “a hawikom cung ah ṭhatlonak a tuah lo i a innpa kong ah bia a vahpi lo.”

Jehovah A Ṭihmi Kha Upat Hna

14. Jehovah khual pawl nih ‘Pathian nih a hlawtmi kha zei rel loin a ummi’ pawl zeitindah an hrial khawh hna ti kha fianter.

¹⁴ Salm 15:4 ah Jehovah hawi pakhat nih cun “Pathian nih a hlawtmi kha zei rel loin a um” tiah a ti. Kannih tah cutin zeitindah kan tuah khawh? Mitlinglo kan si caah ahodah Pathian zei ah a rel lomi an si ti kha kan hngal kho hna lo. Zeicah? Komh a fawi tiah kan ruahmi hna cu komh kan duh hna nain kan thin a kan huntermi hna cu komh kan duh hna lo caah a si. Cucaah Jehovah nih ‘zei rel loin a ummi’ hna lawng kha kan hrial hna awk a si. (1 Kor. 5:11) Mah ah ṭhatlonak a tuah i aa ngaichih lomi hna, kan zumhnak a upat lomi hna le thlaraulei ah kan thazaang a dertermi hna an i tel.—Ptb. 13:20.

15. “Jehovah a ṭihmi hna” kan upat khawh hnanak lamkhat cu zeidah a si?

¹⁵ Salm 15:4, NWT ah “Jehovah a ṭihmi hna” kha upat hna awkah a kan hal. Cucaah Jehovah hawile cung ah zaangfahnak le upatnak langhter khawh ning lam kan kawl. (Rom 12:10) Zeitindah? Salm 15:4 cung ah i hngat in cutin kan tuah khawh ning lamkhat cu Jehovah thlam ah khual a simi nih cun ‘zeitluk in a har hmanh ah a biakam ning in a tuah zungzalnak’ thawng in a si. Kan biakam kan let ahcun midang kha harnak kan pek khawh hna. (Matt. 5:37) Tahchunhnak ah, Jehovah nih ṭhitum biakamnak kha nuva hna nih fehter hna seh ti a duh. Cun nulepa nih an fale kha bia an kamh hna ahcun an biakam ning in tuah hna seh ti zong a duh. Pathian le kan minung hawi kha kan dawt hna caah kan si khawh chung in kan biakam ning in tuah awkah kan i zuam.

16. Jehovah hawile kan upat khawh hnanak a dang lamkhat cu zeidah a si?

¹⁶ Pathian hawile kan upat khawh hnanak a dang lamkhat cu khual dawtnak le siannak kan langhternak thawng in a si. (Rom 12:13) Pumhnak le phungchim rianṭuannak ah unau pawl he caan hmanṭinak nih anmah he Jehovah he a kan naihter chin. Mah leng ah khual dawtnak kan langhtermi cu Jehovah kan i zohchunhmi a si.

Tangka Kha Duh Tuk Hlah

17. Salm 15 ah zeicah tangka kong a chim?

¹⁷ Jehovah khual pawl cu “a karh la loin mi tangka a cawih i a sual lomi hna sual phawt awkah ziknawh pek khawh lomi cu an si” tiah a ti. (Salm 15:5) Mah salm ah zeicah tangka kong kha a chim? Tangka kong ah a tlarimi hmuhnak kan ngeih lo ahcun midang kha harnak kan pek khawh hna i Pathian he kan i hawikomhnak zong a rawh khawh caah a si. (1 Tim. 6:10) Baibal chan lioah mi cheukhat nih a si a fakmi an unau pawl sinin ningcang loin tangka a karh an rak lak hna. Baiceihtu cheukhat cu ziknawh an ei i sualnak a ngei lomi hna kha a ding loin bia an ceih hna. Cu bantuk tuahsernak hna kha Jehovah nih a huat tuk.—Ezek. 22:12.

18. Tangka kong he aa tlaiin kan lungput i dothlat awkah zei biahalnak hna dah kan i hal khawh? (Hebru 13:5)

 ¹⁸ Tangka kong he aa tlaiin kan lungput i dothlat cu a ṭhami a si. Hitin i hal: ‘Tangka kong le mah in zeidah ka cawk khawh timi kong lawngte ka ruat maw? Tangka ka cawi tikah a ka cawihtu nih mah tangka kha a herh lo tiah ruat in cham ṭhan awkah a caan saupi ka la maw? Tangka ngeihnak nih midang nakin ka ṭha deuh timi ruahnak a ka ngeihter maw? Midang cung ah siannak langhter tah kaa harh maw? Tangka tampi a ngeimi unau pawl kha Jehovah nakin tangka a duh deuhmi an si tiah ka ruat hna maw? Mirum pawl lawng komh hna in misifak pawl kha komh duh hna loin ka um maw?’ Jehovah nih a khual in a kan sawm caah cutin bia i hal cu a biapimi a si. Asinain tangka kan duh tuk lo lawng ah Jehovah khual kan si kho peng lai. Cutin kan tuah ahcun Jehovah nih zeitik hmanh ah a kan kaltak lai lo.—Hebru 13:5 rel.

Jehovah Nih A Hawile Kha A Dawt Hna

19. Salm 15 ah langhtermi thil dihlak kha Jehovah nih zeicah tuahter a kan duh?

¹⁹ Salm 15 cu mah biakam in a dong: “Hi thil a tuahmi hna cu an sung bal lai lo.” (Salm 15:5) Salm caṭialtupa nih Jehovah nih mah thil vialte tuahter a kan duhnak kong kha a fianter. Jehovah nih i nuam hna seh ti a kan duh. Cucaah Pathian nih thluachuah le huhphenhnak a kan pemi lamhruainak kha a kan pek.—Isa. 48:17.

20. Jehovah khual pawl nih zeidah hmuh lai an i ngaih?

²⁰ Jehovah khual pawl cu a ṭha tukmi hmailei ruahchannak an ngei. Zumhfekmi chiti thuhmi hna cu vancung ah Jesuh nih a timhpiakmi hna “khaan tampi” chung ah umnak nawl an ngei lai. (Johan 14:2) Vawlei ruahchannak a ngeimi hna nih Biathlam 21:3 i biakamnak hna kha hmuh lai an i ruahchan. Jehovah nih a thlam ah khual si zungzal ding in a kan sawmmi cu tinvo sung taktak a si.